Пятница, февраля 07, 2025
Важное

2022 иестэ Россиянь Культурань министерствась нолдась проект субъекттнэнь центральной библиотекатнень юрсо библиотекань фондтнэнь ванстомань коряс модельной куншкакуротнень теемга. Весемезэ масторонь келес 2030 иентень панжовить 40-де ламо реставрациянь истят куншкакурот, сынст ютксто кементне уш панжозь ды важодить.

 

Ютазь иень ноябрясто Реставрациянь ды консервациянь центра панжовсь Мордовиянь А. С. Пушкин лемсэ Раськень библиотеканть юрсояк. Сонзэ прявтокс аравтозь Мария Владимировна Фокина. Сон миненек ёвтнеськак Центранть панжомадонть-важодемадонть ды ютавтсь мельстуиця экскурсия.

 

– Икеле минек тесэ ульнесь А.С. Пушкин лемсэ Раськень библиотекань библиотечной фондтнэнь ванстомань ды консервациянь секторось. Сонзэ алов явозельть колмо кабинетт, ней жо минек сисем нупальть. Неень шкасто истят центрат панжозь кемень регионсо, Саранскоесь ульнесь вейксэце. Центранть панжомасо минек кирдимизь республикань руководствась ды ансяк сень коряс, што регионось карми лездамо, Саранскоенть кочкизьгак. Теезель пек покш робота, – ёвтни Мария Фокина.

 

2020 иестэ Российской государственной библиотекась пшкадсь РФ-нь Культурань министерствантень консервациянь ды реставрациянь центратнень панжоманть коряс. Министерствась те меленть кирдизе, ды 2022 иестэнть тевс нолдазельть пилотной кавто проектт – Рязаньсэ ды Нижней Новгородсо. 2023 иестэ центратне панжозельть Воронежсэ, Кировсо, Ижевскойсэ ды Красноярскойсэ.
– Ютазь иестэнть ульнесть кавксо яволявтомат, теке марто Мордовиянть пельдеяк. Изницякс лиссть ниле регионт. Консервациянь ды реставрациянь региональной центратне панжовсть Волгоградсо, Якутскойсэ, Новосибирскойсэ ды Саранскойсэ, – мерсь Мария Владимировна.

 

Центрасонть улемстэ минь васняяк ванынек реставрационной мастерскоенть. Тосо роботыть кавто важодицят – реставраторт, конатнень туртов те тевесь овсе од ды ламосо а содавикс.
– Икеле минек реставрациянь роботась эзь ветяво овсе. Ней те мастерскойсэнть важодить кавто од специалистт, конатне ютасть тонавтнема Российской государственной библиотекасонть ды покш мельсэ кундасть реставрациянь тевентень. Те шкане вана Елена одс велявтовты (реставрирови) газета, – ёвтни Мария Владимировна. – Те тевесь минек ансяк ушодовсь, секскак весементень тонавтнетяно аламонь-аламонь. Васенце книгатнень, конатнень одкстомтынек, максынек чуросто вастневиця книгатнень фондов. Сень коряс, што минек тедеде тешкставить Ине Изнямонь 80 иетне, важодеманть кемекстынек ушодомс сеть иетнень книгатнень реставрациястонть. Истя жо 2025 иестэнть минек тешкстави Мордовской автономиянь 95 иетнень юбилеесь. Миненек пшкадсть анокстамс оцифровкантень эрзянь ды мокшонь кельтнесэ лисниця икеле шкань газетатнень, конатнень вадрячист уш аволь пек паро.

 

Елена Евгеньевна Ергачева – реставрационной мастерскойсэ важодиця. А. С. Пушкин лемсэ Раськень библиотекасо тейтересь роботы омбоце ие. Сон зярс Н. П. Огарёв лемсэ МГУ-нь студентка, тонавтни «Библиотечно-информационная деятельность» специальностенть коряс.
Те тевентень тонавтнемантень Елена бажась вишкинестэ саезь. Свал вечкиль книгань ловноманть ды нейгак мизолдозь корты, кодамо мельспаро эсеть кедьсэ кирдемс алкуксонь конёвонь книга, аволь цифровой гаджет, конасонть арась ойме.
Мезестэ ушодови книгатнень-газетатнень реставрациясь ды кода весемесь ветяви?

 

– Васняяк минь ваннотано книганть ёжонзо, штобу чарькодемс, зяро одс велявтоманзо лангс юты шка, кодат эрявить материалт ды седе тов. Мейле ваннови чернилатнень вадрячись – нардавить-арась сынь конёвонть лангсто, эдь книганть эряви шлямс. Истя, книгась шляви тень туртов специальной ваннасо, мейле костяви. Седе тов тевс нолдави реставрационной конёвось, чайной конёвось ды почтсто клей, – ёвтни Елена Ергачева. – Важодеманть туртов минек тесэ теезь весемесь, ули неень шкань специализированной оборудования. Весементь тень кисэ покш сюкпря Российской государственной библиотекантень.

 

Тесэ улить специальной линейкат, покшолгавтыця сельмукшт, паровой карандаш, блендер, вакуумной столь (ультразвуконь парсо витневи конёвось), покш форматонь документтнэнь марто важодемань столь. Истя жо тесэ улить телевизор, микрофон, видеокамера, штобу ютавтомс видеоконференцият эрявикс специалисттнэнь марто.
– Видеонь пачк конференциятне пек лездыть миненек. Реставрациянь тевесь минек тесэ ансяк ушодови, весементень эштё тонавтнемс ды тонавтнемс. Ды бути лисить кевкстемат, пек паро кортамс содыця специалисттнэнь марто. Книганть одс велявтомантень эдь апак сода а кундат, васняяк весементь кортасак содыця ломантнень марто, конатне ёвтасызь, мезестэ ды кода ушодомс тевенть, – ёвтни Мария Владимировна.

 

Омбоце реставраторось – Вера Хазова. Тейтересь сонсь Нижегородской областьстэ, Саранскойсэ прядызе М. Е. Евсевьев лемсэ МГПУ-нть, ней тонавтни магистратурасо Чебоксары ошсо. Кадык специальностень коряс сон эйкакштнень марто важодиця, ансяк книгатнень одс велявтомань тевентень кундась покш мельсэ, снартни весементь теемс видестэ ды вадрясто.
Мария Владимировна пек кенярды, што сыненст састь од кадрат. Тейтертне превейть, чарькодицят, куроксто весементь тонавтнить. Зярыя шкань ютазь сынст эйстэ лисить алкуксонь специалистт.
Реставратортнэ Центранть важодемасо саить башка тарка, ансяк ушодови весемесь лабораториястонть. Тесэ ламот арсезевить, кодамо лаборатория библиотекасо? Алкукс, аволь весе содыть, библиотекатнесэ реставрациянь куротнесэ улить лабораторият ды натой химикть. А.С. Пушкин лемсэ Раськень библиотекань Реставрациянь ды консервациянь центрань лабораториясо важоди сонсь отделэнь прявтось Мария Фокина. Образованиянь коряс сон химик, зярыя иеть роботась республикань ламповой заводсо. Пушкинкав сась 2006 иестэ, сестэ ульнесь Гигиенань ды реставрациянь сектор ды эрявсь производствасо важодемань опыт ды технической образования марто ломань.
Кода ёвтнесь Мария Фокина, библиотеканть сон свал вечкиль, покш мель яви книгань ловномантень. Вишкинестэ аламодо сезневезь книгатнень свал снартнесь витнемс-одкстомтомс. Средней общеобразовательной школасо тонавтнемстэ вановтозо прась химиянть лангс ды эрямонь тевекс кочкизе химикень профессиянть. Ансяк шкань ютазь химиясь ды книгатненень вечкемась вейсэндявсть эйсэнзэ, ды сон сась библиотекав.

 

Библиотекасо важодеманть ушодозь, ламо тонавтнесь. Стажировкасо ульнесь Российской Национальной библиотекасо, Интернетэнть вельде ванкшнось масторонь лия библиотекатнень важодеманть, кеме сюлмот кирди эсь коллегатнень марто, вейсэ ютавтыть онлайн-семинарт. Ней жо весе сынст вейсэнди Российской государственной библиотекась.

 

– Реставраторонть столь лангс документэнть максомадо икеле, сонзэ эряви ванкшномс лабораториясо. Электронной микроскопонть вельде минь ванкшнотано конёвонть ёжонзо, кодамо сон: древесной, газетной эли лия кодамо. Истя жо ванкшнотано грибоконть лангс, теньсэ лезды Вудонь лампась. Сонзэ вельде чарькодеви грибокось эриця эли аволь. Ули тесэ книгатнень летькенть ванкшномань термометра, термогигрометра, кельмевтемань ларь, косо кельмевтевить книгатне ды, бути эряви, ванстовить эрявикс шкас, – ёвтни Мария Владимировна. – Те лабораториясь лезды минек книгань ванстомань фондтнэнь, нупальтнесэ коштонть ванкшномасояк.
Седе тов содавтынек инкапсуляторноенть. Тесэ теевить инертной плёнкань конвертт эрьва кодамо документтнэнь ванстоманть туртов. Истямо конвертэсь вансты сынст пульденть ды рудазыямодонть. Зярдо документэсь эряви, сон таргави истямо конвертстэнть-капсуластонть, мейле одс путови тарказонзо. Инкапсуляторнойсэнть ули эрявикс материалтнэнь ванстомань система.
Центрасонть истя жо важодить кавто специалистт переплётной тевенть коряс. Вейкесь эйстэст – Людмила Борисовна Маралина. Тесэ сон сехте содыця важодиця, переплётной тевсэнть 1976 иестэ саезь.

 

– Роботан тесэ уш 48 иеть. Сынь сеске школанть прядомадо мейле, ушодынь переплётчикекс ды важодян те шкас, – ёвтни Людмила Борисовна. – Весементень тонавтнинь теске жо. Икеле библиотекасонть ульнесь картонажной цех ды тосо тонавтниньгак. Тесэ минь, эряви меремс, пурнатано ды оршатано журналтнэнь, книгатнень, газетатнень. Центранть панжоманзо марто минек тевесь седе шождалгавтовсь, ней ламосо лезды неень шкань оборудованиясь.

 

Переплётной мастерскоень эштё вейке важодицясь – Галина Николаевна Санаева. Библиотекасонть сон 2007 иестэ саезь. Аламос роботась книгатнень ванстомань отделсэнть. Мейле ютась квалификациянь кастомань курсат ды кармась библиотечной фондтнэнь ванстомань ды консервациянь секторонь библиотекарекс. Куш сынь топавтыть переплётчикень тевенть, ансяк должностень коряс библиотекарть.
Центрань каштанчись – плоттерноесь. Сон лемдеви истя тесэ аштиця оборудованиянть – плоттерэнть коряс.
– Консервациясь – те книгатнень ванстомань туртов картонсто теезь контейнертнэ. Икеле минь сынст истя жо тейнинек, ансяк тейнинек эсь кедьсэ. Картонсто теилинек эрявикс форманть, менчилинек ды керсилинек сонзэ. Лисильть эрьва кодамо покшолмань коробкинеть. Ней истя жо анокставить коробкинеть, ансяк весементь теи плоттерэсь. Компьютерэнть вельде максовить коробкиненть покшолматне, машинась арты эрявикс форманть, кери сонзэ. Миненек кадови ансяк пурнамс, – тешксты Мария Фокина. – Неть коробкинетнес путовить книгатне ды максовить чуросто вастневиця книгатнень фондов. Истямо коробкинесь вансты книганть пульденть, летькеденть.

 

Центрась вадря аволь ансяк тесэ улиця неень шкань эрьва кодамо оборудованиянть коряс, важодемскак тесэ покш мельспаро. Нупальтне покшт, валдот, фойесь, мерят, музейсэ выставкань экспозиция. Стенатнесэ невтевить чуросто вастневиця книгалангакстнэнь фототне. Тесэ эрзянь ды мокшонь грамматиканть марто сюлмавозь книгатне. Те мокшонь наречиянь XIX пингень рузонь-мокшонь валксось, 1821 иень эрзянь кельсэ канонической Евангелиятнень православной нолдавкстнэ ды ламо лия мезе. Нупальтнень дизайнонть теизь Мордовиянь Дизайнертнэнь союзс совицятне, конатне эзизь стувто раськень тешкстнэньгак.
– Эряви меремс, масторонть келес весе истят центратне теезь вейке стильсэ, вейке тюссо. Эрьва нупалентень совамо тарканть вакссо сёрмадовкстнэяк теезь вейке шрифтсэ. Весемесь сень туртов, штобу центратне улевельть вейке-вейкень ёнов молицят, – кемекстызе Мария Фокина.

 

Юлия Еремина
Фототне А. С. Пушкин лемсэ республикань Раськень библиотеканть.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».