Меельце шкасто Александр Маруховонь эрзянь кельсэ «Ламбамо паламо» морось гайги эрьванть колонкасто. Моронть авторонзо Мордовия Республикасо кармасть содамонзо а пек умок.
Церась чачсь Самарань областень Похвистневской райононь Покш Толкан велесэ. Тосо жо чачсь эрзянь содавикс поэтэсь Числав Журавлев, конань шкинеманзо марто кеместэ сюлмавозь Сашань творчествань кизэ.
Самарань эрзя
Эйкакш пингестэ саезь Саша марясь эрзянь келенть, ансяк эзь корта эйсэнзэ. Тетязо-авазо седе сеедьстэ кортасть те кельсэнть эсь ютковаст. Ансяк Сашань туртов уш сестэ эрзянь келесь марявсь масторлангсонть сехте мазыекс. Вишкинестэ сонензэ марявсь, тетязо-авазо аволь кортыть – морыть. Валтнэнь таргасть кувакасто, седейшкава.
Церанть авазо, Наталья Юрьевна, важоди тиринь велень школасо завучокс. Вечкевикс важодеманзо туртов алтась 30 иеть.
Сашань тетязо, Сергей Васильевич, ероков музыкант, эрзянь ды рузонь кельсэ морсиця. Церась ламо иеть важодсь тиринь велень клубонь прявтокс, седе тов художественной руководителекс, теке жо енкссонть роботы нейгак. Сон вадрясто налкси балалайкасо, гитарасо ды гармониясо. Репертуарсонзо улить Числав Журавлевонь стихензэ лангс путозь морот. Ней чарькодеви, кинь пельде Сашанень ютась морамонь ерокчись.
Од ломанесь ушодсь морамо ниле иесэ. Васенцеде сцена лангс лисеманзо мельсэнзэ кирди нейгак. Сон кидеяк эзь визде ды эзь тално, мекевлангт, сценась тердсь эйсэнзэ. Сестэ сон морась рузонь кельсэ моро. Кунсолыцятне сеске содызь, сценась – те сонзэ эрямо лувозо.
Вете иесэ церынесь васенцеде моракшнызе «Эрьва тундось сы эсензэ койсэ» Числав Журавлевонь стихензэ лангс путозь моронть. Музыканть сермадызе Сашань тетязо.
Од церась ледстни, сынст семиясо Числав Журавлевонь стихензэ содылизь весе. Кода седе кассь, «Кадозь кудо» ды «Седеень лавсь» стихтнень лангс музыканть уш сермадызе сонсь.
– Школань прядомадо мейле тонавтнинь Самарань областень Культурань ды искусствань училищасо. Ламоксть морсинь сцена лангсо, те тевесь кандсь тень покш кеняркс. Училищанть прядомадо мейле арсинь туемс тонавтнеме Московов, ансяк весемесь лиссь лиякс. Сась армияв туема шкась. Службам ютась Московсо Президентэнь полксо. Мон иень перть эзинь стувтне музыкадонть. Юткошкасто налксинь ялгатненень гитарасо, ульнинь «Оптимисты» солдатонь инструментальной ансамблянть художественной руководителекс, – евтни Саша.
Армиядо мейле Саша зярсыя роботась Дополнительной образованиянь центрасо, тонавтсь эйкакштнень вокалонтень. Седе тов важодсь Love Radio Самарань радиокомпаниянь студиясо эфирэнь ветицякс. Ансяк эйкакштнень марто важодемась сонензэ вечкевсь седе пек, секскак 2020 иестэ Саша тагояк велявтокшнось эйкакшонь тонавтомантень. Те енкссонть сон роботы нейгак.
Музыкась ды СВО-сь
Александр Маруховонь свал ульнесь мелезэ пурнамс эсензэ группа. Те бажамось топавтовсь ансяк 2020 иестэ. Од ломантне макссть группантень «Эрзя» лементь, секс мекс эрьва музыкантонть семиясо улить эрзянь ундокст.
Эряви евтамс, группанть пурнамодо мейле музыкантось кувать арсесь репертуаронть лангсо, эзь сода, мейстэ ушодомс. Те тевсэнть церантень парсте лездасть МР-нь заслуженной морыцянть Андрей Бочкановонь ды МР-нь культурань заслуженной важодицянть Виктор Чичайкинэнь (Бакич Видяень) шкинемаст.
– Мон кунсолынь цератнень морост ды чарькодинь, кодамо виев ды мазый эрзянь келесь. Мекс жо монь группантень а варчамс морамс эрзянь кельсэ?! Се шкастонть монь дивавтсь вана мезесь, мекс Самарань областьсэ арасть тиринь кельсэ неень шкань морыцят, эдь те таркасонть ламо пингень перть эри эрзянь раськесь. Эесь сыргась таркастонзо, зярдо минь морынек «Якстере инзейне» Хабибень ды «Салыця» (руз. «Угонщица») Ирина Аллегровань эрзянь кельс ютавтозь моротнень. Сюкпря евтан Самарань областень Раськень ояксчинь кудонь важодицянтень Вера Алексееванень, кона лездась ютавтомс моронть рузонь кельстэ эрзякс, – корты музыкантось.
Кавто иень перть «Эрзя» вокально-инструментальной группанть репертуарозо сюпалгадсь. Од ломантне невтнесть эсь ерокчист эрьва кодамо фестивальсэ ды пелькстамосо. Марявсь, весемесь моли валанясто ды а улить кодаткак стакачить, ансяк 2022 иестэ Россиясо ушодовсь специальной военной операциясь. Саша васенцетнень ютксо эсензэ олясо тусь Тиринь масторонь ванстомо. Боевой долгонзо топавтомсто морыцясь эзь стувтне музыкадонть. Мартонзо свал ульнесть вадря ялганзо – гитарась ды моронь пусмось. Юткошкасто сон морась солдаттнэнь туртов сэтьме ды валдо эрямодонть, моротне ульнесть сехте вадря ормаменьксэкс. Иень перть фронтсо улемстэ Саша невтизе эсь прянзо, кода алкуксонь боец. Вадря арсема лувонзо ды превейчинзэ кисэ ялгатне максызь тензэ «Ванга» позывноенть. 2023 иень октябрясто, боевой задачань топавтомсто, музыкантось стакасто ранязель. Иень перть ютась реабилитация, се шкастонть пачколесь инжекс Мордовияв. Тесэ сон теевсь вадря ялгакс Андрей Бочканов марто.
– Андрей ульнесь тень кумирэкс. Эзинь тално ды кевкстия сонзэ, мери-арась морамс сонзэ зярыя моронзо эсень группань марто. Андрей эзь моле монь энялдомам каршо. Самарав велявтынь пек уцяскавокс. Ды тагояк ушодовсь «Эрзя» группанть марто эряза важодемась. 2024 иень декабрясто карминь содамо: лавшомгадозь шумбрачинть кувалма армияв молемс а маштован. Истя, 2025 иестэ прянек-пильгенек чопавтинь музыкальной карьерантень. Иень перть ульнесть ламо гастрольть, концертт, фестивальть. «Эрзя» группанть марто эрьва кува ардтнинек. Сцена лангсо ламоксть морсинек Андреень «Вачодо ванан» ды лия моронзо. Шкань ютазь Бочканов гайгстась тень ды мерсь варчамс морамс сонзэ «Се кудосонть» моронзо. Сон, келя, косояк эште эзь гайге, казизе монень. Самай те моронть кувалма ламот содасызь монь ды «Эрзя» группанть леменек, – евтни Саша.
Неень шкасто Сашань шкинемазо яла сюпалгады. Аволь умок Самарань эрзясь нолдызе мазый од моронзо. Сонзэ ней морсить кода покштне, истя вишкинькатнеяк. Те моронть историязо ушодови Мордовиясто. Ютазь иень кизэстэнть Александр Марухов «Эрзя» группанть марто сакшность морамо «Шумбрат!» Покш Березниксэ ютавтозь кенярксчинтень. Концерттэ мейле Саша вастовкшнось Саранскойсэ эриця ялганзо марто, кортасть седе-тонадо.
– Самарав велявтынь вадря ежосо, сюкпря ялгатненень! Сестэ уш арсинь, сермадан кодамояк эрзянь моро. Ды истя лисськак, автомойкасо аштемстэ прязон састь моронь васенце строчкатне. Кудов ливтязь ливтинь, озынь ды сеске сермадыя моронть, секе жо чистэнть кучия Саранскоень ялгатнень туртов, сынь моронть шнызь. Ды вана Од иеде икеле сонзэ маризь кунсолыцятне, – евтни морыцясь.
Алкукскак, Саша казсь шкинеманзо вечкицятнень туртов покш ды паро казне. Самарань эрзянть морозо токи седей, вадрялгавты ежо.
Вечкевикс важодемадонзо башка, морыцянть эрямосо ули эште вейке сюпавчизэ – семиязо. Вероника нинзэ марто трить-кастыть Ленька церынькаст. Саша тешксты, малавиксэнзэ – те сонзэ кеме нежезэ ды эрямонь смустезэ.
Эсенек пельде арсетяно Александр Маруховнень кеме шумбрачи, важодемасо икелев молема ки ды эрзянь кельсэ ламо од морот!
Алена Артемьева
Фототне саезь
Александр Маруховонь архивстэ.