Сась тундось ды сонзэ марто ушодовсть паксянь тевтне. Те иестэ ловось солась шкадо икеле, ды минек республикань аграрийтне уш кундасть паксянь тевтнес. Мартонь меельце читнестэ васенце трактортнэ ушодсть андомо ламо иень тикшетнень ды озимой культуратнень эрявикс минеральной удобрениятнеде. МР-нь Минсельхозпродонь максоматнень коряс, озимой сюротнеде видезь 176 тежат гектарт. Истя жо ветяви соказь модатнень изамось ды зярыя районтнэсэ ушодовсть тундонь видемань тевтне. Региононь велень хозяйствань предприятиятнень ули весе эрявиксэсь, штобу роботатнень прядомс шкастонзо ды агротехнологиятнень топавтозь.
Тундонь тевтне весе вийсэ молить Ицялонь райононь «Агропромсервис» ООО-сояк, косо прявтокс ламо иень перть важоди алкуксонь аграрникесь Владимир Ильич НУЖНОВ. Мартонь 31-це чистэ предприятиясонть ушодовсь сюротнень видемась. Васенцекс видизь шужонть.
«Агропромсервис» велень хозяйствань предприятиясь ютазь иень сексня озимой товзюродонть видсь 1425 гектарт. Ней неть паксятнесэ видьметнень ды ламо иень тикшетнень минеральной удобрениядо андомаськак уш топавтозь.
Яровой сюротнень алов явозь 3200 гектарт. Тень ютксо, 554 гектарт – яровой товзюро, 1276 гектарт – шуж, 170 гектарт – сюрокс кукуруза, 595 гектарт – кснав, 167 гектарт – соя. 165 гектарт хозяйствасонть явозь силосокс кукурузанть алов. Ламбамо якстерькайденть те иестэ видевить 1978 гектарт. Истя жо видевить веиень ды ламо иень тикшеть.
Сортонь одкстомтоманть туртов эрьва ие рамавить яровой товзюронь, шужонь, соянь, кснавонь элитной видьметь. Кода мерсь Владимир Нужнов, течи эряви роботамс сюронть вадрячинзэ кастоманть коряс, штобу сон улевель аволь ансяк ламо, истя жо паро. Ютаволь аволь ансяк ракшатнень андоманть туртов, почтонь теемантеньгак. Теке марто те питнентькак седе кастсы, истямо сюронть рамицянзояк седе ламо.
Велень хозяйствань техникань коряскак предприятиясонть мелявкст арасть. Сон весе вадря, ламо мезе рамазь меельце иетнестэ. Трактортнэнь-машинатнень ды эрявикс агрегаттнэнь одкстомтоманть-полавтоманть мельга тесэ ваныть пштистэ. Неень шкане ули ламо вадря техника, конась аволь ансяк важодеманть шождалгавты, истя жо урожайностенть кастомасояк лезды. Телень перть сонзэ витнизь-анокстызь ды ней важоди кода эряви.
Тундонь видематнесэ хозяйствасонть важодить кавто неень шкань агрегатт. Эште колмотне – моданть изамосо-анокстамосо.
Техникась витнезь, видьметне ды удобрениятне анокстазь сатышка, ГСМ-сь рамазь ды сехте прявтось – улить вадря, эсь тевень содыця специалистт ды механизаторт. Куш кодамо тевсэ те сехте эрявиксэсь.
Сынь лиякс а маштыть
Мезе иля корта, эрьва предприятиянть юрозо – важодиця ломантне. Неень шкасто трактористтнэ, механизатортнэ, водительтне, видицятне ды хозяйстванть туртов эрявикс лия важодицятне – покш питнейчи куш кодамо предприятиянть туртов. Эдь сынст лангс весе кемемась.
Андрей Николаевич ДУПЛЕНКОВ «Агропромсервис» ООО-со роботы механизаторокс-трактористэкс малав кеветее иеть. Весе те шканть перть тевтнень топавты тракторонь руль экшсэ. Андрей Николаевичень чачома-касома тарказо – Ицялонь Оброчное велесь. Школанть прядомадо мейле тонавтнесь Саранск ошонь 10-це № СПТУ-со, косо максозель тензэ механизаторонь профессиясь. Училищанть прядомадо мейле важодемань кинзэ ушодызе эсь райононь колхозсо. Андрей Николаевич – вете эйкакшонь тетя. Сонзэ кавто тейтерьканзо ды колмо церанзо!
Механизаторось свал тевсэ, кизэнек-теленек. Тундось, кода содатано, – велень хозяйствань весе важодицятнень туртов пси шка, трактористтнэнь туртов жо седеяк. Андрей Дупленков ероков куш мейсэ. Сон модатненьгак соки-изы, видемасояк важоди. Неть тевтне прядовить, вант, тикшетнень анокстамось, сюротнень нуемась ушодови. Сексня кенери ламбамо якстерькаесь, сонзэ урядама. Зярдо жо паксятне чамить, тагояк ушодовить видемантень анокстамот.
– Тельня механизатортнэнь учить лия эрявикс тевть, эряви витнемс-анокстамс эсь техниканть, конавтомонть минь ковгак, – корты Андрей Николаевич. – Техникась минек андыцянок. Ды штобу тракторось эли машинась вадрясто ды кувать важодевельть, сыненст эряви явомс башка мель.
Иван Николаевич ОГУРЦОВ те хозяйствасонть роботы 2019 иестэ саезь. Сон чачсь Орданьбуесэ. Ней семиянзо марто эри Станция Оброчное поселкасо. Сыненст вечкевсь районось, лиссь важодема таркаяк. Ды велень хозяйствасо эсь содамочитнень ламолгавтомга, церась тонавтнесь Кемлянь аграрной колледжсэ. Иван важоди водителекс. Ардтни ГАЗ-53 машинасо. Видеманть шкасто сон ускси видьметнень. Нуеманть шкасто жо сюронть пачти КЗС-в ды утомс, паксястояк ускси, бути а сатныть машинат.
– Машинам пек вадря, виензэ сатышкат ды арды паксянь куш кодамо киява. Мартонзо мелявкст а лиснить. А те пек паро, шкась а таргсеви, – тешксты церась. – Ней, видема шкастонть, роботамс эряви седе эрязасто. Ды, сюронь урядамстояк истя жо. Эдь бути шкастонзо тевенть тейсак, невтевкстнэяк кармить вадрят. Велень хозяйствасо те покш тев.
«Агропромсервис» ООО-со истя важоди эрьвась. Свал бажить весементь теемс шкастонзо ды ливтемс эсь хозяйстванть икеле молицятнень юткс.
Минь жо карматано кемеме, «Агропромсервис» ООО-нь аграрийтне кармить изницякс (истя ульнесь а весть) трудовой соперничествань республикань пелькстамосонть, конань изницятне евтавкшныть Велень хозяйствань ды перерабатывающей промышленностень кенярксчинть тешкстамсто. Секскак арсетяно хозяйствантень вадря ие ды сюпав урожай!
Юлия Еремина
Фототне Егор ГОРИНЭНЬ.