Суббота, апреля 13, 2024
Важное

Улить эрямосонок истят вастовомат, конат а стувтовить кувать. Сеедьстэ истя эрси сестэ, зярдо ломанесь панжи оймензэ, ёвтни теть вечкевикс тевдензэ седйшкава. Сон аволь мельде валдо ледстни седе, мезесь сонзэ алкукс талновты, кие пии-палы важодема таркасо эрьва тевенть кисэ. Сон а арси эсензэ лезэс ютавтомс ютко шканзо ды эрьва тевенть бажи топавтомс алкукс.

Койсэнь, истятнэнь юткс сови Большеелховской средней школань прявтось, Лямбирень райононь Почётной гражданинэсь Александр Михайлович Афроськин. Сонзэ марто прась уцяска теевемс содавиксэкс ютазь иень кизна Лямбирень райононь Покш Елховка велесэ улемстэ. Се шкане тосо одкстомтовсть зярыя социальной зданият, конатнень ютксо ульнесь Покш Елховкань средней школась.

Тешкстасынек, республикасонок неть паро тевтнень топавтомс лездыть федеральной национальной проекттнэ, конатнень эрямос совавтомо вейсэндясть муниципалитеттнэ.
Ледстясынек, те школась теезель эште советской шкатнестэ. Кода тенек пачтясь школань прявтось Александр Михайлович, тосо вестькак покш витнемань тевть арасельть. Ды вана ней, «Образование» национальной проектэнть лувсо, колмо этажсо школась допрок одкстомтовсь. Тень туртов явозельть аволь аламо федеральной ярмакт.

Те казнентень пек кенярдсть кода тонавтницятне, истя тонавтыцятне. Виде, истямо покш тевенть шкастонзо ды парсте топавтомасо покш путовксозо школань прявтонть Александр Афроськинэнь. Александр Михайлович ниленьгемень иеть важоди вейке таркасо ды зняро жо шкань перть – школань прявтокс. Образованиясо стажозо – ведьгемень иеде ламо.

Ульнесь истямо шка, зярдо сон тей сась вейсэ нинзэ Любовь Михайловна марто. Низэ истя жо тонавтыцяль… Вейксэньгеменце иетне ламонь туртов а шождальть. Афроськинтнэнь семияст покшоль. Те тувталонть коряс Любовь Михайловнанень савсь туемс важодеме Покш Елховкань нармунень фабрикав. Эдь сестэ тонавтыцятнень туртов кувать кирдевкшнесть зарплататне. Стакачитнень лангс апак вано, те семиясь весементь цидярдызе. Александр Михайлович ды Любовь Михайловна трясть-кастсть ниле эйкакшт, ниленест сынь школаст прядызь сырнень медаль марто, университетэст – якстере диплом марто. Течи ули мезе ледстямс Александр Михайловичнень,
кие, ловт, весе пингензэ алтызе образованиянь тевентень, одтнэнь алкуксонь ломанекс ливтемантень ды патриотизмань лувсо сынст кастомантень. Течи сон минек редакциянь инже.

– Александр Михайлович, косо ютась эйкакш пингенк, кода сыде тонавтомань ды школасо важодемань тевентень?
– Монь чачома таркась – Ельникень ёнксонь Вольной посёлкась. Аламошка ёвтнян тиринь ёнкстом. Тевесь ульнесь истя, 1927 иестэ Покш Мордовской Пошат велестэ тетям вейсэ 12 лия семиятнень марто тусть эрямо лия таркав. Сынь пурнасть «Маяк» од колхоз, косо тетям ульнесь прявтокс, шкань ютазь – партийной организациянь секретарекс. Ламо иень перть парсте важодеманть кисэ сонзэ казизь «За отвагу» медальсэ, мезень коряс покш мельспаросоль пингензэ перть. Авам важодсь фермасо. Ледстневи, минь, котоненек эйкакштне, свал якинек тензэ лездамо. Сень ловозь, тетянок-аванок чинь-чоп важодема таркасольть, кудоютконь малав весе тевтне ульнесть минек лангсо.

Шкань ютазьгак минь вечкезь ледстнетяно малавикс ломаненек, эдь сынь ламо важодсть эйкакштнень трямга. Велесэнть васенцекс минек туртов рамазель телевизор. Нейгак эзь стувтово, кода тетям сонзэ аравтылизе вальма лангс, сестэ эйсэнзэ вансть аволь ансяк минек куронь, малав цела велень эйкакштне ды покштнеяк. Велесэнек ульнесь ансяк вишка классонь школа, 5-9-це класстнэсэ тонавтнинек Уркатень школасо,10-11-це класстнэнь прядынь Ельниксэ. Эште нилеце классо тонавтнемстэ лездынь тонавтыцям туртов ялгатнень марто стака заданиятнень топавтомсто.

Эште школав якамсто ульнесь покш мелем тонавтнемс Оренбургонь лётной училищасо, косо анокстасть лётчикть-истребительть. Ансяк те мелесь сеске эзь топавтово. Школам прядыя 16 иесэ, секс савсь эште ие учомс. Шканть а ёмавтомга карминь тонавтнеме М. Е. Евсевьев лемсэ пединститутонь (ней университет) филологиянь факультетсэ. Васенце курсонть прядомадо мейле, пионерэнь лагерьсэ педпрактикань ютавтомсто, чарькодинь, те тевесь монь!

– Школань прявтонь тевентень зярдо кундыде?
– Кемтядо-арась, школань прявтокс карминь 21 иесэ. Пединститутонть прядомадо мейле кучимизь Темниковань РОНО-в. Тосо варштызь документэнь ды кучимизь важодеме пионерэнь лагерень прявтокс. Теде мейле макссть тень пек ответственной тев, карминь улеме Кушки велесэ кавксо классонь школань прявтокс, кавто иень ютазь те тевенть карминь топавтомо Польское Цыбаево велень средней школасо. Прявтонь тевденть башка тонавтыцякскак свал ульнинь, лиякс а кода велень школасо.

– Александр Михайлович, тонеть прась уцяска важодемс омбо масторсояк, кода савсь тов пачкодемс?
– Алкукс истя. Зярдо монень топодекшнесть 27 иеть, саимизь армияв, куш се шкане школань прявтт служамо эзть сайне. Тевесь сеньсэ, аламошкас тукшнынь важодеме Темниковань ГПТУ-нь прявтонь полавтыцякс, кавто ковонь ютазь макссть тень повестка. Нать, тенень улема. Од боецэнь курсатнеде мейле ильтимизь Бузулук ошов, косо ютынек сержантонь школа ды офицерэнь курсат. Теде мейле кармавтымизь Германиясо Советской войскань группань артиллерийской полксо взводонь разведкань командирэнь полавтыцякс, савсь тень топавтомс офицерэнь тевтнень. Пек ответственной тевень топавтомадо мейле, энялдсть тень кадовомс армияс седе тов служамо. Зярс жо тень лангсо арсинь, макссть лия тев. Апак учо кучимизь важодеме Эберсвальдень школав, косо тонавтсть военнослужащеень эйкакшт. Ледстян, школась пек покшоль, тёжадо ламо тонавтницят. Прявтонть ульнесть ламо полавтыцянзо, вейкесь юткстост – мон. Колмо иень перть важодинь те школасонть завучокс. Видькстан, а шожда тень ульнесь, ялатеке лангозом путозь тевтнень топавтылинь. Шкань ютазь тов тердия ним ды цёрам, тейтеренек чачсь Германиясо. Колмо иень ютазь, зярдо сась полавтома шкам, велявтынь Мордовияв. Темниковасо тень муевсь тев партиянь райкомсо. Куроксто чарькодинь, школась тень седе малавикс ды тешкстынь яволявтома. Теде мейле семиянек туинек эрямо Саранскоев, карминь важодеме профтехучилищасо прявтонь полавтыцякс. Шкань ютазь аравтымизь лия тевс, Покш Елховкасо – школань прявтокс, сестэ тень ульнесть 34 иеть.

– Александр Михайлович, покш ошсо эрямодо мейле, кодамокс марявсь велень школась ды мейстэ ушодыде од таркасо?
– Виде, куш школась аволь умок стявтозель, эйсэнзэ тевтне певтемельть. Кавксоньгеменце иетнестэ ламот социальной объекттнэ строязельть хозспособонь вельде. Кода те тееви, башка толковамс а эряви. Эрьва чистэ школань тееме сакшность 200-300 тонавтницятнень тетяст-аваст ды лия лездыцят. Се шкане, зярдо ушодынь важодеме, школасо тонавтницятнеде ульнесть 360 эйкакшт. Шкань ютазь Покш Елховкасо стявтовсть ламо этажсо эрямонь кудот. Малав эрьвась макссь 60 тонавтницят. Вейксэньгеменце иетнестэ школасонть тонавтнесть тёжадо ламо пакшат. Тонавтомась ветявсь колмо сменасо.
Важодемань васенце иестэнть покш мель карминь явомо педколлективентень. Икелень содамочитнень совавтынь тевс. Весе вейсэ ютавтынек ламо эрьва кодат мероприятият, пелькстамот тонавтыцятнень ютксо, конкурст методической вейсэндявкстнэнь ютксо. Республикасо редизь тонавтыцятнень парсте важодемаст ды эйкакштнень домка содамочист. Теде мейле монь кармавтымизь МР-нь Образованиянь министерствань аттестациянь группань прявтокс. Те тевенть топавтомсто республикань малав весе школатнесэ савсь ульнемс. Весе паронть, конань редия тосто, бажинь совавтомс эрямос коллективсэнть. Ды те весе а стяко. 1993 иестэ минек школась Россиясо лиссь сехте паро школакс. Шкань ютазь миненек кармасть сакшномо опыт мельга Мордовиянь лия школатнестэ. Виде, васня ульнесть истят кортамоткак, келя, прянь шнамга те весе тееви… Кода кармасть тенек максомо казнеть тонавтницятнень домка содамочист кисэ, сестэ ламот арсезевсть. 2000 иетнестэ тонавтыцятне вастовсть ламо стакачи марто. А мезть сёпомс, зарплататне школасо аволь покшт ульнесть, минек тонавтыцятнень жо республикасонть сехте покшоль. Ней вана сась истямо шка, зярдо кармасть тенек усксеме эйкакшт истят велетнестэ, кода Инят, Аксёнова, Вишка Елховкасто ды мик Саранскойстэ. Васенце сырнень медалистэнть анокстынек школанек. Ней сядодо ламо медалистэнек. Тонавтницянок ютксто ламот кармасть велявтомо тенек тонавтыцякс!

Неень шкане тенек сакшныть сетнень нуцькаст, кить кавксоньгеменце иетнестэ тесэ тонавтницяльть.
Виде, ниленьгемень иень перть, зярс важодян прявтокс (образованиясо весемезэ – 53 иеть), школасо теевсть ламо полавтомат. Вейкесь эйстэст – тетятнень-аватнень, школанть ды вузонть ютксо специалистэнь целевой анокстамодо колмо ёнксонь договоронь кемекстамось. Истя, минь анокстынек комсте ламо тонавтыцят, юткстост 17-тне те шкас важодить минек школасо. Чарькодеви, неень шкань од технологиятнень тонавтнезь, эйкакштне сеедьстэ тонавтыцядост седе ламо содыть. Нама, тенень ансяк кенярдома. Эдь сынь – минек кемеманок, сынь – минек вандынь чинек!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».