Россиянь Президентэнть мереманзо коряс 2024 иесь ёвтазь Кудораськень иекс. Те а стяко, эдь минек масторсо семиянь питнейчитне свал аштесть прявт таркасо. Уцяскав се ломанесь, конань ули семиязо ды кудозо, косо сонзэ свал учить ды весе седейсэ вечкить, косо васень таркасо аштить чарькодемась, вейке-вейкенень лездамось, кемемась.
Неть ёнкстнэ аштить прявтокс Саранск ошонь Зобковтнень семиясо. Мирдеть-нить Вячеслав ды Екатерина неть аравтлувтнень кирдеме уш вишка шкасто тонавтыть эсь эйкакштненьгак – Родиононь ды Захаронь. Ды лиякс а кода, эдь семиясь – эрямонь смусть.
Сонзэ лемдить «Мордовиянь сырнень вайгелекс», «омбоце Магомаевекс», «Кобзонокс». Мордовия Республикань заслуженной артистэнть, Мордовиянь государственной филармониянь солистэнть Вячеслав Зобковонь минек республикасо содасы малав эрьвась. Сон региононь весе прявт мероприятиятнень ветиця, вадря морыця, вечкиця мирде ды тетя, эсь тиринь ёнксонь алкуксонь патриот.
ЭЙКАКШ ПОРАСЬ
Вячеслав Зобковонь эйкакш поразо ютась Ицялонь райононь Рождествена велесэ. Тосо прядызе школанть ды кемекстынзе эсь эрямонь аравтлувтнень. Николай Алексеевич ды Алевтина Анатольевна Зобковтнень семиясо кассть кавто цёрат: покшось – Алексей ды веженцесь – Вячеслав. Алексей, кода велесэ чачозь ломань, свал ульнесь малавикс модантень ды школадо мейле кочкась эстензэ трудий ломанень профессия – кармась агрономокс. Вячеславнень жо свал седе малавикс ульнесь шкинемась.
– Эштё школасо тонавтнемстэ минек велев, пенсияс лисемадо мейле, састь эрямо Мордовия Республикань заслуженной артисттнэ мирдеть-нить Медведскойтне – Вадим Владимирович ды Нина Яковлевна, – ёвтни Вячеслав. – Сынь састь минек школав ёроков эйкакштнень вешнеме, штобу панжомс драматической кружок. Минек классонь тейтерькатне сеске ёвтымизь монь, келя, пек вадрясто ловнан стихть. Монь койсэ, лиятнень эйстэ мейсэяк эзинь явово. А сёпса, валморотнень тонавтнинь пек куроксто, монень те максовсь шождасто. Медведскойтне кунсолымизь. Эряви ёвтамс, пек мелявтынь. Овсе эйкакш эштё ульнинь, 7-це классо тонавтнинь. Истя мон ды эштё зярыя лия эйкакштне понгинек драмкружокс.
Ушодовсть занятиятне. Ней уш валморотнень ловность кода эряви – оймень путозь, эрявикс интонация марто, штобу весе смустенть пачтямс кунсолыцянтень. Васенце стихотворениясь, конань тонавтнизе цёрынькась, ульнесь Сергей Михалковонь «Карта» военной валморось. Сон ульнесь аволь вишкине, эйсэнзэ невтевсть войнань зыянось, стакачитне. Репетициятнесэ Вадим Владимирович тонавтсь кода ловномс, сон эйкакштненень свал кортась, сюжетэнть васняяк эряви эстеть чарькодемс, эрямс сонзэ. А вана кода тень эрямс ды весементь марямс седейсэ, пакшатне эзть сода. Ялатеке Вячеслав стихенть анокстызе Ине Изнямонь чинтень ды ловнызе. Арсеманзо коряс, лиссь а беряньстэ.
– Драмкружоконтень якинь 9-це классонть прядовомс. Мейле Медведскойтне мерсть тень молемс тонавтнеме Саранскоень Культурань ды искусствань колледжев. Авам-тетям тень каршо эзть моле, ансяк лелям Алексей кортавтсь эйсэнь. Сон тонавтнесь Кемлянь Аграрной колледжсэ агрономонь тевентень, Медведскойтне тосояк ветясть кружок. Студентэкс улемстэ сон налксесь спектаклясо. Вадим Владимирович путокшнось спектакля Степан Эрьзянь ланга, лелям налксизе прявт роленть. Сонензэ истя жо кортакшность культурань колледжев тонавтнеме молемадо, ансяк лелям мерсь, келя, артистэнь тевесь – те аволь профессия. Прявт сюпавчись – кшись. Ней сон роботы прявт агрономокс эсенек райононь велень хозяйствань предприятиясо. Колледжсэ тонавтнемстэ, пельиень ютазь, мероприятиятнесэ ёрокчим невтеманть кисэ монень макссть грамота. Авам-тетям ды лелямгак сакшность кенярксчинь те промксонтень. Ды ансяк сестэ Алексей мерсь: «Паро, мон шнан мелеть, важодть шкинемань ёнкссонть», – поладызе кортамонзо Вячеслав.
ШКИНЕМАСО УШОДКСТНЭ
Культурань ды искусствань колледжсэ Вячеслав Зобков кармась тонавтнеме 2005 иестэ ды теке иестэнть тов састь республикань Раськень творчествань кудосто, кочкасть «Шумбрат, Мордовия!» фестивалень ветицят. Од цёрась вадрясто ютынзе кунсоломатнень. Ды 2005 иестэ саезь ламо иень перть ветясь те фестиваленть, лиясто нейгак Гала-концерттнэнь ютавты.
– Сестэ РДНТ-нь прявтокс ульнесь Светлана Владимировна Чиндина, покш сюкпря сонензэ ды лия важодицятненень, редизь ёрокчим ды лездасть виевгадомасо, – кемексты артистэсь. – 2007 иестэ, омбоце курссо тонавтнемстэ, Андрей Николаевич Ермолин, рузонь драмань театрань сестэнь режиссёрось, тердимем важодеме театрав. Иешка роботынь тосо. Теке шкасто ветинь эрьва кодат мероприятият. Паряк, эштё од ульнинь, паряк, аволь монь те весемесь ульнесь, туинь театрасто.
2008 иестэ А. С. Пушкин лемсэ парксо ульнесь Мастянь кенярксчи. Тосо морасть ошонь Культурань центрань артисттнэ. Вакскаст ютамсто цёранть чачсь покш мелезэ каземс весенень кодамояк моро. Эриль аволь васоло, студентэнь общежитиясо. Чийсь тов, муизе минусовка марто дискенть ды велявтсь мекев парков.
– Саранскоень Культурань центрань прявтокс сестэ ульнесь Анна Петровна Чигажова, пшкадинь сонензэ, мереде морамс ошонь эрицятнень ды ваныцятнень пельде. Сон талакадсь, келя, минь тынк а содатадызь, кода сцена лангс нолдамс. Ванан, юты Светлана Никитовна Баулина, содылия ансяк чама лангс, ошонь Культурань управлениянь прявтокс важодемадонть эзинь содаяк. Пшкадинь сонензэ, каршо эзь моле. Сестэ морыя Пахмутовань ды Добронравовонь «Надежда» моронть ды ёвтынь пурнавозтненень лембе поздоровт. Сцена удало уш эйсэнь учось Анна Чигажова, саизе телефононь номерэм ды мерсь самс Культурань центрав, – ёвтни Вячеслав. – Истя, 2008 иестэ саезь карминь явомо мель вокалонтень, ушодовсь музыкальной карьерам. Те шкастонть саезь карминь Саранск ошонь Культурань центрань солистэкс. Теке жо иестэнть минек вейсэндимизь «Клуб строителей» учреждениянтень. Тосо важодемстэ истя жо ветинь мероприятиятнень.
АРМИЯСЬ
2009 иестэ Вячеслав Зобков прядызе Культурань ды искусствань колледженть ды цёранть тердизь армияв. Саизь июлень 4-це чистэ. Службанть ютась Саратовань областень Таманской ракетной дивизиянь стратегической назначениянь ракетной войскасо.
– А сёпса, васень шкасто а шождаль. Сюкпря полковникентень Виктор Николаевич Белецкойнень, вадря службанть ды ютко шкань ютавтоманть туртов ульнесь весемесь – налксемань комната, бильярд, телевизорт… Теньсэ сон аламодо шождалгавтсь кудонть кис тошначинть. Истя жо частьсэнек ульнесь «Силуэт» вокальной группа. Зярдо сыльть од ломанть, весе полктнестэ кочкавильть морамо маштыцят, музыкальной инструментсэ седицят. А монь уш учебкасо аравтымизь запевалакс. Эряви ёвтамс, школасояк, колледжсэяк травамкам ульнесь «Кобзон» ды армиясояк истя мерильть. Весть плац ланга ютамсто морынек моро, каршонок понгсь воспитательной тевтнень коряс полковникесь Лишай. Сон лоткавтымизь, кевкстсь – кие запевалась, монь ёвтымизь. Шнымем морамонть кисэ. Теде мейле понгинь 55555 В/ч. Те полксонть Мордовиясто минденек ульнесть ниле ломанть, дивизиясонть жо – 39 ломанть. Сюкпря полковникентень Белецкойнень те полконтень саеманть кисэ. Тосо боевой дежурстватнеде башка ульнесь шкинемань шка, – тешксты Вячеслав.
ПОКШ СЦЕНАСЬ
Армиясто велявтомадо мейле цёрась кармась тонавтнеме Н. П. Огарёв лемсэ МГУ-нь Культурань институтонь актёрской отделениясонть. Кармась Игорь Фёдорович Кузьминэнь студентэкс. Эряви ёвтамс, экзаментнэнь максомсто пурнась сехте ламо баллт. Кода те лиссь, сонськак а соды, весемесь уш стувтовкшнось. Кармась студентэкс ды одс велявтсь важодеме Саранск ошонь Культурань кудов. Аванзо-тетянзо лавтов лангсо улемс мелезэ арасель, эрявсь эсь прянть трямс. Нама, эрсильть концертт, мероприятият, университетсэ паратнень савкшнось менстямс. Воспитательной тевень коряс институтсонть сестэ ульнесь Алла Ивановна Казанцева, тонавтнемстэ а панемга сон мерсь цёрантень ютамс библиотечно-информационной тевень отделенияс. Тонавтнеманть поладызе тосо.
– Истя жо ламо мероприятият ветинь вузсояк. Университетэнть пельде лия студенттнэнь марто ардтнинь Грецияв «Золотой Олимп» раськеютконь вокальной пелькстамов. Сестэ ректорокс ульнесь Сергей Михайлович Вдовин, покш сюкпря сонензэ лезксэнть кисэ. Недлянь перть ульнинек Грециясо, мон саия пелькстамонь Гран-принть. Морыя Муслим Магомаевень «Синяя вечность» моронть. Казнекс макссть сырнень статуэтка-чакш, диплом ды тёжа еврот. Ульнинь аволь ськамон, лия студенттнэ лездасть ды неть ярмактнень явинь весень ланга. Сынь жо ярмактнень велявтызь одс ды мерсть, келя, изнявксось тонь. Ялатеке сюкпрянть ёвтыя лиякс, – пейди Вячеслав.
2012 иестэ, Мордовиянь государственной филармониянь прявтось Владимир Иванович Шарапов тердизе Вячеславонь эстест. Кортамось сестэ ульнесь ветицянь таркадонть. Эряви меремс, цёрась васня мелявтсь, кода туи Саранск ошонь Культурань кудостонть, зяро иеть уш тосо важоди. Нама, ней тень коряс а янкси. Эдь филармониясо возможносттне лият.
– Весть РДК-со концертэнь сезононть панжомантень ульнесь репетиция. Мон сынь тов, весе морыть, кунсоломат молить. Пшкадинь Владимир Ивановичнень, меремс морамс моненьгак. Морынь Магомаевень зярыя морот. Ванан сестэ, Шарапов залганть мекев-васов яки, мезде-бути арси. Морось прядовсь, залс валгинь, сон мери, сёрмадт яволявтома солистэкс улемадо. Ды 2012 иень октябрясто саезь мон – Мордовиянь государственной филармониянь солист. Владимир Ивановичнень покш сюкпря. Сон министракс улемстэяк вановттомо эзь кадо. Монь се шкастонть ульнесь васенце сольной концертэм ошонь ДК-со, сон сакшнось поздоровонь ёвтамо. Видьстэ меремс, эзинь арсекшнеяк, васенце концертэм пурны зняро ломанть – залось пешксель, савсь эштё озамо таркат ладямс. Васенце концерт ды истямо аншлаг. Эзинь учокшно. Ней эрьва вете иень ютазь снартнян теемс эсень концерт. Ней вана мартонь 28-це чистэ арсян пурнамс шкинемань чокшне. Весень учан. Нама, талнан. Эрьва концертэсь, зяро бу эйстэст авольть уле, мелявтовты. Тень эйстэ ковгак а туят. Покш сюкпря ёвтан филармониянь режиссёронтень Оксана Юрьевна Вишнякованень. Сон филармониянть виезэ. Истят пек аламо. Важодеманзо вельде анокставить-ютавтовить пек ламо эрявикс ды покш мероприятият, фестивальть. Сон – эсь тевсэ алкуксонь профессионал, – ёвтни Вячеслав Зобков.
Кода мерсь артистэсь, анокстамонтень шкась кадовсь аламо, тевтнеде жо эштё сатыть. Эдь сон Мордовия Республикань Прявтонть участиянзо пингстэ республикань весе покш мероприятиятнень ветиця. Савкшны улемс эрьва косо. Ды зярдо Артём Алексеевич якась СВО-нь таркатнес, Вячеславгак мартонзоль.
– Ды бути тердьсамизь, молян тагояк, – кемексты артистэсь. – Мейсэ ульнесть виенек, кирдинек минек военнослужащейтнень, ускинек гуманитарной лезкс. Вейсэ боецтнэнь марто морынек морот. Те вастовомасонть ульнесь кодамо-бути а ёвтавикс седей лембе. Ды арасель пелема. Покш сюкпря республикань Прявтонтень Артём Здуновнень ды сонзэ командантень, Мордовиянь весе эрицятненень, сынь теить пек ламо боецтнэнень лездамга. Весе вейсэ минь малавгавтано Изнямонть.
СЕМИЯСЬ
– Екатерина ним марто теевинек содавиксэкс Н. П. Огарёв лемсэ МГУ-со тонавтнемстэ. Мон лиясто ветинь вузонь мероприятиятнень ды вейке истямо кенярксчисэ рединь мазый тейтерь. Сон тонавтнесь «хореография» отделениясо. Шкань ютазь ульнесь «Сокол ясный» университетэнь пелькстамось. Культурань институтонть пельде кочкавкшнынь Соколокс. Покш мелем арасель невтемс прям пелькстамосонть. Деканось Татьяна Николаевна Сидоркина вийсэ кармавтымим, аравтсь мельган ваныця ды анокстамосо лездыця. Те ульнесь мелезэнь туезь тейтересь Екатерина. Минь карминек сёрмалеме СМС-т, кортнеме телефонга, мейле уш вастневеме. Зярыя иень перть вастневинек. 2017 иестэ урьвакстынек, – корты Вячеслав. – 2018 иестэ чачсь васенце цёрыньканок – Родион, 2022 иестэ – Захар. Ним васенце лездыцям. Сон чарькодиця, кеми лангозон. Екатерина – пек паро ава. Семиясо истя эрявияк. Эдь семиясь – прявт сюпавчи. Седе малавикст кияк арасть.
Тетям, Николай Алексеевич, ней уш ютксонок арась, авам – Алевтина Анатольевна, весе эрямонзо перть важодсь Кемлясо налоговой инспекциянь секретарекс. Ней лезды миненек, ашти нуцьканзо марто. Сонтемензэ ковгак.
Тетям од шкасто налксиль гитарасо, сонзэ тетязо – покштям Алексей Михайлович – вадря гармонистэль, бабам, Мария Петровна – вадрясто морыль, свал эйсэнзэ тердтнильть велень свадьбатнес. Кода кортыть, весемесь юты семиясто. Монь шкинемань сёлмотнеяк саить ушодкс тосто.
Юлия Еремина
Фототне Эдуард РЕТУНСКИЕНЬ