Аволь умок минек республикань Отяжелень районсто делегациясь якась Беларусь Республикань Червенской районов. Ояксчинь республиканть содавтызь Отяжелень райононь прявтось Константин Николаевич Николаев, райононь администрациянь Культурань управлениянь прявтось Анжела Михайловна Ивашкина ды «Аловская средняя школа» МБОУ-нь Таразбуень средней школань прявтось Марина Алексеевна Атласова. Самай сон миненек ёвтнеськак те ардтнемадонть ды минек культуранть лезэс эсь важодемадонть.
– Беларусь Республикав молемань прявт тевесь ульнесь – минек республикатнень ютксо ояксчинь сюлмотнень кемекстамось. Теке марто июлень 3-це чистэ тосо тешкстави покш чи. Те чистэнть 80 иеде икеле республикань Червенской районось олякстомтозель фашисттнэнь эйстэ, – ёвтни Марина Алексеевна. – Беларусев минь пачкодинек июлень 1-це чистэ. Самай те чистэнть Ине Отечественной войнань шкасто Червенской райононь Сунище веленть маласо минек землякось, Отяжелень райононь Ламбаське велень эрицясь, эрзянь цёрась Василий Фёдорович Здунов (Мордовия Республикань Прявтонть Артём Здуновонь покштянзо лелязо) невтизе эсь прянзо фашисттнэнь марто покш тюремасонть, конанть кисэ сонензэ максозель Советской Союзонь Героень лемесь. Тень коряс весе минь аштетяно покш каштанчисэ ды Отяжелень райононь прявтось Константин Николаев ёвтась мель содавтомс неть таркатнень.
Кода тешкстызе Марина Атласова, Беларусенть содавтомась ульнесь пек сюпав сынст туртов. Кадык ульнесть тосо аволь кувать, малав колмо чить, кенерсть ламо. Васняяк, сынь содавтызь Славань курганонть, конась алтави Ине Отечественной войнасо чавовозтненень. Тесэ ледстизь Ине геройтнень лемест. Истя жо содавтызь райононь краеведениянь музеенть. Ульнесть ошонь прявт площадьсэнть, косо ули Ине Отечественной войнань Геройтненень стенд. Ды кадовсть покш мельспаросо, те стендсэнть невтеви минек земляконть Василий Фёдорович Здуновонь фотографиязо ды ёвтневи сонзэ ине подвигтенть.
Истя жо Марина Атласова тешкстызе, июлень 3-це чистэ Червень ошсо ютавтовсть покш мероприятият, конатне алтавсть райононть ятонть эйстэ олякстомтомань 80 иетненень ды Беларусь Республикань кидеяк а аштемань (Независимостень) чинтень. Кенярксчись ютась лембестэ, парсте. Васняяк ульнесь парадонь кондямо ютамо, седе тов – концерт. Мордовиясто инжетне весе пурнавозтненень казизь эсь морост. Марина Алексеевна морынзе «Гляжу в озёра синие» ды «Ты же выжил, солдат!» патриотической моротнень. Седейс токиця морот морась Анжела Ивашкинаяк.
– Беларусь Республикасо минек вастымизь парсте. Лембе вастовома ульнесь Червенской районсо, покш сюкпря тосонь райисполкомонь председателентень Владимир Новицкийнень, – ёвтни Марина Атласова. – Минек Отяжелень райононть ды Беларусень Червенской райононть марто ояксчинь кеме сюлмот уш ламо иень перть ды, арсян, седе тов карми эштёяк седе виев важодема.
Марина Атласовань туртов те иесь сюпав покш мероприятиятнень ды вастовоматнень коряс. Иенть ушодовомсто, февральстэ, эрзянь авась ульнесь Андрей Малаховонь «Песни от всей души» передачасонть.
– Морамонть марто сюлмавозь малав весе эрямом. Моран ськамонгак, ансамблясояк. Эсенек велень школань тонавтыцятнень ды ДК-нь важодицятнень марто пурнынек «Эрзяночка» ансамбля. Тосо морсить Светлана Ивановна Моисеева, Лидия Ивановна Саврушкина, монсь. Лиясто тенек лездыть Лидия Сергеевна Кузнецова, Валентина Викторовна Кузнецова, – ёвтни Марина Атласова. – Ней ютавтнетяно концертт эсенек велень клубсо, тердтнить эйсэнек шабра велетневаяк, Отяжелевгак. Истя жо минек райононь вадря ломаненть, лиятненень лездамо бажицянть Евгений Шульговонь марто пурнатано-невтнетяно благотворительной концертт сыречинь ютавтома кудотнесэ, тиринь Ламбаське велесэ.
Районсонтькак Марина Атласовань ламот содасызь морамонь ёрокчинзэ кувалма. Гайтев, валаня, седейс токиця вайгелезэ вечкеви весенень. Ды самай неть эрицятнень чачськак мелест сёрмадомс аванть ланга сёрма Андрей Малаховонь «Песни от всей души» передачав. Те сёрмасонть сынь ёвтнесть Марина Алексеевнань эрямодо, морамонтень мелень явомадо, лиятненень лездамонь тевдензэ. Шкань ютазь авантень гайневтсть Московсто ды Таразбуев сакшнось «Россия 1» телеканалонь съёмочной группась.
– Мондень сюжетэнть снимасть малав чинь перть. Валскень 10 чассто саезь чокшнень 6 часос, – тешксты эрзянь авась. – Минек покш хозяйстванок, кирдтяно ламо ракшат, ули скалонок. Снимизь, кода скал потявтан, скалой пивтян, кудоютконь тевть теян. Семиям марто кортнесть, важодема таркав якасть – школанть снимизь.
Зярыя чинь ютазь, Марина Атласова мельга кудос сась машина ды ускизе Саранск ошонь чугункань кинь вокзалов, косто сон тусь Московов. Теке чинь чокшне ульнесть съёмкат студиясо. Марина Алексеевна морызе авторонть-морыцянть Людмила Михеевань «Позвоните, дети, матерям» моронть.
– Эряви тешкстамс, весе важодемась ладязь пек вадрясто. Студиясонть эрьвась содасы эсь тевенть ды топавты сонзэ шкань апак таргсе. Тосо меленек вансть истя, кода кудосояк мельгат а якить, – мерсь Марина Алексеевна. – Студиясо снимамсто теезельть фонограммань сёрмадовкст бек-вокал марто (те эрявсь апак учнень тевень лисемга). Те сёрмадовксось монень овсе эзь эряво. Моронть морыя монсь, фонограммавтомо. Мейле весе шнымизь, кодамо виев вайгелем.
Тешкстасынек, Марина Атласова центральной телевидениясо аволь васенцеде, зярыя шкадо икеле сон эсь ёрокчинзэ невтизе «Поле чудес» передачасонть.
Эштё вейке кенярксчись, конань анокстамосо Марина Атласовань истя жо покш путовксозо – Таразбуе велень 400 иетнень тешкстамось. Мероприятиясь ютавтовсь июнень 23-це чистэ – Троицянь чистэ. Таразбуев сакшность ламо инжеть, весе кадовсть покш мельспаросо.
– Покш сюкпря «Сабанчеевское» ООО-нь прявтонтень Дмитрий Николаевич Игушкиннэнь, минек поселениянь прявтонтень Василий Петрович Сидоровнень. Сынь тевень сыргавтыцят, анокстамотнесэ прявт лездыцят. Минь жо, эрьвась, теинек эсь тевенек, – тешксты Марина Атласова. – Анокстамось ютась шождасто, мелявкстомо. Покш сюкпря ёвтан минек школань коллективенть туртов, теинек покш ды эрявикс тев. Тешкстасынь культурань важодицятнень, кода эсенек велень, истя райононь. Весемесь ютась пек вадрясто, лембестэ, оймень путозь.
Кода тешкстызе авась, истят покш читне куроксто невтевить Интернетсэ, ды вейсэ инжетнень марто эсь седеест оймавтсызь ды кенярдовтсызь ве ёно эрицятнеяк, конатне, паряк, ламо иень перть эзть пачкодекшне велев. Кадык оймесэст, ансяк сыньгак кенярксчинь инжеть.
– Паро, зярдо се, мезе теят, канды кеняркс. Канды кеняркс аволь ансяк эстеть, лиятнененьгак. Те корты седе, эрят а стяко, – кемекстызе Марина Атласова.
Марина Алексеевна Атласовань чачома-касома ёнксозо – Отяжелень райононь Ламбаське велесь. Весе пингензэ перть жо эри ды важоди теке райононь Таразбуесэ. Эрзянь авась эрямонзо сюлмизе тонавтыцянь тевенть марто ды вана уш 36 иеть эсь седейлембензэ кази эйкакштненень. Зярыя шка роботась вишка классонь тонавтыцякс, 2013 иестэнть саезь – Таразбуень средней школань прявт, истя жо тонавты эйкакштнень эсь вечкевикс тевентень – морамонтень.
Марина Алексеевна – уцяскав ни ды ава. Мирдть-нить Атласовтне вейсэ 34 иеть. Трясть-кастсть колмо эйкакшт: кавто тейтерть ды цёра, конатне сынст уцяскаст, кемемаст ды нежест.
Юлия Еремина
Фототне Марина Девятовань
ды Марина Атласовань