Понедельник, октября 18, 2021
Важное

Аволь умок минь пачколинек инжекс Ицялбуень ёнксов. Тесэ содавтынек Селища ды Береговые Сыреси велетнень. Кода сынь эрить? Теде ловнодо материалсонок.



Береговые Сыреси велень администрациянтень сови 11 веле. Сонзэ прявтокс кавксоце ие важоди Александр Константинович Пискайкин. Чачсь сон Селищасо. Школань прядомадо мейле тонавтнесь Н.П. Огарёв лемсэ МГУ-нь велень хозяйствань механизациянь факультетсэ. Эрясь Саранскойсэ, 13 иеть важодсь «Агропромдорстрой» ООО-нь прявтокс ды лия таркасо. Сон зярдояк эзь стувтне тиринь велензэ. Свал лездась, мейсэ маштсь. Алкуксонь энтузиаст. Мейле Ицялбуень райононь прявтось В.Г. Дмитриева пшкадсь тензэ улемс велень прявтокс. Александр Константинович каршо эзь моле, сась. Семиянзо марто кармась эрямо тиринь велесэнзэ.

– Неень шкане велень сехте покш мелявксось – арасть важодемань таркат. Секс ломантне тукшныть, кие ков. 11 велетнесэ весемезэ 1653 эрицят. Ней велесэ ансяк пенсионерт, одт арасть. Ансяк савкшны ледстнемс, зяро ломанть тесэ эрясть!

– Александр Константинович, кода велявтомс ломантнень мекев велев? Эли теемс истя, иляст туе?

– Улевельть важодемань таркат. Арсян, эряви стявтомс кодамояк велень хозяйствань покш комплекс. Школась вадря, од. Газ ули, ведь ветязь. Тесэ истямо мазычи, валт арасть! А уш кода чадыведь шкане сравтови Ратор леесь… а ёвтнеявияк, – мерсь А.К. Пискайкин.

Береговые Сыреси велесэ од школанть панжизь 2006 иестэ. Школасонть 11 велестэ тонавтнить ансяк 79 эйкакшт. Ули эйдень кужояк.
Велень ломантне кортыть, бути аволь А.К. Пискайкин, тесэ мезеяк а улевель. Сынь ёвтыть тензэ седейшкавань сюкпря. Теезь пек ламо. Панжсть Ине Отечественной войнасо чавовозтненень кеврунго. Фронтов тестэ тусть 562 ломанть. Чавовсть – 345. Ветязь ки, конань учость малав комсь иеть, кувалмозо 3 вайгельпеть. Прядызь церьковань стявтоманть. Селищасо 14 иеть стявтсть Успениянь Пазонь Авань церькованть. А.К. Пискайкин – Пазнэнь кемиця ломань, ламо лездась, сонсь ветясь проектированиянть. Умарьковонь 28-це чистэ тесэ престольной кенярксчи. Тедеде те чистэнть кармить тешкстамо велень 350 иетнень. Бути мезеяк а полавтови, сонзэ тешкстасызь келейстэ.

Эрицятне апак лотксе пшкалить велень прявтонтень эрьва кодамо мелявксост ды стакачист марто. Аволь ансяк велень тевтнень коряс, кинень эряви понгомс больницяв, кинень молемс тонавтнеме ды седе тов. Александр Константинович весень кунсолы, путы превс, лезды. Валонзо коряс, сонензэ мельспаро лездамс лиянень ды теемс паро.

– Александр Константинович, кодат икелепелев меленк-бажамонк?

– Покш меленек – теемс паро кить ульцятнева, косо сынь арасть. Теде башка, покшолгавтомс калмазыренть.

2019 иестэ «Демография» национальной проектэнть лувсо «Спорт – норма жизни» федеральной проектэнть вельде Береговые Сыреси велесэ панжозель хоккеень корт. Те ульнесь алкуксонь кенярксчикс весень туртов. Теезь неень шкань вешематнень коряс. Таблосо невтеви шкась ды температурась. Аволь умок сонзэ ваномо сакшнось Мордовиянь Прявтонь тевтнень топавтыцясь Артём Здунов. Ули велесэнть футболсо налксемань паксяяк.

Александр Константиновичень кавто тейтерензэ, кемень нуцьканзо, вейке правнукозо. Весе тей мельспаросо сакшныть. Ды кода а сакшномс, бути покштяст алкуксонь ломань, кинь пельде эряви тонавтнемс ды саемс пример. 68 иесэ сон нейгак кепси гирят ды яви мель бороцямонтень. Улить ломаньсэнть кода рунгонь вий, истя жо алкуксонь эрзянь назойчи ды кемечи.

Эряви Культурань од кудо

Валентина Петровна Борисова кото иеть важоди Береговые Сыреси велень Культурань кудонь прявтокс ды библиотекарекс. Те велесэнть сон эри комсь иеть. Ловнома кудонтень совамсто, теке мерят, понгить ютазь шкас. Ташто книгат, ташто лавсят, краеведениянь ужине, косо ванстовить кезэрень ули-парот. Меельце шкане састь ламо книгат эрзянь кельсэ. Неть: Мордовиянь народной писательтнень Кузьма Абрамовонь ды Александр Доронинэнь книгаст. Ансяк вана ловныцятнеде аламо. Паро, кизна тей совсить ошонь инжетне, конат оймсить велесэ. Паро инже тесэ велень прявтось А.К. Пискайкингак.
Библиотекась ашти велень клубонть потсо. Клубонь зданиясь ульнесь Тарханова велесэ волостень управлениякс. Тосто рамизь ды путызь тей школакс. Тесэ тонавтнесть вишка классо тонавтницятне. Ней вана – Культурань кудо, косо ютавтыть вастовомат, велень кенярксчить. Нама, ташто, нама, эряви витнемс-петнемс. Валентина Петровна мерсь, сынь натой виздить, кодамо клубонь зданиясь. Минь оймавтынек, улить седеяк таштот, натой вальмавтомо ды озамо таркавтомо, косо а уштытькак. Ялатеке ломантне учить, кемить, зярдояк карми Культурань од кудо!

Паряк, нейсызь сёрмадовксонок культурань сферань прявттнэ ды лездыть теньсэ.

Содамга:
Селища велесь ашти Ратор (Алатырь) леенть чиресэ. Революциядо икеле ульнесь Симбирской губерниянь Орданьбуень уездсэ. Лиякс те велентень кезэрень шкане мерсть Болдина. Сонзэ теизь Болдинасто тей сазь эрзянь ломантне. ХХ-це пингень ушодкссто тесэ эрясть 1440 ломанть. Михаил Архистратиг лемсэ чувтонь церьковась стявтозель 1900 иестэ. Советэнь шкатнестэ яжазель. Ней стявтозь кирпецень од церькова

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».