Пятница, февраля 03, 2023
Важное

 

Ледстясынек, Россиянь Президентэсь Владимир Путин яволявтсь кемгавтово национальной проектт, конатнень смустест – паролгавтомс Россиянь эрьва ломаненть, эрьва семиянть эрямонзо. Тешкстасынек, Мордовиясь важоди 56 федеральной проекттнэсэ, конат совить национальнойтнес. Чарькодеви, эрьвась юткстост пек эрявикс минек республикань ломантнень эрямост шождалгавтомга, сынст ёжост витемга.

Текенень поладсынек, кодамо проект иля сае, сон келейстэ сюлмави лиятнень марто. Невтемакс, бути парт кармить минек республикаванть китне, парсте топавтови «Безопасные и качественные автомобильные дороги» проектэсь, теке шкасто ванстови шумбрачись («Здравоохранение» проектэсь), истя жо покш лезэ карми улеме «Экология» ды «Жилье и городская среда» эрямос совавтовиця проекттнэде.

Саранск ошонь округонь Юртов лемсэ ульцяванть кись, конась таргавсь Блохинской чудикерьксэнть чирева, ламо иень перть талновтсь аволь ансяк те куронь эрицятнень, истя жо весе 44 кварталонь ломантнень, кинень эрьва чистэ савсь ютамс ды ардомс те кинть ланга. Мик таксисттнэяк лоткакшность тов ардтнеме эли жо а покш мельсэ сыргильть пассажиртнэнь мельга, зярдо марилизь те ульцянть лемензэ. Ков ансяк эзть сёрмадо те таркасонть эрицятне, ламо иень перть кинень ансяк эзть пшкале энялдома марто.
Иневанькс Троицянь православной кенярксчиденть мейле а ёвтавияк кодамо покш мельспаро саинзе те ёнкссонть эрицятнень, зярдо редизь тосто «МАПО-Транс» ООО-нь строительтнень. Сынь ушодсть эрязасто кинть тееме.

«МАПО-Транс» ООО-нь важодицятне те объектэнть тееме валске марто састь шкастонзо. Цёратнень ансяк вейке талновтсь – пертьпельксэсь. Сон эзь максо ушодомс важодеманть. Секе-тев пиземесь аламонь-аламонь начтсь асфальтонть, конась ацазель чиде икеле. Юткошканть кундазь, кортазевинек те строительной организациянь прорабонть Олег Пырков марто. Сон пачтясь, те объектэсь топавтови «Безопасные и качественные автомобильные дороги» национальной проектэнть лувсо. Сынст коллективесь, конань прявтсо МР-нь Госсобраниянь депутатось Александр Атласов, эрьва тевенть топавты алкукс ды тевень содазь. Олег Викторовичень валонзо коряс, бути кинть вельтявксозо нардев, сон саты аволь вейке кементь иес. Сестэ ломантнеяк эйсэть кармить ледстнеме ансяк паро валсо. Теде арсезь, сынь путыть весе виест, штобу кадомс мельгаст валдо мельть.
Кинть парочинзэ коряс кортамсто, сон минек кемевтимизь, весе вешематне топавтовить, технологиясь кирдеви. Васня кинть ванськавтызь, мейле ацызь кевнесэ. Седе тов кавксть вельтизь асфальтсо.


«МАПО-Транс» ООО-со умонь важодицятне свал явить мель одтнэнень, сынст эсь тевентень тонавтомантень. Невтемакс, те коллективсэнть умок важодить автогрейдерэнь машинистэсь Валентин Пискайкин, асфальтобетононь машинистэсь-укладчикесь Николай Уморин, трактористэсь Александр Маланкин. Истя жо парсте важодить катоконь машинистэсь Сергей Головин, асфальтобетонщиктне Александр Инюкин ды Игорь Нарватов.
Кинь объектэнть лангсо улемстэ теевинек содавиксэкс эрзянь цёранть Александр Каргин марто. Сонзэ чачома ёнксось – Дубенкань райононь Пуркаева велесь. Од цёрась эсь шкастонзо служась армиясо, тонавтнесь кинь теемань тевентень Саранскоень «Дом науки и техники» Автошколасонть.

Потмура пертьпельксэнть лангс апак вано, од цёрась ульнесь покш мельспаросо. Икелень чистэнть сон идизе бакалаврань дипломонзо Н. П. Огарёв лемсэ Мордовской государственной университетэнь Механикань ды энергетикань институтсо. Кевкстеманок лангс: арси-арась полавтомс важодема тарканзо маласо шкастонть, мерсь тенек: «Арась, эдь минек коллективесь, косо важодян кото иеть, пек паро. Ломантне вейке-вейкень чарькодицят, бути кинень эряви, свал сыть лездамо».

…Вана прядовсь пиземесь, кись кармась соркстамо, цёратне кундасть эсест тевест топавтомо.
Неть читнестэ минек редакцияв гайневтсть Саранск ошонь округонь Юртов лемсэ ульцясо эрицятне, кить пачтясть сынст куросо кинь теемань тевтнень прядомадо. Сынь ёвтасть сюкпрянь валт «МАПО-Транс» ООО-нь (прявтось Александр Атласов) важодицятненень сыненст паро кинть тееманзо кисэ ды ёвтасть кемема, од кись саты тенст ламодояк ламо иес.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».