Россиянь ламо-ламо велетнесэ тешкстызь валдо кенярксчинть – Иневанькс Троицянть. Истя ульнесь Орданьбуень Колазелесэяк. Тей сакшность тесэ чачозтне, конат эрить масторонь келес. Кие сась малавиксэнзэ туртов инжекс, кие – молемс калмолангов. Вана уш зярыя иень перть Троицясто Колазелесэ тейнить покш кенярксчи. Сонзэ лездыть ютавтомс ломантне, кинь седеест пии-палы тиринь веленть кисэ.
Минь пачколинек те велентень, косо зярс вестькак эзинек ульне. Паро мельсэ вастымизь Колазелень велень поселениянь культурасо важодицятне, конат теить вейсэнь тевть.
– Троицянть ломантне пек вечксызь ды учить. Вана тедедеяк сакшность тенек ламо инжеть. Од ломантне мазылгавтызь клубонть вакссо тарканть. Клубось – школасонок. Ютавтынек «Седяк, гармония» кенярксчи. Кочкурбуестэ сакшность гармониясо седицятне Владимир Завьялов ды Николай Старкин. Сынст лемест содавикст, цератнень невтекшнизь Андрей Малаховонь передачасо. Истя парсте седясть, истя лембестэ сынст вастызь ваныцятне! Сюкпря тенст! Баянсо седясь Орданьбуень церынесь Матвей Китайкин, сонзэ авазо минек велень. Саранскойстэ сакшнось «Юность» кавер-группась, морасть сазоркатне Оксана ды Олеся Зайцеватне, ульнесть артистт Тургеневань Культурань кудосто. Малав 30 номерт невтезельть. Чокшне ютась дискотека, конасонть гайгсть 90-це иетнень содавикс моротне. Весе веленть пельде сюкпря евтатано лездыцянок туртов: «Лидер-компаунд» акционерной вейсэндявксонь генеральной прявтонтень А.В. Бузлаевнень, А.Ф. Наумовнень (эри Сарапулсо) ды лиятненень. Свал максыть лезкс кенярксчинь ютавтомасо, – евтнесь Колазелень Культурань кудонь прявтось ды библиотекаресь Надежда Ивановна Моисеева.
Мелят Колазелесэ школанть пекстызь. Эйкакштнень кармасть усксеме Низовкав. Колазелень клубось, библиотекась, почтась ды ФАП-сь ютасть школань зданиянь васенце этажов. Тесэ седе паро роботамс: валдо, лембе, нупальтне покшт, ули, косо ютавтомс вастовомат ды кенярксчить. Школань пекстамось – покш ризкс весень туртов, ансяк мезеяк а теят, бути пек аламо эйкакштнеде.
Надежда Ивановна чачсь теке велесэнть. Школадо мейле прядызе Ицялонь педучилищанть. 1985 иестэ сась роботамо Колазелень школав начальной классонь тонавтыцякс. Моликсэль тонавтнеме седе тов ды чачсь эйдезэ, савсь кадомс те меленть. 27 иеть сон тонавтсь сехте вишкинетнень. Пек вечкилизе школанть, эйкакштнень, педколлективенть. Нолдась ламо класст. Валонзо коряс, ульнесь содамочинь вешиця тонавтыцякс. Сонськак макссь кеме содамочить, тонавтсь тевде а пелеме. Ды тень кисэ те шкас евтыть сюкпря икелень тонавтницязо. Сон кармавтсь а ваномс стакачитнень лангс, мездеяк апак пеле молемс ансяк икелев. Нейгак важоди истямо мель марто: весементь теемс парсте, аволь мельде-валдо.
Кода ледстни авась, зярдо тусь школасто, васенце шкастонть пек ризнэсь. Школанть вакска ютыль талнозь ды янксезь. Шкань ютазь сонзэ тердизь роботамо клубонь прявтокс. Те тевденть эзь тандадо. Тонавтыцякс улемстэ, свал лисниль сцена лангс, ветясь эрьва кодат покш чить. Морсесь «Чудикерькс» фольклорной ансамблясо.
– Те ансамблясь пурназель 1985 иестэ. Улить пек мазый костюмонок. Эрьва косо морсинек, ардтнинек «Шумбрат, Мордовия!» фестивалев ды покш кенярксчис Чувашиявгак. Сисем ават морсилинек. Ветицянок ульнесь Т.Н. Родионова. Мастясто свал моро марто ардтнинек лишмесэ. Натой масторонь Президентэнть В.В. Путинэнь вастомояк якинек Саранскоев. Мейле аламодо срадынек. Кие кулось, кие сырекадсь, кие тусь ошов эрямо. Мелят вана, Авань чистэ, ветенек пурнавинек одс. Школасо невтинек паро концерт. Кеман, ансамблянок вельми одс, – евтни Надежда Ивановна.
Колазеленть вакссо аштить Мадышкась, Лувнесь, Канаклейкась, Суродеевкась ды лия велетне. Истя ладявсь, сынь кармасть ютавтомо культурань вейсэнь покш чить. Культурань важодицятне панжсть теке мерят методической вейсэндявкс. Вастовить, арсить, мезе эряви ютавтомс ды косо, те велесэнть эли тонасонть. Тевесь лиси седе мельстуицякс ды сакшныть ламо ломанть. Истямо ладсо важодить зярыя иень перть, эсь ютковаст эрить паро ялгаксчисэ. Эряви меремс, лия таркасо истямо а вастат. Ней анокстыть кизна ютавтомс Колазелесэ «Есть в травах и цветах целительная сила» вастовома.
Культурасо важодицятненень савкшны марямс эсест ланга эрьва кодат валт. Ансяк кияк а чарькоди, кода аволь шожда пурнамс ды ютавтомс велень кенярксчитнень. Чарькодеви, эрьва чи а кармат киштеме-морамо сцена лангсо. Теке марто, сынст сеедьстэ тердтнить райононь покш читнес, косо эрявить невтемс эрзянь раськень койтнень, оршамопельтнень, ярсамопельтнень. Гайневтить ды мерить тенст: «Куроксто садо! Тынтеменк а кода!». Неть валтнэ максыть селмот. Велень аватне панить прякат, каймакт, сюкорот, пачалксеть, кши – ды сыргить килангов. Райононь чи, Эрзянь келень чи, Библиове, Библиотекарень чи эли жо покш инжень вастома. Эрьва веленть эсензэ коензэ ды тантей каванямонзо. Колазелень аватне мельспаросо невтить эсест культурань сюпавчист. Меельце иетнестэ эрзянь койтне кармасть вешевикст ды вечкевикст эрьва косо.
Надежда Ивановна важоди клубсо уш 13 иеть. Тевесь тонадовсь ды пек вечкевсь. Свал ломань ютксо. Сыре ломанень ковсто ды Изнямонь чиденть икеле якси сыретненень казне марто. Тесэ тагояк максыть лезкс спонсортнэ. Авась кирди кеме сюлмот «Маяк» райононь газетанть марто. Бути ули кодамояк паро куля – свал пачти, евтни, сермады. Пельксты яволявтозь конкурстнэсэ. Парсте важодеманзо кисэ тедеде казевсь МР-нь Правительствань Благодарностьсэ.
Мадышкасо ильтизь тундонть
Мадышка-2 велесэ клубонь прявтокс важоди Людмила Степановна Батылова. Сон прядызе Саранскоень культпросветучилищанть ды уш 34 иеть алты культурантень.
– Мадышкасо те шкас ули «Ведьбайгине» фольклорной ансамблянок, те – минек каштанчинек. Морсетяно ветенек. Эрзянь оршамопельтнень стынек минсь, видьстэ меремс, ламо стась Нина Михайловна Годяева. Кизэнь лембе шкантень веенст палянок, шождат, якшамонень – кувака ожа марто ды жилетка. Якатано эрьва иестэ морамо «Шумбрат, Мордовия!» фестивалев, эсенек велень покш читнестэ невттяно концертт. Монсь эште ардтнян морамо райононь Культурань кудонть пингстэ панжозь «Сюлгамо» фольклорной ансамбляв, тосо морсить эрзянь велетнестэ культурасо важодиця аватне. Мадышкав сакшность телевидениясто ды снимимизь передачас. Ютазь недлячистэ наряжинек, ильтинек тундонть, вастынек кизэнть. Сэдь лангсто ведьс ваявтынек килей. Кода тейнесть аванок-сырькаенек, истя поладтано миньгак, – пачтясь Людмила Степановна.
Зярс эрить эрзянь велетне, тосо ванстыть минек келенть, койтнень, культуранть. Мезеяк лангс апак вано, теить тевест, пурныть ломантнень, ютавтыть велень кенярксчитнень. Лиясто, эрси, новолить кедест, арсить кадомс весементь ды туемс. Ансяк ванды сы лия чи, кази валдо, канды лия ежо. Эли гайневтить костояк, мерить, садо, учотано, ды таго вельми парос кемемась!
Татьяна Маторкина
Фототне Егор Горинэнь