Раськеютконь авань чистэнть сехте малавикс аваломантнень туртов евтатано поздоровт ды арсетяно сехте паронть, мезе ули масторлангсо. Ды кода вадря, зярдо кудосо вейс пурнавить мик ниле поколеният! Сыретненень ули мезе евтнемс одтнэнень. Те эдь, ловт, цела пингень история кудосот эри…
Минек газетань умонь ялганок – «Тавла» образованиянь центрань 17-це № средней общеобразовательной школань эрзянь келень тонавтыцясь Ольга Дорофеева – кучсь тенек семиянь историядост питней материал. Сонзэ 6 иесэ Михаил церынезэ сайсь прабабанзо кедьстэ «интервью», конань Ольга Сергеевна сермадызе видеос. Нама, кевкстематнень марто церынентень лездась авазо. Мишань сыре бабазо, Мария Ивановна Модина (тейтерьксэнь фамилиязо Кияткина), чачсь Ине Отечественной войнань иетнестэ. Сеть шкатнестэ савсь тензэ неемс ламо нужачи, конась ушодовсь, ловт, чачомстонзо саезь… Весемеденть седе домкасто ловнодо седе тов, нуцьканть сырькаензэ марто кортамостонть.
– Бабай, зярдо ды косо тон чачить?
– Мон чачинь 1942 иень ноябрянь 29-це чистэ Орданьбуень районсо, сестэ Ульяновка поселка тосо ульнесь, тетям тостонь. Тетям-авам важодсть колхозсо. Сыре патянь валонзо коряс, тетянь (Иван Иванович Кияткин) саизь войнав. Зярыя шкань ютазь, келя, тетям сакшнось кудов ранязь. Иеяк, арсян, сестэ тень эзь топодекшне. Тетям вачтымим каштомлангсто ды тусь… Седе мейле войнасто эзь велявто.
Тетянь чавовомадо мейле, авам, монь велькспотс тапардазь, тусь эсь чачома таркав – Селища тиринь велезэнзэ. Ававтонть кедьстэ савсь тензэ туемс: Ульяновкасо эрясть тетянь лелятне семияст марто, косо трявсть-кастовсть ламо эйкакшт. Эрямо таркась вишкинель, эрицятнеде ламольть. Селищасо тиринь авань туртов истя жо а шождаль. Бабань кедьсэ эрясть церанзо козяйкаст марто. Теснадонть авань эзизь прима. Мик а ков мадемскак ульнесь. Мейле аванень савсь молемс Прасковья Кузьминична сазоронстэнь, тона примизе. Кудынест вишкинель, тень лангс апак вано, тосо минь эринек мартост.
– Кода эриде тетявтомо войнань шкасто?
– Пек а шождаль. Мон уш а содан, кодамо те «тетя» валось, тетя ендо седеймарямонь валт эзинь марсе. Каршонок шабрасо ялгам эрясь. Пек сельмень сявалесть лангозост ванозь. Тетяст сась войнасто, кадык ранявозь, ансяк жив ульнесь. Важодсь тракторной бригадирэкс. Эрясть аволь беряньстэ, кши пансть вадря, товзюронь. Сыненст макснесть ламо сюро. Авам важодсь скалонь потявтыцякс. Сеть шкатнестэ карсемапельть арасельть – рудаз, начко, кизнаяк, сексь еновгак кепе потявтнесть скалт. Мейле звенасо звеноводкакс ульнесь.
Тетявтомо пек стакаль. Кудонок вишкинель, берянь, витнемс-петнемс а кинень ульнесь. Сыре патянь марто авам кирдсть скал. Тельня кудось якшамоль, вальматнень яла давол валилинзе – чинек-венек кудосонть тол кирдилинек. Скалонть потявтомо совавтылизь кудос. Сэдявксонок (половицы) сивсть, витнемс-петнемс а кинень. Авань ульнесть ниле лелянзо. Вейкесь эйстэст, Николай Кузьмич, чавовсь Ине Отечественной войнасонть, омбоцесь, Иван Кузьмич, ранязель, войнасто сась пильгевтеме, ансяк ялатеке сакшныль тенек лездамо церань тевтнесэ.
– Бабай, зярдо тон ульнить вишкине, мезде ярсниде?
– Ярснинек беряньстэ, седе сеедьстэ модамарде: апак ватксе пидилизь каштомосо, мейле путылизь пачалгос. Кода коськильть, керсилинек, чиньжарамонь ойсэ авам аламодо ваднилинзе ды истя ярсылинек. Ледстнян, листяно каршо эриця шабра Оля ялгань марто ульцяв. Монь кедьсэ марчонь покш кшикочом, Оляшонь – ашо кши. Оляш вансь-вансь лангозон ды мерсь: «Эрьга, Манька, полавтсынек тонь раужо кшинть монь ашонть лангс». Нать, арсесь, монсесь седе тантей. Максыя марчонь кшинть, сон тень – ашо калацянть. Мон покш мельспаросо сэвия. Вана истя беряньстэ ярснинек, седе сеедьстэ модамарень кшиде. Кшис модамаренть човсесть яла марчонь почтонь таркас. Марчтнень каштомлангсо костилизь, мейле яжавтылизь, юткозост зярояк вадря почткеть почодыльть, те човорявксстонть мейле кши панильть, истя вана ярснилинек.
– Бабай, а тон школасо тонавтнить?
– Тонавтнинь, Миша. Сестэ тонавтнемаськак стакасто ютась. Панксонь сумкат тенек стакшность книгань кандтнемс, пильгес тонгомкатне ульнесть карть. Мейле уш авам тень рамась котат. А евтавияк, кодашка мельспаро ульнесь! Картне кувать якамодонть колильть, олгосо потомдылинек, истя ульцява чийнилинек. Тундаяк карьсэ, мезтькак лият арасельть. Шкань ютазь, кода кармасть ревень трямо, кемть кевердстильть. Истя лембе кемсэ карминек якамо.
– Кодаткак налкшкеть ульнесть вишка пингестэ?
– Арасельть, Миша. Ушова чийнилинек, оскасо налксилинек. Ды шкаськак пек налксемс арасель. Пенгень асатомадо тейнилинек навозпенгеть. Те истят кирьпецькеть – рузонь кельсэ «кизяк» лемест. 12 иесэ уш важодеме ушодынь. Колхозов росада валномо кучнимизь. Веденть эстенек савиль кандтнемс. Лисьматкак ламо арасельть сестэ, симемс, муськемс Куликень лисьмасто кандтнинек ведь. Песэнек баня ульнесь вейке, парсилинек, ловт, ансяк покш кенярксчитненень. Кода карминь седе покшокс, ушодынь важодеме колхозсо телятницакс.
– Кода теевиде содавиксэкс покштянь марто?
– Кода… Ушова вейсэ чийнилинек, вейсэ касынек. Минь покштят марто овсе одсто васодевинек. Лемезэ Михаил Алексеевич Модин (Ред.: Мишань авазо, Ольга Дорофеева, лемдизе церанзо эсь покштянзо лемсэ). Койсэнь, 17 иеньгак арасельть, сельсоветсэяк эзимизь сермадсто (мизолды). Мейле уш, кода кемгавксовотне топодсть, сермадстымизь. Покштянть сеске саизь армияв. Колмо иеть служась, а мон весе те шканть перть истя жо служинь, ансяк мирдень кудосо. Ававтось кежеель. Ялатеке покш сюкпря тензэ, эйкакшонок тринзе, зярдо важодинек. Эйстэдест минек колмо. Михаил покштят, кода сась армиясто, кармась роботамо колхозсо сварщикекс, а мон пенсияс скалонь потявтыцякс ульнинь. Кирдинек кудонь ракшат – скал, реветь, тувот.
– Бабай, мезе арсят нуцькат туртов?
– Арсян, васняяк, эрямс сэтьмечисэ, илязо уле война. Аволиде нее истямо стакачи, конань марто минь эшкевинек, те пек берянь. Ней шкась вадря, эрьва мезе рамамс ули, нужачи кияк а кирди… Тонавтнек, Миша, ульть превеекс, кунсолыцякс, каст паро церынекс!
– Мон пек вечктян, бабай! – меельцекс мерсь Миша ды кутмордызе сырькаензэ.
– Монгак тынк весень пек вечктядызь! – мельспародонть мизолкс марто мерсь каршонзо сыре ломанесь.
Мария Ивановнанень Авань чинтень евтыть поздоровт ды кеме шумбрачинь арсемат весе кудораськензэ: 3 эйкакшонзо (2 церат ды тейтерь), 4 нуцьканзо, 9 правнуконзо. Сехте паро арсемат кучить тензэ Модинтнэ, Шулугинтнэ, Калугинтнэ, Пивцаевтне, Дорофеевтне.
Максозь материалтнэстэ кортамонть сермадызе
Марина АГАФОНОВА.
Фототнесэ: Миша сырькаензэ марто кортамсто.
Мария МОДИНА правнуконзо марто ютазь кизна.