Кизэнь маней читне кенярдовтыть аграрниктнень. Паксятнесэ ашти комбайнань увт – весе вийтне максозь сюронь нуемантень. Неть читнестэ ульнинек Ицялонь райононь «Сельхозтехника» ООО-нь, конань прявтсо ламо иень перть важоди кеме азорось Федор Борисович Корнаухов, Резоватова велень отделениясонть.
Кода евтнесь Федор Борисович, тедеде Резоватовань отделениянть видезь моданзо весемезэ 1100 гектарт. Тесэ кастыть озимой ды яровой товзюро, пиянь пидемань туртов шуж, ламбамо якстерькай.
Хозяйствасонть улемстэ минь вастовкшнынек «Сельхозтехника» ООО-нь Резоватова велесэ отделениянь управляющеенть Анатолий Иванович Наумов марто. Велень хозяйствасо важоди Наумовтнень весе кудораськест.
Велень хозяйстванть марто сюлмавозь весе эрямозо
Анатолий Наумов чачсь Ицялонь райононь Папулево эрзянь велесэ. Семияст важодемань вечкицяль. Наумовтне весе пингест перть роботасть колхозсо. Иван Сергеевич ульнесь стадань ваныцякс, Анна Васильевна – скалонь потявтыцякс, ваз мельга якицякс. Церасткак кочкизе велесэ эрямонть ды мода лангсо важодеманть. Школанть прядомадо мейле Анатолий Наумов тонавтнесь СПТУ-со шоферонь тевентень. Мейле кавто иеть армиясоль, службанть ютась Германиясо. Армиядо мейле велявтсь тиринь енксов ды весе пингензэ перть важоди мода лангсо – велень хозяйствасо.
– Зярдо сынь армиясто, вастыя вечкевиксэм – Надежда Александровнань. Урьвакстынек ды карминек эрямо эсенек райононь Резоватова велесэ. Ушодынь важодеме тесэнь колхозсо. Васняяк роботынь ГАЗ-51 автомашинасо. Мейле ульнесть ГАЗ-52, ГАЗ-53, ЗИЛ автомашинатне ды седе тов. Лиякс меремс, варчнинь эрьва кодамо техника, – евтни Анатолий Иванович.
Водителекс церась важодсь зярсыя. Мейле эсест велесэ колхозось каладсь, модатнень ды велентькак эсь вановт алов саинзе «Сельхозтехника» ООО-сь. Резоватова велесэ панжовсь предприятиянь отделения ды Анатолий Наумовонь саизь тозонь управляющеекс. Те тевсэнть ней уш комсешка иеть важоди. Предприятиянь прявтось Ф.Б. Корнаухов шны Анатолий Ивановичень: «Ломанесь сон важодеме вечкиця, чарькодиця. Тевензэ содасы парсте. Лангозонзо ули кемема. Самай истят важодицятне – минек предприятиянть неже».
Анатолий Иванович – Мордовия Республикань велень хозяйствань заслуженной роботник, трудонь ветеран, Ицялонь райононь Почетной гражданин. Сон алкуксонь трудий ломань. Ды, эряви меремс, Наумовтнень весе кудораськест истямо.
Анатолий Ивановичень низэ – Надежда Александровна, роботась велень медпунктсо санитаркакс, мейле ульнесь колхозонь конторасо кассирэкс. Ней хозяйствань роботниктнень туртов пиди-аноксты ярсамопель. Паксясо важодицятнень тесэ андыть кавксть: обедстэ ды чокшне енов. Тантей ярсамопеленть Резоватовань отделениянь управляющеесь пачти витьстэ паксяв. Важодицятне мекев-васов ардтнеманть лангс шкантькак а емавтнить, ней питней эрьва минутась, ды паксясо ярсамоськак ков седе тантей.
Наумовтнень кавто цераст, Александр ды Анатолий, истя жо важодить «Сельхозтехника» ООО-со механизаторокс. Сынь эрьва кодамо комбайнасояк, тракторсояк роботыть. Те тевентень эйкакш шкасто тонавтозь. Тесэ жо, «Сельхозтехникасо», Андрей нуцькасткак важоди. Армиясто самодо мейле сонзэ арасель мелезэ туемс ошов. Малавиксэнзэ туртов сеске мерсь, сынст ладсо карми важодеме велень хозяйствасо. Предприятиянь прявтось Ф.Б. Корнаухов истят ероков од ломантнень туртов теи весементь. Секскак Андреень уш васенце читнестэ озавтызь од тракторонь руль экшс, конасонть сон важоди покш мельсэ.
– Велень хозяйствасо важодемась вадря сестэ, зярдо улить алкуксонь прявтт. Федор Борисович самай истятнэстэ. Эсь предприятиянть ды сонзэ важодицятнень туртов сон теи весементь, – корты Анатолий Иванович. – Теке марто пек ламо теи велетнень, косо предприятиянть моданзо, ды тосонь эрицятнень туртовгак. Пшкалить куш техникань коряс, куш лия мелявкс марто. Весенень лезды. Сон ломанесь алкуксонь.
Тесэ важодить
семиянек
«Сельхозтехника» ООО-нь Резоватова велень отделениясонть важодить кавксо ломанть. Эрьвась эйстэст алкуксонь труженик.
Кода евтнесь Анатолий Наумов, ней Резоватовань отделениянь паксятнесэ урядыть озимой товзюронть, сон прядови, кундыть пиянь пидемань туртов шужонть нуеме. Мейле, аламо шкань ютазь, уш яровойтнеяк кенерить.
Зярдо минь ульнинек хозяйствасонть, Резоватова веленть эйстэ аволь васоло паксясонть комбайнатне нусть озимой товзюронть. Вейкенть руль экшсэ роботась Денис Александрович Леонтьев. Велень хозяйствасо ды «Сельхозтехника» предприятиясонть сон важоди студентэкс улема шкастонть саезь, сась эште 2002 иестэ. Церанть чачома-касома тарказо – Ицялонь райононь Баева велесь, школадо мейле тонавтнесь Кемлянь аграрной техникумсо ды практикань шкасто кармась роботамо «Сельхозтехника» ООО-со. Мейле кизэнь шкасто роботась комбайнасо ды истя теске кадовськак. Ней эрьва иень нуема шкасто важоди комбайнасо, сексня, ламбамо якстерькаень урядамсто, погрузчиксэ эрявикс тевтнень топавты, тельня важодить мастерскойсэ – пурныть-анокстыть тундонтень техниканть.
– Покш сюкпря минек прявтонтень Федор Борисовичнень, предприятиясонть техникась вадря, малав весе рамазельть меельце шкасто. Комбайнатне парт, теезь неень шкань вешематнень коряс. Важодемаськак эйсэст седе шожда: кабинасонть гайтесь а маряви, двигательтне виевть, жаткась келей, бункерэсь пешкеди куроксто. Вадря важодеманть туртов минек теезь весемесь, – мерсь Денис Леонтьев.
Эряви евтамс, «Сельхозтехника» ООО-со роботы Леонтьевтнень весе кудораськест. Денис Александровичень тетязо – Александр Владимирович, важоди инженерэкс, ялаксозо – Александр Александрович, истя жо механизатор. Ней лелят-ялакст вейсэ нуить.
Ютазь иень сексня Денис Леонтьевнень максозь «МР-нь велень хозяйствань заслуженной важодиця» лемесь.
Комбайнань жаткась – теке ероков парикмахерэнь машинка, саи тусто паксятнестэ товзюронь прятнень ды пачти сюронть бункерэнтень. Неень шкань ниле комбайнатне, мельга-мельцек ардозь, паксясонть касыця сюронть изнить эрязасто. Ванат, вейкенть бункерэзэ пешкедсь, мельганзо – омбоценть. Нуезь сюронть усксиця КамАЗ-тнэнь водительтне а нувсить, куроксто ардыть комбайнатнень малас ды пивсэзесь пештяви сынст кузоватнес. Седе тов сон пачтяви предприятиянь тинге лангс ды утомтнес.
Сюронть усксемасо те чистэнть роботасть ниле автомашинат. Вейкенть руль экшсэ ульнесь опыт марто водителесь Николай Викторович Просвирнин. Предприятиясонть сон важоди 1984 иестэ саезь. Неть важодемань ниленьгеменде ламо иетнень перть кавто иеть ансяк эзь робота, зярдо служась армиясо. Службанть ютась Дальней Востоксо, пограничникель.
Эряви меремс, теке предприятиясонть весе пингензэ перть механикекс роботась Николай Просвирнинэнь тетязо – Виктор Петрович. Сон тонавтськак церанзо кшнинь машинатнень важодема лувонть чарькодеме ды сынст витнеме-петнеме. А вана руль экшс васенцеде озавтызе аванзо лелязо – Виктор Евгеньевич.
– Зярдо ушодынь важодеме, максокшность тень ЗИЛ. Машинась вадряль, чарькодевикс ульнесь. Мейле тусть КамАЗ-т. Эйстэдест зярыяльть. Ней вана сынь минек уш ветеце поколениянь. Нама, одт, приборонь панеленть лангсо мезе ансяк арась. Ялатеке, монь койсэ, икелень техникась ульнесь седе кемевикс, – тешксты Николай Просвирнин.
Предприятиянь водителенть свал улить тевензэ. Ней весе важодить сюронть усксемасо, сексня ушодови ламбамо якстерькаень урядамось, сюротнень видемась, тунда таго видемань тевтне, тельняяк важодемавтомо а аштить. Ниленьгеменде ламо иетнень перть Николай Просвирнин весемезэ ардсь тежат вайгельбеть.
Вадря важодеманть кис Н.В. Просвирнин казезь ламо эрьва кодамо грамотасо ды шнамонь коневсо. Сехте покшось – «Российской Федерациянь агропромышленной комплексэнь почетной роботник» лемесь.
Нуемась прядови, хозяйствасонть ушодовить лия тевть – чаво паксятнень кармить изамо ды анокстамо сы иень видемантень. Ней жо весе вийтне максозь вадря норовонть пурнамонтень.
Резоватова велень эрицятне евтыть покш сюкпря «Сельхозтехника» ООО-нь прявтонтень Федор Борисович Корнауховнень. Сон аволь ансяк ванстызе сынст Резоватовасо велень хозяйствань предприятиянть ды макссь тесэнь эрицятненень важодема таркат, куш кодамо тевсэ лезды велентеньгак. Истя, аволь умок «Сельхозтехника» предприятиянть вийсэ витнезель-вадрялгавтозель Резоватова велесэ Ине Отечественной войнасо чавовозтненень кеврунгось. Сон уш малав овсе каладокшнось. Федор Борисович жо явсь ярмакт, техника, важодицят ды нурька шкас памятникесь педе-пес витнезель, пирявксось полавтозель, истя жо перьканзо таркантень путовсь брусчатка.
Юлия Еремина
Фототне Егор Горинэнь.