Прядовсь «Равось – ояксчинь лей. Рав чиресэ эриця раськетнень культуратнень вейсэнь кортамот» Раськеютконь этнокультурной XXII-це экспедициясь-фестивалесь. Сон мольсь июнень 4-це чистэ саезь 9-це чис.
Фестивалесь ушодовсь Самарасто, мейле «Валерий Чкалов» теплоходось совсесь Тетюши, Болгары, Свияжск, Казань, Нижнекамск, Елабуга ды Ульяновск оштнес. Экспедициясонть ульнесть весемезэ 70 участникть Россиянь зярыя регионтнэстэ, истя жо Крымстэ ды Севастопольстэ. Ютксост общественной деятельть, педагогт, журналистт, культурань роботникть. Экспедициянть прявтсо ульнесь МР-нь Культурань, раськень политикань ды архивень тевень министрась Светлана Баулина.
Этноэкспедициянь шкасто теплоходсонть ютасть дискуссият, мастер-класст, регионтнэнь-участниктнень презентацият, вастовомат ды ламо экскурсият. Роботасть тиринь кельтнень ды литературатнень неень шкань эрямодост, НКО-тнень важодемадост секцият, эрьва чистэ чемпион марто зарядкат, келень тонавтнемань урокт, проектэнь фестивальть. «Эрзянь правда» газетанть пельде Равга укшномо якась минек фотокорреспондентэсь Эдуард Ретунский, сон анокстакшнось «Мир без экстремизма и терроризма» выставка ды ускизе тосто те фоторепортажонть. Ванодо паро мельсэ!