Четверг, декабря 08, 2022
Важное

Аволь умок минек газетанть лемс лембе поздоровт састь Эльбрус пандонть прясто. Сынст кучицясь – эрзянь ёроков од цёрась Дмитрий Елеськин. Минь вастовинек Дмитрий марто, ды сон ёвтнесь, кодат кить-янт ветизь Эльбрусонть пряс, кода превс тензэ сась кучомс поздоровт «Эрзянь правдань» ловныцятненень, ды истя жо пачтясь эсензэ ланга – кода ды мейсэ эри.



Николай Васильевич ды Людмила Сергеевна Елеськинтнэнь семиясь Отяжелень райононь Сабанцелесэ парсте содавикс. Людмила Сергеевна эрямонзо перть важоди «Сабанчеевское» ООО-со бухгалтерэкс, Николай Васильевич истя жо кеместэ сюлмавозь велень хозяйстванть марто. Семиясост чачсть-кассть колмо эйкакшт – колмо эряза цёрат. Покшось, Владимир, – офицер. Эри Московсо, важоди «МиГ» авиастроительной компаниянь конструкторской бюросо. Веженсесь, Василий, тонавтни школасо. А вана Дмитрий эрямонзо сюлмизе ломантнень идемань ды зыянов тевстэ лезксэнь максомань тевенть марто – сон канды службанзо МЧС-сэ. Кода тешксты цёрась, те профессиядонть арсесь эштё эйкакшокс улемстэ. Ансяк школанть прядозь, эстензэ кочкась аламодо лия тев. Сон истя жо сюлмавозь ломантнень идеманть ды сынст эрямост ванстоманть марто. Дмитрий мольсь тонавтнеме Саранск ошонь медицинской колледжев. Тосо тонавтнесь «Лечебное дело» специальностенть коряс, получизе фельдшерэнь профессиянть.

– Колледженть прядомадо мейле тердимизь военкоматов, икеле эйсэнь учось служба армиясо, – ёвтни Дмитрий Елеськин. – Мон тенень ульнинь анок. Армиясо службадонть орголемс эзинь арсекшне, мекевлангт, бажинь молемс, эдь тевесь те пек эрявикс. Ансяк тосо, зярдо кармасть содамо, кодамо монь профессиям, ёвтасть тень истямо ёнкс – армиянть таркас молемс важодеме фельдшерэкс МЧС-в. Те службасонть медицинань важодицятне свал эрявикст. Ды вана уш колмо иеть важодян Мордовия Республикава Россиянь МЧС-нь ГУ-нь ФПС-нь ПСО-нь 5-це № ПСЧ-сэ, конась ашти Саранск ошонь Ленинской районсо. Мон аварийно-хозяйственной отделэнь ды медицинской отделэнь прявт. Специализациянь коряс жо спасатель, зярс квалификациянь классом кодамояк арась. Лиякс меремс, спасательтне явовить зярыя класска, улить васенце классонь, омбоце ды колмоце. Колмоце классонтень карман тонавтнеме сы иестэ, зярдо важодемань колмо иетнень печтясынь.
Эряви меремс, те Центрась роботы ламо ёнксонь коряс. Тесэнь специалисттнэ важодить толонь мадстемасояк, вешнемань-идемань тевтнесэяк.

ВЕЧКЕВИКС ТЕВ

Эсь важодемадонть Дмитрий Елеськин корты покш мельсэ. Сельмесэнзэ натой редяви мельспаронь сяткине. Ды, лангозонзо ванозь, чарькодят – сон вечкевикс тевсэ.

Кадык важодияк аволь пек кувать, весемезэ колмо иеть, ялатеке эсь маштомачинзэ ды ёрокчинзэ невтинзе эрьва кодамо тевсэ, ульнеськак ламо косо. Истя, эзь стувтово эштё ютазь иесь, зярдо палсть виртне. Покш кирвазема ульнесь минек республиканть марто шабрацек аштиця Нижегородской областень Саровонть маласо вирьсэнть, конась ашти Мордовиянь заповедникень пельксэкс. Покш тев сестэ тейсть минек региононь специалисттнэ – толонь мадстицятне ды идицятне. Сынст ютксо ульнесь Дмитрий Елеськингак.

– Зярдо лиссь покш кирваземась, минек малав васенцекс тов кучимизь. Те ульнесь кизэнь куншкавидьстэ ды весемесь таргавсь ковдо куватьс, – ёвтни цёрась. – Вейсэ лиятнень марто важодинек толонть мадстемасо. Эряви меремс, ульнесь а шожда. Понгонинек толонь «полонскак». Паро, весемесь изнявсь ды покш зыян эзь лисе.
Эряви тешкстамс, Дмитрий Елеськин важоди пожарно-спасательной частьсэ. Лиятнень эйстэ явовикс ёнксось сеньсэ: сынь важодить кода толонь мадстемасо, истя вешнемань ды идемань тевтнесэяк. Теке марто сонзэ лангсо ашти медицинань лезксэнь максомань тевеськак.

– Бути пожарнойтне ансяк кирвазематнесэ важодить, минь эштё ламо лия тевтнесэяк, – корты Дмитрий. – Монь ули квалификация важодемс ДТП-нь, катастрофатнень, самолётонь прамонь, техногенной ды бытовой эрьва кодамо тевтнень, кирвазематнень ды апак учне лисезь зыянтнэсэ. Тундонь чадыведенть шкасто минек специалисттнэ важодить покш ведьс понгозь ломантнень идеманть коряс.

Нама, истят тевтнесэ важодемга эсь ёрокчист ды содамочист пожарно-спасательной частень важодицятне свал кастыть. Ардтнить командировкав лия регионтнэс, косо ютавтовить эрьва кодат анокстамот. Истя, важодема тевень коряс Дмитрий Елеськин ульнесь Карелиянь Вытегра ошсо, косо сынст туртов ютавтовсть мероприятият, конат алтавсть пещерасо идемань тевтнес тонавтнемантень. А вана аволь умок анокстасть промышленной альпинизмантень.

– Эряви меремс, минек Управлениянь прявт отрядось ашти Нижней Новгородсо. Ды тедедень тунда ПФО-нь лия спасательтнень марто монь кочкакшнымизь эсь квалификациянь кастомань тевтнес. Сынст лувсо ульнесть промышленной альпинизмань коряс анокстамот, конат ютавтовсть масторонь содавикс пандотнень прясо – те Бештау, Машук, – ёвтни Дмитрий. – Неть пандотнень сэрест вейке пель марто вайгельбе. Ды малав эрьва чистэ колмо недлянь перть тонавтнинек пандотнень пряс куземань ёнкстнэнь ды кода тесэ важодема кодамояк зыянонь лисемстэ.

Ансяк тонавтнемань ёнкстнэ цёратненень марявсть асатыкст, ды Дмитрий Бурятиянь, Тывань ды Мурманскоень ялганзо марто вейсэ арсесть изнямс Эльбрусонть. Ды оймсема чистэ те арсеманть топавтызь.

– Минек ульнесь пек покш меленек неемс Эльбрусонть, эдь теде икеле тосо кияк эйстэнек арасель, – корты Дмитрий. – Валскень 7 чассто сыргинек килангов. Седе паро сыргамс ранаяк, эдь пандонть пряс куземанть мереви теемс обед мейлень ниле часос (бути тон а ютат регистрациянть), мейле кепети виев варма. Тов ардомсто, Азау посёлканть видьс апак пачкоде (те косо-бути 2350 метрань сэрьсэ), ульнесь кевень прамо, кись весе валязель. Истямо тамаша тосо эрси иезэнзэ весть, зярдо чинь ды вень температуратне пек явовить. Зярсыя учинек, зярдо кинть ванськавтсызь, ды сыргинек седе тов. Минь кузекшнинек косо-бути малав 4 тёжат метрат. Эряви меремс, теемс тень ульнесь а шожда. Секскак кувать тосо эзинек ульнеяк. Мон кучинь поздоровт тиринь Сабанцелентень, «Эрзянь правдантень» ды сыргинек мекев. Мекс «Эрзянь правда» газетантень? Паряк, сень коряс, пек вечкса тиринь эрзянь келенть, вечкан ловномо эрзякс. Ды зярдо монь седеенть пештясть те шкас а содавикс ёжомарямот, мелезэнь ледсь сехте малавиксэсь – тиринь велем ды эрзянь кельсэ лисиця вейкине газетась.

Цёранть валонзо коряс, эрямосо лисиця истят тевтне свалшкас кадовить седейс. Секскак, бути сы куш кодамояк тердема ковгак ардомс, молемс, тень а эряви менстямс. Ды Дмитрий Елеськин эрьва чистэ кемексты эсензэ туртов – эряви кенеремс теемс седе ламо. Те кармавтоманть марто молияк эрямованть. Важодемадо башка сон полады тонавтнеманзо Н. П. Огарёв лемсэ МГУ-нь Механикань ды энергетикань институтсо, покш мель яви спортонтень, пек бажи лездамс ломантненень ды сёрмадызе прянзо донорокс, верень максомо якась уш ветексть. Эрьва юткошкасто снартни ардомс тиринь велев, лездамс тетянстэнь-аванстэнь. Те весемесь корты седе, сонзэ туртов прявтокс ашти лиятненень лезксэнь максомась: куш эрямосо, куш важодемасо.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».