Четверг, декабря 02, 2021
Важное

Л. Н. Толстой сёрмадсь: «Вадря тонавтыцянть улест ансяк кавто ёнксонзо – покш содамочить ды покш седей». Неть эрявикс ёнкстнэ улить Отяжбуень Ламбаськень средней школань эрзянь ды рузонь кельтнень тонавтыцянть Ольга Ивановна АНТИПОВАНЬ, кона вана уш 38 иеть важоди тонавтыцякс ды кази эсь седейлембензэ эйкакштненень. 

Эстензэ жо маряви, буто ансяк исяк сонсь прядызе школанть, кочкась эстензэ вечкевикс тев, конантень алтызе весе эрямонзо, ды зярдояк тень коряс эзь янксекшне. Сонзэ педагогонь биографиязо – те свалшкань тонавтнема, эсь содамочитнень ды ёрокчитнень кастома.

Эйкакшпорась лади эрямо кинть

Ольга Антипова (тейтерькс Ешелькина) чачсь-кассь Отяжбуень эрзянь Тазалесэ. Те велесь а пек покш, ашти Ламбаське веленть маласо. Эсь стихсэнзэ авась тень тешкстызе истя:
Эрзянь вишкине велинес
Вере Паз мерсь тень чачомс,
Леля-ялакс юткс вейкинекс
Чанстязь ульнинь мон касомс.

Тетянень-аванень сюкпря,
Сынь эрямо монень макссть.
Васень чоледиця валтнэнь
Эрзякс ёвтамо кармавтсть…

– Вишка пингстэ пек вечкилинь радио вельде кунсоломс передачат, косо пачтявиль эйкакшонь кужосо ютавтовиця кенярксчитнеде. Монень пек вечкевсь кунсоломс, кода валморот ёвтнить, морынеть морыть. Бути кудосо араселинь, авам ушов лисиль ды серьгедиль: «Оля, сака! Передачась ушодовсь». Мон, кодамо мельстуиця налксема аволь уле, кадылия ды чиилинь кудов кунсоломо, – ёвтни Ольга Ивановна. – Истя жо вишка пингстэ уш пек вечкилинь ловномо. Рана кадовинь тетявтомо, весемезэ ульнесть тень кавксо иеть. Телевизоронок кудосо кувать арасель, аванень сон эзь рамавкшно, роботась ськамонзо, пандыльть тензэ трёшникть. Теке марто телевизоронь арасьчисэнть ульнесь паро ёнкскак – пек ламо ловнынек книгат. Эринек овсе веленть песэ, библиотекась куншкакуросоль, велесь жо кувака.
Школасто, эрсиль, сат, нулат-валат кайсесыть-понгавтнесыть, ярсат куроксто ды ютат библиотекав. Тов те молемась монень уш марявиль пек покш чикс. Нейгак ледстнян, библиотекарекс ульнесь Валентина Константиновна Панюшкина. Сон свал вастыль эйсэнек покш мельсэ. Эштё зярдо пек вишкинеть ульнинек, книгатнень яла сокарилинек, вешнинек мазый артовкс марто. Сон тень кисэ эйсэнек а кардыль, апак сёвно ёвтыль, косто ванномс-кочкамс книгат. Свал кевкстиль, мезе ланга книгась, конань саекшник. Ды бути уш книга саить, ловнык. Паряк, те весемесь, паряк, мартот те явовтыця ёнксось чачи, ансяк ловноманть те чис вечкса.

Паряк, сестэ, кода корты Ольга Ивановна, вельмеськак вечкемась эйкакш марто важодемантень.
– Авам, Любовь Никитична Ешелькина, довакс кадовсь 30 иесэ. Те шкас дивсян, зяро сестэ тевть ульнесть: колхозсояк валскестэ чокшнес роботасть, кудосояк ракшат савкшнось трямс, лия ламо тевть. Ды вана ней арсян, косто сон, пиштякась, шканть муиль ловномс, книгатнень кандылинек сонзэ лемскак. Ловноманть сон куломазонзо вечксь. Ульнесь шка, кода сыль газетатнень-журналтнэнь сёрмадстомань шкась, свал сёрмадстылинь кавто «Сяткот», кавто «Чилисемат», кавто «Эрзянь правдат». Веенст номертнэ сонензэ казнекс. Мон эштё а кенерян ловномояк, сон уш телефонсо тень гайневти: «Оля, «Сяткосо» истямо мельстуиця сёрмадовкс!» Ютазь иестэ од ормасонть ормалгадсь, сэредсь пек стакасто, эзь идеве, – ризнэзь ёвтни Ольга Антипова.

Школань иетне

Эсест тиринь велесэ Ольга Ешелькина прядсь начальной школа. Мейле, кода весе лиятнеяк, тонавтнеманть поладызе Ламбаськесэ.
– Ней вана ледстнян Ламбаськев школав якамонть ды неень шкатнень марто ладсян. Неень эйкакштненень мезеяк а эряви, – корты Ольга Антипова. – Минь эдь овсе лият ульнинек. Монь эштё ульнесть лелям ды ялаксом. Бабанок уш арасель, авам роботамо туиль рана. Минь жо школав пурнылинек мекс-бути кувать, туилинек апак завторка. Ялганок ютксо ульнинек авторитетэкс, секскак минтеменек школав кияк а туиль, кенкш лангсонок учильть эйсэнек. Школасо вишка классо тонавтницятненень максыльть компот эли кисель, седе покштнень а андыльть. Кудосто саилить кшисускомо, переменасто сонзэ сэвилик. Ды се тантей компотонть, се киселенть, се кшинь танстест те шкас а стувтовить.

Школасо пек вечкилинь рисовамо. Невтемга, литературань коряс ютатано художественной произведения, монь свал ульнесь мелем теемс иллюстрация се произведениянтень. Весть тонавтыцянок макссь задания М. Ю. Лермонтовонь «Мцыри» поэманть коряс. Мон уш сонзэ целанек тонавтния, теинь артовкс ды сёрмадстыя «Обняться с бурей был бы рад». Ансяк тонавтыцясь заданиянть эзизе кевксте. А мон ульнинь сэтьме, ковгак эзинь эцне, кедь а кепедилинь. Ды ней монськак уш 38 иеть эйкакшт тонавтан ды эстень свал кортан: мезе максыть тонавтницятненень анокстамс, свал кевкстить.

Ламбаськесэ тонавтнемстэ минек ульнесть кавто параллельной класст, эрьвасонть 36 тонавтницят. Минек мельга омбоце сменас сыльть Ламбаськень тонавтницятне, истя жо аволь аламо. Кудов сыргатано ды кодаяк Тазалев а пачкодтяно. Рудазонтькак ламо ичинек, ловонтькак ламо шешкинек. Тельня портфель лангсо пандо прясто кирякстнилинек. Кенярксовсто ютась шкась. Теке марто кода прядынь кавксо класстнэнь, монь уш арасель мелем яксемс ве ёнов. Ды арсинь туемс тонавтыцякс тонавтнеме.

Истя сон кармась тонавтнеме Ицялонь педагогической училищасо. Тосояк ульнесь сэтьмекс, прянзо ковгак а эцниль. Весть рузонь келень коряс макссть сёрмадомс сочинения. Тонавтыцякс ульнесь Татьяна Фёдоровна Куркина. Сон сась урокс ды мери: «Содатадо, кинь сочинениязо мелезэнь сехте пек тусь? Ольга Ешелькинань. Мертядо, мон сонзэ ловноса?» Ольга визделгадсь, сон эзь тонадо, зярдо лиятнень эйстэ эйсэнзэ явить.

Педучилищадо мейле, зярдо уш роботась тиринь велень школасо, тейтересь поладызе тонавтнеманзо М. Е. Евсевьев лемсэ педагогической институтонь «Педагогика и методика начального обучения» факультетсэ.

Тонавтыцянь
китне-янтнэ

– Мирденень лисинь рана, 18 иеть тень ульнесть, тонавтнинь педучилищань нилеце курссо. Рана чачтыньгак, – ёвтни Ольга Ивановна. – Мейле, зярдо прядыя тонавтнемам, сынь тиринь Тазалев ды 28 иеть роботынь эсенек школасо, косо монсь тонавтнинь. Роботынь, зярс школась эзь пекставо, 2012 иень таштамковонь 1-це чинть самс.
Се шкане Ольга Антипова уш кармакшнось сёрмадомо эрзянь кельсэ валморот. Кармасть тердтнеме эйсэнзэ райононь библиотекатнесэ, музейсэ ютавтовиця раськень мероприятиятнес. Ламбаськесэяк парсте содылизь, секскак Антипова пек кенярды, саизь тосонь школав роботамо.

– Ды вана 2012 иестэ саезь течинь чис Ламбаськесэ важодян, – ёвтни тонавтыцясь. – Начальной классо тарка арасель, эсест тонавтыцяст ульнесть, максызь тень рузонь, эрзянь кельтнень ды тиринь литературанть. Ды, мерят, рузонь кель пинге тонавтылинь, а уш эрзянсенть – седеяк. Лиясто кевкстить, зяро иеть ветятадо эрзянь кель? Монень жо маряви, весе 38 иетнень перть. Эдь вишка класстнэсэ эрзякс малав весе предметтнэсэ кортатано.

Истя жо сеедьстэ кевкстнить, мекс велес кадовинь? Эдь сеть шкатнестэ ламот уш туильть ошов. Васня яла мерилинь, а содан, мекс кадовинь, паряк, превень арасельть. А мекс истя кортынь? Паряк, сень коряс, авань ладсо мирдевтеме кадовинь 31 иесэ. Се шкане велесэ эштё арасель газ, монсь пенгть пильсинь-лазнынь, кардаз потмо скотинат тринь. Кода бюджетной сферасо важодицянень гектар якстерькай яла максыльть. Скалнэнь тикше кизэнь перть анокстылинь, лездыцян арасельть. Авам лездыль мезес виензэ ды шказо сатыльть. Сон эштё аволь пенсиясоль, фермав роботамо валске марто чииль, мейле монень лездамо сыль, эсь тевензэ теиль ды чокшне мекев фермав. Пек стака шкат ульнесть, паро, неть шкатне прядовсть...
Ды неть шкатне стакальть аволь кудоютконь тевтнесэ. Ламо стакачить савсь кирдемс авантень од шкасто саезь. Ашкасто эрямосто тусь мирдезэ, овсе эйкакшокс, 18 иесэ, куломась нельгизе цёранзо. Одсто калминзе ялаксонзо ды лелянзо. Весе апаронть, седей ризксэнть сон валызе эсь валморотнес, конатне ёвтнить аванть а шожда уцяскадо, эрямонь китнеде-янтнэде.

Вечкевикс роботась ды шкинемась жо свал ульнесть седей оймавтомакс, эрямонь смустекс. Ольга Ивановнань пек вечксызь тонавтницятне, сон машты муеме мартост кель-вал, машты уроконть тееме мельстуицякс. Парсте соды, мезе эряви неень шкань эйкакштненень. Паряк, тень кувалма сонзэ тонавтницянзо республикань ды весероссиянь пелькстамотнень свалшкань изницят. Вадря важодеманть кис эсензэяк пек ламо грамотанзо ды шнамонь конёвонзо, аволь весть лиснесь сехте вадря тонавтыцякс. Весементь кисэ тензэ максозь «Российской Федерациянь общей образованиянь почётной роботник» лемесь.

– Тетям-авам монень макссть аволь ансяк эрямо, истя жо тиринь келентень, тиринь ёнксонтень вечкема. Ды те пси вечкеманть максан вишка оинень ды тонавтницян туртов, – кемекстынзе валонзо Ольга Антипова.

Тонавтыцянь чинть кувалма арсетяно Ольга Ивановнанень кеме шумбрачи, кунсолыця ды превей тонавтницят, ламо од изнявкст! Эсь творчествасонзо шкинемань од тёкшт!

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».