Весть, Мордовиянь НТМ телеканалонть ваномсто, педязь пединь экранонтень. Тосо ульнесть эйкакшт – школань тонавтницят, конатнень снимизь пейдевтиця передачас. Сон теке «Ералашонь» кондямо, ансяк минек, эсенек. Ды кода парсте налксить! Мезе те? Титратнесэ пачтявсь: «Пек вадря» киножурналось. Нурька сюжеттнэсэ ульнесть Саранскоень мазый таркатне ды ломантне, кинь содасынек. Ули меленек пачтямс газетасонок, мезе те истямось, кода чачсь, кодат икелепелев бажамост.
2021 иестэ Саранскойсэ панжовсь «Даридаль» автономной аволь коммерческой вейсэндявксось. Сонзэ прявтокс кармась Мария Федотова-Орлова. Тейтерьавась чачсь Саранскойсэ. Прядызе Н.П. Огарев лемсэ МГУ-нь филологиянь факультетэнть. Колмоце курссо тонавтнемстэ кармась важодеме университетэнь Культурань кудосо культорганизаторокс. Панжсь «Зазеркалье» поэтической клуб, ков эрьва недля пурнавкшность стихень ды прозань сермадыцятне. Ютавтсь студенттнэнь марто эрьва кодат кенярксчить ды пелькстамот. Самай сон арсинзе «Сударушка» ды «Сокол ясный» конкурстнэнь лемест. Зярдо МГУ-со панжовсь Культурань ды искусствань кудось, сон кармась покш кенярксчитнень режиссерокс, ульнесь вузонь культмассовой отделэнь прявтокс. Теде башка, важодсь республикасо ютавтовиця покшчитнень, фестивальтнень, форумтнень ветицякс. 1997 иестэ саезь, студенткакс улемстэ, свал налксесь «МХАТик» театрасо-студиясо. Самай тосо важодемстэ изнясь грантонь васенце проектэнзэ марто. 2017 иестэ саезь важодсь аволь коммерческой организациятнень марто, лездась арсемс-сермадомс грантт. Косо ульнесь проектэнь ветицякс, косо жо ансяк лездыцякс. Пурнась ламо содамочить ды чачсь мелезэ панжомс эсензэ организация, косо бу совавтоволь эрямос мельстуиця проектт. Истя теевсь «Даридаль» АНО-сь. (Тешкстама, Мария шкань ютазь кармась социальной проектированиянь коряс экспертэкс-педагогокс, федеральной ды региональной грантонь конкурсонь экспертэкс).
– Минь сеске кочкинек важодемань зярыя енкст. Васенцесь – краеведениянь. Мезть сепомс, школатнесэ пек аламо шка явови тиринь енксонь историянтень. Аволь весе класстнэ содавтовить краеведениянть марто. Саемга, стратонавттнэнь подвигтест пачтяви ансяк вейке-кавто валсо. Эйкакштне мезеяк а содыть. Истя лиссь «Подвиг стратонавтов» васенце проектэнек. Минь ардтнинек Инсаронь районов. Тосо лездынек паролгавтомс музеест, теинек экспозиция. Зярдо эйкакштне ковгак ардыть, неить эсест сельмесэ, якить од таркатнева, весе те кадови мельсэст-превсэст. Истя теевсь образовательной туризмась. Неть проекттнэс ярмакт макссь Президентэнь грантонь фондось. Аволь умок прядовсь «Мордовия вдохновляет» проектэсь. Пурнынек участникть зярыя школасто, кочкинек республикань кемень районт, теинек маршрутт ды сыргинек экспедицияв! Ульнесь туристэнь слет, теинек 10 видеоэкскурсият ды нолдынек «Мордовия вдохновляет» альбом-путеводитель. Эйкакштне содавтызь райононь центратнень, совсесть музейтнес ды заповедниктнес, ваннызь памятниктнень ды церьковатнень, варчнизь эрзянь ды мокшонь раськень тантей ярсамопельтнень. Ульнинек Орданьбуесэ, Покш Березникбуесэ, Инсарбуесэ, Ицялбуесэ, Кочкурбуесэ ды лия районтнэсэ. Кодамо мазый лиссь альбомось-путеводителесь! Тосо фотографият ды информация седе, кодат мельстуиця таркат улить районтнэсэ, ков эряви молемс экскурсия марто, – евтни М.Г. Федотова-Орлова.
– Мария Геннадьевна, инескеть, евтнеде, кода теевсь «Пек вадря» киножурналось ды мейле киношколась?
– Евтаса, истямо республикасонок мезеяк арасель. Эйкакшонь киножурналонтень эрявсь снимамс ковозонзо 6 сюжетт. Весемезэ эйстэст – 54. Вейке тев, зярдо сермадат грантонь яволявтома, арсесак, кода ды мезе. Зярдо жо кундат весементь топавтомо, лиснить эрьва кодат тамашань тевть. Сюжетной видеот вечкан эйкакш пингестэ саезь. Васняяк, улезэ литературной материал, вадря сценарий. Командантень эряви весементь снимамс, теемс монтаж, шкастонзо нолдамс. Эряви вадря звук, ламо камерат, вадря оборудования. Пурнынек съемочной колмо командат. А мезть кортамс, стакаль тевесь, цидярдынек. Съемкатнеде икеле эйкакштне ютасть кастинг, тонавтнесть актерской мастерстванть, кортамонть, движениятнень, камера икеле аштеманть. Ды аволь весенень сатыть прявт рольтне. Сниминек малав 90 сюжетт. Ветятано вейсэнь важодема НТМ ды «Мордовия» ГТРК телеканалтнэнь марто. Киножурналонь сюжеттнэнь невтизь телевизорга. Евтаса сеньгак, мелят ардтнинек Казанев кинофестивалев. Тосо евтнинь минек киножурналдонть. Ламот кевкстнесть сондензэ. Бути теевтемс прокатной удостоверения, сонзэ сайсызь невтеме Россиянь регионтнэва.
Киножурналось поладовсь «Пек вадря» киношколань проектсэнть. Эйкакштнень туртов весе те питневтеме, сынь таго саевтить пряст, ансяк кода а покордамс? Эряви лиятнененьгак варчамс. Сюкпря Культурань инициативань Президентэнь фондонь грантонтень. Киношколасонть пек вадря педагогт. Тешкставлинь Владимир Буралкинэнь, Гелена Юсуповань, Николай Большаковонь. Николай Павлович – ломанесь содавикс, МР-нь народной артист, важоди Рузонь драмань театрасо. Эйкакштне пек вечксызь сонзэ занятиятнень. Вана мезе рединь: эйдетненень пек а сатныть покш ломань, превей цераломань марто кортамот. Сон пейдевтияк, тонавтнемеяк кармавты! Теке марто кевкстни тевдест-мелявкстост, кунсолы сынст. Истя жо занятият вети Марина Савкина, важоди видестэ кортамонть коряс. Гримень ды образтнэнь коряс тонавты Светлана Борзова.
– Мезе лангсо важодтядо ней?
– Ве шкасто ветятано зярыя проектт. Ули «Семейный портрет. История моего героя» проектэнек. Сон топавтови региональной грантонть вельде. Сонзэ лувсо эйкакштне ванкшныть генеалогиянть, ундоксост, семиянь историяст. Школатнева ютавтынек малав 50 вастовомат, косо видеоуроктнень вельде генеалогось пачти, кода ушодомс тонавтнемс семиянь историянть, кода важодемс архивтнень марто, кода саемс интервьют покштятнень-сырькайтнень кедьстэ. Ней тенек кучнить семиянь геройтнень марто видеот, фотот, артовкст. Кочкатано 10 видеороликть, тейтяно нурька фильма. Седе тов нолдатано «Семейный портрет» книга.
Истя жо ней ушодынек «Мастерская талантов «Даридаль-медиа» од проектэнть. Сон изнясь Культурань инициативань Президентэнь фондонь грант. Важодемась ветяви «Киношкола» ды «Тележурналистика и медиатворчество» енкстнэнь коряс. Пурназь эйкакштнень иест коряс ниле группат. Кемекстазь покш программа. Медиашколасонть тонавты содавикс тележурналистэсь Дмитрий Божедаров. Улить эсенек ды федеральной педагогт. Саемга, Михаил Ломов важоди НТВ-сэ, сон тонавты сценариень сермадомо. Те проектэнть вельде нолдатано эйкакштнень марто социальной роликть ды 3 фильмат. Вейкенть лангсо («Чудо в Манадышах») уш важодтяно. Саинек вейке сырькаенть кедьстэ интервью, сон евтнесь тамашань тевде. Башка тема алтави Ине Отечественной войнадонть ледстнематненень, тейтяно «Что нам осталось?», «Держи меня крепче» фильмат. Теде башка, анокстатано «Молодежь на связи» кулянь нолдавкст (10 подкастт, 3 сюжетт). Ды тагояк ютавттано эйкакштнень марто ламо занятият: кода сермадомс текстэнть, кода аштемс кадрасо, мезе те репортажось, видеорядось ды седе тов. Монь покш мелем – теемс ды нолдамс вадря передача, саемс виев сюжет, улезэ эйсэнзэ покш смусть. Ды, нама, эряви арсемс ваныцятнеде.
– Мария Геннадьевна, кодат неень шкане эйкакштне?
– Пек парт. Васняяк, эряви мартост кортамс. Сынь весементь неить, марить, редить. Сынь вечкить кортамо, учить, зярдо кунсолосызь. Мон вечкан эйкакшт. Эйсэст ули покш потенциал, конань эряви редямс ды лездамс. Эряви тенек теке нармушканень лездамс ливтямсто. Весе эйкакштне талант марто, ансяк бу а емавтомс тень.
Татьяна Маторкина
Фототне Мария Федотовань-Орловань.