Тундонть ушодовомсто тешкстави сехте мазый ды лембе кенярксчись – Тейтерь-авань раськеютконь чись. Сон алтазь сетненень, кинь вечкемась ды мелень явомась ломаненть марто весе эрямонзо перть. Сынь кастыть эйкакшт, виевгавтыть экономиканть ды промышленностенть, вадрялгавтыть эрямонь социальной енксонть. Мезе иля сае, куш косо ули путовксост. Течи минь содавттадызь велень хозяйствань енкссо важодицятнень марто, евтнетяно Покш Березникень райононь «Искра» ООО-со роботыця тейтерь-аватнеде.
Хозяйстванть прявтсо ашти превей, чарькодиця ды эсь тевень содыця эрзянь церась Геннадий Афанасьевич Беспалов. Сон пек лембестэ корты тесэ важодиця тейтерь-аватнеде ды лови сынст предприятиянь нежекс.
Валентина Ивановна Балыкова «Искра» ООО-со важоди учетчикекс. Аванть чачома-касома енксозо – Покш Березникень райононь Кузым велесь.
Школанть прядомадо мейле Валентина Балыкова тонавтнесь Краснослободскоень зооветеринарной техникумсо зоотехникень специальностенть коряс.
– Важодеме ушодынь эсень тиринь велень колхозсо, ков саимизь фермань прявтокс. Мейле вастовинь мирдень Павел Григорьевич марто, сон Чугырвелень, ды сынек эрямо тей. Мирдем роботась Тазинань колхозсо, моньгак тов саимизь. Ды вана уш 35 иеть роботан хозяйствасонть.
Весе неть иетнень перть Валентина Ивановна роботась эрьва кодамо тевсэ – ульнесь осеменаторокс, колхозонь столовойсэ пидицякс-паницякс, скалонь потявтыцякс, меельце колмо иетнень перть важоди учетчикекс.
Сонзэ вановт ало хозяйствань важодицятнень тевтеемаст, ракшатнень андомась, потявтовиця ловсонть ламочинзэ ды вадрячинзэ ванномась, заводов сонзэ ильтямось.
– Важодицятне минек весе вадрят, эсь тевентень кандовить ответственнойстэ. Покш сюкпря прявтонтень Геннадий Афанасьевичнень, зарплатанть получатано вадря ды шкастонзо, – тешксты Валентина Ивановна. – Кемтяно, хозяйствась минек ашти кеместэ ды седе товгак карми важодеме.
Валентина Ивановна истя жо уцяскав ни ды ава. Мирдензэ Павел Григорьевич марто сынь вейсэ уш 35 ламо иеть. Балыковтне трясть-кастсть ниле эйкакшт – колмо тейтерть ды цера. Истя жо сынст кемень нуцькаст.
– Эрьва тейтерь-аванть туртов покш уцяскакс ды прявт питнейчикс ашти семиясь, – корты Валентина Ивановна. – Монь эсеньгак кастсть ды вишка шкасто тонавтсть эсь кудораськень аравтлувтнень, койтнень-кирдатнень ванстомо ды ней весементь бажан максомс эсь эйкакштненень ды нуцькатненень. Штобу эрямосонть сынь улевельть алкуксонь ломанекс, эсь семиятнень туртов кеме нежекс.
Светлана Васильевна Абрамова хозяйствасонть важоди фермань прявтокс. Сась тей 2016 иестэ. Васень шкастонть роботась осеменаторокс, аволь кувать ульнесь учетчикекс ды колмо иеде икеле аравтызь фермань прявтокс.
– Неень шкань ферматне кода а кода икеленсетнень эйстэ явовить. Икеле фермасо важодемась стакадояк стакаль. Скалонь потявтыцятненень эдь малав весементь савкшнось эстест теемс. Ракшатненень коромонтькак явшильть, алксосткак ванськавтыльть, сеедьстэ кедьсэ потявтомскак савиль. Ней жо ламось седе шождалгавтовсь. Те пек паро, – тешксты Светлана Абрамова. – Зяро иеть тесэ роботан ды зярдояк эзинь янксекшне. Эсь тевем пек вечкса. Тесэнь важодицятне пек парт. Минь весементь тейтяно вейке-вейкенень лездазь, вейке-вейкень чарькодезь. Вейсэнь тевсэ те пек эрявикс енкс.
Тешкстасынек, те хозяйствантень покш лезкс максы «Птицефабрика «Атемарская» ОАО-сь, конань прявтокс важоди А. В. Щемеров. Лезксэсь максови эрьва кодамо кевкстемань коряс.
Наталья Васильевна Федянина – «Искра» ООО-нь бухгалтер. Авась чачсь-кассь теске, Тазинасо. Школанть прядомадо мейле тонавтнесь Чаунзань райононь Алексеевской индустриальной техникумсо. 2001 иестэ велявтсь тиринь велев ды кармась роботамо колхозсо бухгалтерэкс.
Од порасто кочказь профессиясь Наталья Васильевнань туртов кармась эрямонь тевекс. Сон мельспаросо васты важодемань эрьва чинть, топавты вечкевикс тевенть. Ды кемексты, покш уцяска, зярдо важодемась канды кеняркс.
Наталья Васильевна – ламо эйкакшонь ава. Сонзэ колмо эйкакшонзо. Сехте вишкинесь – Мария – тонавтни Ицялонь педагогической техникумсо, Никита ней армиясо, службанть юты Нижегородской областьсэ. Юлия – сехте покшось. Сон эри ды роботы Московсо.
Наталья Васильевна эсь семиядонзо корты вечкезь, сэтьме мизолкс марто. Сонзэ туртов Владимир Дмитриевич мирдезэ ды эйкакшонзо – те прявт питнейчи ды сехте покш уцяска.
– Мон уцяскав ава. Вакссон вечкиця ды чарькодиця мирде, мельспаронь казиця эйкакшон. Арази аволь те эрямонь смустесь, – кемексты Наталья Васильевна.
Хозяйствань эште вейке важодицясь – эсь тевень содыця, дока ды мазый авась, конась топавты утомонь прявтонь тевенть, – Людмила Ивановна Абрамова. Сон шабра Чугырвелень. Школадо мейле тонавтнесь бухгалтерэнь тевентень. Эште овсе од тейтерькакс вастызе вечкевиксэнзэ ды лиссь мирденень. Одтнэ эзть туе ошов, кадовсть эрямо тиринь велес. Стявтсть кудо, пурнасть хозяйства, ды эрямось лаказевсь.
Людмила Абрамовань важодема кизэ ушодовсь эсь велень колхозсо, роботась истя жо утомонь прявтокс, бухгалтерэкс. 2020 иестэ тосонь предприятиясь вейсэндявсь «Искра» ООО-нтень, ды Людмила Ивановна кармась роботамо тесэ.
Кода тешксты авась, роботанзо пек вечксы ды эрьва чистэ важодема таркав сы паро мельсэ.
Мартонзо важодиця ялганзо Людмила Ивановнань лемдить алкуксонь азоравакс. Сон машты пидеме-панеме эрьва кодат тантейкат. Эйсэст кенярдовты аволь ансяк вечкевикс мирдензэ ды церанзо, хозяйствань важодицятненьгак.
Вана истят сынь, минек тейтерь-аватне – мазыйть, ероковт, эрязат, эсь тевень содыцят ды превейть. Сынь – семиянь юр ды государствань неже.
– Весе содыть, авась кази эрямо, кази лембе сехте вишка шкатнестэ саезь. Тынь пештятадо минек эрямонть мазычиде. Весемесь юты аванть пельде, мейле поладови вечкевикс нитнесэ, минек тейтертнесэ, нуцькатнесэ. Тынь кемевттядо, весе тевтне, конатнень топавттано, ютыть эсенек пельде. Эрьва церась, кода покш венчень капитанось, велявтни штурвалонть витев-кершев, максы командат, алкукс жо, сонзэ вишка венчесь ашти мазый аванть кедькуншкасо: ков велявтсы, истя улияк.
Мельвановикс тейтерь-ават, седейшкава арсян тенк шумбрачи ды изнявкст весе тевтнесэ. Кадык топавтовить мельтне-бажамотне, эрямось свал карми истямокс, кода те покш чись – кенярксов, валдо, пешксе тундонь маней чиде. Уледе уцяскавокс ды вечкевиксэкс! Кенярксчи марто!
Г. А. Беспалов, «Искра» ООО-нь прявтось.
Юлия Еремина