Пятница, февраля 07, 2025
Важное

Саранскоень 3-це № эйдень кужосо тевс нолдавсь «Тропою традиций» этнотуристической интерактивной проектэсь. Сонзэ анокстыцякс кармась Равчирень финнэнь-угрань раськетнень культурань центрась. Эйкакштнень туртов невтезельть мельстуиця мастер-класст.

– Минек прявт меленек – содавтомс эйкакштнень Мордовиянть, районтнэнь, эрзянь ды мокшонь койтнень-кирдатнень, народно-художественной промыслань мастертнэнь марто. Кодат улить мазый ды содавикс тарканок. Эрьва эйдень кужов молемстэ кочкатано кодамояк башка тема. Васенце вастовоманок ульнесь 14-це № эйдень кужосо. Сон пек тусь эйкакштнень ды тетяст-аваст мельс. Мартонок сайнетяно Мордовиянь покш картанть. Эйдетне пазлатнень вельде мукшныть ды пурныть таркаваст республикань районтнэнь. Улить интерактивной лазонок, сынь лездыть няка лангс эрзянь, мокшонь, шокшонь авань оршамопельтнень пурнамосо. Ёвтнетяно, кодат эрсить оршамопельтне, кодат улить мазылгавтомаст. «Тропою традиций» проектэнть арсизе минек важодицянок, отделэнь специалистэсь В. В. Дыдыкина. Сюкпря тензэ. Сон сонськак важодсь эйдень кужосо. Пек ламо мелензэ-арсеманзо, конат сюлмавозь дошкольной образованиянть марто, кемтяно, весе совавтсынек эрямос, – ёвтнесь Равчирень финнэнь-угрань раськетнень культурань центрань прявтось Екатерина Модина.

Истя, эйкакштне покш мельсэ пурнызь Мордовиянь картанть, мукшнызь весе районтнэнь. Седе тов сынь явовсть группава, эрьвасонть ютасть мастер-класст. Эйкакшонь 4-це № художественной школань чувто ланга керсемань коряс тонавтыцясь А. В. Рябов невтсь, кода лаксемс-теемс Тавлань налкшкенть – лишминенть, кода мазылгавтомс сонзэ.

Эрзянь, мокшонь, шокшонь костюмтнень марто эйдетнень содавтсь Е. О. Модина. Эсензэ лангсояк ульнесь раськень оршамопель. Эйдетне куроксто мукшность някатненень пулайть, пангот, панарт, руцят.

Някань теемань мастер-класс ютавтсь Равчирень финнэнь-угрань раськетнень культурань центрань этнокультурной образованиянь коряс специалистэсь А. С. Шулугина. Истя жо сон ёвтнесь, кодамо районсо чачсь-кассь. Лангсонзо оршазель мокшонь оршамопель, секскак вишкинетнень содавтынзе  Ковылкинань райононь костюмонть марто.

Эряви меремс, мастер-класстнэсэ тейнезь някатнень ды лишминетнень эйдетне кадызь эстест казнекс.

Од кужось

кецявты весень

«Солнечный город» 3-це № эйдень кужонь омбоце корпусось од, сон панжовсь 2022 иестэ Саранск ошонь Российской Армиянь проспектсэ. Перьканзо аштить од кудот, нейгак вакссонзо стявтовить лият. Секскак кавто-колмо иень ютазь эйдень кужось пештяви. Зярс пурназь аволь весе группатне.

Мон чачинь Самарасо. Тонавтнинь Московонь педагогической университетсэ педагогокс-психологокс. Тей лисинь мирденень. Кавто иеть важодян те эйдень кужосонть. Минек 12 группат, эштёяк пурнатано. Эйкакштнень туртов улить дополнительной образованиянь кабинетт – ИЗО-нь, компьютерэнь тонавтнемань. Ули бассейна, физкультурань ды музыкальной залт. Эйдетнень марто важодить музыкальной руководитель, укшномань коряс инструктор, физической культурань инструктор, педагог-психолог. Кужось стявтозь неень шкань вешематнень коряс, покш, валдо, мазый. Мельспаро важодемс. Тетятне-аватнеяк кецнить тень кувалма, – ёвтнесь старшей воспитателесь Анна Александровна Наумова.

Наталья Ивановна Исайкина тесэ вети эрзянь келень кружок. Од тейтерьавась чачсь Чаунзань районсо. Заочна тонавтнесь М.Е. Евсевьев лемсэ МГПУ-нь дошкольной образованиянь факультетсэ. Сон уш 2018 иестэ кармась важодеме эсензэ районсо эйдень кужосо. Мейле семиянек састь эрямо Саранскоев ды сеске ютась важодеме 3-це № эйдень кужонтень. Ней важоди покш группанть марто, косо 25 эйдеть. Сёксня весе сынь молить школав. «Эрзяночка» кружоксонть сон содавты эйкакштнень Мордовиянь историянть, культуранть, койтнень-кирдатнень марто. Улить натой эйкакшонь оршамопелест. Кенярксчитнес сынь наряжить эйсэст ды морсить эрзянь морот.

Воспитателенть Галина Васильевна Светкинань стажозо 12 иеть. Валонзо коряс, зярдояк эзь арсе, эрямонзо сюлмасы педагогиканть марто. Школань прядомадо мейле тонавтнесь М. Е. Евсевьев лемсэ МГПУ-со логопедэкс. Васня важодсь 83-це № эйдень кужосо. Сисем иеть ульнесь логопедической группасо. Мейле ютасть эрямо лия таркав, самай те эйденть кужонть малас. Кармась роботамо тесэ воспитателекс, ансяк нейгак тевс нолды логопедэнь содамочитнень.

Мелят нолдынь покш эйкакштнень, ней сынь тонавтнить школасо. Пурнынь од группа, косо 3-4 иесэ вишкинетне. Эйстэст 30. Ды вана ниле ковтнень перть тонадынек минсь оршнеме-кайсеме. Кой-кить уш парсте кортытькак, лиятне зярс тонавтнить, сасыть сынст. Нама, кудодо мельга эйкакштне аволь сеске тонадыть эйдень кужонтень. Тесэ эряви кунсоломс, тонавтнемс, ули режим. Ялгатнень ютксо сынь марить пряст седе парсте – налксить, чийнить. Ютавтан мартост артомань коряс лия ёнов а молиця урокт. Мекс лия ёнов а молицят? Арттано сурнэсэ, ватань палкинесэ, мерьказь конёвсо ды лия кедьёнкссо. Кудосо эдь истят тевть а мернить теемс. Вишкинетне жо пек вечкить артомо. Истя жо тонавтнетяно стихть, тейтяно эрьва кодамо гимнастика, ды весемесь моли налксема ладсо, – ёвтни Галина Светкина.

Кода видькстась воспитателесь, зярс-бути сон тукшнось эйдень кужосто. Варчнизе прянзо лия таркасо, важодсь колл-центрасо, архивсэ. Ансяк эйдень кужось кодаяк эзь туе мельстэнзэ-превстэнзэ. Сон сась мекев. Валонзо коряс, муемс эйкакштнень марто кель-вал эряви вечкеманть вельде. Вечкемс весе эйкакштнень, явомс эрьвантень мель, лездамс, мелявтомс кисэст. Те ашти васенце таркасо. Ды ансяк сестэ эйстэть лиси алкуксонь воспитатель.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».