Зяро ломанть, уцяскат нардась моданть лангсто Ине Отечественной войнась. Кадык минь, неень шкань од ломантне, а содасынек кулозтнень чачост, ансяк лемест ды сынст ине тевест кармить эрямо минек седейтнесэ свал.
Тедеде минек масторонь эрицятне тешкстыть Ине Отечественной войнасо Изнямонь 80 иетнень. Зярдо арсезеван войнадо, превезэнь сеске сыть поэтэнть-фронтовикенть Евгений Аграновичень «Вечный огонь» моростонзо валтнэ: «Нет в России семьи такой, где б не памятен был свой герой». Алкукскак, арась вейкеяк кудораське, конань бу а токавлизе 1941–1945 иетнестэ молиця верень валовтыця Ине войнась!
Тиринь газетань ловныцятненень ули мелем евтнемс Ине Отечественной войнань ветерандонть ды сырькайдень – Мария Леонтьевна Маторкинадо.
Сон чачсь-кассь Орданьбуень райононь Орозбие велесэ 1922 иень ноябрянь 8-це чистэ. Тетязо-авазо эрзянь ломанельть. Сырькаень ледстнеманзо коряс, тетязо, Леонтий Иванович, гражданской войнань участникель. Аванзо ланга евтниль аламо, Евдокия Яковлевна велень аваль, свал лакась кудоютконь тевсэ. Семиясост ульнесть сисем ломанть. Марькодо башка (истя тензэ мерильть малавиксэнзэ) кудораськесэнть ульнесть Наталь, Полина, Сергей ды Петра эйкакштне. Сынст мельга ульнесть эште эйдеть, ансяк чачтомадо мейле сеске кулость. Сеть шкатнестэ истямо тевесь эрсиль сеедьстэ.
Кудынесь, косо эрясь Марько бабань семиязо, ульнесь пек вишкине, кода кортыть, ломанень пилеваряшкаль. Латозо вельтязель олгосо. Семиясь эрясь кажовсто. Ансяк эйкакштнень ялатеке тризь-кастызь.
Апак учне сась зыянов шкась – войнась. Се шкантень Марько бабань туртов ульнесть 20 иеть. Кувака черь, валдо-сэнь сельме, калаця чама од тейтересь бажась лисемс мирденень, ансяк войнань стака шкатне пшти пеельсэ керизь неть бажамотнень. Васенцекс Маторкинтнэнь семиясто войнань тюрема паксятнес понгсь Петра цераст, конась малав сеске чавовсь. Ульнесть тензэ ансяк 25 иеть. Сырькаем жо войнань танстенть варчизе Сурань оборонань рубежень стявтоманть шкасто.
Ледстясынек, рубежень теемась мольсь 1941 иень октябрясто саезь 1942 иень январьс. Ушосонть цят якшамоль. Моданть чувсть эйкакшт, од тейтерть, ават ды сыре ломанть. Ютксост ульнесь Мария Леонтьевнаяк.
Бабань ледстнеманзо коряс, аволь эрьвась цидярдсь, ламот орголесть мекев кудов. Сонзэ жо мезеяк эзизе тандавто. Сурань рубежень теемадо мейле шумбрасто сась кудов. 1942 иень июлень меельце читне велявтызь сырькаень эрямонзо мекевлангт.
Вана мезе кадовсь превезэнь бабань ледстнемастонзо:
– Се иень кизэсь пек псиль. Коштось мик пултазель чисэнть. Ялгацек аштинек вальмало. Апак учне ваксозонок ардсь покш грузовой машина. Кузовстонть кирнявтсть зярыя солдатт: мазыйть, одт. Апак фатя човорявсть минек юткс, пейдинек, аламодо кортынек. Шкань ютазь ваксозонок сась военной формасо оршазь цёраломань. Валонзо коряс, кучозель военкоматсто. Ваннымизь прясто-пильгес ды мерсь: «Ну, что, бояравоньки, готовы ехать на войну?» Минь ялгатнень марто васняяк эзинек чарькоде, мейсэ ашти тевесь, пейдезевинек. Ды ансяк мейле, кода венстизе военкоматонь коневонть, чарькодинек, те ломанесь сась минек мельга. А седе тов весементь ледстнян, мерят, сув потсо: сельведть, лайшемат, кувака килангов анокстамот. Сыргинек чокшне, ардынек веть. Эйстэденек ульнесть байтяк, минек районсто малав 1000 ломанть. Чугункань кись пачтимизь Нижней Тагилэв. Поездстэ лисемадо мейле стявтымизь стройс. Евтнесть, мекс тей сынек. Седе тов кильдезь лишмес нурдосо пачтимизь Коминтернань лемсэ 183-це № Уралонь танконь теема заводов. Васняяк ветясть тенек апокшке экскурсия заводонть перька. Седе тов совавтымизь потс. Кода совинек потмозонзо, судос вачкодсь стака чине, зданиянть потсо аштесь виев гайть. Ломантне важодсть. Седе тов ветимизь эрямо таркав – бараков. Явсть оршамопельть, кши ды пси ведь. Килангодонть мельга мадинек топчан лангс, удынек валскес. Завторкамодо мейле стявтымизь стройс. Бригадирэкс ладизь минек велень Юдань Настань. Тосо весемесь ульнесь армиянь ладсо.
Заводось, косо важодсь сырькаем, нолдась Т-34 танкт, лиясто снарядткак. Тесэ роботасть зярыя тежат од ломанть. Ютксост ульнесть военнойть, ученойть, инженерт. Роботыцятне пурназельть масторонь эрьва регионсто. Нама, тонадовсь а сеске. Сехте покш тошначись – тиринь кудо мельга. Ялгатнень ютксо сельведть кияк эзь невтне. Сырькаень сельмензэ икеле куломазонзо аштесть рузонь кельсэ сермадозь лозунгтне: «Все для фронта! Все для Победы!». Ды истямо кармавтома марто од ломантне важодстькак, виень апак жаля.
– Седе ламо савсь важодемс ушосо. Чинек-венек кедьвийсэ чамдтнинек кшнимода (рудань) марто вагонт. Поездэнь рельсатне ульнесть кавто ярусонь. Вере ярусонь вагононь чамдомсто ламот эйстэденек чавовсть. Аватне валявсть кшнимоданть алов. А весть савкшнось важодемс станок экшсэяк, пурнамс танконь эли снарядонь конструкцият. Ламо кирдинек вачочи ды арасьчи. Лездась ансяк парос кемемась. Изнямонть вастыя станок экшсэ важодемстэ.
Войнадо мейле Нижней Тагилсэ сырькаем эрясь эште колмо иеть. Тосо жо вастызе васенце вечкеманзо. Од ломантне пурнасть семия, чачсь Миколь церынькаст. Зярыя шкань ютазь семиясь каладсь. Сырькаем эйкакшонзо марто сась эрямо тиринь енксов. Самозост авазо уш кулокшнось, тетязо эрясь лия эйкакшонзо марто. Секскак савсь тензэ совамс эрямо Сергей ялаксонзо кудос. Велев самодо мейле ушодсь важодеме колхозсо тувонь мельга якицякс. Миколь церыньканзо туртов ульнесть кавто иеть, сон пек экшендекшнесь ды кулось.
Шкань ютазь бабань эрямозо таго валдомсь. Вастызе Федор омбоце мирдензэ. Сон важодсь лишмень мельга якицякс. Сырькаень ледстнеманзо коряс, те ломанесь кирдсь покш ризкс. Войнань шкасто понгонесь ятонь полонс. Ульнесь тосо аволь вейке ие. Кудов нолдызь ансяк Изнямодонть мейле. Полонс саизь войнань васенце читнестэ. Сон служась армиясо, тевесь лиссь Польшань территориясо. Ламо нарьгамот, вачочи ды сэредькст печтясь те церась. Вана мезе евтнесь сырькаем покштянь полонс понгомадонть:
– Васень шкастонть советской солдаттнэнь кирдсть кельме церьковасо. Ламот кулость вачочиде. Полонсо аштезь, Федоргак экшендсь. Кудов самодо мейле ламо сэредсь, ансяк важодсь сисем ломань таркас.
Марько бабань марто кенерсть эрямо ансяк вейке ие. 1951 иень июлень меельце читнестэ Федор кулось, сырькаем жо лиядсь пешксесэ. Федор покштянь куломазонзо мелезэ ульнесь вейке – содамс, кинь чачты низэ. Пек учось церынька – юронь поладыця. Куломадонзо мейле бажамонзо топавтовсть. Августонь 3-це чистэ чачсь Федор церазо. Мирдензэ куломадо мейле сыре бабам лиядсь эрямо атявтонзо кудос. Сондензэ башка тосо эрясть эште 16 ломанть. Церазо кепететсь, свал лездась аванзо туртов кудоютконь тевсэ. Прядызе школанзо, кавтошка иеть важодсь колхозсо лишмень мельга якицякс ды тусь армияв. Армиядо мейле кавто ковонь ютазь урьвакстсь шабра ульцянь мазый, кувака раужо черь Маня од тейтеренть лангс. Шкань ютазь Маторкинтнэнь семиясо чачсть колмо эйкакшт: Тоня, Женя ды Света. Марько сырькаесь пельминутаяк эзинзе кадно ськамост нуцькинензэ. Свал ульнесь мартост, эдь эйкакштнень тетяст-аваст ламо трудясть колхозсо.
Нуцькатне кассть, пурнасть эсест семият. Марько сырькаень чачсть кото правнуцьканзо. Вейкесь эйстэдест – мон.
Тешкстаса, эсензэ куломадонзо икеле, сырькаем калмизе вейкине церанзо. Федор покштям кулось астмадо.
Мария Леонтьевна кулось 2013 иень маень 9-це чистэ, сонензэ ульнесть 90 иеть. Сон куломазонзо ловсь прянзо уцяскав ломанекс, секс мекс сонзэ пельде чачсь истяшка кудораське. Ды эрямонь меельце чис мелезэ ульнесь вейке – иляст сода эйкакшонзо ды нуцьканзо войнань ризксэнть.
Алена Артемьева
Фототне саезь Маторкинтнэнь архивстэ.