Эрзянь-мокшонь раськень культурань музейсэ (ул. Советская, 19) панжовсь Мордовия Республикань народной художникенть, Россиянь художествань академиянь почётной академикенть Анатолий Николаевич Барговонь «Традиции живая нить» выставказо.
Анатолий Николаевич Баргов – живописень классической школань художник, кона пек парсте содасы ды чарькодьсы тиринь ёнксонь мазычинть. «Традиции живая нить» выставкасонть невтневить ведьгеменде ламо важодевкст, конатнесэ невтезь пертьпельксэнь мазычись, тиринь ёнксонь историясь, мифологиясь, койтне-кирдатне, ломантне.
– Мон сюкпря ёвтан Эрзянь-мокшонь раськень культурань музеень прявтонтень Надежда Петровна Баулинанень, кона ёвтась мель пурнамс тесэ монь роботатнень невтема, – мерсь Анатолий Баргов. – Музеень залось аволь покшке, валдо. Тесэ ули алкуксонь музеень ёжо. Ды аволь покш выставкатнень ютавтоманть туртов пек лади.
Кода тешкстызе сонсь художникесь, выставкасонть пурназь роботатне артозь меельце вете иетнень перть.
– Тедеде мон ульнинь пленэрсэ Болдинасо, сёрмадынь котошка роботат. Ансяк кода-бути лиссь истя, мон сынст весе казинь ялгатненень, содавикс ломантненень. Эстень вейкеяк эзь кадово, – ёвтызе Анатолий Николаевич.
Выставкасонть невтезь роботатнень ютксто Анатолий Баргов башка яви сетнень, конатне ульнесть сёрмадозь обедъёнксов ардтнема шкастонть.
– Воронежской областьсэ ули веле, пек мазый, ванькс, сэтьме. Ды те велесэнть улить сёвонень зярыя кудынеть. Кода содатадо, минек республикасо истят кудот улить Тавласо. Тосо жо эрьва кудыненть перька неезесь лиссь картинакс. Сынь невтевить течинь выставкасонть, – тешксты артыцясь. – Истя жо ульнинь Краснослободской райононь Чукало велесэ. Ванкшнынь тосонь пейзажтнень. Тува чуди пек мазый лей, истя жо велев совамо кись сельмес каяви. Те весементь сёрмадыя, ды лиссь пек мазый картина.
Кода ёвтазель икеле, «Традиции живая нить» выставкасонть невтевить ломантне, раськень койтне-кирдатне, пертьпельксэнь мазычись. Неть тематне свал ульнесть малавикст художникентень, сынст марто сюлмавозь сонзэ шкинемазо. Ды те чарькодевияк. Анатолий Николаевич сонсь эрзянь ломань, чачсь-кассь велесэ ды раськень культуранть мазычинзэ несь вишкинестэ саезь. Секскак те ёнкссонть васенце роботазояк невти эрзянь раськень кенярксчинть – «Эрзянь Озксонть». Кода тешксты авторось, композициясь ульнесь многофигурной. Ды шкань ютазь лиссь триптих.
– Зярдо сёрмадыя эрзянь раськень те кенярксчинть, чарькодинь, мезе-бути а саты. Истя, керш ёнкссонть невтия чинь стямонть «Торама» ансамблянть марто. Вить ёно – чокшне, моли «Келу» ансамблянь концертэсь. Теньстэ монь ушодовськак раськень темась.
Ды те ёнкссонть важодемась аламонь-аламонь виевгавтовсь. Кода тешксты Анатолий Баргов, минек республикасо раськень пек ламо кенярксчить ютавтневить, косо невтневить раськень мазыйдеяк мазый оршамотне. Зярыя иеде икеле Рузаевкасо васенцеде ютавтовсь «Кургоня» кенярксчись. Тосо ульнесь истямо мазычи – эрьва кодамо раськень ломанть, мазый оршамопельть. Кода тень а невтемс? Истя чачсь «Шумбрат, Кургоня!» картинась.
– Минек эрзянь-мокшонь раськесь пек мазый, ломантне панжадо седейть, мизолдыцят. Ды кенярксчитне, конатнень сынь пурныть-ютавтыть, истят жо вадрят ды мазыйть. Эрзят, мокшот, шокшот – вейке раське, конась эри ояксчисэ ды свал вейсэ. Кода тень а невтемс эсь роботатнесэ, – кемексты Анатолий Баргов.
«Традиции живая нить» выставканть ваномо сакшность художникенть ялганзо, малавикс ломанензэ, содыцянзо.
Кода мерсь искусствоведэсь, Мордовиянь Художникень союзонь прявтонь полавтыцясь Елена Голышенкова, Анатолий Баргов эсь важодевкстнэсэ машты эрьва ёндо невтемс покш кенярксчинть («Шумбрат!» картинась), сэтьме лириканть («Яблочная благодать»), раськень мазычинть («Шокшанки») ды, нама, пейзажтнень, конатнесэ истя жо редявить минек эрзянь-мокшонь раськень койтне-кирдатне.
А вана Эрзянь-мокшонь раськень регионъютконь общественной вейсэндявксонь ответственной секретаресь Татьяна Ширманкина мерсь, Анатолий Барговонь роботатнесэ ули покш вечкема. Вечкема тиринь ёнксонтень, пертьпельксэнтень ды ломантненень.
– Анатолий Николаевич эсь роботатнесэ невти минек республиканть мазычинзэ, раськень оршамопельтнень лиятнень ёнов амолемачист. Течинь чистэ те пек эрявикс, – мерсь Татьяна Тимофеевна. – Художникесь кирди кеме сюлмот минек общественной вейсэндявксонть, республикань Культурань, раськень политикань ды архивень тевень министерстванть марто. Сон кирди кеме сюлмот сеть регионтнэнь марто, косо эрить эрзят ды мокшот. Ды косо свал ютавтокшны эсь выставканзо.
Выставканть ды Анатолий Барговонь творчестванзо коряс истя жо ламо лембе валт ёвтасть пурнавозтне.
«Традиции живая нить» выставкась карми важодеме июлень 3-це чис. Садо, кадовтадо мельспаросо!
А. Н. Баргов чачсь Магнитогорскойсэ 1955 иень июлень 22-це чистэ. Эйкакшчизэ ды од шказо ютасть Покш Игнатовань райононь Андреевка ды Покш Игнатова велетнесэ. Школанть прядомадо мейле тонавтнесь С. М. Киров лемсэ Ицялонь педагогической училищасо, Чувашиянь И. Я. Яковлев лемсэ государственной педагогической институтсо. 1995 иестэ совавтозель Россиянь Художникень союзонтень. Истя жо сон – Россиянь Художникень творческой союзонтень совиця. 2002 иестэ саезь 2012 иес ульнесь Мордовиянь Художникень союзонь председателекс. Художникесь ламоксть невтсь прянзо республикань, региононь, регионъютконь, весероссиянь, раськеютконь художественной арт-проекттнэсэ. 1997 иестэ саезь Анатолий Николаевич ютавтсь колоньгеменде ламо персональной выставкат, ютксост Санкт-Петербургсо, Нижегородской областень Лукояновасо ды Покш Болдинасо, Саранскойсэ, Пензасо.
Юлия Еремина
Фототне Эдуард Ретунскиень