Весе муниципальной районтнэстэ «Шумбрат, Мордовия!» фестивальсэнть меельцекс эсь ёрокчинзэ невтизе Дубёнка ёнксось. Ансяк кода мерсь сцена лангсто райононь прявтось В. Н. Нефедов: «…Меельцекс яла кадныть сехте партнэнь ды содавикстнэнь. Те фестивалентень анокстамось мольсь иень перть. Ды, нама, минь течи тенк невтьсынек се вадрянть, мезе ули районсонок…»
Кода весе лия читнестэяк, васняяк теезель мельстуиця выставкась, косо ёроков ды кедьчелькев ломантне невтнизь эсь важодевксэст. Выставкасонть васняяк сельмес каятотсть «Районный фотопроект «Семьи героев» СВО-нь семиятнень фотографиятне, конатнень ало келемтезель Россиянь флагось. Мельганзо, кода свал, невтезель сельмень салыця мазычись: ставкст-викшневкст, чувтосто, джутсто теевкст, макраме, эрьва кодамо техникасо топавтозь картинат, човалянь кирьгакшт, пилекст-кедькст, някат ды ламо лия мезть. Нина Викторовна Аниськина сась лезэв канст марто – авась весементь содасы чаень тикшетнеде, конат касыть тиринь районсонзо. «Минь шешктяно сень, мейсэ эряви лецямс ды лездамс шумбрачинтень», – тешкстась Нина Викторовна. Тень коряс содамочитнеде сонзэ таштавсть певтеме, ловт, цела энциклопедия. Ланганзо сёрмадтано башка материалсо.
Выставкадонть мейле ломантне ютасть залонтень концертэнь ваномо. Ветицятне А. А. Маркова ды А. Д. Абитов васняяк ётызь жюринь лемтнень. Тешкстама, сынст ладсо лемест эзинзе ёвтакшно ве районгак – эрьва жюринть туртов арсезель ниле строчкас весёла валморыне. Темась текель – «Мейстэ ушодови тиринь масторось?». Ды тесэяк Дубёнка ёнксось арсесь киньгак ёнов а молиця тев. Кавто ветицятнень ваксс лиснесь кадетэнь оршамосо цёрыне, 5-це классонь тонавтницясь Данил Гераськин, сон максызе теке кевкстеманть: «Авай, школасо тенек макссть сёрмадомс сочинения, ёвтак, инескеть, мейстэ ушодови тиринь масторось?». Ды мельга-мельцек номертнэстэ цёрынесь мукшнось каршо валт эсь кевкстеманть лангс.
Васняяк, нама, те весе покш масторонок… Ды васенце моронть – «Россия моя» – морызе райононь Культурань кудонь «Морамо» ансамблясь. Мейле Кенде велень «Эрзянка» фольклорной этнографической ансамблясь невтизе «Одирьвань парень пурнамо» свадьбань койстэ саевксэнть, конась невтезель кенярксовсто ды мазыйстэ, мерят, алкукс свадьбань койс весе понгонесть. «Одирьвась» ульнесь истямо «сюпав» палясо-нардамосо, натой эрямонь парезэ кодаяк эзь пекставо: аватне вельксэнть ланга вачкоестькак, ойсестькак лангозонзо, мейсэ пейдевтизь ваныцятнень. Те койденть мейле сеске ламо вайгельсэ моразель «Исень саевкс одирьва» раськень морось, конань морызь Орданьбуень «Эрзянь ава» ансамблянь аватне. Арсетяно, истят морыцятнень вайгелест эрявить нолдамс башка дисксэ – те минек раськень алкуксонь сюпавчи, конась ней вастневи пек чуросто.
Весе редизь, Дубёнкасо ули пек виев «Фантазия» киштемань студия. Хореографокс тосо важодить Борис ды Светлана Слепцовтне – Саранскоень РДК-нь важодицятне. Эйкакшонь колмо группатне невтсть киштемань вете номерт, ды эрьвась истя парсте, рузкс меремс, оригинальнойстэ теезь, натой ваныцятне секе-тев сеересть тенст «Браво!».
Нама, тиринь ёнксось ушодови эсенек Мордовиясто, конанень гайгсть «Шумбрат, Мордовия!» Алена Сыреськинань ды «Тиринь ёнксом» Светлана Фадейкинань эсест арсевть эрзянь валморотне. Пек вечксызь ломантне Кенде велень цёранть Александр Дёмкинэнь творчестванзо. Тедеде сон гайгстызе «Кавто килейть» моронзо. А вана Ломаты велень «Чишмя» дуэтэсь кецявтынзе ваныцятнень «Сандугачым-тургаем» («Соловей-жаворонок») татаронь моросонть. Дубёнка велень «Сударушка» ветеранонь ансамблясь пиже лугань тюсонь палясост серьгедизь «Мы будем петь» моронть. Вейкеяк райононь арасель клавишной инструментсэ налксемань номер: «Вдохновение» квартетэнь тейтерькатне налксизь Г. Гурмиттэнь «Венский вальс» произведениянзо.
Седейстокицякс ульнесь Алина Бояркинань «Вернитесь» морось, конань пингстэ весе залось стякшнось, ламотне нардтнесть сельведть. Экранонть лангсо те шкане мольсть СВО-с саезтнень малавиксэст марто фотографиянь слайдтнэ. Чарькодеви, те неень шкань сэредьксэнек, конадо кияк а кадови ве ёнов.
Истя жо мельстуицякс ульнесь Дубёнкань школань тонавтыцянь «Гармония» хорось, те малав 40 ломанть, сынь морызь «Дубёнский край» моронть. Меельцекс гайгстазель «Льётся музыка» морось, конась пурнакшнынзе концертэнь весе анокстыцятнень ды участниктнень.
Недлячистэ прядызе фестиваленть Саранскоень концертэсь. «Шумбрат, Мордовия!» фестивалень Гала-концертэсь ютавтови декабрянь 16-це чистэ.
Марина Агафонова