Тундонь видемась – те аволь ансяк велень хозяйствань важодемань пелькс, весе масторонть туртов одкстомтомань ды кемемань алкуксонь тешкс. Чинь васенце лембе налтнэнь марто, зярдо пертьпельксэсь сыргози телень удомадонть, паксятнесэ ушодови пси шка. Аграрийтнень пельде те шкась веши аволь ансяк содамочить, истя жо покш цидярдома, эдь сынст важодемаст эйстэ ашти сы шкань урожаесь.
Ансяк, весе инновациятнень лангс апак вано, прявтокс кадови ломаненть важодемазо. Тундонь видемась – те командасо важодема, косо эрьвась содасы эсь тевензэ: агрономсто саезь, кона тешксты видемань шканть ды норматнень, механизаторс, кона ламо част ютавты тракторонь руль экшсэ. Неть читнестэ паксятнесэ лаки эрямось: увны техникась, качады ансяк соказь модань чине, коштсонть жо ливтни дивань учомань ежо.
Самай истя молить тевтне Ицялонь райононь велень хозяйствань прявт предприятиятнестэ вейкесэнть – «Агропромсервис» ООО-со, конань прявтсо ламо иень перть ашти алкуксонь аграрникесь Владимир Ильич НУЖНОВ.
Зярдо минь ульнинек хозяйствасонть, мольсь сюрокс кукурузань видемась. Те агротехнической стака процесс, конань эйстэ ашти аволь ансяк урожайностесь, истя жо ярсамопелень ды коромонь промышленностенть туртов сы шкань анокставкстнэнь вадрячись.
Весе тевтне ушодовить техниканть паксяв лисемадо ламодо седе икеле. Васняяк эряви кочкамс гибридэнть. Эрьва региононть туртов кочкавить гибридт, конат цидярдыть климатонь условиятненень ды орматненень. Седе тов вадрясто анокстави модась. Сексня ютавтови сокамо, тунда – кавшаня, летьке видема таркань теемга культивация. Истя жо тееви видьметнень протравливаниясь. Специальной препараттнэсэ обработкась вансты лисевкстнэнь орматнеде ды кажов унжатнеде уш васень шкатнестэ саезь.
Весементь коряс, эрьва эскельксэсь – гибридэнь кочкамосто саезь урядамос – веши содамочить, ерокчи ды неень шкань решеният. Ансяк истя кастови вадря сюро.
Эсь тевень содыця трудий ломанть
Кода кортыть «Агропромсервис» ООО-со, неень шкань технологиятне лездыть видемс кукурузанть пек видестэ. Самай весе вешематнень кирдезь важоди Александр Александрович НИКИТИН механизаторось. Сон тевензэ содасы, аволь вейке кемень иеть тракторонь руль экшсэ важоди. Сон велень алкуксонь ломань, корьмай моданть эрьва лекстямонзо чарькодьсы.
– Мон чачинь Оброчнойсэ. Школадо мейле тонавтнинь Смольноень 10 № СПТУ-со. Тосо макссть содамочить зярыя специальностень коряс: водителень, механизаторонь, слесарень. Уш васенце курссо тонавтнемстэ Лишмень заводонь икелень прявтось тердекшнимим практикань ютамо. Самай сестэ, 1997 иестэ саезь, ушодовськак важодема ким, – евтни Александр Никитин.
Александр Александрович чачсь-кассь велесэ ды уш вишка шкасто саезь тонадсь важодемантень. Эйкакшокс покш мель явсь техникантень, вечкиль мезе-бути калавтнеме, витнеме-петнеме. Сонсь, киньгак лезкстэме, вешниль тракторонь-машинань каладомань тувталонть ды витнилизе. Те весемесь тензэ пек лезды те шкас.
– Тетям-авам истя жо важодсть колхозсо. А вана сазором тусь эрямо ошов. Мон жо ковгак эзинь туе. Кода кортыть: киненьгак эдь эряви кастомс масторонтень кши! Ней роботан кода тракторсо механизаторокс, истя комбайнань руль экшскак сенажонь урядамо ды сюротнень нуема шкасто меельце зярыя иетнень перть озакшнан. Коллегатне-комбайнертнэ весементь тень невтизь, тонавтымизь, тевесь пек тукшны мелезэнь, – корты Александр Никитин. – Ней минек весе вийтне максозь сюронть видемантень. Телесь тедеде ловов ульнесь, тундось экшель ды пиземевель, модась кувать эзь коське, роботатне аламодо таргавсть. Пек учотано лембе ды вадря кизэ, штобу норовось кенярдовтовлимизь.
Александр Никитин роботы од тракторонь руль экшсэ, хозяйствась сонзэ рамизе ютазь иестэ. Кадык техникантень апак ладя неень шкань компьтер, тень лангс апак вано, роботамс эйсэнзэ вадря. Теке марто сы шкань урожаенть вадрячизэ ашти механизаторонть содамочинзэ эйстэ. Тень коряс мелявтомс а эряви, Александр Александровичень весемеденть сатышка, эдь важодемань стажозо малав 30 иеть. Тевензэ содасы пек парсте, лангозонзо ули кемема.
Ламо иень перть парсте важодеманть кисэ А.А. Никитин казезь ламо наградасо: МР-нь Прявтонть пельде дипломсо, МР-нь Велень хозяйствань ды продовольствиянь министерстванть пельде благодарностьсэ ды лиясо.
«Агропромсервис» ООО-со истя важоди эрьвась. Свал бажить весементь теемс шкастонзо ды ливтемс эсь хозяйстванть икеле молицятнень юткс. Минь жо арсетяно хозяйствантень вадря ие ды сюпав норов!
Юлия Еремина
Фототне Егор ГОРИНЭНЬ.