Воскресенье, мая 28, 2023
Важное

Ютазь номерсэ ловныцянок содавтынек Дубёнкань райононь Орданьбуе велень школань историянть марто. Кода а ёвтнемс тесэнь тонавтыцятнеде, кить весе эрямост алтызь школантень, кить трить-кастыть тиринь масторонь вечкиця, превей эйкакшт, сырнень ды сиянь медалистт. Тонавтницят, конат изнить натой федеральной пелькстамосо.



Орданьбуень школасо историянь ды обществознаниянь тонавтыцякс важоди Ирина Владимировна Наумкина. Чачсь сон Арзамассо, военноень семиясо. Валонзо коряс, семиясост тонавтыцят арасельть. Школанть прядомадо мейле тонавтнесь Н. П. Огарёв лемсэ МГУ-нь географической факультетсэ, косо теевсь содавиксэкс мирдензэ марто, сон ульнесь Дубёнкань районсто. Истя Ирина Владимировна сась важодеме тей. Географиянь част эзть сатно, ды сон ютась переподготовка историянь тонавтыцянь коряс. Историясь теевсь тензэ сехте вечкевикс предметэкс. Кода ледстни тонавтыцясь, Орданьбуень школасо важодсть историянь зярыя учительть, виевть, эсь тевест парсте содыцят. Неть: М. В. Чинаева, Н. В. Мартьянов, И. Ф. Катаев. Сынст тевест поладынзе Ирина Наумкина. Сон пек вечксы тиринь ёнксонь историянть, секскак сеске кармась пурнамо веледенть эрьва кодат материалт. Эряви меремс, сонсь Ирина Владимировна – рузава.

Весе 28 иетнень перть эйкакштнень марто сынь пурныть экспонатт, сёрмадыть сыре ломантнень пельде ледстнемат ды лия эрявикс материалт. Школасо таркат а сатныть, васня весе экспонаттнэ аштесть историянь классо, мейле музеень нупаль панжсть велень Социальной центрасо. Тейсть пелькст (разделт) – кезэрень шкасто саезь течинь чинь историяс. Улить умонь экспонатост, конат пурназь эрицятнень кедьга (пряхат, лавсть, пенчть-вакант), лейчирестэ муезь натой мамонтонь ловажа. Ламо материалт пурнасть Ине Отечественной войнань участниктнеде. Те – покштояк покш тев. Ялгаксчинь сюлмот кирдить «Поиск» республикань патриотической движениянь вейсэндявксонь прявтонть Н. А. Кручинкинэнь марто, велест коряс ламо информация макссть сонензэ 1941-1945 иетнень войнань ды трудонь подвигень мемориальной музеев. Тонавтыцясь эйкакштнень марто сёрмалинзе Орданьбуень эрицятнень кудолемест, кудонь-буень тешкстнэнь (родовые знаки), ламо мель явить проектэнь тевтненень, ванкшномань-тонавтнемань важодематненень.

Ирина Владимировнань тонавтницянзо аволь весть лиснесть изницякс регионъютконь пелькстамотнесэ. Тедеде Алина Матвеева войнань эйкакштнень коряс конкурссо саизе колмоце тарканть. Тонавтыцясь свал бажи совавтомс эйкакштнень мельс-превс: эсь велень историянть эряви содамс. Малав весе важодемаст-проектэст алтавить велень эрицятненень: Масторлангонь васенце войнасонть тюрицятненень, Сурань рубежень стявтыцятненень ды седе тов.

– Вешан эйкакштнень пельде паро содамочить. Эряви содамс историянь ледстнемань читнень (дататнень), мекс теевсь те эли тона событиясь, кодамо путовкс тейсть прявттнэ минек масторонтень. Койсэнь, эрьва ломанесь – личность, – ёвтни тонавтыцясь.
Эйкакштне, историядонть башка, покш мель явить обществознаниянтень. Сонзэ сеедьстэ кочкить ЕГЭ-кс. Эряви меремс, И. В. Наумкина историянь коряс ЕГЭ-нь заданиятнень ванномаст коряс республикань эксперт. 2020 иестэ невтизе прянзо «Иень тонавтыця» пелькстамонь муниципальной этапсо, лиссь изницякс «Инновации в образовании» номинациясо. Казезь РФ-нь Образованиянь министерствань Почётонь грамотасо, МР-нь Прявтонь тонавтыцятнень туртов грантсо. Свал юты квалификациянь кастомань курсат.

Тедеде школасост ютасть Православной образовательной районной 1-це ловномат. Истямо паро меленть ёвтакшнызе Орданьбуень Никольской церьковань настоятелесь о. Андрей. Эйкакштне анокстасть ды ловность докладт ХХ-це пингень 20-це иетнень коряс, зярдо мольсть репрессиятне, коллективизациясь, церьковатнень яжамотне. Тонавтницятне сёрмадсть сочиненият, тейсть артовкст, ловноматненень явсть мель райононь зярыя школатнестэ. Православной ловноматнень арсеви ютавтнемс эрьва ие.
Те велесэнть 1880 иень январень 12-це чистэ чачсь священномученикесь Иван Иосифович Сульдин. Сон тонавтнесь Алатырень духовной училищасо, седе тов – Симбирской духовной семинариясо. 1920 иестэ саезь ульнесь Сызрань ошонь Ильинской церьковань настоятелекс. Сонзэ ламоксть пекстакшнызь тюрьмас. 1937 иень ноябрянь 30-це чистэ таго арестовизь, чумондызь «подпольной контрреволюционной церковно-сектантской организациясо улемань кисэ».

1938 иень январень 14-це чистэ о. Иоаннонь ды лия священниктнень ледизь, калмизь Самарасо вейсэнь калмазырьс. 2000 иестэ Рузонь Православной Церьковань Архиерейской соборось совавтызе сонзэ Россиянь иневанькс исповедниктнень ды новомучениктнень юткс. 2022 иень августонь 20-це чистэ Орданьбуень Никольской церьковасо ютась Пазонь литургия, конань ветизе Орданьбуень ды Отяжбуень епископось Вениамин. Тесэ светязель священномученикенть Иоанн Сульдинэнь пазавась. Кода пачтясь И. В. Наумкина тонавтыцясь, сынь ламо вешнесть-кевкстнесть сыре ломантнень, бажасть содамс, кадовсть-арась велесэ Иоаннонь роднянзо-раськензэ, зярс киньгак эзть муе. Кие соды, паряк, шкань ютазь муевить сынь. Священникенть ульнесть кото эйкакшонзо.

Орданьбуень школасонть химиянь ды биологиянь тонавтыцякс 30 иеть важоди Валентина Дмитриевна Катаева. Сон, кода лия тонавтыцятнеяк, прядызе М. Е. Евсевьев лемсэ МГПИ-нть (ней – МГПУ), кочкизе биолого-химической факультетэнть. Пек уш вечкевсть тензэ школасо тонавтнемстэ химиянь ды биологиянь уроктне, конатнень ветясь В. И. Карасёва. Эйкакштнень марто сон путнесь школань пире, косо вейсэ вансть касовкстнэнь мельга. Мейле тевензэ поладызе Валентина Дмитриевна. Вузсонть колмо иеть эйсэст анокстасть медсестракс. Кой-кить ютасть тонавтнеме медицинань факультетэв, В. Д. Катаеваненьгак пек тукшнось мельс медицинась, ансяк кочкизе тонавтыцянь тевенть ды а янкси.

Аволь умок кавто тонавтницянзо лиссть изницякс школасо эйкакштнень андомань коряс пелькстамонь федеральной этапсо. Конкурсонть ютавтсь «Единая Россия» партиясь. Изницятнень сайнизь «Артекев». Эйкакшонь содавикс лагерентень васня якась Сергей Катаев, седе тов – Мария Рузавина, кона ней пряды 10-це класс. Тонавтыцясь казезь МР-нь Государственной Собраниянть, МР-нь Образованиянь министерстванть пельде Почётонь грамотатнесэ. Сон бажи эйкакштнень эйсэ вельмевтемс вечкема пертьпельксэнтень, редямс мазычинть ды ванстомс сонзэ.

Школасо важодемадонть башка, Валентина Дмитриевна пек вечки цецянь кастомо. Кудосонзо ды пиресэнзэ кодат ансяк цецят арасть. Сехте пек тукшныть мелезэнзэ лилиятне. Сонензэ свал пшкалить превс путома мельга, кевкстнить, кода якамс неень шкань цецятнень мельга, вешить лия ёнов а молиця цецянь лисевкст (отросткат). Тонавтыцясь вечки тейнеме экспериментт касовкстнэнь марто, ваны, кода ветить пряст, косо тенст вечкеви, конатнень эряви полавтомс таркаст. Кинень валдо эряви, кинень варма коштось а вечкеви. Эрьва мезентень эряви явомс мель, кияк сонсь а кирнявты верев. Пиресэяк Валентина Дмитриевна касты эрьва мезть, озавтни помидоронь малав кеветее сортт! Эрьва кодамо тюсонь, покшолмань ды мазычинь коряс. Аволь ярсамонь ды танстест кисэ, мельспаро кастомс ды мельгаст ваномс. «Бути тевесь вечкеви – муеви шкаяк лангозонзо ды сиземаяк а пры», – истямо валсо прядовсь тонавтыцянть марто кортамонок.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».