Октябрянь 10-це чистэ 75 иень юбилеензэ тешксты МР-нь заслуженной учителесь Римма Дмитриевна Жегалина. Те тонавтыцянть парсте содасызь Покш Игнатбуесэ. Самай тосо сон ламо иень перть важодсь школасо.
Р.Д. Жегалина чачсь Покш Игнатбуень Оржаньбие велесэ покш семиясо, косо кассть кото эйкакшт. Школадо мейле тонавтнесь Ицялонь педагогической училищасо. Сонзэ прядызе якстере диплом марто. Теде мейле кавто иеть важодсь Отяжбуень 2-це № школасо начальной классонь тонавтыцякс.
Седе тов тонавтнесь Московонь В.И. Ленин лемсэ педагогической институтонь дефектологиянь факультетсэ. Сонзэяк прядызе якстере диплом марто. Вуздонть мейле кучизь важодеме Саратовань областень Ртищевской райононь Салтыковка велень вспомогательной школав-интернатов. Тосо Римма Дмитриевна лиссь мирденень, чачсть Алексей церазо ды Марина тейтерезэ. Кавксо иень перть сон важодсь логопедэкс.
Кода ледстни сонсь Р.Д. Жегалина, седеезэ свал тердсь тиринь енксов. Мелезэ топавтовсь, семиянек сынь састь эрямо Покш Игнатбуев. Ансяк вана ламо шкань перть школасо арасель тонавтыцянь тарка. Римма Дмитриевна важодсь эйдень кужосо, партиянь райкомсо. Мейле сон, окойники, понгсь роботамо школав. Важодсь начальной классонь тонавтыцякс, ветясь эрзянь кель Покш Игнатбуень школасо, ульнесь Эйкакшонь творчествань кудосо дополнительной образованиянь педагогокс.
Римма Дмитриевна покш мель явсь эрзянь уроктненень. Пурнась краеведениянь, фольклоронь коряс материалт. Мезе ансяк эзь ютавтне эйкакштнень марто! Сон видьксты, эйкакштнень марто тонавтнесь сонськак. Теевсь содавиксэкс эрзянь сказительницанть С.М. Люлякинань марто, сынь кармасть паро ялгакс. Покш лезксэкс уроктнесэ тонавтыцянть туртов ульнесь «Чилисема» журналось. Шкань ютазь Римма Дмитриевнань уроконзо ды лия материалонзо кармасть лиснеме журналсонть.
Р.Д. Жегалина ветясь «Килейне» поэзиянь клуб, мейле – «Тештине» кужине, косо эйкакштне явсть мель литературантень, ютавтнесть концертт. Сонсь стакшнось эйкакштненень эрзянь оршамот. Теде башка, кирдсь кеме сюлмот шабра Нижегородской областень Покш Болдинань райононь школатнень марто.
Вешнят ды, койсэнь, а муят минек республикасто Римма Дмитриевнань кондямо ломань, кона псистэ вечксы тиринь келензэ, культуранзо, эрзятнень. Истя ульнесь, зярдо сон важодсь школасо, истя нейгак, зярдо кармась ветямо эсензэ блог Интернетсэ. Тосо сон содавты весе лиятнень минек раськенть марто. Кодат улить мазый валонок, косо кодамо кенярксчи ютась эли карми, кить минек содавикс ломантне, косо гайгсь од моро – весемеденть сон пачти. Россиясо ды лия масторсо эриця эрзятне апак лотксе евтыть тензэ сюкпрянь валт. Ламотне кель эзть тонавтне, кинь жо покштяст-бабаст эрзят, сынсь мезеяк а содыть. Весенень паро валсо, превсэ лезды Римма Дмитриевна. Ды, саемга, косо сыргить пелькстамот-севномат, сон састыне оймавтсынзе «превень максыцятнень». Интернетсэ сон зярыя групань ветиця ды модератор, саемга, «Тонавтнетяно эрзянь келенть», «Эрзянь моро, мазый моро» ды лиятнень.
2011 иестэ Р.Д. Жегалина нолдась «Мельстуиця эрзянь кель» книга, козо совасть сонзэ уроконзо ды тонавтыцятнень туртов лездамонь материалонзо. Римма Дмитриевна морси «Пизелнэ» фольклорной ансамблясо. Сон – РФ-нь общей образованиянь почетной роботник, МР-нь заслуженной учитель, МР-нь Раськень политикань министерстванть пельде казезь «Гордость нации» почетонь тешкссэ.
– Римма Дмитриевна, мезе тон арсят эрзятнень сы шкадост?
– Арсян, карматано эрямо. Ней ламонь потсо сыргозсь эсь раськень вечкемась, седе ламо сондензэ содамс бажамось. Меельце шкасто карминек нееме, кодат мазыйть эрзятне: сынст оршамост, коест-кирдаст, келест, морост, кедьтеевксэст. Бути теде минь содавлинек седе икеле, бути миненек эйкакш пингестэ теде евтневельть, эрзянь тевтне улевельть ламоксть седе парт. Ды нейгак а эряви нолдтнемс кедтнень. Эряви эрьвантень теемс куш вишка тевне, мезе сонзэ вийсэ, эрзятнень лезэс, тиринь раськенек кепедемга. Кеман од ломантнень лангс. Сынь превейть, ероковт. Чарькодьсызь: зярдояк а эряви стувтомс, кить минь. Эрзят ульнесть минек умонь раськенек, покштянок-бабанок. А эряви теде стувтнемс, сынь ванстызь келенек. Кирдемс тень эсенек оймесэ-седейсэ.
Римма Дмитриевнань семиясь – тонавтыцянь династия. Авазо – Надежда Анисимовна – тонавтыцяль. Войнадо мейле школасо тонавтнеманзо ансяк прядызе, сеске саизь важодеме школав. Учительть эзть сатно. Мария Ивановна ававтозо пенсияс роботась начальной классонь тонавтыцякс.
Марина Валерьевна тейтерезэ прядызе М.Е. Евсевьев лемсэ МГПИ-нть (ней – МГПУ). Семиянзо марто эри Московонь областьсэ, важоди школасо начальной классонь, математикань ды технологиянь тонавтыцякс, ульнесь завучекскак. Алексей церазо прядызе Ицялонь педучилищань художественно-графической отделениянть. 2023 иестэ седеезэ лоткась чавомадо, сон апак учне тусь эрямосто. Те кармась покш вачкодьксэкс аванть туртов. Ледстнемакс кадовсть ламо картинанзо, сон вечксь артомо, пек мазыйть пейзажонзо.
Римма Дмитриевнань кавто нуцьканзо – Кирилл тонавтни техникумсо омбоце курссо, Ирина мольсь нилеце классос. А евтавияк, кода вечксынзе сон неть малавикс ломантнень. Сынь сеедьстэ сакшныть бабаст туртов инжекс. Римма Дмитриевна яла стыль тенст эрзянь оршамопельть ды сынь вейсэ якильть эрзянь кенярксчитнес.
«Эрзянь правда» газетась евты седейшкавань лембе валт Римма Дмитриевнанень чачома чинзэ кувалма. Арсетяно кеме шумбрачи, сэтьме эрямо, икелев молемань тевть!
Татьяна МАТОРКИНА