Вторник, марта 19, 2024
Важное

АПРЕЛЕНЬ МЕЕЛЬЦЕ ЧИТНЕСТЭ ЁВТАЗЕЛЬ САРАНСК ОШОНЬ 2022 ИЕНЬ ВОСПИТАТЕЛЕСЬ. ИЗНИЦЯКС КАРМАСЬ 80-це ЭЙДЕНЬ КУЖОНЬ ТОНАВТЫЦЯСЬ, ЭРЗЯНЬ ТЕЙТЕРЬ-АВАСЬ ВАЛЕНТИНА ДЫДЫКИНА. НЕТЬ ЧИТНЕСТЭ МИНЬ ВАСТОВИНЕК ВАЛЕНТИНА ВЛАДИМИРОВНА МАРТО ДЫ КЕВКСТНИНЕК СОНЗЭ СЕДЕ, КОДАМО КИ СОН ЮТАСЬ ТЕ ПОКШ ЛЕМЕНТЕНЬ.



– Валентина Владимировна, ёвтнек, инескеть, эседеть. Косо чачить-касыть, тонавтнить?

– Монь чачома ёнксом – Покш Игнатбуень Ташто Чамза эрзянь велесь. Тосо касынь, туинь школав. Эйкакшпорасто саезь пек вечкилинь морсеме, киштеме ды эштё свал бажинь вишка эйкакш марто озямо. Сазоркам те шкас ледстни, кода тонавтылинь сонзэ ловномо ды ловомо, чинь-чоп наряжилинь эйсэнзэ мазый оршамопельсэ, кодсинь черьбулот. Вейксэ класстнэнь прядомадо мейле арсинь туемс Ицялбуень педучилищав, ансяк тетям эзимим нолда. Секскак прядынь 11 класст ды туинь тонавтнеме Н. П. Огарёв лемсэ МГУ-нь филологиянь факультетэв «Журналистика» отделенияв, конань прядыя 1999 иестэ. Лисинь мирденень, чачтынь цёра. Декреттэ мейле важодинь школасо вожатоекс, газетасо корреспондентэкс, панжокшнынь эсень тев. Ансяк кото иеде теде икеле тень чарькодевсь: эрямо ким лия ды сон сюлмавозь вишка эйкакшонь кастоманть-тонавтоманть марто. Теке оймесь тердсь тов. Ялган-оян свал кортыльть тень: «Валя, кода вечктядызь эйкакштне, ансяк учить, зярдо сат. Тон маштат мартост озямо, мукшнат кель-вал, акунсолыцятнеяк вакссот оймить». Истя вана пачкодинь эйдень кужов, ютынь квалификациянь кастомань курсат, макссть тень «педагогонь» диплом.

– Тонь койсэ, кодамо обуцязо улезэ воспитателенть? Кода ладямс эйдетнень марто?

– Васняяк, эряви вечкемс эйкакшт, лият кодаткак салавачить арасть. А мезть прят манчемс, бути седейсэть арась вечкемань толнэ, эйдетне сеске тень несызь-редясызь. Сынст марто эряви ветямс прянть истя, штобу свал цивтёрдовольть сельмест. Вишкинетне эрямонть лангс ваныть налксемань пачк. Бути машттадо кирвазтеме эйсэст толнэ, сестэ эйдень кужосояк важодемс карми а стака. Монень маряви, те шкас монськак эйде ды касан вейсэ тейтерькатнень-цёрынькатнень марто.

– Тон васенцеде невтик прят «Иень воспитатель» пелькстамосонть? Мейсэ дивавтык жюринть?

– Истя, васенцеде варчия прям ды сеске изнямо. Видькстан, пелемат ульнесть. Мон невтия аволь ансяк эсень, весе 80-це эйдень кужонть важодеманзо. Морынь, анокстынь мастер-класс, эсень программа, ёвтнинь стихотвореният. Монень лездасть прявтось С. В. Вишнякова, методистэсь О.Н. Сидорова, психологось Е. А. Мягкова. Программам сюлмазель Раськетнень культурань сюпавчитнень иенть марто, конась яволявтозель тедеде. Лемезэ: «Мордовиясо этнотуризмась». Эйкакштнень марто саинек зярыя районт, ванкшнынек, мейсэ сынь дивавтыть туристтнэнь, кодат койть-кирдат тосо ванстовсть. Тавлань налкшкетне, Теньгушевань семицветкась, Орозбиень понань кемтне… Арсян, этнотуризмась парсте содавты эйкакштнень раськень культуратнень марто, кужосто лисезь, сынь уш ламо чарькодить, кирдить каштанчи тиринь моданть кувалма, эйсэст касы вечкемась эсь масторонтень.

– Мон содан, эйдень кужосонк ютавтневить ламо мероприятият, конатнесэ эйкакштне морсить рузонь, эрзянь, мокшонь кельтнесэ.

– Истя, аволь умок анокстынек утренник Эрзянь келень чинтень, февральстэ – Тиринь кельтнень чинтень. Эйкакштне ёвтнить стихотвореният, морыть морот, нурька морынеть, налксить сценкат. Свал бажатано совавтомс национально-культурной пелькске эрьва кенярксчинтень, ловнотано эрзянь ёвкскеть рузонь кельсэ, оршнетяно мазый оршамопельсэ. Содавлидеяк, кода истят тевтнень вечкить тетятне-аватне. Мельспаросо анокстыть мартонок вейсэ! Эйдень кужосо роботамодо башка Валентина Владимировна Дыдыкина вечки невтеме прянзо художественной самодеятельностьсэ. Тиринь велень клубсо сонтемензэ а ютни вейкеяк мероприятия. Тейтерь-авась морси, ловны ды сонсь сёрмады стихть, нурька морынеть, сценарийть. Кой-конатне эрзянь кельсэяк. Варчнизе прянзо кенярксчинь, чачома чинь ветицякс.

Дыдыкина – эсь тиринь ёнксонь ды масторонь алкуксонь патриот. Корты, зярдояк а полавтсы омбо мастор лангс ды свал эсенектнень кисэ! Сон ашти Россиянь Президентэнть спецоперациядонть мелензэ-арсеманзо кисэ ды важодемстэнзэяк васенце таркас путы эйкакштнесэ патриотизмань ёжонь кастоманть.

Марина ДЕВЯТОВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».