Лембе телесь ды ловонь арасьчись теизь эсь тевест. Аграрийтнень туртов тедеде паксянь тевтне ушодовсть натой мартонь меельце читнестэ. Ромодановань «АПО Элеком» ОАО-со важодицятне, конатнень марто минь вастневкшнинек ютазь недлястонть, евтнизь тенек, мейстэ сынст предприятиясо ушодовсь видемась.
Корьмай модась теке ава, конань бути а васькавтсак, а путат тензэ вийть ды а валат лангсонзо ливезь, сонгак а макссы теть лембензэ ды сюпавчинзэ. Минь уш а весть якинек «Элекомов» ды содасынек – тосо важодить эсь тевень вечкиця ды седейга тевень теиця ломанть. Паксятнень лангсо прявт азорось – агрономось Виктор Вячеславович ПАУЛКИН. Сон домкасто евтнесь видема шканть мелявкстнэде. Трактортнэ паксяв лиссть мартонь 31-це чистэ. Минь сакшнынек тенст колмо чинь ютазь, ды те шканть перть кенерсть уш видеме 500 гектарт. Ушодсть шужсто. Тедеде арсеви видемс 400 гектарт пиянь пидемань туртов шуж ды 672 гектарт фуражокс шуж. Весемезэ 1072 гектарт. Пиянь пидемань шужонь видьметне рамазельть, а фуражокс молицянть – эсест.
«Сексня минек видезельть 2500 гектарт озимойть. Лембе пертьпельксэнть лангс апак вано, озимой сюротне ютавтызь теленть аберяньстэ. Сексня уш кавто лопинес касомо туекшнесть, ней вансынек, кодамо пертьпельксэсь карми седе тов. Минеральной удобрениядо андоманть ютавтынек целанек.
Мартонь 31-це чистэ паксятнес нолдазель ансяк вейке агрегат. Овторникстэ уш омбоце комплексэнть нолдынек. Середасто – колмоценть, конась важоди Ромодановань райононь Курмачкасы веленть маласо. Ней ве шкасто моли видемаськак ды паксятнень изамоськак.
Важодемань чинть перть вейке комплексэсь юты малав 100 гектарт. Тевтне ветявить валскестэ саезь чокшнес, зярс а чополгады, лиякс а кенерят. Эряви а емавтомс модастонть летькенть. Нама, модась парсте зярс эзь эже, ансяк шужось кельмеде а пели, бути максы кавто лопинетькак – кирди -8 градуст. Ды пертьпельксэськак минек а учни – течи маней, ванды пиземе…» – мелявтозь евтни ушодовозь тевтнеде Виктор Вячеславович.
Шуждо мейле сеске видеви яровой товзюрось. Сонзэ алов явозь 550 гектарт. Седе мейле молить лия культуратне: кснавдонть – 400, чиньжарамодонть – 630, сюрокс кукурузадонть – 50, силосокс кукурузадонть – 480. Теде башка, видевить веиень тикшеть – 968 ды ламо иень – 524. Тедеде оймсеме кадовить 242 гектарт. Якшамотнеде пек пели ламбамо якстерькаесь. Сонзэ видемензэ капшамс а эряви. Тедеде якстерькаенть алов явозь 2 тежат гектарт. Весемезэ «АПО Элеком» ОАО-нь паксянзо 9416 гектарт.
Вейке видемань комплекссэнть важоди Андрей Николаевич ФИЛАЛЕЕВ. Церась чачсь Ромодановань райононь Липки поселкасо. Тонавтнесь Кемлянь аграрной техникумсо. Се шкастонть саезь эсь прянзо алтызе велень хозяйствань тевентень. 10 иеть важоди «АПО Элеком» предприятиясонть. Агрегатозо, ловт, од, важоди ансяк омбоце сезон. Азорось эйсэнзэ шны, келя, техникась пек паро. Целанек топавтозь автоматикасо: мониторось невти весементь – зяро видьметь каязь, зяро бункерсэнть кадовсть сюродонть. Бункерэнтень кельгить 4 тоннат. Сменазонзо, бути пертьпельксэсь максы, 12 часонь перть ютавить малав 80–90 гектарт.
– Андрей Николаевич, мекс кочкинк велень хозяйствань енксонть?
– Монь семиясо ульнесть велень хозяйствасо важодицят. Крестной тетям важодсь инженерэкс, покштямгак бабань марто пингень перть колхозсо роботасть. Мон кода прядыя Рузаевкань чугункань кинь училищанть, чарькодинь, те тевесь аволь мелень коряс, молинь Кемлянь аграрной техникумов тонавтнеме. Ды се шкастонть саезь тесэ важодян. Пек мелезэнь тукшны. Мон оймсян тесэ. Ламо тевть улить аволь иень перть, кенерят эрьва ков, – паро мельсэ евтни эсь прядонзо од тракторонь азорось.
Андреень семиязо покш. Эйкакшонзо ниле: колмо тейтерть ды цера. Меельце тейтерькантень ансяк 10 ковт. Кавтотне школасот, вейкесь – эйдень кужов яки. Андреень низэ Отяжелень райононь Таразбуестэ. Вейсэ эрить 15 иеть. Содавиксэкс нинзэ марто теевсть Кемлясо тонавтнемстэ. Тейтересь тонавтнесь зоотехникекс. Вастовсть ды тусть вейкест-вейкест мельс… Эрить Ромодановасо, косо стявтсть кудо.
Лия трактористэсь – Сергей Иванович АБРАМОВ – топавты изамонь тевтнень. Церанть чачома тарказо – Ицялонь райононь Селища велесь. Школанть прядомадо мейле сеске ушодсь важодеме. Мейле ютась служба армиясо. Армиядо мейле велявтсь мекев тиринь колхозов. Ули семиязо. Касыть кавто тейтерьканзо. Кавонест уш покшт, вейкесь тонавтни школасо, омбоцесь – техникумсо. Сергей Абрамовонь тетязо истя жо колхозсо роботась, секскак церанть икеле эзь аште кевкстемась – ков молемс важодеме.
Тракторстонзо каятотсь музыка, мизолдозь корты, келя, чаво паксясонть яла ломань вайгель, лиякс, тошначи сайтянзат ськамот… Моданть марто ней сон а яви, ловт, ноябряс. «Роботамось вадря, аволь кода икеле. Кабинасо а пуль, а мезе, ардт ды ардт. Кельмить – пецьканть уштык, псилгадыть – кондиционерэнть кармавтык», – мизолдозь корты эрзянь церась.
Истя жо умок важоди Сергей Петрович ВИНОКУРОВ. Сон чачсь Ромодановань райононь Старые Карачи велесэ. Важодемань кизэ ушодовсь 17 иесэ. Ансяк дизелень трактортнэнь марто содавикс уш 7 иестэ саезь. Тонавтызе тетязо. Образованиязо средней школань. Сестэ видьстэ школасо тракторонь ветямо тонавтсть ды максыльть прават. Тракторонтень, конанть руль экшсэ сон важоди, 11 иеть. Изамодонть мейле ушодови дисковамось, мейле анокстыть сексень видематненень. Церась кувать мартонок эзь кортне, шка емавтнемс мелезэ арасель, эряви капшамс тевень прядомо. Тундонь чись, кода кортыть, ие анды.
Бути пертьпельксэсь карми вадря, весе видематне прядовить кавто недлянь перть.
Марина Агафонова
Фототне Егор ГОРИНЭНЬ