Аволь умок весе масторось тешкстызе сехте лембе ды валдо кенярксчинть – Авань чинть. Эрьванть эрямосо авась – прявт ломань. Сехте вечкевикс ды сехте питней.
Кенярксчиденть икеле минек редакцияв сась поздоров марто сёрма. Сонзэ кучизь Дубёнкань райононь Поводелестэ. Эйсэнзэ ламо лембе валт эсь тиринь аванстэнь, А. Н. Стёпкинанень, ёвтыть эйкакшонзо.
– Авань чинть кувалма седейстэ ютыця лембе поздоровт ёвтатано вечкевикс аванок Стёпкина Анна Никитичнань туртов.
Ули моданть лангсо вечкема, конась а онкстави кодамояк онкстамосо, а лепами иетнень ютазь – те авань певтеме вечкемась. Ламо эйсэнзэ валдо, лембе, вий ды кемема. Авань вечкемась свал неяви сонзэ оймень тевтнесэ, важодемасо, кисэнек ризнэмасо.
Минь, эйкакштне, те вечкеманть сайтяно эрямонок перть. Зярс ават эри – семс тон свал эйкакшат.
Тетянь-авань кудось – те таркине, козонь свал пурнавкшныть эйкакштне ды нуцькатне, косо свал учить эйсэнек ды вастыть седейлембень казезь. Мезезэ бу а улевель авань, мезе бу а таштаволь, сон весементь яви эйкакшонзо ланга. Тетянь-авань кудось – те чопода вене валдо теште, конась, теке маяк, невти ки, максы вийть, оймсема, оймень таргамо. Авам – истямо ломанесь, конась машты кунсоломо ды максомо виде превть. Сонзэ превс путоматне пурназь эрямостонть, покштятнень-бабатнень пельде, сюлмсезь теке човалинеть ве карькскес ды таргсевить эрямонь мелявкстнэнь коряс, сетне, конатне эрявить те эли тона шкастонть.
Тон минек сехте мазый ды превей ава, сехте питней ды вадря ломань весе масторсонть, тон свал казят тенек оймень лембе ды чевте мизолкс. Ульть свал истямо вечкиця, чарькодиця авакс ды сырькаекс. Кадык эрьва чись карми кенярксовокс, уцяскавокс ды эрьва иесь канды вийть ды ёрокчи! Эряк, авай, ламо иеть! Кеме шумбрачи тонеть, валдо менель моданть лангсо. Сюкпря теть весементь кисэ!
Тонь эйкакшот: Валя, Галя,
Витя, Оля.
Вечкевикс ловныцят, бути ули меленк минек газетанть вельде ёвтамс поздоровт ды лембе валт малавиксэнк туртов, сёрмадодо. Тынк пельде – тиринь ломаненк ланга ёвтнема, мазый фотография ды «Эрзянь правда» газетанть лангс сёрмадстома. Минь жо газетань лопатнесэ ды социальной сеттнень эсь группатнесэ сёрмадтано те ломаненть ланга мельстуиця материал. Кучодо эсь сёрматнень.