Четверг, декабря 08, 2022
Важное

Эсенек газетасо минь уш а весть сёрмалинек Саратовань ёнкссо эриця эрзятнеде ды мокшотнеде, Валентина Ивановна Кривошеевадо, «Шумбрат» тосонь национально-культурной центрань прявттонть, теке жо лементь ало ютавтовиця кенярксчиденть. Сехте ламо эрзянь-мокшонь раськень ломанть эрить Петровской, Энгельской ды Ершовской районтнэсэ.

 Ды, кода невтить тостонь кулятне, эрить сынь весе покш ялгаксчисэ, бажить вейсэнь вастовоматнес, сёрмадстнить Мордовиясто эрзянь ды мокшонь кельтнесэ газетат, журналт, панжсть киштемань ды морамонь зярыя ансамблят. Течи минь содавттадызь кой-кона эрзятнень марто, кить сакшность те кизэстэ «Рав – ояксчинь лей» фестиваленть-экспедициянть вастомо, конась ушодокшнызе кинзэ Саратовасто.

МОРОЗОВА Екатерина Ивановна – Петровской райононь Оркина велень Культурань кудонь художественной руководитель, «Лисмине» раськень моронь ансамблянь прявт. Те мазый авась – рузава, ансяк эрзянь-мокшонь культурантень вечкемась эйсэнзэ минек раськень кой-кона ломантнедеяк покш. Сон пурнынзе вейс велень аватнень-цёратнень, ды 2017 иестэ саезь Оркинань СДК-со сынь вейсэ морсить эрзянь ды мокшонь кезэрень ды неень шкань морот. Тетятне-аватне, покштятне-бабатне мартост кармасть сайнеме вишка тейтерькаст ды цёрынест. Истя панжовсь «Эрзяночка» эстрадань ансамблясь. Оркина велентень уш 300 иеде ламо, эрзятне тей састь 50 иеде теде икеле ды тесэ а весе парсте содасызь раськень келест, ялатеке моронь моразь сон седе саеви ды токи седейс. Истя эйкакштнеяк аламонь-аламонь саить мельс-превс келенть ды совавтыть пряудемс эрзянь-мокшонь культуранть ды койтнень-кирдатнень. Паро, весе ансамблятнень улить мазый оршамопелест, пряс путомкаст, эсь кедьсэ теезь эрьгест-кирьгаксост. Сынст анокстыцясь – Р. П. Вавилова. «Лисьмине» ансамблясонть морыцятне Т. Н. Занкина, Л. Н. Фадейкина, В. Д. Живайкина кортыть, репертуарось пурназель умок, тетяст-аваст пельде. Кудосо морсематнесэ сынь ледстилизь тиринь ёнксост, эдь ламот ютазь пингестэ састь эрямо ды важодеме Саратовав Мордовиясто, седе ламотне Ицялонь буестэ, лия таркастояк. Вана овсе аволь умок сынь мельспаросо вейсэ пурнавкшность Сыре ломанень ковонть кувалма велень клубс (прявтось И. И. Шупикова), косо, морамотнеде башка, анокстакшность эрзянь кезэрень нардамонь ды лия викшневкстнэнь-кодавкстнэнь выставка.

Оркинань «Кучугуры» эрзянь раськень моронь ансамблясь морси уш 25 иеть. Ней эйзэнзэ кадовсть ансяк кавто ават: Нина Лаврентьевна Шнякина ды Мария Ивановна Мигачева. Сыненст уш 80 иеде ламо, ансяк сыре патятне эштё ёрокчисэст одтнэнь «карксасызь». «Кучугуры» ансамблянть ушодыцякс-панжицякс ульнесь А.С. Кузнецов, кона, ризксэнтень, мелят тусь юткстост… Сон ульнесь ансамблясонть баянсо седицякс ды тиринь культуранть кисэ пиицякс-палыцякс. Те ломаненть важодеманзо кувалма Оркинасо панжозельтькак эрзянь-мокшонь раськень музей ды культурань куншкакуро.
«Кучугуры» ансамблянть репертуарось ашти эрзянь ды рузонь кезэрень малав комсь моросто. Сехте вечкевиксэкс аватне ёвтызь «Адядо, ялгат, розь паксяв», «Вай, пиже садсо», «Кукушка»…

Баянистэнть Павел Леонтьевень раськень ундоксонзо Мордовиясто, Отяжелень райононь Сабанцеле велестэ. Сынь эрить Энгельской райононь Новопушкинское посёлкасо. Павел – международной конкурсонь лауреат, сон роботы музыкальной школасо, вети баянонь коряс урокт ды мельспаросо сакшны В. И. Кривошеевань тердеманзо коряс седямо вейсэнь вастовоматнес. Павел чарькоди эрзякс, аламошкадо кортыяк, теньсэ покш таликась аванзо – Лидия Павловна Леонтьевань, ды Сабанцелесэ ютавтозь каникулатнеяк лездасть. Вейсэ аванзо ды семиянзо марто сынь сеедьстэ кудосо морсить эрзянь морот ды снимсить теде видеот. Леонтьевтнень семиянь ансамблянть Саратовань областьсэ содасызь ламот.

СОДАДО:
Эрицятнень весероссиянь сёрмадстоманть коряс (2010 ие), Саратовань ёнкссо эрить 2,5 миллионт ломанть, 164 раськеть: рузт, казахт, татарт, армянт, азербайджанецт, украинецт, чувашт, эрзят, мокшот, удмуртт ды лият. Эрзятнеде ды мокшотнеде весемезэ 10,9 тёжат, те 0,43 % весе эрицятнестэ.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».