Неть читнестэ топодсть 36 иеть, кода «Эрзянь правда» газетань редакциясо важоди Валентина Владимировна Юдина. Монь мельстэ те эзь туе вана мекс – Валентина Кечайкина Ленинградонь госуниверситетэнь журналистикань факультетэнть прядомадо мейле сась важодеме сёрмань отделс, монь марто.
Ульнесь 1983 иень кизэнь куншка. «Эрзянь правдав» састь практикантт Н. П. Огарёв лемсэ Мордовской госуниверситетстэ – сы шкань журналистт. Сынь эрьва ие тосто сакшныть, кадык аволь весе сюлмить пряст журналистиканть марто, практикасо уш неяви, конастонть лиси эли а лиси журналист. Те разнэ састь кавто тейтерькат: Лида Годяева ды Валя Кечайкина. Вейкенть, Кечайкинань, кучизь миненек, сёрмань отделс. Минек отделэсь ёвтни-сёрмады эрьва мезде, вейке валсо, ломанень эрямодо, мелявкстнэде-ризкстнэде. Теде башка, сонензэ максозь невтемс Советтнэнь, депутаттнэнь важодемаст. Эйстэнек аволь ламо, ды целанек газетасонтькак ловозь ломанть. Тень кис савкшны тенек кизэнек-теленек пештнемс газетанть эсенек материалтнэде. Чизэнзэ эрьва журналистэнтень эряви максомс секретариатс 250 строчкат! Кода свал тенек кармавтыть «Эрзянь правдань» прявттнэ, келя, эсенк материалтнэнь сёрмадодо кудосо, оймсема чистэ, а вана кабинетсэ, роботамо таркасо – ансяк авторскойть. Мезе истямось «авторской материалось», ней од журналисттнэ, монь койсэ, а содытькак. Се шкава вана весе минек шканть саласть-сэвсть самай неть авторской материалтнэ. Савкшнось сёрмадомс газетас статьят партиянь васенце секретаренть ды райисполкомонь прявтонть пельдеяк, скалонь потявтыцянть пельдеяк, эйкакшонь триця аванть пельдеяк… Ансяк сыре ломантне кой-зярдо сёрмалесть сынсь, ульнесть истят авторонок, конат пештякшнызь эсест кулятнеде весе отделтнэнь: Василий Ацапкин – Ковылкинань районсто, Василий Балакин – Ичалкань райононь Селища велестэ, Иван Ведяшкин – Ардатовань районсто… Вана неть авторонь сёрматнень лангсо ушолестькак редакциясо тонавтомо одтнэнь. Валяненьгак сатотсь истямо уцяскась, ансяк мон эзинь карма «морямонзо», чинь-кавтонь ютазь сыргась сон командировкав, Ичалкань районов.
«Эрзянь правдань» редакторось Пётр Прохорович Борейкин, командировкав сыргамсто, эрсесь, задания корреспондентэнтень эзь максне, кортась истя: «Несынк, кода тосо эрямось моли. Кода тевтне аштить…» Истямо вана ильтямось кармавтсь седе ламонть редякшномс, маштомс нееме эрямонть аволь ансяк заданиянть перька, седе келейстэ. Ансяк практикантонть истямо вал марто а ильтясак командировкав. Арсинек заданиянть лангсо парсте.
Велявтсь – блокнотозо пешксе, ёвтнематнедеяк ламо. Ламо марто вастневсь… Ансяк вана, валонзо коряс, сонсь кавто чить, ловт, вачодо ульнесь. Ды, мерян, арази кияк ярсамо эзинзить терде? «Тердимизь, пек тердсть эйсэнь, ансяк эзинь моле…»
Мекс? – чарькодинь седе тов, зярдо ловныя материалонзо. Се, мезенть сон усксь, кармавтсь ваномс сонзэ лангс, кода пек арсиця ды ламонь неиця журналистэнть лангс. Эсензэ корреспонденциясонть, конань кандызе цють а сеске, Валентина ёвтнесь, мекс а строить велесэ участковой больницянть. Ярмактне явозь, а вана тевтне аштить. Материалось лиссь критической ды видьстэ ёвтазельть чумотнень леместкак, кить саизь больницянть строямс явозь ярмактнень эсест лезэс. Вана истя те «пиже журналисткась» невтсь, кодамо а рамавиксэкс эряви улемс тевень теемстэ. Виде, минек сестэ истя эйсэнек тонавтсть. Ней а содан, кода тонавтыть. Полавтовсть шкатне, ёмасть принциптне. А вана минек тонавтомань шкасто, васенце курссо, главной предметэкс ульнесь «Советской журналистикань принциптне».
Лия материалозо ульнесь комсомолецтнэде, конат партиянть ды комсомолонть тердемаст коряс класснэк сыргасть важодеме фермав. Арсесь сёрмадомо шнамонь материал, зярдо жо кортась од животноводтнэнь марто, кармась содамо: покш мель тенст велесэ эзть яво, эрить берякшке кудынесэ, куш алтнесть паро условият.
Те корреспонденциядонть мейле пшкадема кучозель ВЛКСМ-нь обкомов. Сеске «Эрзянь правдань» корреспонденциянть коряс велев якасть обкомонь ломанть, ды газетасо невтезь асатыкстнэ витезельть: тейтертненень максозель паро эрямонь тарка. А вана Валентина Кечайкинанень Ленинградсо практиканть ванкшномсто апак кавтолдо путсть «5»: аволь эрьва корреспонденциянть коряс сестэяк примсевсть алкуксонь мерат, а вана сонзэ журналистэнь валозо кармавтынзе прявттнэнь витемс асатыксэнть.
Валянь васенце сёрмадовксонзо ульнесть аволь газетас – …масторонь келес. Эрясть Кечайкинтнэ Покш Березникень райононь Вейсэ эрзянь велинесэнть, кона Шугурвеленть эйстэ зярыя километрань тарка. Авазо, Василиса Андреевна, ульнесь Вейсэнь почтальонокс, а вана почтанть сеедьстэ кисэнзэ явшекшнылизе Валя. Вейсэнь ламо кудотнева сестэяк уш эрясть сыре ломанть, кинь эйкакшост туекшнесть масторонь келес. Конат-конат эйстэст ловномояк эзть машто, лиятнень сельмест уш а неильть. Мобильнойть се шкава арасельть, веленть келес ульнесь ансяк вейке телефон. Секс малавикстнэ секе-тев кучность вейкест-вейкест туртов сёрмат. Тейтерькинесь васняяк ловнылинзе неть сёрматнень, мейле сёрмадыль эрьва сёрманть каршо каршо валт. Истя вана тонадськак сёрмадома тевентень.
Пейдезь ледстни ней эсь васенце информациянть, конань кучокшнызе «Заветы Ленина» Покш Березникень райононь газетав. Лемезэль – «Успех овцевода», эйсэнзэ ледстязельть весень лемест, кить трудясть ревень фермасо, конань прявтсоль сёрмадыцянть тетязо, Владимир Михайлович. Тонавтнесь Валя сестэ сисемеце классо, зярдо сась тензэ почта вельде гонорарось – 3,60 целковойть, – мельспаронтень пе арасель.
Валентинань обуцясо лия ломаннень седейлембесь, ёрокчись ды чарькодьксчись молить тетянзо-аванзо пельде. Авазо, Василиса Андреевна, од шкасто саезь несь ламо майсемат. Сонзэ тетянзо-аванзо ульнесть трудицят, секс уличист лиянь коряс седе ламоль, тень кис сынь ловозельть сюпавокс. Ды мартост лиссь се, мезесь лиснесь сестэ лиятнень мартояк, кинь ловокшнызь истямокс, тень минь парсте содатано историясто. Ансяк вана а шкантень, а стакачитненень авась эзь синдеве, сэрьс апокшке, – косо ансяк кекшни эйсэнзэ вийнесь? – братонзо марто кавонест стявтсть паро кудо ды, эрязь-аштезь, тагояк пурнасть вий. Мезде те корты? – Вейкеде: улиндеряй ломаньсэнть оймень нарде, сон кодамояк стакачисэ а мендяви-а синдеви. Вана истямоль эрямонзо перть Василиса Андреевна. Меельцес, зярс сатотсть виензэ, эзинзе кадно велень кудонзо-чинзэ, кирдсь ракшат, яла лездась эйкакштненень-нуцькатненень. Саранскоевгак сась, яла муиль эстензэ тев, зярс ормась эзизе правто, сон тевтеме эзь аштекшне.
Владимир Михайлович ды Василиса Андреевна трясть-кастсть колмо эйкакшт. Михаил Владимирович – предприниматель, пек лезды тиринь ёнксонтень ламо тевсэ, Людмила Владимировна важоди кондитерской фабрикасо лаборантокс. А сехте веженсь тейтерест, минек ялганок, Валентина Владимировна, пингензэ алтызе журналистикантень, седе виде ули меремс, «Эрзянь правдантень». 36 иеть уш сон важоди масторлангонь келес те вейкине эрзянь кельсэ лисниця газетасонть.
Кечайкинтнэнь аваст-тетяст эйкакштнень туртов эрямост перть ульнесть превень ды виень максыцякс, лездасть мейсэ маштсть. Валя тонавтнесь университетсэ, зярдо кудост-чист палсть, ды тагояк сынь эзть синдеве, аламонь-аламонь стясть пильге лангс ды, мезеяк лангс апак вано, эзизь ёмавто обуцястост, эрямонь лувстост седейлембенть. Ульнесть сынь пек важодиця ломанть, тенень тонавтызь эйкакшосткак. Эрямс видечисэ, эрямс эсеть вийсэ, эсеть превсэ – те арази аволь сюпавчи, конань максыть тенек превс путомакс тетянок-аванок! Валянь обуцясо кеме ёнкстнэ семиясто, тетянзо-аванзо пельде!
Мон а стувтнян се очеркенть, конань Валентина сёрмадызе Вейсэ веледест, эйсэнзэ маряви весе вечкемазо тиринь ёнксонтень, сонзэ ломантненень. Ламо иень ютазь те очеркстэнть кассь Вейсэнь ломантнеде, сонзэ пертьпелькстнэде цела книга, косо ледстявсть весе-весе! Содан, кода ламо ломаннень сон казсь тантей ледстнемат ды мельспаро те книганзо марто! Весенень сон пек вечкевсь! Вейсэнь икелень эрицятненень, эсензэ эйкакштнень-нуцькатнень туртов, эрзянь ловныцятнень туртов.
…Мордовской госуниверситетэнь филологиянь факультетэнь колмоце курсонть прядомадо мейле Валентина Кечайкинань кучизь тонавтнеме Ленинградов, тосонь госуниверситетэнь журналистикань факультетэв. Истямо уцяскадонть бути ансяк онстот арсят! Валянень сон прась эрямосонзо. А содан, кода ней, се шкава минек масторсо сехте вадря вузокс, косо анокстасть журналистт, лововсть Московонь, Ленинградонь госуниверситеттнэнь журналистикань факультеттнэ – тосо анокстасть виев теоретикть, ды Свердловскойсэ – Уральской госуниверситетэнь журналистикань факультетэсь – виев журналистэнь-практикень анокстамонь коряс сонзэ марто эзть пелькста а Московось, а Ленинградось. Видьстэ меремс, пек кенярдынь монь од ялганть кис, истямо уцяска – тонавтнемс Ленинградсо! Неемс те ошонть мазычинзэ, лексемс сонзэ кошттонть!
Ленинградсо тонавтнемстэнзэ весть савсь тень улемс кедьсэнзэ. Валентина марто тосо тонавтнесть Лидия Годяева ды Татьяна Шаляева – сонгак сакшнось «Эрзянь правдав» практикас, истя жо важодсь минек сёрмань отделсэ. Икелепелев мерян, весе сынь тевсэст кемекстызь: Ленинградонь школась пек вадря! Лидия Годяева-Шумкина кувать важодсь телевидениясо. Ламо иень перть минек телерадиожурналистикасонть гайгсь Татьяна Ларина (Шаляева). Кенярдовты, Валентина Юдина (сон самай Кечайкинась) кармась эсь тевсэнзэ ламонь содыця, ламонь маштыця журналистэкс.
А вана сестэ, умок, самай Валентина Нева чиресэ ине ошонь алкуксонь азорокс вастымим ды совавтымим студентэнь семиязонзо, ялганзо марто минь ульнинек Петродворецсэ, ламо лия пек мазый исторической таркатнесэ: косо-косо, а вана Ленинградсо эйстэст а ёвтавияк зяро, «ашо ветнестэ» якинек ошканть… Ды мон тагояк неинь: те тейтерькинесэнть чарькодьксчись, тевень тееме маштомачись овсе покш ломанень, эрямонь содыця ломанень. Сон сайнесь эсензэ лангс истят тевтнень решамонть, конатнес кунды аволь эрьва покшось. Те сестэ уш дивавтымим – косто весе те эйсэнзэ? Од шкава (кой-кить пингест пертькак а тоналить саеме эсест лангс кодамояк тевень теема) сон маштсь изнямо лиянь туртов а теевикс тевть ды весе тень тейсь прянь апак невте, мештес апак чаво, прок буто весе те мезеяк тензэ а ашти. Шкань ютазьгак те а стувтови.
Те обуцянть эйсэнзэ редясть весе ды свал. А стяко тонавтнемстэ сон весе иетнень перть ульнесь группань старостакс, вейкеяк вейсэнь тевде эзь кадново ве ёно.
Ленинградсо тонавтнемстэ журналистэнь васенце практиказо ульнесь «На страже Родины» Ленинградонь военной округонь газетасонть. Те шкас ледстни Мария Васильевна Климовань, киде савсь сестэ тензэ сёрмадомс очерк газетань цела страницас. Те авась печтизе Ленинградонь блокаданть, ламо ёвтнесь се стака шкадонть. Валя теевсь пек малавиксэкс очеркень героенть марто ды зярс эзизе прядо тонавтнеманзо, свал сакшныль тензэ инжекс, Саранскоевгак сась – яла кучниль тензэ сёрмат. Мейле сон ютась практика Курскойсэ, областень газетасо. Кадсть эйсэнзэ тоско, ансяк сон сась Мордовияв. Ды кода лиякс теема?! – эдь тестэ кучизь тонавтнеме, тесэ учость сонзэ! Сон сась «Эрзянь правдав» ды се шкастонть саезь ковгак лияв эзь тукшно. Тесэ кассь корреспондентстэ отделэнь прявтокс, ламо материалонзо а весть лиснесть эрьва кодамо конкурссо изницякс, мезень кис а весть казневсь сонськак, редакцияськак.
Меельце шкатнень редявикс тешксэсь – эрьва косо, васняяк правительствань учреждениятнесэ журналистэнь аккредитациясь. Валентина Владимировна ламо иень перть уш «Эрзянь правдасо» невти минек республикань Прявтонть, Мордовиянь Правительстванть ды Государственной Собраниянть тевест. Нама, те веши пельдензэ ламо содамочи ды чарькодьксчи, икелев неема ды тевтнень пек видестэ невтема. Валентина Владимировнань вановтсо ёвтневи минек республикасо ютавтовиця весе покш тевтнеде, мезесь кармавты улемс пек ответственноекс, тевтнень содыцякс ды видестэ сынст толковицякс.
Тевензэ парсте топавтомань кис сон казезь Мордовия Республикань Почетонь Грамотасо, кармась улеме массовой информациянь заслуженной роботникекс.
Кода одсто, истя нейгак, Валентина Владимировна а каднови вейсэнь тевтнеде. Сеск, советэнь шкатнестэ, ульнесь Печатень кудонь комсомолецтнэнь прявтокс, зярыя иеть мельцек «Эрзянь правдань» Журналистэнь союзонь первичной организациянь прявтокс, сови Мордовиянь Журналистэнь союзонь президиумс, топавты аволь аламо вейсэнь тевть.
Профессиональной касоманть марто неть иетнень перть, нама, ульнесть лиякстомат эсензэ эрямосонзояк. 1988 иестэ Валентина лиссь мирденень, кармась улеме Юдинакс. Мирдезэ – сэтьме ды виде обуця ломань, маштсь каземс нинть седейлембесэ, чарькодемасо. Виктор Николаевич важоди «Орбита» объединениясо, сонзэ тесэ содасызь кода эсь тевень пек ёроков ломаненть. Юдинтнэнь кавто тейтерест: Марина ды Маша. Покшось – Марина – прядызе Московсо Иван Фёдоров лемсэ Печатень университетэнть, лиссь мирденень, кавто эйкакшонзо, Маша прядызе Плеханов лемсэ Россиянь экономической университетэнть. Мирде экшсэ, ули эйкакшозо. Школасо тонавтнемстэ тейтерькатне прядсть музыкальной школа, маштыть пианинасо седямо, мазыйстэ морыть. Сынь тетяст-аваст кондякс эрьва тевсэ докат, мейсэ кецявтыть эсест малавиксэст.
Юдинтнэ Светотехстроенть маласо стявтсть эстест кудо. Кувать строясть сонзэ, кудонть перька тевтне а маштнить. Тень кис кудось седеяк кенярксов, весе тесэ теезь эсест кедьсэ, эсест вийсэ! Истя, кода зярдо-бути строясь-стявтсь эсензэ кудотнень Валянь авазояк, васня братонзо марто, мейле мирдензэ марто.
Валентина Владимировнань эрямосонзо весе моли истя, кода сон, паряк, эзь арсе, но кода ладси эйсэнзэ, эсь семиянь койтнень-мельтнень кирдезь-топавтозь. Маштомс чарькодемс лия ломаненть, марямс лиянь ризксэнть, улемс анококс лездамс эрьванень, кинень эряви тонь лезксэть… Киньгак ланга беряньстэ а арсемс, беряньстэ а теемс… – истят сонзэ коензэ-кирданзо, конат пачкодсть тензэ покштянзо-бабанзо, тетянзо-аванзо пельде, ютасть ды ютыть тейтерензэ эйскак.
Весе те, весе те а стяко!
Тамара Баргова
Вечкевикс Валентина Владимировна!
«Эрзянь правда» газетань коллективесь ёвты тенк покштояк покш, седейстэ молиця поздоровт чачома чинк кувалма! Тынк седеенк свал пии-палы тиринь газетанть кисэ, сонзэ мелявкстнэ свал тынк мелявксонк. Ды свал, эрьва косо тынь кирдтядо каштанчи эрзянь кельсэ сёрмадыця журналистэнь лементь кувалма. Зяро статьят, репортажт, интервьют тынь сёрмадыде 36 иетнень перть – а лововить ды а ёвтавить, зяро килангот тынь ютыде сынст мельга яказь – а онкставить! Тынк весе содатадызь кода весенень валсояк, тевсэяк лездыця, стака шкасто киньгак а кадыця, виде кис стявтыця ломаненть. Кадык уцяскавсто моли эрямонк, уледе шумбрат тынськак ды эйкакшонк-малавиксэнк, роднянк-раськенк! Кадык эрьва чись канды кеняркс, а стувтовикс ёжомарямот, парочи, валдо мельть-бажамот!
Уважаемая Валентина Владимировна! Примите мои самые искренние поздравления с Вашим прекрасным и красивым юбилеем! Вы – необыкновенно чуткий и внимательный человек и наделены такими замечательными качествами: добротой, искренностью, лёгкостью и доступностью в общении, открытостью и отзывчивостью. Вы являетесь профессионалом своего дела, творчески и с душой относитесь к своей работе, пользуетесь огромным уважением и любовью коллег! Сегодняшняя дата очень значительна, ведь это не возраст, это мера опыта и мудрости, это время строить новые творческие планы и реализовывать яркие идеи! В этот знаменательный для Вас день желаю Вам крепкого здоровья, семейного благополучия, прекрасного настроения, душевного мира, дальнейших успехов в работе, любви и заботы близких! Пусть каждый прожитый год наполняет жизнь счастливыми событиями, новыми достижениями и приятными воспоминаниями, а сердце всегда будет преисполнено радостью и благодарностью Богу за каждый подаренный день жизни!
С любовью о Господе, Преосвященнейший Вениамин, епископ Ардатовский и Атяшевский.
Валентина Владимировна марто теевинек содавиксэкс, зярдо сон сась "Эрзянь правдав" важодеме Ленинградонь университетэнть прядомадо мейле. Ютксонок аволь аламо иетнень лангс апак вано, сеске теевинек паро ялгакс, малавикс ломанекс. Кементь иеть топавтынек вейке тев – ве отделсэ, вейке кабинетсэ. Лиясто пейдезь лемдильть эйсэнек патякс-сазорокс. Течис ояксчисэть семиянокак. Неть иетнень перть Валя зяроксть ульнесь тень аволь ансяк кеме лездыцякс – лисекшнесь, паряк, эрямом идицякскак! Ды эдь аволь ансяк монень. Истямо уш сонзэ обуцянь васень ёнксось: капшамс лездамо весенень, кинень берянь, кие понгсь кажос... Эштё сонзэ весе содасызь свал тевсэ лакицякс, ков-бути капшицякс, перьканзо ламо ломань мартокс. А лотксетяно дивсемеде, косто сон саи тень туртов вийть, шка, мель. Кадык эно сон свал ули истямокс.
Валентина Владимировна, Валюша ялгинем! Арсян теть кеме шумбрачи, валдо уцяска, ламодояк ламо паро тевсэть од изнявкст!
Татьяна Рябова, МР-нь культурань заслуженной роботник.
Юдина Валентина Владимировна по праву принадлежит к плеяде настоящих профессионалов, наиболее авторитетных и опытных представителей отечественного медиасообщества. Есть у неё какое-то внутреннее чутьё, ведущее вперёд – к новому, современному, интересному. Валентина Владимировна с большим вниманием и искренней мыслью освещает все значимые и приоритетные события республики.
Жизнь Валентины Владимировны наполнена разноплановой деятельностью, и не только журналисткой, но и благотворительной. Являясь членом Попечительского совета детского приюта «Надежда», она привлекает неравнодушных людей к оказанию благотворительной помощи детям, оказавшимся в трудной жизненной ситуации.
Я, как руководитель приюта, от всей души поздравляю этого коммуникабельного, духовно-нравственного человека с юбилеем! Вы прекрасная мама, воспитавшая двух дочерей. Теперь вся Ваша любовь и забота направлены на воспитание трёх внуков.
Уважаемая Валентина Владимировна! Выражаю Вам глубокую признательность и благодарю за чуткость, доброе слово и тёплый взгляд; за помощь нашим воспитанникам, за Ваше неравнодушие к чужим проблемам.
Желаю здоровья, творческого вдохновения, исполнения желаний и новых ярких побед! Оставайтесь всегда такой же молодой, яркой, весёлой! Пусть Ваше перо будет лёгким, а слово – метким!
Татьяна Барашихина,
директор ГКУСО РМ «Республиканский социальный приют для детей и подростков «Надежда».