Истямо лем ало неть читнестэ Эрзя-мокшонь раськень культурань музейсэ панжовсь мазый ды весе тейтерь-аватненень малавикс выставка. Кезэрень шкасто саезь пацясь ванстовсь тенек аволь ансяк кода авань мазылгавтыця ды прянь эждиця вельтявксокс, истя жо апаро арсицятнеде ды сельмедицятнеде ванстыцякс.
Те мелень витемань, кенярдовтыця выставканть анокстыцязо-арсицязо – эрзянь ёроков авась Людмила Демьяновна Лёвина. Сон – Мордовия Республикань культурань заслуженной роботник, декоративно-прикладной искусствань художник, Н.П. Огарёв лемсэ МГУ-нь Национальной культурань институтонь театральной искусствань ды народной художественной культурань кафедрань доцент. Выставкась алтавсь Людмила Демьяновнань юбилеентень. Тосо истя жо невтневить сонзэ тонавтницятнень важодевксэст, весемезэ эйстэст – 75!
Тешкстасынек, Людмила Демьяновнань республикасонок содасызь ламот. Васняяк сеть, кить тонавтнесть ды тонавтнить пельдензэ коцт ланга викшнеме, сёрмадомо, артомо. Эрзянь оршамот викшнесть сырькаезэ ды авазо. Людмила Лёвина эштё вете иесэ тейтерькинекс сайсь кедезэнзэ салмукске ды ушодсь тееме васень эскелькстнэнь те а шожда кезэрень тевсэнть.
Ледстясынек, ламос бажиця тейтерькась васня тонавтнесь Саранск ошонь 2 № художественной школасо, мейле тонавтнеманзо поладызе Ф. В. Сычков лемсэ Саранскоень художественной училищасо.
2003 иестэ саезь Людмила Демьяновна эрямонзо сюлмизе Н. П. Огарёв лемсэ МГУ-нть марто. Од ломантненень содамочинь максомадо башка Людмила Лёвина сеедьстэ якси республикасонок ды лия регионтнэсэ ютавтневиця выставкатнес, аноксты ды невтни мастер-класст. Эсензэ кедьсэ ды тонавтницятнень вийсэ анокстазь важодевкстнэнь невтни аволь ансяк Мордовиясо, масторонь келес. Ламо важодевкстнэнь сон кази ялгатненень ды малавикс ломантненень.
Людмила Демьяновна вейсэ ялганзо марто аволь умок васенцеде кундасть Грантонь тевентень ды лиссть изницякс. Юбилеень иентень топавтовсь умонь шкань арсемазо, конась сась тензэ эрзянь ды мокшонь велетнева якамсто, кода эсенек Мордовиясо, истя сонзэ томбалеяк. Малав иень перть вейсэ С. Д. Эрьзя лемсэ музеень важодицятнень марто важодсть те проектэнть лангсо.
– Мазыйстэ викшнезь раськень оршамопеленть вельде, мезе бу те аволь уле, бажатано невтемс аволь ансяк сонзэ мазычинзэ, истя жо келенек, коенек-кирданок сюпавчист, – ёвтни Людмила Лёвина. – Кезэрень шкасто саезь минек сырькаенек свал яксильть пацясо. Ламотнень юткстонок горобиясо ванстовить нейгак. Чарькодеви, сынь ней седе одкстомтозь, кода рузтнэ мерить, теевсть стилизованнойкс, ялатеке эйсэст кадовсть покштятнень-бабатнень тешкстнэ. Пацянть вельде аволь ансяк прясь ванстови, истя жо куш кодамо оршамопель седе мазылгавтови ды чачось валдомгавтови.
Алкукскак, Людмила Лёвинань пацятнесэ седе ламо валдо ды мазый тюст. Сынст лангсо прок чипай налкси, лангозост ванозь, валдомгады седеесь ды вадрялгады ёжось.
Весемева неяви, артыцясь седейшкава невти весе те мазычинть, конань сон реди пертьпельксканзо. Пацянь выставкань ваныцятнень сельмест кенярдовтыть кизэнь ды тундонь валдо тюстнэ.
Теде башка, тесэ невтевить архитектурной зданият, соборт, университетэнь корпуст, ракшат ды истя седе тов. Нурькинестэ, артовкстнэ ёвтнить тенек седе, мезесь седе пек тусь художникенть мельс, мезесь кенярдовты тейтерь-авань седеенть ды сонзэ тонавтницятнень. Сехте покш мель явови валдо тюстнэнень. Тень тешкстызь выставканть ваномо ламот сыцятнестэ, Людмила Демьяновнанень поздоровонь ёвтыцятнестэ.
С. Д. Эрьзя лемсэ МРМИИ-нь музеень прявтось, Мордовия Республикань Художникень вейсэндявксонь председателесь Людмила Николаевна Нарбекова тешкстась:
– Те выставкасонть, конань анокстызе Людмила Демьяновна, мазычиденть башка, редяви вейке поколениясто омбоцентень содамочинь максомась. Те ломанесь оймамонь а содыця, свал одонтень бажиця. Мордовия Республикань Художникень вейсэндявкссонть сон вети декоративно-прикладной искусствань лувонть. Правлениянь заседаниянь эрьва самонтень Людмила Лёвинань свал улить ламо арсеманзо, конатнень вейсэ бажатано совавтомс эрямос. Текенень поладан, сон пек ламо содамочить максы од ломантненень, тонавтницянзо туртов.
Седе тов Людмила Николаевна пачтясь, кодамо питнейчи сон путы «Мордовский народный костюм» альбомонтень, конань савсь аволь умок анокстамс вейсэ Людмила Демьяновна марто.
Те чистэнть Людмила Демьяновнань лемс ёвтавсть ламо поздоровт ды паронь арсемат. Сонзэ ёрокчидензэ пурнавозтненень пачтясть, сюкпрянь валт ды цецят тензэ казсть ялганзо ды тонавтницянзо. Вейкесь эйстэст сась Московсто. Те – Н. П. Огарёв лемсэ МГУ-нь Национальной культурань институтонь прядыцясь Екатерина Беляева. Екатерина Юрьевна ней масторонь прявт ошсо содавикс дизайнер. Тонавтнеманзо сон поладызе Строганов лемсэ Московонь художественно-промышленной академиясо. Ней важодевксэнзэ невтевить масторлангонь келес. Вана истят ёроков од ломанть Людмила Демьяновнань студенттнэнь ютксо.
Мария ПЕТРОВА
Пачтятано, выставкась карми важодеме Эрзя-мокшонь раськень культурань музейсэ октябрянь 25-це чис.