Сентябрянь васенце читнестэ аграрийтне лиссть урядамо паксянь инязораванть – кукурузанть. Сонзэ кавто метрань сэрезэ ды чопода-пиже палязо неявить васолдо. Ансяк а кувать кадовсь тензэ мазылгалемс. Агрономтнень валост коряс, пеель марто комбайнатне сонзэ «керясызь» кеменьшка чис.
Ютазь недлясто минь пачколинек Ромодановань райононь Трофимовщина велев ды неинек, кода моли кукурузанть урядамось «АПО Элеком» ОАО-нь предприятиясонть, конань прявтсо И. А. Базакин. Те предприятиянтень кандовить зярыя отделеният: Трофимовщинань, Курмачкасонь, Алтарынь ды сехте васолонсесь – Береговые Сыресинь, кона Ицялонь районсо. Трофимовщинань отделениянть ветицязо С. М. Жуков. Тесэ минь вастневинек прявт агрономонть Виктор Вячеславович Паулкин марто. Сон паро мельсэ ёвтнесь паксянь тевтнеде ды ускимизь кукурузань урядыця комбайнанть ваксс. Се чистэнть комбайнась важодсь ансяк омбоце чи. Чизэнзэ сон нуи малав 30 гектарт. Кукурузась кенерсь, сон пачкодсь, кода кортыть специалисттнэ, ловсонь-штань (молочно-восковой) кенеремас. Секскак сонзэ пурнамось моли шкастонзо.
Комбайнанть мельга керсезь кукурузанть кенерить ускомо сталмонь усксиця вете машинатне: колмо КамАЗ-т ды кавто МАЗ-т. Сынь коромонть ускить 10 вайгельбень трокс видьстэ силосонь латконтень. Тосо Т-150 ды К-700 трактортнэ чарысэст матрыть кукурузанть. Теде башка, Т-150 тракторось кечесэнзэ лезды витнемс КамАЗ-сто сявордозенть, конась латксонть сравтовозь малав 20 сантриметрань сэрьсэ. Бути кукурузанть парсте а матрамс, силосось кушты ды а карми маштовомо ракшатнень андомс. Вейке латконтень весемезэ кельгить 5-6 тёжат тоннат силос. Т-150 тракторсонть важоди Александр Макаров, К-700-сонть – Владимир Михайлов.
Трофимовщинань отделениясо кукурузадонть весемезэ видезь 200 гектарт. Урожайностесь 370 центнерт гектарсто. Те пек вадря, бути саемс мельс, што кизэнь перть малав допрок арасельть пиземеть.
Минь кортнинек Олег Олегович Новопольцев комбайнёронть марто. Те силосонь урядыця комбайнасонть сон важоди васенце ие. Истят комбайнатнеде весемезэ кавто. Омбоце комбайнась седе умонь. Теде икеле Олег Олегович урядась сенажокс тикшенть, роботась «Кировец» тракторсо. Цёрась тонавтнесь Ромодановань СПТУ-со электрогазосварщикекс. Специальностень коряс важодемс мелезэ арасель. Седе пек вечкевсь тензэ вельхозтехникась. Вишка пингестэ саезь тетянзо марто ардтнесь паксятнева. Тензэ пек тукшнось мельс тетянзо тевезэ, конась важоди теке предприятиясонть. Сюронь пивсэмань шкасто – комбайнасо, зярдо жо сюрось пурнави – топавты механизаторонь тевть.
Ве валсо, машты важодеме эрьва кодамо техника марто. Ней анокстыть чиньжарамонь пурнамонтень. Олегень тетязо эштё од, тензэ 48 иеть. Семиясост эйкакштнэде ниле: кавто сазорт ды кавто лелят. Ней покш леляст СВО-со, ков тусь эсь олясо. Тосо важоди рембатсо. Витни яжавозь военной техниканть. Олег ськамонзо тусь тетянзо киява. Вечксынзе паксянь тевтнень. Олегень важодемань чинзэ кувалмозо – валскестэ саезь чокшнес. Кевкстеманок лангс, зяро чизэнзэ урядыть кукурузадонть, мерсь: «Весемесь ашти техниканть эйстэ. Бути а карман аштеме, учнеме машинат, сестэ 30 гектартнэ урядавить. Бути киньгак мезезэяк яжави, тагояк шкась таргави. Те комбайнанть арась бункерэзэ. Сон пек алга леди кукурузанть, конань мейле керсесызь пеельтне ды пештяви витьстэ КамАЗонь кузовас». Важодемань кувака чиденть мейле кудосо Олегень учи вечкевикс семиязо – низэ ды колмо эйкакшонзо!
Зярс кортнинек Олег Олегович марто, тевтеме аштесь грузовой машинаськак. Эдь сынст важодемаст сюлмавозь вейке омбоценть марто. Секс эрязасто кортнинек КамАЗ-нь ветицянть Шамиль Саяфович Слаев мартояк. Сон чачсь Алтары велесэ сокицянь-видицянь семиясо.
Школадо мейле тонавтнесь Саранскойсэ автомеханикекс. Весе эрямонзо перть роботы техника марто. Бути мезеяк яжави, свал сонсь тейсы. Роботамо ушодсь 1981 иестэ саезь. Сестэ эштё ульнесь колхоз. А вана те организациясонть важоди ансяк кавто иеть. Теде икеле роботась частникень лангс. Пек мелезэнзэ тукшны «АПО Элекомсо» важодемась ды пандытькак, келя, седе вадрясто. Куш роботамскак сави ламо. Чизэнзэ теема 10-12 рейст. Шамилень кавто эйкакшонзо, колмо нуцьканзо.
Те шкастонть ваксозонок арась омбоце грузовой машинаськак, конань ветицязо Айрат Альбертович Абубякиров. МАЗ-нь азорось Ромодановань райононь Алтары велестэ. Те грузовикесь эсензэ. «АПО Элекомсо» важоди сестэ, зярдо тердьсызь. Сехте сеедьстэ те эрси сюронь урядамо шкасто. Айраттнэнь 31 ие. Важодеме кармась 18 иестэ саезь. Школадо мейле тонавтнесь Саранскоень строительной техникумсо. Ансяк специальностень коряс эзь важоде. Велявтсь тиринь велев. Теде икеле лия машиназо ульнесь. Тельня полавтызе. МАЗ-сь КамАЗ-донть, келя, аламодо седе виев. Ардтни колхозтнэва, лезды усксемс товзюро, сенаж, силос, мейле ушоды заводов ламбамо якстерькань усксеме. Айратонь кавто эйкакшонзо. Вете ды кото иесэ. Козейказо важоди медсазорокс Ромодановань больницясо. Ней декретсэ – учить колмоце эйде. Айратонь тетязояк важоди «АПО Элекомсо». Эри истя жо Алтары велесэ. Лия шофёртнэнь неемс эзь саво. Учнеме ды налкставтомо эзинек карма. Чарькодтяно – тевтнеде ламо.
Кукурузанть силосокс урядамонзо марто вейсэ паксятнесэ молить лия важодематкак. Саемга, трактортнэ ды лия техникась видить озимойть, конатнень видемадо мейле модань кой-кона калгодо ды кевев таркатнень эрявить валакавтомс катоксо, штобу лепштнемс покш покольтнень ды лазномс кевнетнень. Истямо тевенть Беларусь тракторсо топавты Алексей Викторович Гагулин. Сонзэ туртов содавикст сокамонь-видемань весе тевтне. Важодеме ушодсь, зярдо эштё ульнесь «Заря» колхозось, конань мейле саизе эсь сёлмонзо алов «АПО Элеком» ОАО-сь ды цёраськак кадовсь важодеме теке моданть лангсо, ковгак лияв эзь тукшно.
Алексей чачськак теске, Трофимовщинасо. Секскак а весть трокс-кувалт ардтнинзе тиринь паксятнень. Алексейнень уш школасо кеменце классо тонавтнемстэ макссть прават. Армиясояк важодсь тракторсо. Служась Оренбургонь областень Тоцк ошсо. Кудов самодо мейле сеске кундась колхозонь тевтнес. Важодеме машты эрьва кодамо техникасо. Низэ роботы Ромодановань сыре ломань мельга ваномань кудосо. Кавто тейтерензэ. Вейкесь венчазь Краснослободскойс, омбоцесь – Саранскойс. Улить нуцьканзо.
Паксява ардтнемстэ чарькодят, тесэ важодить эсь тевень парсте содыця ды кодамояк стакачиде а пелиця ломанть. Теде башка, од ломантнень покш семияст. Те корты седе, сыця шкасто мода лангсо важодемась карми поладозь!
Кукурузадо мейле кадови урядамс чиньжарамонть ды ламбамо якстерькаенть. Арсетяно цёратненень шкастонзо прядомс паксянь тевтнень, конатнень топавтомсто илязо яжаво вейкеяк техника!
Марина Агафонова