Суббота, сентября 18, 2021
Важное
Финнэнь-угрань раськетнень ушманонь виень варчнемань «Тюштя» вейсэндявксонь прявтось Павел Валерьевич Мигунов сеть ломантнень ютксто, кить а вечкить аштеме тевтеме. Сон ламо иень перть топавты тев, кона сюлмавозь спортонть марто, ды весе виензэ путы сень туртов, кода бу одс велявтомс ды эрямос совавтомс сеть койтнень, кодат ульнесть седикеле финнэнь-угрань раськетнень эрямосо од ломантнень шумбракс ды виевекс кастомань коряс.
 Тень кисэ Павел Валерьевич апак лотксе ардтни сеть таркатнева, косо эрить финнэнь-угрань раськень ломанть, ёвтни ды невтни, кода седикеле од ломантне невтнесть эсь виест, кодат пелькстамот ютавтнесть эсь ютковаст. Нейгак, кезовонть лангс апак вано, сон свал ки лангсо. Мордовиясто лия делегаттнэнь марто якась Ижевск ошов, косо аштемковонь (июнень) 3-4-це читнестэ ульнесь Россиянь финнэнь-угрань раськетнень форумось. Кода ютась те покштояк покш вастовомась, кодат кевкстемат кепедезельть эйсэнзэ, арсинек содамс Павел Валерьевич Мигуновонь пельде.

– Павел Валерьевич, кезовонть лангс апак вано, те кизэсь тынк туртов пештязь эрьва кодамо тевде. Маринек, якатадо эрьва ков. Ульниде Россиянь финнэнь-угрань раськетнень форумсояк, кона ютась Ижевск ошсо аштемковонь 3-4-це читнестэ. Тосо, арсетяно, ульниде аволь ансяк кунсолыцякс, тынськак ёвтынк эсенк меленк-арсеманк сень коряс, кода ванстомс ды седе тов кемекстамс минек раськетнень коест-кирдаст.

– Форумсонть стяко аштемс, нама, эзь саво. Тов сыргамодо икеле ёвтынь мель ютавтомс «кругловой столь» истямо лем ало: «Раськень налксематне ды пелькстамотне кода этнокультурной ды патриотической тевень ветямонь пелькс». Форумонь ютавтыцятне эзть моле каршо, саизь мельс-превс. Виде, кезовонть кувалма форумонь программанть арсезель а келейгавтомс. Мерсть тень коряс анокстамс покш кортамо ды лисемс мартонзо од ломантнень икелев. Истя теиньгак. Зярдо яволявтозель од ломанень вастовомань ютавтомадо тердемась, васня кой-кить арсесть, тов пурнавить аволь ламот. Секс сонзэ туртов максозель вишка залось. Лиссь мекевлангт. Лия секциятнесэ ломантнеде ков седе аламольть. Од ломанень секцияв жо састь зярыяксть седе ламо. Секс вастовомань ютавтома таркантькак савсь полавтомс седе покш лангс.

– Косто саевсть од ломантне? Кода содатано, форумов ламо ломанть пурнамс эзь мереве.

– Састь весе, кить пурнавкшность форумонтень. Лия секциятнесэ кепсевсть кевкстемат, конат сюлмавозь тиринь келенть ванстоманзо ды седе тов сюпалгавтоманзо марто. Тов якасть ломанть, кинень малавикс те тевесь: литературоведт, профессорт, тонавтыцят. Аволь аламо ломанть пурнавкшность секциянтень, косо кортасть айти-технологиятнеде. Минек секциясо ульнесть сеть, кить бажить седе ламо содамс, кода седе парсте ладямс од ломантнень марто сюлмотнень, тердемс сынст эсь раськень культуранть, койтнень-кирдатнень вечкеме. Ламонь мелест покшоль содамс, мезе тееви од ломантнень эрямосо этнокультурной ёнкстнэнь совавтоманть коряс. Тосо ульнесть сеть, кинь седеест сэреди раськень койтнень ванстомаст кисэ. Мезе теема неть койтнень ванстомга? Васняяк, эряви од ломантнень ды эйкакштнень теемс содавиксэкс неть койтнень марто, невтемс тенст, кодат налксемат ды пелькстамот ютавтнесть кезэрень шкасто эриця од ломантне. Кортамонть ушодызе секциянь модераторось Е. Ледяйкин. Мельганзо кортынь мон.

– Кевкстемам ули, кона, паряк, тынк туртов карми апак учонь ды покордыця. Кода понгиде форумов? Кить кочкидизь? Зярдо ульнесть кочкамотне?

– Форумов понгинь эсень мельсэ. Зярдо маринь сонзэ ютавтомадо, пшкадинь сетненень, кить пурнасть делегаттнэнь. Ёвтыя, кодамо арсема марто молевлинь тов. Монь маримизь. Лия делегаттнэньгак, кода мон маринь, пурнызь кочкамонь апак ютавто. Кочкамот арасельть, келя, секс: те аволь инекужо (съезд), ков делегаттнэ кочкавить. Те ульнесь форум, тов якить ломанть тердемань коряс.

– Зяро чить ульниде Ижевскойсэ? Мезесь весемеде пек кадовсь мельс-превс?

– Ижевскойсэ ульнинек колмо чить. Васенце чистэнть, зярдо ульнесь вейсэнь (пленарной) промксось, сонзэ ушодомадо икеле Ижевск ошонь куншкакуросо анокстазель декоративно-прикладной шкинемань выставка. Монгак арсинь панжомс эсень интерактивной тарка – «Тюштянь налксемат». Весень, кить ютыльть се тарканть вакска, тердилинь варчамс виест «штере-суре» налксемасо. Ламот маризь тердемам. Кить варчизь, мезе истямось тапарямс суре штерень кондямо цётмар перька, сетненень меринь: сынь ней сёрмадозь Тюштянь ушмос, ды весе тень а стувтомга эрьванть снимия «Тюштянь налксемат» флагонть ало. Весень мельс те пек тусь.

– Тусь-арась мелезэнк Ижевск ошось?

– Мелезэнь весемеде пек тусь ошонь куншкакурось. Тосо араселинь кавто иеть. Пандемиядонть икеле тов якинь «Ижем Мари» вейсэндявксонть юбилеензэ тешкстамо. Сестэяк ошонь куншкакурось а берянель. Ней сон одкстомтозь ды истя парсте, сеске неяви, тосонь прявттнэ, васняяк, арсить ломантнеде. Се таркасонть аравтнезь ламо эземть, панжозь ярсамо таркат. Ули косо аштемс, ков совамс сыретнененьгак, одтнэненьгак. Секс се таркась зярдояк а эрси чаво. Од ломантне тосто а тукшнытькак.

– Удмуртонь келесь тосо гайги? Мариде удмуртокс кортыцят? Кортыть, Удмуртиясо тень коряс тевтне молить минденек седе парсте. Сынст моросткак гайгить эрьва косо.

– Минь тосо ульнинек аволь кувать. Кортыть-арась удмуртонь кельсэ тосонь эрицятне, марямс шканок арасель.

– Мон маринь, тосо ламо од морот чачить, од морокурот теевить. Аволь кода минек, косо меельце шкастонть од морот овсе а чачить, композиторонок лоткасть сёрмадомадо.

– Тень коряс монень стака мезеяк ёвтамс. Монень седе шожда кортамс седе, мезе ульнесь форумсо, од ломанень секциясо. Кортасть айтишниктне, блогертнэ.

– Удмуртиясо тень коряс, маринь, тевтне седе ладязь. Ламо од ломантне панжсть эсест лопат, ветить эсь передачат.

– Те истя. Ды мерян, Удмуртиясь сеть аламотнень ютксо, косо парсте ладязь тевтне тонавтома книгатнень анокстамост ды нолдамост коряс. Тонавтома книгатне совавтозь Россиянь книгань каталогс. Теде кортамось мольсь форумсонтькак.

– Ули-арась лезэст истят форумтнень?

– Нама, ули. Ков седе сеедьстэ карматано вастневеме, тов седе ламо карматано содамо финнэнь-угрань раськетнень эрямодост, седе, кодат стакачить ды асатыкст улить культурасо тевтнень ветямосонть. Истят вастовоматне лездыть седеяк малавгадомс тенек.
Вейсэ седе шожда ветямс тевтнень ды ванстомс се сюпавчинть, конань кадызь тенек покштянок-бабанок.

– Форумдонть мейле, маринек, якиде Пенза ёнксонь Бессоновской райононь Пазелка велев, косо эрьва иестэ Троицянь чистэ ютавтневи Эрзянь покш чи. Кода сон ютась тедеде? Мейсэяк явовсь ютазь иенсетнень эйстэ?

– Покш чись, кода свал, ютась пек парсте. Виень варчнемань пелькстамотнень коряс жо ульнесть полавтомат. Икеле сынь ютасть башка таркасо. Мон васня невтнинь, мезе ды кода эряви теемс. Мельган варчнизь ёрокчист лия ломантнеяк. Неень пелькстамотне анокстазельть ков седе парсте. Тердезельть тренерт, спортсмент Пензань ёнксонь районтнэстэ ды сонзэ малава аштиця регионтнэстэ. Изницянтень анокстазель паро казне – реве. Сонзэ кисэ «тюрсть» покш цёрынеть, кинь сталмост пачколесь 85 килограммас.

– Кинень понгсь ревесь? Изницякс кие лиссь?

– Изницякс лиссь Антон Миряев. Сон Чемодановка велестэ.

– Кие те ломанесь? Мейсэ сон невтизе прянзо?

– Миряев – спортсмен, самбосо бороциця. Сонензэ 18 иеть.

– Покш чинтень ломантнеде пурнавкшность, кода свал, кавто тёжат?

– Монень маряви, седеяк ламо. Тосонь эрицятне вечксызь те покш чинть. Сакшныть покш прявттнэяк. Тедедеяк ульнесть ламо. Монь маласкак сакшность. Кевкстнесть.

– Те покш чинть ютавтыцятне таго секеть ломантне? Икеле неть ульнесть Сергей Мальцев ды Павел Фомин.

– Неть ломантне тевтнень ладицят. Пензасо ули вейсэндявкс, конань прявтсо ней Елена Бакалова. Пазелкасо тевтнень эйсэ якавты Павел Фомин. Лездыть тенст, нама, велень прявттнэяк.

– Эсенк ёндо, мезенть бу полавтовлинк те покш чисэнть, мезе теде башка совавтовлиде программантень?

– Мон бу меревлинь ютавтомс чокшнень вастовома косояк ведь чиресэ. Лемдямс Ведявань налксемат, кодамо минь мартонк ютавтнинек. Чинькуншкат якить седе сыре ломанть. Сынь вечкить кунсоломо морот. Од ломантненень вечкеви пурнавкшномс чокшне ланга, тосо, косо ули ведь. Сынст тосо ули паро тарка. Тосо пек мазый эрьке. Пирясть ванькс лисьмапря (купель), козонь чопавтнеме яксить Пазнэнь кемицятне. Эйстэнзэ аволь васоло ашти эрьке. Таркась пек вадря. Ды сон пек маласо.

– Кодат арсеманк седе тов? Паряк, ковгак лия таркав тердидизь?

– Арсеман пек ламольть. Учнинь, кармить Велень озкс – Покш Игнатовасо, Ашо лисьма – Березниксэ. Ней, а содан, кармить-а кармить.

– Мезеяк а теят. Кезовось весень минек тандавтымизь. Йовлань Олонень алтазь иеськак текень кувалма стакалгавтозь. Ялатеке кемтяно, таштамковсто (сентябрясто) улить ютавтозь кавто фестивальтне, ков таго пурнавить чувто ланга керсицятне ды эрзянь моронь морыцятне. Тыненкак муеви тосо тев.

– Истя. Вирь Тавласо минь сеедьстэ ютавтнетяно эрьва кодат вастовомат. Йовлань Олонь лемсэ музеенть перька таркась аволь берянь. Ансяк сон вишкине. Кельгить тозонь сядо, кавтосядт, но аволь седе ламо ломанть. Покшолгавтомс те тарканть а кода. Миненек эряви муемс лия тарка. Ды сон тосо ули. Лемезэ – Татар пандо. Тельня тува кирякстнить сокссо. Тосо ней стявтыть инжень кудо. Вана тосо эрявияк ютавтнемс покш вастовоматнень.

– Тосо лисьмапряяк ули?

– Ули. Ды эйсэнзэ ведесь пек тантей ды ванькс. Те таркась пек ладяволь теемс Лудорвай кондямокс. Ули истямо музей Удмуртиясо. Сон ашти 20-30 вайгельпень тарка Ижевскоенть эйстэ. Тов усксть ламо кудот, ули нешке пире. Ули весемесь. Сат тов, тосо васттадызьгак, каванятадызьгак.

– Паряк, минекак зярдо-бути истя карми улеме.

– Эряви истя теемс. Бути арсетяно панжомс туристтнэнень кинть, эрявить истят таркат.

– Пек паро мелесь. Ансяк кадовсь сынст пачтямс ков эряви ды ушодомс топавтомост.

– Сёрмадодо тыньгак эсенк газетасо. Паряк, ловносызь ды сайсызь мельс.

– Вадря. Сюкпря ёвтнеманк кисэ.

Кортамонть ветясь Раиса Щанкин
https://sun9-14.userapi.com/impg/NxmY6CJzhr8YY8eSk6voDcKzziORCpDWzD8jkw/4bqR4Thai3Q.jpg?size=280x420&quality=96&sign=e8143c3610fa57c7724f67be1e3bb02d&type=album");">

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».