Республикань Культурань кудосо ютась кенярксчинь вастовома, кона алтавсь Культурасо важодицянь чинтень ды Театрань чинтень. Тей пурнавкшность музеень, библиотекань, театрань, творческой коллективень, культурань лия учреждениятнень важодицятне. Лембе валонь евтамо сакшнось МР-нь Прявтось Артем Здунов.
– Течи явтано мель сетненень, кить кецявтыть ломантнень, кинь ули ерокчист – максомс ломантненень кемема вандынь чинтень, эсь Чачома масторонтень, лездамс эрямс ды важодемс моро марто. Культуравтомо ковгак! Истя ульнесь Ине Отечественной войнань иетнестэяк – солдаттнэ ютасть тюреме моро марто, культурась эрицятнень марто ульнесь масторонть туртов стака иетнестэяк, – мерсь Артем Здунов.
Эряви меремс, республикань культурань сферась парсте виевгавтови. «Культура» нацпроектэнть вельде кото иетнень перть явозельть малав 1,3 млрд целковойть. Стявтозельть ды витнезельть 35 объектт, эште 38 учреждениятнесэ одкстомтозель материально-технической базась, витневить райононь ды велень культурань кудотне. Тедеде «Культура» национальной проектэнть таркас ушодовсь «Семья» нацпроектэсь.
Мордовиясо важодить 7 профессиональной, 11 народной, эйкакшонь образцовой кавто театрат, тесэ ютыть лия енов а молиця фестивальть.
– Театратнес кармасть якамо семиянек, те пек вадря невтевкс, минек культурань сюпавчись юты од ломантненень. Пешксе залтнэ невтить, культурась карми эрямо седе тов! – кортась Артем Здунов.
Тешкстазель, те иестэнть тевс нолдавсь «Земский работник культуры» умок учовиця программась, сонзэ кармавтсь ушодомс Россиянь Президентэсь.
Сы иестэ ине скульпторонть Степан Дмитриевич Эрьзянь чачома чистэнзэ топодить 150 иеть. Тенень алтавить юбилеень покш кенярксчить.
МР-нь Прявтось башка тешкстызе «#КультураZаПобеду!» проектэнть, конанень явить мель культурань государственной ды муниципальной учреждениятне. Ламот ардтнесть СВО-нь таркатнес, кепедсть цератнень боевой ежост, анокстасть патриотической концертт ды выставкат, пурнасть гуманитарной лезкс.
– Сюкпря боецтнэнень лездамонть кисэ, кадык те парось велявты тенк сядоксть. Цератне свал кармить кирдеме мельсэст: минь сындест эзинек стувтне – сынст туртов те пек эряви! – тешкстызе Артем Здунов.
Мордовиянь Прявтось евтась сюкпря эрьвантень, кие алтызе эсь эрямонзо республикань культурань виевгавтомантень, патриотизмань кемекстамонтень, духовно-нравственной питнейчитнень ды раськень койтнень-кирдатнень ванстомантень ды вельмевтемантень.
Теде мейле государственной покш наградасо казевсть сетне, кить тейсть покш путовкс республикань культуранть кастомасо-виевгавтомасо. Истя, МР-нь Някань государственной театрань режиссерось-постановщикесь Лилия Шахова казевсь РФ-нь Президентэнь Почетной грамотасо.
И. М. Яушевень лемсэ Оперань ды балетэнь театрань прявтонтень Владимир Шараповнень максовсь «МР-нь Народной артист» лемесь.
«За заслуги перед Республикой Мордовия» медальсэ казевсть Мордовиянь государственной филармониянь прявт режиссерось Оксана Вишнякова, филармониянь морсицясь Игорь Лисенков, филармониянь прявт балетмейстерэсь Галина Хмаренко.
«МР-нь искусствань заслуженной деятель» лемесь максовсь Н. П. Огарев лемсэ МГУ-нь Культурань ды искусствань кудонь прявтонтень Наталья Атитанованень.
«МР-нь заслуженной артист» лемесь максозь «Росичи» моронь театрань морсицянтень Евгений Гороховнень, МР-нь государственной филармониянь морсицянтень Карина Сергееванень ды лиятненень.
Зярыя ломанть казевсть «МР-нь Культурань заслуженной важодиця» лемсэ. Ютксост Орданьбуень Орозбие велень Культурань кудонь прявтось Надежда Аксенова (фотозо 1-це стр.), конась 30 иеть важоди культурасо. Ардтни Россиянть келес ды содавты весень кемень кевердемань промысланть марто.
Татьяна Маторкина