Вторник, марта 19, 2024
Важное

Кулят томбалень эрзятнень пельде

Малав эрьва номерсэ минь сёрмалетяно седе, кода эрить-аштить эрзятне ды мокшотне минек республиканть томбале. Течи содавттадызь Татарстанонь Лениногорской райононь Эрзянь Карамалка веленть ды тосонь эрзяванть, велень библиотекань прявтонть Елена Павловна Макарова марто. Весемеде ловнодо минек материалстонть.

Эрзянь Карамалкась – раськень келень ды коень-кирдань

ванстомань усия

Татарстанонь Лениногорской районсо Эрзянь Карамалка велинесь ськамонзо, косо эрить ламо эрзянь ломанть. Кода кортыть покштятне-бабатне, састь сынь тей малав 260 иеде икеле ды, мезеяк лангс апак вано, те шкас ванстызь эсест эрзянь келест ды коест-кирдаст. Покш таликась теньсэ Карамалкань велень библиотеканть, конась панжозель 1929 иестэ кода ловномо тонавтомань кудо, ды теевсь раськень культуратнень, койтнень-кирдатнень ванстыця васенце таркинекс, эдь велесэнть вейсэ ялгаксчисэ эрить татарткак, рузткак, удмуртткак, маритькак. 1962 иестэ библиотекась ютась велень клубс. Неень шкане тей книгань ловномо сакшныть 360 ламо ломанть, 110 эйстэст – эйкакшт. Паро, ули мезе ловномс, эдь тесэ 8 тёжадо ламо книгат, газетат ды журналт. Эрзянь-мокшонь кельсэ фондось а пек покш – 303 экземплярт, ансяк сынь а аштить лавсятнень лангсо пуль потсо ды эрьва чистэ тезэнь ловномост эли кудов саемест сакшныть зярыя од ды сыре ломанть. Кода эрси сеедьстэ, зярдо аламодо явозят исторической тиринь ёнксот эйстэ, тиринь келентень, литературантень мелень явомась седеяк покшолгады. Истя лиссь Эрзянь Карамалкасояк. Тешкстасынек, тесэ ламо иеть сёрмадстнить «Чилисема» эрзянь эйкакшонь журналонть, ды арсетяно, сыця иестэ поладсызь сюлмотнень «Сятконть» ды «Эрзянь правданть» марто, кода ульнесь 2012 иенть самс. Минек редакциясь эсензэ ёндо тейсы весементь, штобу изданиясь пачкодевель томбалень эрзятнень туртов.

Эрзянь Карамалкасо 1990 иес эрзянь келесь тонавтовсь ансяк ветеце классос, 2016 иестэ жо тесэнь средней школанть овсе пекстызь  ды тонавтницятнень усксить шабра  рузонь велев, косо, нама, эрзянь келенть тонавтомадо кияк а арсияк. Секскак тесэнь библиотекась теевсь эрзятнень вастовомань, кортнемань таркинекс, ды паро, сонзэ прявтсо тиринь келенть кисэ аштицясь, сонзэ вечкицясь, кисэнзэ пиштицясь-палыцясь Елена Павловна Макарова. Сонзэ вийсэ тесэ панжозь «Лисьмаприне» эйкакшонь клубось, конанть девизэзэ: «Свал гайгезэ тиринь келем». Тесэ аволь ансяк калярдыть,  вейсэ ловныть эрзянь сёрмадыцятнень произведенияст, истя жо эйдетне сынсь снартнить сёрмадомс, а библиотекаресь ёжомарязь витни ильведькстнэнь, кабу а тандавтомс «васенце сяткинетнень». Елена Павловнань васенце мелезэ – кирвазтемс эйкакштнес тиринь келентень вечкеманть, эдь сынст кедьсэ Карамалкань сыця шкась – кармить тесэ кортнеме эрзякс, сестэ карми эрямо келесь седе товгак, а лепами, а ёми.

Библиотеканть марто вейсэ мероприятият ютавтни велень Культурань кудось, конасонть панжозь «Пизелнэ» фольклорной ансамбля. Тоско жо ули «Эрзянь кудо». Те а покшке музей, косо ванстовить минек раськень кезэрень курмотне-кармотне. Вастовоматне музейсэнть теке «шкань машинасо» ютазь пингентень кирнявтома, тесэ весе экспонаттнэнь мереви токшемс кедьсэ, сайнемс коень-кирдань невтемс кенярксчитнестэ.

Эрзянь Карамалкась эштё содавикс весенень, кода Балтай фольклорной  кенярксчинть чачома тарка, конась теевсь уш Татарстанонь эрзятнень вейсэндявомань покш чикс ды ютавтневи кизэнь пси шкасто. Кие весть сакшнось «Балтаев», зярдояк а стувтсы! Кенярксчинть азорось тесэ – Овтось. Кикирькайсэ (ленгень шарикть) налксемадо мейле изницятнень ютксто пурныть овтонь семия: овто, овтоава ды овтолевкс. Оршавтнесызь-сюлмсесызь укшторонь лопасо, вирявань сурсемесэ (папоротник), цецясо, ды овтотне сыргить веле юткова раськень ярсамопельтнень варчамо. Ловови, бути сезят овтонь оршамостонть лопине ды пургсесак эсь прят ведьсэ, сестэ цела ие кармат шумбракс. А эйкакштне Балтаенть ютавтомсто вечкить кечесэ валномо кенярксчинь инжетнень. Истя, келя, сынь тердить пиземе, эдь коське кизна сон пек эрявкшны вадря сюронть-урожаенть  кастомга-кенерстемга. Вана истят коест-кирдаст Татарстанонь эрзятнень ды сынь лиятнень ёнов амолицят, теке марто, кода весе кенярксчитнесэ, тесэ морыть-киштить, ветнить хороводт, невтнить мазый оршамопелест.

Библиотекарь – те аволь ансяк книгань вечкемадо

Велень библиотекаренть Елена Павловна Макаровань Карамалкасо весе лемдить эрзякс: «Олёна» ды асодыцянзо те аванть тесэ арасть. Книгатнень вечкемась оймезэнзэ чачсь эйкакшпорасто. Олёнань тетязо ульнесь анеицякс, ялатеке пек вечкиль ловномо Брайлень алфавитэнть вельде, ды тейтерькинесь сеедьстэ яксиль велень библиотекав тетянстэнь книга мельга. Зярдо кассь ды тонадсь ловномо, сон бажась ёвтнемс-ловномс вечкевикс книгатнень тетянзо туртов. Олёнанень библиотекась марявсь омбо масторокс, васенце «содамоёвксокс». А кодат эрзянь ёвкст ёвтниль тензэ сырькаезэ, зярдо сынь вейсэ эжнильть каштомлангсо, ды кодат картинат рисовиль те шкане пряудемесь! Олёнка васняяк арсесь улемс артыцякс, ансяк кода алкуксонь комсомолка, кадовсь тиринь велес «Победа» колхозонть кепедеме ялганзо-оянзо марто. «Минек, кода од дояркатнень, ильтимизь васняяк «Карл Либкнехт» теплоходсо   Равга  укшномо. Те шкас а стувтови те путешествиясь ды васенце спецоршамопелесь. Важодинек минь мельспаросо вейке ие, мейле мельга-мельцек стака тевденть оргодинек тонавтнеме. Мон прядынь Бугульмасо кооперативной ПТУ ды сеске лисинь мирденень шабрам Михаил Макаровонь экшс, кона аволь умок сась Афганистансто ды кармась важодеме эсенек колхозсо механизаторокс», – ёвтни од порадонзо Елена Павловна. Од семиянтень 1993 иестэ колхозось стявтсь кудо, нись таго велявтсь важодеме фермав дояркакс ды те стака тевентень максынзе эрямостонзо кемгавксово иетнень. Ялатеке книгатнень вечкеманть эзизе стувто, роботавгак яла кандтниль. Юткошкасто кие удыль, кие калярдыль, Елена жо ловныль книгат ды киштиль-морыль велень клубсо. Секскак, зярдо велень библиотекасонть 2010 иестэ чамсь тарка, Елена Макарова апак арсе кармась сонзэ прявтокс.

«Монь роботам тесэ – эрямонь  омбоце пелькскем. Васенцесь максозь вечкевикс семиянтень. Кода кортави валмеревкссэнть, уцяскав ломанесь се, конась валске марто мельспаросо моли роботамо таркав, а чокшне кенярдозь велявты тиринь кудов. Арсян, мон уцяскав ломанесь. Мирдем Михаил Николаевич марто кастынек кавто цёрат: Мишань ды Колянь. Монь колмо нуцькан – Вадим, Игнат ды Тимофей. Веженсь цёрам Николай кочкизе военной тевенть, неень шкане  сон СВО-нь участник», – поладызе кортамонзо Елена Павловна.

А ёвтавить, зяро мероприятият эрзянь-мокшонь культуранть ды кельтнень коряс ютавтнесь Елена Макарова кемгавтово иетнень перть, козонь тердьсызь – сон зярдояк а моли каршо. Весероссиянь, регионъютконь, республикань ды райононь  выставкат, фестивальть, тиринь келень тешкстамо чить, конкурст, акцият… А стяко 2021 иестэ Эрзянь Карамалкань велень библиотекась – Лениногорской ЦБС-нь 18-це филиалось – изнясь Татарстанонь Минкультонь пелькстамосо, кода велень сехте вадря библиотека, ды казезь ярмактнень лангс одкстомтозель мебелесь. Макарова кирди кеме сюлмот Мордовиянь Финнэнь-угрань раськетнень Равчирень куншкакуронть, А.С. Пушкин лемсэ Национальной библиотеканть марто, сон ульнесь «Равось – ояксчинь лей» экспедициянь участникекс.

Елена Павловна Макарова – аволь ансяк библиотекарь, сон раськень культурань ды литературань ванстыця, парсте морыця ды свалшкань тонавтниця. Кода корты авась, ловныцятне – сонзэ васенце тонавтыцянзо, тулкадицянзо, паро ёжомарямонь казицянзо, ды ансяк сынст мелест ды вешемаст коряс сон, кода «Приходите завтра» киностонть Фрося, кармась Культурань ды искусствань Казанень Государственной  университетэнь ды Санкт-Петербургонь культурань институтонь студенткакс ды топавтызе мелензэ высшей профессиональной образованиянть коряс. Елена Макарова каштансто корты эсь тевдензэ: «Мон – библиотекарь! Ды те профессиясь кандсь тень покш содамочить, кода эрьва вечкевикс тевсэнть, мон бажан касомс-кемекстамс ды каземс эсень седейлембем вакссон эриця ломантненень!»

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».