Эсь покштятнень-бабатнень культуранть, койтнень-кирдатнень ванстомась – те покш сюпавчи ды ине тев. Ды тенень эряви тонавтомс вишка шкасто саезь. Штобу раськенть улевельть поладыцянзо, эряви ушодомс эсеть семиясто. Самай истя лади эрямонзо Шулугинтнэнь кудораськесь.
Андрей Андреевич ды Анна Сергеевна эрить Саранскойсэ ды трить-кастыть колмо эйкакшт – Полинань, Дарьянь ды Иванонь. Кудазорось – Мордовской государственной филармониянь артист, «Разгуляй» моронь ды киштемань казаконь ансамблянь солист. Анна Сергеевна – Равчирень финнэнь-угрань раськень культурань центрань этнокультурной касомань-виевгавтомань коряс специалист. Теке марто евтама, сон икеле морсесь «Мерема» фольклорной ансамблясонть. Полина тонавтни Саранск ошонь 19 № гимназиясо 8-це «Б» классо, Дарья – 3-це «А» классо, Иван яки ошонь 2 № эйдень кужов. Эряви евтамс, тейтерькатне, тетяст-аваст ладсо, явить мель шкинемантень, сынь морсить «Виртеня» эйкакшонь этно-фолк группасо. Мирдесь – руз, нись – эрзя. Ансяк те а ашти пирявксокс эсь раськень койтнень-кирдатнень ванстомасо. Шулугинтнэ тень вадрясто теить шкинеманть вельде – морыть эрзянь, мокшонь, рузонь морот. Раськень оршамоткак улить эрьванть. Сынст мазычись сельмес каяви.
Анна Шулугина (тейтерькс Калугина) чачсь-кассь Отяжелень райононь Селища велесэ. Кудораськесэст ламот поколениятне – весе эрзят.
– Пек берянь, эйкакшон эрзякс а кортыть, ансяк чарькодить келенть. Ламосо, паряк, те монь чумось. Тонавтнемс келенть тенст мекс-бути маряви стака, а вана эрзянь ды мокшонь морот морыть покш мельсэ. Секскак раськень койтнень-кирдатнень, келенть, культуранть минь вансттано моротнень вельде. Ваня, куш эште вишкине, а кадови эйстэнек. Ды зярдо весе вейсэ кодамояк кенярксчисэ серьгедтяно моро, паро мельсэ моры мартонок, тонавтни а содавикс валтнэнь, – евтни Анна Шулугина.
Анна прядызе Н.П. Огарев лемсэ МГУ-нь Раськень культурань институтонть. Ды зярдо сон ансяк ушодсь тонавтнеме «Вокальное искусство» отделениясонть, тонавтыцятне макссть задания: муемс раськень костюм, конань икелень шкатнестэ кандтнесть сынст велесэнть эли районсонть.
Анна ардсь тиринь велев, евтнесь весемеденть аванзо туртов.
– Авам аволдась кедьсэнзэ, костюмонок арась. Пшкадинек бабанень. Тонась мерсь, келя, улить ансяк мазый тюсонь юбкат-ковтат, конатнень икелень шкатнестэ одирьватне свадьбас оршнесть. Мейле бабань мельс ледсь се, ульнесть минек енксонь эрзятнень кезэрень оршамосткак, ды кучимизь Маря бабантень, – евтни Анна Сергеевна.
Анна тетянзо марто сыргасть сырькаентень. Ды тонась тейтерентень макссь сарафан. Палянть марто ульнесь ковтаяк, ансяк шкась эзизе вансто, коцтось таркань-таркань кольсь-каладсь. Аня сонзэ коряс ситцасто стась од ковта. Кода евтнесь Маря баба, кезэрень костюмонть юрсо ульнесь домотканной коцтсто алгаюбка. Ды мерсь: «Истямо коцтом ули. Саик ды стак эйстэнзэ эстеть алгаюбка. Сон улезэ сарафандонть седе кувака, неявозо». Костюмонтень ули икельга пацяяк.
Зярдо Полина ды Дарья тейтерькатне кармасть морсеме «Виртеня» эйкакшонь фолк-группасо, те костюмось сынст лангс теезель. Мейле ансамблянь руководителесь Екатерина Олеговна Модина мерсь стамс те оршамонть енов молиця ковтат-сарафант тейтерькатнень туртовгак. Ней сынь морсить самай истямо палясо, кодамосо икеле яксесть сырькаест.
Анна Сергеевна шкинемань кинзэ ушодокшнызе «Мерема» фольклорной ансамблясонть. Ды зярдо тусь тосто (вейке-омбоце мельга чачсть эйкакштне, кармась стака свалшкане ардтнемс гастролев), мирдензэ марто кемекстызь тейтерькатнень максомс морамонь ансамбляв. Арсесть, паряк, истя, морамонть вельде, седе ванстови минек раськень культурась.
Тейтернетненень морамось пек вечкеви.
– Морамонтень покш мель яви Ваняяк. Сон эште кортамояк эзь машто, ие пель марто тензэ ульнесь, весть нурямосо нурсемстэ сон ушодсь «Три кота» мультфильмасто моронь морсеме. Ды сестэ Андрей мирдем тень мерсь: «Аня, ковгак а туят, сонгак морыця», – корты Анна Шулугина.
Андрей мирдензэ марто Анна теевсь содавиксэкс институтсо тонавтнемстэ. Церась прядызе дирижеронь отделениянть. Тонавтнемань шкасто кавонест якасть факультетэнь «Ладушки» вокальной коллективентень.
– Зярдо мон сонзэ васенцеде неия, марявсь, Данила Бодров актеронть енов моли. А уш кода ушодсь гитарасо налксеме, эстень меринь: «Те церась карми монь!» – кемексты Анна Шулугина.
Истя лисськак.
Андрей Шулугинэнь чачома енксозо – Чаунзабуень Медаево велесь. Зярыя иеть церась морси «Разгуляй» моронь ды киштемань казаконь ансамблясо. Ламоксть туекшнесь, варчнизе прянзо эрьва кодамо лия тевсэ, ансяк свал велявтыль мекев. Истя жо сон моравты Иоанно-Богословский кафедральной соборонь хорсо.
Андрей Андреевичень вечкевикс книгазо – Михаил Шолоховонь «Тихий Дон» романось-эпопеясь. Сонзэ пек токизе сюжетэсь – мезе савсь цидярдомс се шкань поколениянтень. Самай те романось ветизеяк казаконь ансамбляс.
Эряви меремс, Андрей ды Анна Шулугинтнэ культуранть марто эсь эрямост сюлмизь а стяко. Весемесь юты эйкакш порасто.
– Мекс мон кочкия культурань енкссо важодеманть? Весемесь юты семиясто, – евтни Анна Сергеевна. – Монь авань – Надежда Михайловна Калугинань, ульнесь эйкакш шкань бажамозо – морамс. Ды зярс эсензэ те мелесь эзь топавтовкшно, сон кундась монь эйс. Школасо мон аламодо морсилинь, ды авам кучимим тонавтнеме Раськень культурань институтов. Тонавтнинь вадрясто, ИНК-нть прядыя якстере диплом марто. Авам роботась эйдень кужосо, ансяк сонзэ пекстызь, ды сон кармась велень Культурань кудонь прявтокс. Ды вана сонзэ ушодовсь лия эрямо – топавтовсь эйкакш порань бажамозо. ДК-со ютавтыть эрьва кодат кенярксчить, ардтнить концертэв-фестивалев. Ютазь иестэ сон монь одс ливтимим сцена лангс. Сисем иеть эзинь морсе, кода туинь «Меремасто», пек стака ульнесь. А ней «Шумбрат, Мордовия!» фестивальс эрявсь анокстамс семиянь ансамблянь номер. Монь арасель мелем, тейтерькатне кортымизь, согласинь. Весе вейсэ лисинек сцена лангс.
Аванзо туртов покш лезкс истя жо максы Аннань сазорозо – Ольга Дорофеева (Калугина). Сон ероков, творческой тейтерь («Эрзянь правдась» ланганзо сермалесь а весть), свал арси-аноксты мельстуиця мероприятият.
Самай истят ломантнень вельде, кода Надежда Михайловна, Анна ды Ольга тейтерензэ, Селищасо культурась эри. Течи минек велетненень те пек а сатны.
Эряви евтамс, Андрей Андреевичень авазо – Галина Васильевна, истя жо важоди культурасо. Сон весе эрямонзо перть бажась морамс, те мелесь топавтовсь пенсияв лисемадо мейле. Ансяк сестэ авась чарькодсь, эрямонзо алтызе овсе аволь вечкевикс тевентень. Ней снартни а менстямс вейкеяк мероприятия, морамонтень путы оймензэ.
Седе ламо бу Шулугинтнэнь ды Калугинтнэнь кондят семият, косо раськень культурась ашти васенце таркасо ды тонавтневи эйкакш шкасто саезь. Ванат, покштянок-бабанок коест-кирдасткак седе ванстовить ды раськенекак а еми.
Юлия Еремина
Фотось Егор Горинэнь.