Россиянь Президентэнть Владимир Владимирович Путинэнь мереманзо коряс 2024 иесь минек масторсо яволявтозь Кудораськень иекс. Семиянь питнейчитнень ванстомантень минек свал явовсь покштояк покш мель. Тезэнь кандовить вечкемась, вейке-вейкенень кемемась, чарькодемась ды лездамось. Неть питнейчитне аштить кеме ды уцяскав семиянь юрокс. Кеме семиясь – те минек обществанть виевчинь прявт ёнкс.
Кудораськень иенть панжомсто Россиянь Президентэсь тешкстызе: «Кеме семиясь – эрямосонть прявт сюпавчи, конась ашти вечкемань, ёрокчинь, чарькодемань, вейке-вейкенень кемемань юрокс, сон свал ульнесь ды кадови государствань ды обществань нежекс. Самай семиясо ломанесь тонавтни пертьпельксэнть, совавты седейс эсь раськень духовно-нравственной койтнень-кирдатнень, тонавтови Тиринь масторонтень ды эсь малавикстнэнень вечкемантень». Ды неть аравтлувтне масторсонть свал ульнесть прявт таркасо.
Минек республикасо семиятненень свал явовсь башка мель. Тень коряс Мордовиясо те иесь юты аволь ансяк Кудораськень иень тешксэнть ало, 2024 иесь минек кемекстазь Важодемань династиятнень иекс. Ды истят династиятнеде республикасонть пек ламо. Важодемань кодамо ёнксонть иляк сае, эрьвасонть улить семиянек роботыцят.
Течи минь тынк содавттадызь вейке истямо семиянь династиянть марто, косо эйкакш марто важодемантень казсть зярыя кементь иеть.
Бажась улемс тонавтыцякс
Дарья Владимировна Каткова важоди воспитателекс Саранск ошонь «Детский сад № 80» МАДОУ-сонть. Эрзянь тейтересь чачсь-кассь Отяжелень райононь Селища велесэ. Вишка шкасто саезь свал бажась улемс тонавтыцякс ды, касозь, важодемс эйкакш марто.
– Кода ледстнян, эйкакш шкасто тейтерька ялган марто ульнесь вейке сехте вечкевикс налксеманок – школынесэ. Ды неть налксематнесэ мон свал ульнинь тонавтыцякс. Профессиясь тень марявиль пек вадрякс ды эрявиксэкс, – ёвтни Дарья Каткова. – Касозьгак, бажамон эзть полавтово. Прядыя средней школанть ды молинь тонавтнеме М. Е. Евсевьев лемсэ МГПИ-нь (ней – МГПУ) психологиянь ды дефектологиянь факультетэв, кочкия «логопед-дефектолог» специальностенть. Арсинь, прядса вузонть, молян роботамо школав, карман тонавтыцякс. Лиссь жо весемесь аламодо лиякс.
Педагогической институтонть прядомадо мейле Дарья Каткова мольсь роботамо эйдень кужов, кармась воспитателекс. Сестэ арсесь истя, сонзэ специальностесь седе лади вишкинетнень марто важодемантень. Ды вана уш кемень иень перть сон прок омбоце ава Саранск ошонь 80-це эйдень кужов якиця тейтерькатнень ды цёрынькатнень туртов. Тейтерь-авась важоди подготовительной группань эйкакштнень марто.
– Эйкакштнень марто важодемась монень пек вечкеви. Сынст марто монськак, мерят, полавтован, снартнян эрьвантень явомс мель, бажан максомс седе ламо содамочить, – ёвтни воспитателесь. – Вишкинетнень марто седе шожда важодемс мероприятиятнень, пелькстамотнень, кортамотнень ды налксематнень тевс нолдазь. Секскак, мероприятиятне минек ютавтневить сеедьстэ. Эрьва чись мезнень-бути алтави, эйкакштне кармить содамо мезеяк од, икеле а марсевикс. Аволь умок покш мероприятия алтынек Ленинградонть фашистэнь блокаданть эйстэ олякстомтомань 80 иетненень. Вишкинетненень ёвтневсь войнань а шожда иетнеде, стакачитнеде. Паряк, сынь эштё аволь весементь вадрясто чарькодить, ялатеке ёвтнезесь кадови сынст превс. Те минек историянок ды теде стувтнемс а эряви. Истя жо Од иенть каршо эйкакштнень марто эсь ёрокчинек невтинек «ЭтноЁлка» пелькстамосонть, конань меельце зярыя иетнень перть ютавты Равчирень финнэнь-угрань раськень культуратнень куншкакурось. Важодемань весе иетнень перть мон истя жо а стувтнян эсь тиринь келенть. Видьстэ тенк ёвтаса, эрзянь келенть пек вечкса ды эйкакштненьгак тонавтан эсь раськень келенть, культуранть ды койтнень-кирдатнень вечкеме. Эдь бути минь ванстсынек эсь тиринь келенек ды культуранок, минь ванстсынек эсь раськентькак.
Эрзянь келенть, культуранть ды койтнень-кирдатнень ванстомантень алтави краеведениянь кружокось, конанть Дарья Каткова вети меельце иетнень перть. Эйкакштне тов якить покш мельсэ ды свал кевкстнить, зярдо таго пурнавить те кужинесэнть.
Воспитателесь ды сонзэ группань эйкакштне ёроковт эрьва кодамо пелькстамосо эсь прянь невтеманть коряскак. Башка мель явови аволь ансяк эсест кужонь ды ошонь, истя жо республикань пелькстамотненень. Бажить а менстямс вейкеяк. Сынь киштитькак, морытькак, докат артомасо ды стихень ёвтнемасо. Те корты седе, эйкакштнень марто ветяви виев робота.
Важодемань васенце читнестэ уш Дарья Владимировна кемекстызе эсензэ туртов – мизолксось ламоксть седе виев кежтнень ды ацирьгалематнень коряс. Секскак чачозо свал чевте мизолдомадонть, сельмесэнзэ налксить валдо сяткинеть. Эйкакштнень марто свал муи кель-вал, эрьванть чарькоди, эрьвантень лезды. Сон кемексты, куш тонавтыцянть, куш воспитателенть васень тевезэ – эрьва эйкакшонть эйстэ кастомс алкуксонь ломань. Сон тонавты сынст эсь раськенть, сонзэ ине подвигтнень кисэ каштанчисэ аштемантень, тиринь келенть ды чачома масторонть вечкемантень. Эдь весе неть ёнкстнэ невтить алкуксонь патриотонть.
Весемесь ушодови семиясто
Дарья Каткова а стяко эйкакшчистэ саезь бажась улемс тонавтыцякс, те профессиянть марто сынст семиясь сюлмавозь кеместэ. Малав 30 иеть тонавтыцянь тевентень алтась Дарьянь авазо – Лариса Ивановна Модина. Отяжелень Селищань школань эйкакштнень сон тонавтсь англань келентень.
Школасо важодемантень весе эрямонзо алтызе тейтерь-аванть бабазо Антонина Михайловна Хнырева. Антонина Михайловна прядокшнызе М. Е. Евсевьев лемсэ педагогической институтонь филологиянь факультетэнть. Зярсыя роботась эсест райононь Сабанцеле велень школасо рузонь келень ды литературань тонавтыцякс. Мейле ламо иетнень перть ульнесь Паранеи велень начальной школань прявтокс ды тонавтыцякс.
Дарья Владимировнань покштязо – Иван Владимирович Хнырев, Сабанцелень школасо ветясь физкультурань уроктнень.
Секскак кодамояк лия профессиядо тейтересь зярдояк эзь арсекшнеяк. Свал содась, карми важодеме эйкакш марто.
Дарья Владимировнань мирдензэ Владимир Иванович марто кавто эйкакшост – эряза ды ёроков тейтерькаст Ксюша ды Арина. Ксюша тонавтни котоце классо, Арина – васенце. Тетяст-аваст ды покштяст-бабаст туртов сынь вишка тякинеть, конат валдомтыть эрямост.
Катковтне теить весементь, штобу сынст эйкакшост касовольть алкуксонь ломанекс, штобу седе товгак ванстовольть сынст семиянь питнейчитнень.
– Аволь умок минь невтинек прянок «Это у нас семейное» пелькстамосонть, конась ютавтови «Россия – страна возможностей» президентской платформанть юрсо. Ютынек кочкамонь пельксэнть. Те истямо проект, конась вейсэнди семиятнень вейсэнь тевтнень вельде. Минек кудораськенть туртов те ёнксось ашти прявтокс. Ды, эряви меремс, минь эзинек учо изнямо. Седе питней се, те пелькстамось эштёяк вейсэндимизь. Минь вейсэ – те прявтось! – кемекстызе Дарья Каткова.
Юлия Еремина