Мордовиясо уш колмоцеде Культурань инициативатнень Президентэнь фондонть лезксэнзэ пингстэ ютавтови «Время героев» Раськень премиясь. Тедеде сон васенцеде кармась регионъютконь – сонензэ вейсэндявсть Россиянь вете регионт. Каязь 2500 ламо яволявтомат, 125 ломанть кармасть номинантокс. Зярыя ковтнень перть мольсь панжадо вайгелень максомась, ды регионтнэнь эрицятне кочкизь минек шкань геройтнень – вайгелень максома шкастонть эрицятнень пельде номинанттнэнь кисэ максозельть 337 тёжат вайгельть.
Сентябрянь 14-це чистэ «Мордовия Арена» стадионсонть ютавтовсь «Время героев» премиянь изницятнень каземась. Тосо ульнесь Мордовиянь Прявтось Артём Здунов.
«Те фестивалесь теевсь минек туртов вадря коекс, конань сёрмадсынек Мордовиянь историянь лопатнес. Течи тешкстатано сетнень, кить топавтсть ине тевть тевдеемань эрьва кодат енкстнэсэ, – мерсь Артём Здунов. – Ризксэнтень, ютксонок арасть сетне, кить максызь эсь эрямост Тиринь масторонь западонь рубежтнесэ. Свалшкань ледстнема геройтненень, конат чавовсть Россиянь суверенитетэнть, минек масторонть кисэ».
Масторонь геройтнень ледстизь чатьмонемань минутасо.
«Время героев» раськень премиясь теезь «Подвиги» аволь коммерческой социальной медиапроектэнь команданть ушодксонзо вельде. Премиянтень уш колмоце ие максови Президентэнь грантонь лезкс.
«Время героев» проектэсь – сехте валдо, сон токши минек седейтнень. Геройтнень лемест свалшкас сермадовить ине Россиянь историянтень!» – тешкстась Мордовиянь Прявтось. Артём Здунов явшесь Государственной наградат СВО-нь участниктнень семиятненень, конатнень цёраст маштовсть боевой тевтнень топавтомсто. Мужествань Орденсэ казевсь Ромодановань районсо чачозесь Владимир Кладов ды Рузаевкасо чачозесь Анатолий Лапшин.
Мужестванть, отваганть ды а пелемачинть кисэ, конат невтезь воинской долгонь топавтомсто, «За отвагу» медальсэ казевсть СВО-нь участниктне ды ветерантнэ – Вадим Калугин, Сергей Макаров, Александр Теркин; Жуковонь медальсэ – Дмитрий Курченков.
Артём Здунов «Время героев» раськень премиянть максызе «Герои нашего времени» башка номинациясонть. Сон максовсь специальной военной операциянь участниктненень Константин Пронькиннэнь, Александр Беляйкиннэнь, Виталий Ергиннэнь, Евгений Автайкиннэнь ды Евгений Шнякиннэнь.
Денис Шапкарин «Подвиги» весе команданть пельде евтась сюкпря Мордовиянь Прявтонтень проектэнтень лездамонть кисэ.
Изницятнень каземась ушодовсь «Герои трудовой династии» пек эрявикс номинациястонть. Семиянь иестэнть, конань яволявтызе масторонь Президентэсь, башка тешкстыть сеть семиятнень, конатнесэ аволь вейке поколения алтызе эсь эрямонть те эли тона профессиянтень служамонтень. Те номинациясонть изницякс кармась Мордовиянь эрицясь. Сценанть лангс кузсть Оксана Старостинань педагогонь династиянтень совицятне. Тонавтыцятнень семиянь вейсэнь стажост 250 иеть.
«Герои наставничества» номинациясонть изнясь Пензань областьстэ студентэнь отрядтнэнь руководителесь Артём Колобов, казненть тензэ максызе Саранскоень ды Мордовиянь митрополитэсь Зиновий.
ПФО-со РФ-нь Президентэнь полномочной представителенть Игорь Комаровонь пельде премиянь участниктненень лембе валт ёвтась МР-ва прявт федеральной инспекторось Анатолий Гулин.
Премиянь смустесь ды прявт питнейчись – тонавтомась. Изницятнень вельде тесэ пурназь пек вадря невтевкст, конатненень эряви явомс мель, конатне истя эрявить те аволь шожда шкастонть.
«Герои по призванию» номинациясонть казненть максызь лия енов а молиця ломанентень – Россиянь Героентень, «Уральские авиалинии» авиакомпаниянь коштонь суднань командирэнтень Дамир Юсуповнень. Вете иеде икеле сон идесь 233 эрямот, вадрясто топавтызе самолетонь аварийной озавтоманть кукурузань паксяс. Казне максозь Чувашиясто МЧС-нь сотрудникентень Сергей Аршиновнень. «Герои правопорядка» номинациясонть изницякс кармасть Нижегородской областьстэ Екатерина Сиротина, Александр Соколов ды Дмитрий Воеводин.
«Герои семьи» номинациясонть изнясь Мордовиясто Юрий ды Надежда Горшенинтнэнь семиясь, сынь трить-кастыть ниле эйкакшт ды топавтыть паро тевть.
«Герой медицины» номинациясонть изнясь Мордовиясто врачось-гинекологось Фаина Магдеева, сон профессиясонть уш 44 иеть, «Наукань героесь» – Нижегородской областьстэ биофизикесь Марина Ширманова, «Промышленностень героесь» – Мордовиясто «ВКМ-Сталень» сталеварось Виталий Кузнецов.
«Герои добровольчества» номинациясонть экспертэнь советэсь кочкась сеске зярыя изницят. Те Ульяновской областьстэ Юлия Куценко, Мордовиясто протоиереесь Владимир Кугушев, Никита Иванов предпринимателесь.
«Герой социального предпринимательства» номинациясонть изницякс кармась Чувашиясто Сергей Сорокин, сон важоди строительствасо; «Герои воспитания» номинациясонть изнясь Пензань областьстэ Екатерина Вдовина.
«Герой культуры» номинациясонть изницякс кармась Воронин лемсэ Мордовиянь краеведениянь музеень прявтось Дмитрий Фролов.
«Герои спорта» номинациясонть изнясь Юрий Назаров, «Герой преодоления» – Александр Яшин, кавонест Ульяновской областьстэ. «Герой сельского хозяйства» номинациясонть изницякс кармась Пензань областьстэ передовикесь Юрий Родионов.
«Герои трудовой династии. Основатель» башка номинациясонть изнясь Мордовиясто Валентина Бучумова – «Саранский» ЛВЗ предприятиясонть сонзэ важодемань стажозо 43 иеть. «Герои качества» эште вейке башка номинациясонть казевсь «Атяшевский» сывелень переработкань комбинатонь Торбеевань подразделениянь производствань прявтось Ольга Сорудейкина.
«Герои зоозащиты» номинациясонть изнясь Пензань областьстэ Наталия Кадомцева, «Герои экологии» – Мордовиясто квадро-эко-патрулень теицясь Надежда Бояркина, «Герои сервиса» – Нижегородской областьстэ электрогазосварщикесь Михаил Дёмкин, «Герои транспорта» – Пензань областьстэ аэродромонь службань прявтось Валерий Маслов.
«Герой сохранения исторической памяти» лемесь максовсь Мордовиясто вешнемань отрядонь ветицянтень Александр Планкиннэнь, «Герой исполнительского искусства» – Чувашиясто Елена Хорькованень, «Герой декоративно-прикладного искусства» – Нижегородской областьстэ Наталия Панкованень.
«Герой медиа» номинациясонть изницякс кармась Пензань областьстэ 20 иень стаж марто спортонь журналистэсь ды комментаторось Владимир Тер-Казаров. «Герои по зову сердца» номинациясонть изнясь Чувашиясто ламо эйкакшонь авась Надежда Цветкова.
«Время героев» церемониянть прядовомга «Мордовия Арена» стадионсонть морась Dabro группась.