Понедельник, июля 22, 2024
Важное

Аволь умок Н. П. Огарёв лемсэ МГУ-со ютавтовсть эрзянь, мокшонь кельтнень Регионъютконь XXV-це олимпиадань республиканской пельксэсь ды татаронь келень ды литературань коряс региональной пелькстамось.
Эрзянь ды мокшонь кельтнень коряс содамочист невтизь малав 120 тонавтницят. Сехте виевтне лиссть Регионъютконь пельксэс. Сон карми февралень 28-це ды мартонь 1-це читнестэ.


Эрзянь келень коряс республиканской олимпиадасонть пелькстасть малав 60 тонавтницят Саранск ошонь ды республикань районтнэнь школатнестэ. Эсь содамочитнень ды ёрокчитнень невтицятнень ютксо Орданьбуень средней школань тонавтницятне Анастасия Максимова, София Кручинкина, Мария Ботнина ды Божена Борисова. Сынст марто сакшнось эрзянь келень тонавтыцяст Татьяна Михайловна Федорчукова. Сон миненек ёвтнеськак, кодамо лувсо ветяви важодема рузонь школатнесэ эрзянь кельтнень тонавтоманть коряс.

– Минек школасо эрзянь келесь тонавтови 2-це классто саезь 7-це классос, кода республикань ламот лия школатнесэяк, – корты Татьяна Федорчукова. – Теке марто лиятнень эйстэ улить явовиксчитькак. Бути 2-це ды 3-це класстнэсэ эрзянь келесь минек ветяви кода урок, 4-7-це класстнэсэ – кода внеурочной занятия.

Ансяк вана мезеяк лангс апак вано, эрзянь келенть тонавтнемантень эйкакштне явить мель, кадык ламот эйстэст келенть овсе а содасызьгак – чачсть-кассть рузонь ды лия раськень семиясо.
– Эштё зярыя шкадо икеле тиринь кельтнень тонавтнемась ветявсь аламодо лия лувсо. Ульнесь оценкань система. Эйкакштнень туртов те ульнесь седе интересна. Сынь, мерят, пелькстыльть вейкест-вейкест марто келенть содамонзо коряс эсь содамочитнесэ. Ней жо оценкат а путовить. Ансяк минек важодемась эзь полавтово. Эйкакштненень бажатано максомс седе ламо, виевгавтомс тонавтнемантень сынст мелест, – кемексты Татьяна Михайловна. – Эйкакштнень марто уроконть снартнетяно теемс седе мельстуицякс, ветятано сонзэ налксемань лувсо. Стихть тонавтнетяно эрзянь кельсэ, невттяно эсь содамочитнень эрьва кодамо пелькстамотнесэ, олимпиадатнесэ. Конкурстнэсэ сынь свал анокт пелькстамс, анокстыть вадрясто. Пек лездыть тетятне-аватне. Ды, эряви меремс, тетятне-аватне овсе а молить сень каршо, штобу эйкакшост тонавтневельть эрзянь келенть. Сынь куш мейсэ анокт лездамс. Минь пелькстатано кода школань, истя республикань ды весероссиянь конкурстнэсэ ды олимпиадатнесэ. Ламоксть лиснинек изницякс ды призёрокс. Нейгак вана кемтяно, листяно изницятнень юткс.

Эряви тешкстамс, Татьяна Федорчукова Орданьбуень средней школасо эрзянь келенть тонавты уш комсте ламо иень перть. Педагогической стажозо жо 36 иеде седе ламо. Сонсь авась чачсь-кассь Орданьбуень райононь Лувне (Луньга) эрзянь велесэ. Школанть прядомадо мейле тонавтнесь М. Е. Евсевьев лемсэ МГПУ-со. Тонавтыцянь важодема кизэ ушодовсь тиринь райононь Силино велень средней школасо, косо кавто иеть роботась рузонь келень ды литературань тонавтыцякс. Мейле ютась Орданьбуень средней школав, косо, рузонь кельденть ды литературадонть башка, 2000 иестэ саезь вети эштё эрзянь келенть.
Важодемань васенце читнестэ уш Татьяна Федорчукова кемекстызе эсензэ туртов – мизолксось ламоксть седе виев кежтнень ды ацирьгалематнень коряс. Секскак чамасонзо свал чевте мизолкс, сельмесэнзэ налксить валдо сяткинеть. Эйкакштнень марто свал муи кель-вал, эрьванть чарькоди, эрьвантень лезды. Сон кемексты, тонавтыцянть васень тевезэ – эрьва эйкакшонть эйстэ кастомс алкуксонь ломань. Сон тонавты сынст эсь раськенть, сонзэ ине подвигтнень кисэ каштанчисэ аштемантень, тиринь эрзянь келенть ды чачома масторонть вечкемантень. Эдь весе неть ёнкстнэ невтить алкуксонь патриотизманть.

– Колоньгемень кото иеть уш ютасть, кода мон ветия эсь васенце уроком. Шкась ютась, эзь марявояк. Кадык минек школась рузонь, ялатеке эрзянь келенть тонавтомантень мелесь явови. Минь, тонавтыцятне, уроктнень ютавтомсто бажатано тевс нолдамс неень шкань од ёнкстнэнь ды технологиятнень, мезесь лезды кепедемс тонавтницятнень содамочитнень. Видьстэ тенк ёвтаса, эрзянь келенть мон пек вечкса ды эйкакштненьгак тонавтан эсь раськень келенть, культуранть ды койтнень-кирдатнень вечкеме. Эдь бути ванстсынек эсь тиринь келенек ды культуранок, минь ванстсынек эсь раськентькак, – толкови Татьяна Михайловна.

Эряви тешкстамс сеньгак, Татьяна Федорчукова эсь тевентень кандови творческой ёнкс марто. Сон чарькоди эрьва тонавтницянть, реди эрьванть содамочитнень, ёрокчитнень ды вешематнень. Секскак уроктнень вети истя, штобу покш мельсэ кунсоловоль эрьвась. Тонавтома лувонтень совавты интеллектуальной пелькстамот, эрьва кодат просветительской ды культурной мероприятият. Ды домкасто ваны сень мельга, штобу неть пелькстамотнесэ ды мероприятиятнесэ эсь ёрокчинзэ невтевлизе эрьва тонавтницясь.

Ды те важодемась максы а берянь невтевкст. Сонзэ тонавтницятне свал невтнить эсь содамочитнень пелькстамотнесэ ды олимпиадатнесэ. Улить ютксост изницяткак. Ды те сехте покш питне сонзэ тонавтыцянь тевентень.

– Эсь тонавтницятнень коряс аштян покш каштанчисэ. Сынь весе ёроковт, превейть. Течияк вана те олимпиадантень мон сынь ниле эсь тонавтницятнень марто. Эрьвась эйстэст пек вечксы эрзянь келенть ды тонавтни сонзэ покш мельсэ, – тешкстызе тонавтыцясь.
Ды те редяви эйкакштнень марто кортамстояк. Сынст сельметнесэ ули ламонть содамонь бажамо, эрзянь келенть тонавтнемадо ёвтнить покш мельспаросо. Снартнить кортамскак. Кода тешкстызе Настя Максимова, олимпиадасо эсь содамочитнень сон невтни аволь васенцеде. Эрзякс тейтерькась чарькодьсы весементь, аламодо машты кортамояк. Теньсэ ламосо тензэ лездыть авазо ды тетязо, конатне сынсь эрзянь ломанть. Ды кудосо сеедьстэ кортыть эрзякс. Сынст салавань кортамотнень чарькодемга, келенть тонавтнизе тейтерькаськак.

Божена Борисовань тетязо эрзя. Ды эрзянь кельсэ кортамотнень сонгак марси сеедьстэ. А школасо келень тонавтнемась лезды марязь валтнэнь седе кемекстамс.
А вана Покш Березникень 2-це № СОШ-нь ды средней школань тонавтницятне Анастасия Юткина ды Кристина Пушкова, конатне олимпиадань пелькстамонтень сакшность Светлана Михайловна Аношкина тонавтыцяст марто, келенть седе вадрясто тонавтнемга кунсолыть эрзянь моротнень. Тейтерькатнень валост коряс, истямо лувсо валтнэ седе парсте кадовить превс. Кода тешкстызь тейтерькатне, сынст школатнесэ эрзянь келесь тонавтови ансяк начальной школасо (2-це, 3-це ды 4-це класстнэсэ). Нама, те аламо. Ансяк тень лангс апак вано, эйкакштне а менстить куш эсест районсо, куш республикасо эрзянь келенть коряс вейкеяк пелькстамо. Эдь келенть тонавтнемантень сынст ули мелест.

2023 иесь Россиянь Президентэнть Владимир Владимирович Путинэнь мереманзо коряс яволявтозь Педагогонь ды наставникень иекс. Те эрявикс ды покш тевенть марто сюлмавозь ламо ломанть, ламо профессият. Прявтось эйстэст – тонавтыцятне. Куш кодамо велесэ, вишка ошкесэ ды покш ошсо школасо тонавтыцятне, педагогической трудонь ветерантнэ, конат весе эрямост алтызь те а шожда, эрявикс ды вадря тевентень – эйкакштнень кастомантень ды тонавтомантень – те покштояк покш сюпавчи. Эдь сынст тевенть эйстэ ашти пек ламось – минек масторонть вандынь чизэ!

Юлия Еремина
Фототне
Эдуард РЕТУНСКИЕНЬ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».