Неть читнестэ «Аграрная производственная фирма «Норов» ООО-нь автомобилень водителесь Александр Альшин тешкстызе юбилеензэ. Александр Дмитриевичнень топодсть 60 иеть, малав ниленьгементнень сон алтынзе республикасонок содавикс, икелев молиця велень хозяйствань те предприятиянтень. Истя жо пингень перть Семилей велень хлебоприемной пунктсо (Элеваторсо) важодсь Ульяна Ивановна авазо. Неень шкане «Норовсо» роботыть Наталья Михайловна низэ ды Людмила тейтерезэ.
Неть читнестэ минь вастневинек ояксчисэ эриця, тиринь моданть лангсо важодеме вечкиця Альшинтнэнь семиянть марто. Тешкстасынек, ульнесь меленек содамс ды кортамс икелень ды неень шкань эрямодонть, ледстямс сетнень, кинь тевест течи полады те семиясь.
Тевенть ушодык – прядык шкастонзо
Александр Альшинэнь тетязо-авазо – Дмитрий Михайлович ды Ульяна Ивановна, пингень перть эрясть Кочкурбуень Семилей велесэ. Кудазорось важодсь чугункань кинь станциясо, низэ – элеваторсо. Альшинтнэ трясть-кастсть кото эйкакшт – ниле церат ды кавто тейтерть. Александр семиясо ульнесь ветеце эйкакшокс. Сонзэ ледстнематнень коряс, кардазост свал пешксель ракшадо: скалт, реветь, тувот ды истя седе тов. Сыненст кизэнь перть эрявсь анокстамс кором, малавиксэнзэ марто якась тикшень костямо-пурнамо. Куш, кудоютконь тевтнестэ седе ламонть савкшнось топавтомс лелятненень, ялатеке сон зярдояк тевтеме эзь аште. Эште овсе вишкинекс лездась тенст, ков сатотсть виензэ. Самай сеть шкатнестэ тонадсь эрьва ушодозь тевенть топавтомо шкастонзо ды педе-пев. Тенень тонавтсь тетязо Дмитрий Михайлович, тенень кармавтсь авазо Ульяна Ивановна.
Эйкакшонь ледстнематнес те шкас кадовсть сеть уцяскав иетне, зярдо сынст тиринь кудосонть эрясть ламо семият, сынь весе вейсэ тешкстасть кенярксчитнень, свал якасть вейкест вейкест туртов инжекс казне марто. Стака шкасто истя жо сыльть лездамо. Икеле ламо квартирас кудотнесэ аволь ансяк ояксчисэ эрясть, ульнесть прок вейке семия.
Альшинтнэнь кудост Семилей велесэ стявтозель чугункань кинть маласо, вальмава парсте неявсь, кода ардыть икельгаст поездтнэ. Александр вечкиль лангозост ваномо ды свал нейсь прянзо машинистэкс, покш составонь ветицякс.
Сень ловозь, што тетязо важодсь чугункань кинь станциясо, сеедьстэ якась мартонзо важодема таркав. Паряк, тень коряс, Семилеень средней школанть прядомадо мейле сон тонавтнесь Рузаевка ошонь РЖД-нь училищасо, косо ламо специальностнеде башка анокстасть чугункань кинь машинистэнь лездыцят.
Седе тов ульнесь армиясь. Служась сон колмо иеть Ленинградонь областень Кронштадт ошсо. Ламонь а кортыця, тевензэ алкукс топавтыця матросось сестэ туекшнэсь командованиянть мельс. Виде, бути улевель мелезэ, кадовлизь тоско контрактонь коряс служамо, ансяк эрзянь церась бажась велявтомс Мордовияв, ульнесь покш мелезэ самс важодеме тиринь велев. Истя, 1988 иестэ сон сюлмизе эрямонзо велень хозяйстванть марто. Се шкане Семилеень «Сельхозтехника» предприятиянтень эрявсть од ломанть, техниканть парсте содыцят. Нама, васняяк эрявсь тонавтнемс сонзэ витнеме.
Александр Альшинэнь ледстнематнесэ те шкас эзть стувтово важодеме васенце тонавтыцянзо, превс путыцянзо. Сынст ютксо ульнесть механикесь Александр Ведяшкин, транспортонь витнемань гаражонь прявтось Федор Сеськин. Неть ломантне сонзэ тонавтызь техниканть вечкеме, мельганзо алкукс якамо. Се шкастонть саезь, Александр Дмитриевич озась КамАЗ-онь руль экшс ды пингень перть важоди водителекс.
Вановтонзо коряс, «Агрофирма «Норов» ООО-нть, косо сон малав цела пинге, ули весемесь важодеманть ды оймсеманть туртовгак. Неень шкане сынст хозяйствасонть тевс нолдавить важодемань од технологиятне, конатне пек седе шождалгавтыть ломантнень тевест.
Ней хозяйствасонть весе вийсэ молить тундонь видемантень анокстамонтне. Александр Альшин ускси видьмекст эсест хозяйствань семенной заводсто. Вановтонзо коряс, те иень пертьпельксэнть башка енкстнэнь мельс саезь, видемань шкантень овсе аволь ламо шка кадовсь. Парсте чарькодьсы «Тундонь чись ие анды!» валмеревксэнть. Тень ловозь, кувать мартонок кортамо эзь карма, капшазь тусь важодеме.
Колоньгемень вете иеть вейсэ
Армиясто самодо мейле Александр Альшин кармась вастневеме эсест велень од тейтеренть Наталья Жидкина марто. Куш, од ломантне зярдо-бути тонавтнесть вейке школасо, вечкемась жо ютксост вельмесь шкань ютазь. Наталья истя жо кассь ламо эйкакшонь триця семиясо. Тетязо, Михаил Семенович, пингень перть ульнесь стадаваныцякс Н. К. Крупская лемсэ колхозсонть. Авазо, Екатерина Тимофеевна, кулось, зярдо Натальянень ульнесть ансяк кавто иеть. Ансяк вановтомо-мельтеме тейтерькась, кода сынст лия эйкакштнеяк, эзь кадово. Од аваст, Мария Лаврентьевна, кинь ульнесь эсензэ церынезэ, трясь-кастсь эйсэст прок эсензэтнень. Церынеськак теевсь тенст тиринь лелякс. Семиясь эрясь покш ояксчисэ ды вейке вейкенень лездазь.
Школанть прядомадо мейле Наталья кармась важодеме стыцякс Рузаевкань швейной фабрикасо. Од тейтересь кодаткак специальной курсат тень туртов эзь прядо, стыцянь профессиянтень васень шкастонть ушодсь тонавтомонзо цехень мастерэсь Валентина Свагина. Валентина Ивановна сестэ ламос тонавтынзе Натальянь ды сонзэ ялгатнень, эдь стыцянь профессиясь аволь шождатнестэ, эрявсь эште стамо маштомань ерокчи.
Оймсема читнестэ Наталья капшась тиринь велев, эдь тосо учось вечкевикс ломанезэ Александр. Колмо иень ютазь одтнэ арсесть урьвакстомс-венчамс. Свадьбаст налксизь 1990 иень февральстэ. Теде мейле Наталья велявтсь эрямо тиринь Семилеев.
Сень лангс апак вано, што Альшинтнэнь семияст покшоль, кармасть эрямо вейсэ, атявтось ды ававтось урьванть вастызь кода эсест тейтерест. Одтнэнень явсть башка комната, се шкане аволь весень, велесэ эрицятнень ютксто, пракшнось истямо уцяска. Покш семиясь эрясь ояксчисэ, вейке вейкенень лездазь, чарькодезь. Мейле одтнэнень важодема таркасто макссть башка эрямо тарка. Тов кементь иетнень ютазь саизь мартост эрямо Ульяна Ивановнаньгак. Наталья Михайловна седейшкава якась ававтонзо мельга куломазонзо.
Кода вере ледстинек, Альшинтнэ венчасть-урьваксть перестройканть шкасто. Сестэ кирдевсть зарплататне, чавот ульнесть лавкатнень лавсятне. Александр ды Наталья, ламо эйкакшонь семиясо чачозтне-касозтне, эзть кирде покш нужачи ярсамопелень коряс. Куш, эрясть квартирасо, кудонть маласо ульнесь ракшань кирдемань таркаст, косо трясть скал, реветь, тувот, саразт. Нурькинестэ, вачо эзть аште, весемесь ульнесь эсест. Натальянь ледстнеманзо коряс, сеть шкатнестэ покш лезкс тенст макссь «Норов» Агрофирмань прявтось Александр Ильич Поздняков. Эдь ракшань трямс эрявсь ламо кором, сонзэ явсть тенст питневтеме.
Ютасть стака шкатне, ней лавкасо эрьва мезе ули, зарплататнеяк шкастонзо пандовить, кенярксчитнестэ казнетькак те предприятиясонть важодицятненень максовить. Александр Дмитриевичнень, кода парсте важодицянтень, 2000 иетнестэ питневтеме максокшность путевка Ялта ошонь санаторияв. Неень шкане те предприятиясонть весе важодицятнень туртов ули «Карнай» оймсема базаст.
Теде башка, Александр Дмитриевич тешкстазь Российской Федерациянь Велень хозяйствань Почетной грамотасо, конань тензэ казизь ютазь иень сексня.
Ули тевест поладыця
Альшинтнэ трясть-кастсть кавто тейтерть. Покшось, Людмила, школань прядомадо мейле тонавтнесь М. Е. Евсевьев лемсэ педагогической институтсо (ней сон университет). Важодемань кинзэ ушодызе Семилей велень эйдень кужосо, специальностень коряс сон логопед-психолог. Шкань ютазь кармась важодеме «Норовское молоко» ООО-сонть.
Людмила Александровна лиссь мирденень теке енксонь цера экшс, Григорий Бояркин Красномайский поселкасто. Одтнэ рамасть покш кудо, косо кастыть колмо эйкакшт.
Омбоце тейтерест Мария вейксэ классонь прядомадо мейле тонавтнесь А. И. Полежаев лемсэ Саранскоень энергетикань ды электронной техникань техникумсо. Неень шкане важоди ошсо ды полады тонавтнеманзо Саранскоень Кооперативной институтсо.
Ютко шкасто весе семиясь вечки пурнавомо тетяст-аваст кудосо, талновтыцядонть кортамо, изнявкстнэнень вейсэ кенярдомо. Неть читнестэ сынь сакшность тетяст туртов юбилеень кувалма поздоровонь евтамо, паро арсемань ды казнень каземе! Кадык масторсонок кармить седе ламо истят семият, косо ули чарькодема, лездамо ды вечкема!
Валентина Юдина