Январень 31-це чистэ Саранскойсэ С. Д. Эрьзя лемсэ музейсэ ютась Россиянь Омбо мастортнэнь тевтнень министерствань брифингесь. Сонзэ ютавтызе РФ-нь МИД-нь официальной представителесь, Информациянь ды печатень департаментэнь директорось Мария Захарова.
«Шумбрат!» – пшкадсь сон залонтень пурнавозь региононь журналисттнэнень ды сетненень, кить вейсэндявсть видеосвязенть вельде – те федеральной СМИ-тнень представительтне, васоло ды маласо омбо мастортнэнь коллегатне. Эсь кевкстемаст максызь кода эсенек, истя жо Ирансто, Китайстэ, Армениясто, Азербайджансто ды лия государстватнестэ журналисттнэ.
Коень коряс брифингенть шкасто Мария Захарова макссь домка анализ недлянь перть лисезь раськеютконь тевтненень, ёвтась Вашингтон велькссэ менельсэнть авиакатастрофасо маштовозтнень семиятненень седеймарямонь валт. «Чавовсть 67 ломанть. Авиалайнерэнь бортсонть ульнесть минек соотечественниктне, сынст ютксо фигурной кирякстнемань коряс Россиянь сборноенть юрсо масторлангонь чемпионтнэ Евгения Шишкова, Вадим Наумов, советской фигуристкась Инна Волянская. США-со сынь важодсть тренерэкс», – тешкстызе Мария Захарова.
РФ-нь МИД-нь официальной представителесь ледстинзе историянь читнень – Ленинградонь блокадань каямонь чистэ 81 иень топодеманть ды «Аушвиц-Биркенау» концлагеренть Якстере Армиянь вийтнень вельде олякстомтомань 80 иетнень топодеманть. Ине Отечественной войнадонть кортамсто, конасонть Изнямонь 80 иетнень карматано тешкстамо тедеде, Мария Владимировна ламо ёвтнесь Мордовиянь эрицятнень путовкстост: «Войнань стака иетнестэ неть таркатнень эрицятне невтизь апелемачист, виевчист, героизмаст. Войнань васенце читнестэ сынь уш кармасть алкуксонь патриотизмань ды Чачома масторонтень кемевиксчинь тешксэкс. Саранскоень тёжат эрицятне эсь мельсэ тусть фронтов, штобу ванстомс эсь Отечестванть. Сынст ютксто малав 10 тёжатне эзть велявто тюремань паксятнестэ. Ламотненень максозь государственной покш наградат, сынст ине тевест свалшкас сёрмадозь аволь ансяк минек масторонь историянтень, истя жо масторлангонь историянтень. Минь карматано тееме весементь, штобу масторлангонь те историясонть сынст лемест иляст уле рудазкавтозь».
Брифингсэнть ламо кортазель СВО-нь темадонтькак. Мария Захарова ёвтнесь СВО-нь участниктнень марто вастовоматнеде: «Мон зярдояк эзинь арсе, кодамо питней сынст туртов сёрматнень получамось. Те кодамо-бути «эриця сэдь», «эрямонь максыця вий». Паряк, кортыть сынь аволь истямо валсо, ансяк смустесь тень эйсэ. Сынь чарькодить – аволь ськамост ды эсь тевест теить сетнень туртов, кие мелявты кисэст, куш явить сынст вайгельбеть… Кармавтан весень. Эрьва сёрмась пек питней. Илядо стувто сёрмадомс сёрмат минек боецтнэнень фронтов! Те сыненст пек эряви!»
Мария Владимировна башка ёвтнесь Мордовиядонть, кода Российской Федерациянь неень шкань эрязасто виевгадыця субъекттэнть. «Республикась неень шкане кирди сюлмот малав кавксоньгемень государстватнень марто – сонзэ 78 партнёронзо. Внешнеторговой оборотось невти кеме касома. 2024 иень январьстэ–сентябрясто сон кармась 427,4 млн долларт, кассь 181 процентс».
М. В. Захарова башка ёвтнесь этнографиянь туризмадонть, кода сехте эрявикс ёнкстнэстэ вейкеденть: виевгавтовить Вирь ало Тавласо чувтонь налкшкень художественной школась, Орозбие велесэ Понань кемень музеесь, Ташто Теризморгасо Раськень культурань куншкакурось.
«Мазыйдеяк мазыйть эрзянь-мокшонь викшневкстнэ, Теньгушевасто кодазь семицветкатне. Мон уш карминь семицветкань посолокс. Неть тюстнэнь масторсонок минь машттано видестэ тевс нолдамо», – покш мель марто яволявтсь Саранскоень инжесь.
Журналисттнэнь вейке кевкстемась ульнесь эрзянь-мокшонь раськенть марто Захаровань сюлмодонзо. Мария Захарова ёвтнесь: «Тетянь ёндо покштям чачсь Самарань Степная Шентала велесэ. Таркатне тосо пек мазыйть, пертьпельксэсь лия ёнов а молиця. Минек семиясо кортасть, покштям сюлмавозь эрзятнень-мокшотнень марто. Мон ловинь, те истямо семиянь ёвкске. 2018 иестэ, зярдо сынь Самарав (Футболонь коряс масторлангонь чемпионатонь мероприятиятнень лувсо), юткошкасто сыргинь Степная Шентала велев. Тосо моразь-киштезь каршон лиссть цёрат ды ават раськень мазый оршамопельсэ, вастымизь кши-сал марто, кортасть тиринь кельсэ. Те велесэнть те шкас покш вечкема марто ванстыть койтнень-кирдатнень, содасызь эрзянь келенть, Культурань кудосонть свалшкане ютавтнить вастовомань чокшнеть, тосо ули раськень шкинемань выставка. Весе те моли седейстэ. Покштям эрясь Шенталасо вете иес, мейле семиясь тосто тусь, войнадо мейле сон уш эрясь Москов ало. Покштям сёрмадозель кода руз, кортась рузонь кельсэ. А карман кортамо, улить кемекстамот, што сон эрзя, ансяк сынь монень а эрявить. Мон мерян истя: монь семиянь историясонть ули истямо лопа, монень те мелем коряс. Зярдо неян эрзянь раськень оршамопельть, викшневкст, марян седеень тердема. Варьгасо-семицветкасо монь фотографиям пек вечкевсь минек масторонь ды сонзэ томбалень эрицятненень. Неть тюстнэнь вейсэндявомась эрзянь-мокшонь культуранть туртов ашти раськень тешксэкс. Свал, зярдо вишка шкасто невтилия кеме обуцям, назойчим, монень кортыльть: «Ну, тон покштякс, тон эрзятнень-мокшотнень ютксто». Се, мезе мон неинь Степная Шентала велесэ, кода тосо ванстыть раськень культуранть, кодашка тосо этнической вейсэндявомаст, истя жо корты кемечиденть».
Покш инженть марто вастовомась прядовсь журналисттнэнь марто вейсэнь фотографиясо. А минек «Эрзянь правда» газетанть прявт редакторось максызе Мария Владимировнанень ледстнемань казнекс. Седе тов сон ванкшнынзе эрзянь ине скульпторонть С.Д. Эрьзянь теевксэнзэ, вастовкшнось «Защитники Отечества» фондонь филиалонь важодицятнень ды Од ломанень центрасо од ломантнень марто.
Марина Девятова