«Тиринь келем – сехте мазый!» – истямо лем ало апрелень меельце читнестэ Нижегородской областень Пикшня эрзянь велесэ ютась регионъютконь V фестивалесь, конась анокстазель Культурань инициативатнень Президентэнь фондонть лезксэнзэ вельде.
Пикшня велесь зярдо-бути ульнесь эсенек, Мордовиянь. Сон аштияк овсе а васоло Покш Игнатбуенть эйстэ, кавто регионтнэнь границясо. Эри эште тесэ эрзянь келесь, маряви, седеяк тесэ эйсэнзэ пек вечкить, теить весементь, штобу эрязо, пачтяволь эйкакштнень ды нуцькатнень туртов. Покш таликазо теньсэ Пикшнянь Культурань кудонть, косо морси эрзянь морот «Чилисема» фольклорной ансамблясь ды аноксты истят эрявикс вастовомат. Ды кода а ванстомс, эдь Пикшнясо чачсь эрзянь поэтэсь Павел Кириллович Любаев ды сонзэ лемезэ тесэ ванстовикс ды ледстневикс.
Фестивалесь панжизе велесэнть Россиянь раськетнень вейсэндявомань иенть ды а стяко ютавтозель Эрзянь келень чинть тешкстамо читнестэ. Покш Болдинань округсо кемекстыть: эрзянь раськень культурась ды келесь – минек покш масторонь раськетнень культурань кодонь а явовикс пелькс.
Пиземев чись эзинзе тандавто киньгак, киштеме-морамо, стихень евтнеме, выставкатнесэ кедьчелькев теевкстнэнь ды тантей эрзянь пидевкстнэнь-паневкстнэнь невтеме Пикшняв сакшность 100 ламо ломанть кода Нижегородской областьстэ, истя Мордовиянь Ицялбуестэ ды Покш Игнатбуестэ. Каймакт, прякат, поза, калязь алт, пачалксеть… – истя каванясть инжетнень Пикшнянь ды Пермеевань аватне. Кияк эзь юта вакска! Тешкстасынек, весе морыцятне каванязельть тантей сывелень ямдо ды тикшень тантей чайде.
Панжизе фестиваленть Покш Болдинасто «Серпантин» од ломанень киштемань коллективесь вейсэ «Ялгат», «Килейне», «Чилисема», «Марьюшка», «Ойме», «Ялгинеть», «Пизелнэ» ансамблятнень марто. Эрзянь раськень штатолонть кирвазтизе «Мордовский культурный центр «Ялгат» вейсэндявксонь прявтось Михаил Иванович Безаев, ды мейле участниктне штатолонть мельга ютасть весе залонть перька. Истя невтезель паро тевень ушодыця коесь.
Почетной инжетнень ютксо истя жо ульнесть Покш Болдинань райононь администрациянь прявтонь полавтыцясь Игорь Николаевич Мухреев, тосонь губернаторонь советникесь Николай Павлович Шкилев, Пикшня велень администрациянь прявтось Дмитрий Александрович Сеняев, «Эрзянь правда» газетань прявт редакторось Марина Николаевна Девятова, Равчирень финно-угрань раськетнень культурань куншкакуронь этнокультурань касомань-виевгавтомань отделэнь прявтось Валентина Владимировна Дыдыкина ды МР-нь заслуженной артистэсь, Мордовиянь филармониянь морыцясь Артем Мамаев. Сюкпрянь коневсо казезельть Пикшня велень аватне Любовь Доронина ды Татьяна Туршатова, конатне ламо тейсть тесэнь культуранть ванстоманзо туртов.
Концертэнь программась пек сюпаволь, сон мольсь колмо част, ды мезе кенярдовтсь, малав весе моротне ды стихтне гайгсть тиринь эрзянь кельсэ. Нама, эзть стувтовкшно рузонь моротнеяк. «Тиринь келем – сехте мазый!» фестивалесь невтизе, зярс минь ледстнетяно эсенек ундоксонок, кортатано тиринь кельсэ ды невттяно коенек-кирданок эйкакшонок туртов – раськень культурась эри ды виевгады.
Марина Девятова
Фототне авторонть.