Неть читнестэ А. С. Пушкин лемсэ Раськень библиотекасо гайгсь «Нить времен» фестивалесь-кенярксчись.
Сон ютавтовсь «Живая нить: фестиваль семейных традиций народов Мордовии» проектэнть лувсо, конась тевс нолдави «Семья» нацпроектэнь «Семейные ценности и инфраструктура культуры» федеральной проектэнть вельде ды алтави Россиянь раськетнень вейсэндявомань иентень. Те проектэнть анокстыцясь – «Некоммерческое партнерство «Национальный спектр» издателень ассоциациясь, топавтови сон Россиянь Культурань фондонь грантонть тевс нолдазь.
Пурнавозтненень лембе вал марто пшкадсь А.С. Пушкин лемсэ Раськень библиотекань ды проектэнь прявтось Анастасия Бакулина:
– Ялгат, тынь содатадо, кодамо течи чись? Маень 15-це чистэ Россиясо тешкстави Семиянь раськеютконь чись. Весе содатано, ломаненть эрямосо сехте питнеесь – те семиясь. Эрьванть туртов сон ашти кеме нежекс. Минек проектэнть прявт тевезэ – евтнемс Мордовия Республикасо эриця раськетнень кудораськедест, сынст койдест-кирдадост. Течинь фестивалесь – те васенце площадка, конастонть ушодови минек проектэсь. Маласо шкастонть арсеви ютавтомс зярыя мероприятият, лембе вастовомат, уледе мартонок!
Седе тов кортамонть поладызе МР-нь Раськетнень кудонь прявтось Татьяна Ларина, кона тешкстызе те проектэнть эрявиксчинзэ. Татьяна Ивановна марто вейсэ сценанть лангс лиснесть эрзянь, мокшонь ды татаронь кудораськеть. Эрьва семиясь евтнесь эсензэ койдензэ. Эрзятнень пельде кортась Швецовтнень кудораськесь.
«Ламзурь» фольклорно-этнографической ансамблянь прявтось Раиса Щанкина тешкстызе, кодамо питнейчи кандыть минек покштятнень-бабатнень коест, зярошка эйсэст сюпавчи ды смусть. Седе тов инжетнень кенярдовтызь театрализованной невтемасо. Сценанть лангсо невтезель кезэрень шкань урьвакстомань-мирденень лисемань коесь. Налксицякс ульнесть А.С. Пушкин лемсэ Раськень библиотекань важодицятне, Саранск ошонь творческой коллективтне: «Ламзурь» народной фольклорно-этнографической ды «Вармава» фольклорной ансамблятне (одирьвань роленть налксизе Мария Майорова). Невтемась мольсь эрзянь кельсэ.
Меельцекс ваныцятнень туртов невтезель «Народы Мордовии: история в семье» книгань выставка-презентация, конань анокстызе филологиянь наукань кандидатось, А.С. Пушкин лемсэ Раськень библиотекань ученой секретаресь Наталья Никерова.
Истя жо фестивалень инжетнень туртов библиотекань фойесэнть анокстазельть мастер-классонь площадкат ды фотозонат.
Алена Артемьева
Фототне Егор Горинэнь.