Ноябрянь 24-це чистэ Республикань Культурань кудосо Мордовиянь Прявтось яволявтызе МР-нь Государственной Собраниянтень Кучоманзо.
СВО-донть
«Течи минь эрятано ды важодтяно аволь шожда шкасто. Ансяк те весемесь тееви республиканть туртов, Мордовиянь прявт отраслятнень виевгавтомаст туртов, – истямо валсто ушодызе эсь Кучоманзо Артём Здунов. – Эряви видьстэ меремс, неень шкань ламот элементтнэнь марто, истя жо оперативной, минь эзинек вастовкшно ютазь пингень 40-це иетнестэ саезь. Чарькодевикс тевть путы икеленек Российской Федерациянь Президентэсь Владимир Владимирович Путин. Весень тень пингстэ ютазь иень тевтне лездасть совавтомс эрямос минек потенциалонть ды кекшезь резерватнень.
Паронь теемась, добровольчествась кармасть свалшкань тевекс бизнесэнь ветицятнень, предприятиятнень прявттнэнь, важодемань коллективтнень, общественно-религиозной вейсэндявкстнэнь ды сядот тёжат эрицятнень туртов. Эрьва кучозь посылкась, эрьва лембе оршамопелесь ды оборудованиясь – путовкс вейсэнь Изнямонтень. Ледстнить минек цёратненень: сынст вечксызь ды учить кудосо. Мордовиянь ламот эрицятне лездыть валсо ды тевсэ. Васенце читнестэ саезь минек марто од ломантне – «#МыВместе» штабонь, Весероссиянь народной фронтонь, «Единая Россия» партиянь «Молодой гвардиянь» доброволецтнэ, конат важодить нурька шкас улемань таркатнесэ, пси линиянь телефонтнэсэ, яксить СВО-нь участниктнень семиятненень. Сюкпрянь башка валт минек духовенствантень: мельвановикс Зиновий Владыкантень, Рафаэль хазрат Манюровнень, Раиль хазрат Асаиновнень, православной ды мусульманской вейсэндявкстнэнь активисттнэнень. Ды, нама, пек ламо сетнеде, кить молить контрактонь коряс военной службав. Сынь а явить пряст масторонть эйстэ, минек боецтнэнь эйстэ. Мелят Мордовиясо чачозентень максозь «Герой России» званиясь. Давид Малыйкиннэнь награданть максызе Российской Федерациянь Президентэсь Владимир Владимирович Путин. Минек свалшкань вановт ало ашти боевой ветерантнэнень, военнослужащейтненень ды сынст семиятненень лездамонть коряс Президентэнь весе решениятнень топавтомась. Важодтяно вейсэ «Защитники Отечества» фондонть ды военкоматонть марто. Специальной военной операциянь шканть перть республикань 123 чачозтне казезь Мужествань орденсэ, 27-тне – «За отвагу» медальсэ, колмотне – Суворовонь медальсэ, вете ломантне – Жуковонь медальсэ». Мордовиясь яви лезкс Херсонской областень Каланчакской округонтень. Ули важодемань аравтлув эрявикс социальной объекттнэнь ды инженерэнь инфраструктуранть вельмевтеманзо коряс.
Промышленностесь
виевгады
Минек масторонь суверенитетэнь ды национальной безопасностень топавтомантень аравтозь республикань весе экономикась. «Республикасонть поладови оптической волокнань пешксе циклань теемань коряс проектэнь топавтомась. Те 10 млрд инвестицият ды 120 важодемань од таркат. Россиянь Минпромторгонть марто вейсэ эряви важодемс «Развитие электронной и радиоэлектронной промышленности» программантень проектэнь топавтоманть коряс, – мерсь Артём Здунов. – Эрязасто путы инвестицият «Оптикэнерго» компаниятнень группась. Тедеде нолдазь импортонь полавтыця кабельтнень производствась ды литейной од производствась. «Биохимикесь» нолдась производствас субстанцият ды препараттнэнь од видт».
Полавтовсть тевтне шожда промышленностьсэнть. Эштё кавто иеде икеле стамонь предприятиятне пшкалесть тенек анокчи марто кундамс куш кодамо важодемантень коллективенть ды компетенциятнень ванстомаст кувалма. Течи неть предприятиятне роботыть, теезь 150 ламо важодемань од таркат. Отраслясь кармась мельстуицякс важодицятнень ды инвестортнэнь туртов, панжовить од предприятият. Тедеде промышленностьсэнть нолдазь 10 од производстват. Ансяк фармацевтикантень инвестициятне кармасть 16 млрд целковойде ламо.
Кадратне
«Течи минек МГУ-сь – республикань ламот отраслятнень туртов высококвалифицированной кадратнень анокстыцятнестэ вейкесь. Предприятиятнень руководительтне сеедьстэ тешкстыть кадратнень а сатомань стакачинть. Неень шкасто улить малав 10 тёжат вакансият! Текень пингстэ вузтнэнь ды СПО-нь учреждениятнень прядыцятнень специальностень коряс, истя жо важодемань профессиятнень коряс, важодеме молемань процентэсь пек вишкине. Тень кувалма – трудонь покш миграциясь. Кадратнеде пештямось молезэ весемеёндо, покш мель явост предприятиятнень прявттнэ. Кармавтан предприятиятненень ушодомс эсь сотрудниктнень профессиональной башка анокстамонть, тов соваст одс анокстамонь нурька шкань курсатне ды квалификациянь кастомань программатне», – мерсь Артём Здунов. Ды яволявтызе сыця иенть Трудонь династиянь иекс.
Кастовить
экспортонь покшолматне
«Владимир Владимирович Путин аволь весть тешкстакшнызе экспортонь возможносттнень кастомань эрявиксчинть. Ёвтан сюкпря предприятиятненень, конат теить путовкс те важодемантень, истя жо Африкань, Азиянь ды СНГ-нь мастортнэнь ёнов экспортонь рынкатнень ладямост коряс, – мерсь Мордовиянь Прявтось. – Эсь важодемасост минек предприятиятненень эряви нолдамс тевс Россиянь экспортонь куншкакуронь возможносттнень. Сы иень февральстэ РЭЦ-сь кочкизе Мордовиянть эсензэ региононь весе сетенть туртов иень невтевкстнэнь ёвтамонть туртов. Эряви явомс покш мель Беларусь Республиканть марто вейсэнь проекттнэнь лангс. Теде башка, эрявить нолдамс тевс Китаенть марто вейсэнь тевтеемань возможносттнень. Минек МГУ-нтень эрявить ламолгавтомс Китайстэ студенттнэнь ды преподавательтнень, седе эрязасто нолдамс тевс Китаень лабораторной ды технической юронть Россиянь арсевкстнэнь-важодевкстнэнь лезэс.
Эряви явомс мель Индиянть лангс, те масторлангонь сехте покш экономикатнестэ вейкесь. Течи минь уш кирдтяно вейсэнь тевтеемань кеме сюлмот гуманитарной ёнкссонть. Истя, Мордовиянь госуниверситетсэнть тонавтнить 700 ламо студентт Индиясто. Те омбо масторонь студенттнэнь сехте покш группась. Китаенть ды Индиянть марто сюлмотнень кемекстамонть туртов эряви нолдамс тевс Индиянь культурань куншкакуронь ды Россиянь-Китаень ялгаксчинь обществань ресурстнэнь».
Инвестициятне
«Вандынь чинтень минек кемемань юрокс ашти инвестпроекттнэнь топавтомась, инвестициянь климатонть вадрялгавтоманзо лангсо свалшкань важодемась, – мерсь Артём Здунов. – Тедеде прявт капиталонтень инвестициятнень покшолмась кармась 65 млрд целковойде седе ламо. Поладови экономикань эрьва кодат отраслятнесэ 32 покш инвестпроекттнэнь топавтомась, инвестициятнень вейсэнь покшолмась – 100 млрд целковойде седе ламо. Прядовома лангсо республикасонть промышленно-производственной лувонь васенце экономикань башка зонань теемась. Икелепелень ванноматнень коряс, арсеви путомс инвестицият 33 млрд целковойтнень покшолмасо. Весе уровенень бюджеттнэс налогонь пандоматнень покшолмась карми 5 млрд целковойтнеде седе ламо. Теевить тёжадо ламо важодемань од таркат. Минек партнёрокс карми Россиянь покш инвестортнэстэ вейкесь – «АФК Системась».
Касы вишка
ды средней бизнесэсь
«Производственной секторсо деловой ёрокчись вети вишка ды средней бизнесэнь виевгавтомантень, ды аволь ансяк кооперациянть лувсо, истя жо микшнемань ды минек эрицятненень услугатнень коряс. Топавтовиця тевтнень вельде уш колмоце ие касыть МСП-нь субъекттнэ, сынь малавгалить 23 тёжатнес. Ламолгадыть самозанятой эрицятне – иенть перть кавтодо ламос, ней те 20 тёжадо ламо ломанть. Эряви поладомс вишка ды средней бизнесэнтень лездамонть», – мерсь Артём Здунов.
АПК-сь
Экономикань прявт отраслятнестэ вейкесь, конась теи покш путовкс масторонь продовольствиянь безопасностентень, – те велень хозяйствась. «Тедеде Мордовиясо васенцеде пурназь кавто миллионт тоннадо ламо сюро. Омбоце ие Мордовиясь путы рекорд пиже кснавонь пурнамонть коряс. Вадря цётавксост якстерькаень кастыцятнень. Кастовить импортонь полавтомань покшолматне лия культуратнень коряскак, истят кода соясь, чиньжарамось, рапсось. Мордовиясь кирди васенце таркатнень продукциянь прявт видтнэнь производстванть коряс. Тедеде арсеви нолдамс 445 тёжат тоннат ракшань ды нармунень сывель. Ловсонь производствась карми 529 тёжат тоннат. Алтнэнь производствась – 1,5 млрд штукадо ламо.
Агрохолдингтненень лездамонть марто ве шкасто карматано виевгавтомо хозяйствованиянь вишка форматнень. Агрохолдингтне – минек налогонь базань, бюджетэнь ды производствань потенциалонь юр, вишка форматне – фермерствантень, предпринимательствантень лездамонь ды велесэ занятостень кастомань ёнкс», – мерсь Артём Здунов.
Образованиясь
Велень хозяйствань, промышленностень, социальной ды лия ёнкстнэнь виевгавтомась а ули квалифицированной кадратневтеме. «Тедеде федеральной бюджетсэ образованиянь системантень явозь 3,5 млрд целковойть. Те 1,2 млрд седе ламо ютазь иенть коряс, – мерсь республикань Прявтось. – Тонавтнемань эрьва иестэ Мордовиясо панжовить образованиянь од организацият. Тедеде – Саранскойсэ 1450 таркас Михаил Девятаев лемсэ «Высота» од школась. Уш сы иестэ миненек эряви панжомс эштё кавто од школат – Белозерьясо 165 таркас ды Саранскойсэ 600 таркас. Минь поладтано школатнень педе-пев витнемань покш программанть – кавто иетнень перть витнезь уш 32 зданият. Сыця колмо иетнестэ эряви витнемс-петнемс эштё сехте аламо 42 школат. Истя жо нолдынек тевс школатнень маласо спортонь площадкатнень теемань ды витнемань программанть. Эрязасто виевгавтови кизэнь оймсемань инфраструктурась – федеральной программанть коряс строинек кавто од корпуст Рузаевкань райононь «Изумрудный» лагерьсэ. Сы иестэ эряви строямс од корпуст Краснослободской райононь «Золотой колос» лагерьсэ ды витнемс Кочкурбуень «Орбита» лагеренть.
Средней профессиональной образованиянь ёнкссо «Профессионалитет» федеральной проектэнть коряс теезь фармацевтикань, велень хозяйствань, машиностроениянь, кабелень промышленностень ды шумбра ярсамопелень коряс вете образовательно-производственной площадкат. Нилетне юткстост панжозь тедеде. Явозь малав пельмиллиард федеральной ярмакт ды эштё 100 млн ламо – важодема таркань максыцятнень пельде. Те неень шкань оборудования марто лабораторият ды мастерскойть, одкстомтозь тонавтомань программат. Те иень сентябрянь 1-це чистэ саезь ютынек профориентациянь вейкине лувонтень. Кармавтоман коряс эрьва средней школанть мельга кемекстазь опорной предприятия. Сюкпря весенень, кить вейсэндявсть те важодемантень. Неть: «Талина» компаниятнень группась, «Биохимик», «Норов» Агрофирмась, Орданьбуень светотехнической заводось, «ЭМ-КАБЕЛЬ», «Сарансккабель-Оптика», «Электровыпрямитель», «Рузхиммаш» ды лият. Республикасонть анокстави кадрань стратегия, конань операторокс карми Мордовиянь госуниверситетэсь».
Строительствась
Тедеде строямонь покшолматне кассть 6% ламос, те карми 40 млрд целковойтнеде седе ламо. «Поладови ламо этажсо кудотнень строямось 4-це микрорайонсонть. Ней ушодовсь Лесной ульцясонть строямось. Башка вановт ало ашти уроз эйкакштненень эрямо таркань максомань кевкстемась. 2020 иестэнть саезь, минь эрьва ие касттано неть тевтнес явовиця ярмактнень. Неть колмо иетнень перть явовиця квартиратне ламолгавтовсть колмоксть. Тедеде Россиянь МВД-нь руководстванть решениянзо вельде меельце иетнес васенцеде панжозь эрямо кудо полициянь сотрудниктнень туртов. Поладови эрямс а маштовиця кудотнень таркас одтнэнь максомань коряс программань топавтомась», – тешкстась Артём Здунов.
Модань участкатне – ламо эйкакшонь семиятненень
«Ламо иень перть Саранскойсэ аволь целанек топавтови ламо эйкакшонь семиятненень модань участкатнень максомань государствань ушодксось. Истя, ошонь Администрациясо учётсо аштить ламо эйкакшонь триця 718 семият, конатнень ули мелест саемс участка эсь подсобной хозяйствань ветямонть туртов. Ламолгадсть льготникень те категориянть властень эрьва кодат органтнэс пеняцямотне. Мон кармавтынь Минземимуществантень явомс лезкс ошонтень, витемс те кевкстеманть», – тешкстызе Артём Здунов.
Китне
«Покш полавтомат территориянь виевгавтомантень теи М-12 «Москва – Казань» скоростной магистралень строямось, – тешкстась Мордовиянь Прявтось. – Саранскоев Московсто ней мереви пачкодемс котодо аламо часос. Истя жо эряви 4 полосатнень видьс келейгавтомс Р-158 «Нижний Новгород – Саратов» трассань пельксэнть. Энялдан Правительствантень Нижегородской областень исполнительной властень органтнэнь ды Федеральной дорожной агентстванть марто вейсэ ванномс Р-158 автомобилень кинь Арзамас – Саранск пелькссэнть строямонь-монтажонь тевтнень финансированиянь кевкстеманть. Теде башка, властень федеральной органтнэнь марто вейсэнь важодеманть лувсо муемс финансирования кинь витнеманть туртов, конась вейсэнди Саранскоенть ды Рузаевканть.
Тедеде витневить 295 вайгельбеть кить. Сы иестэ эряви прядомс Рузаевкань перька кинь строямонть ды топавтомс Строительной курованть тевтнень поладоманть туртов федеральной финансированиянть. Те прявт объект, конань вельде минь видьстэ сюлмасынек эсь ютковаст Саранскоень весе микрорайонтнэнь.
«Безопасные и качественные дороги» нацпроектэнть лувсо эряви шкастонзо витнемс региононь ды межмуниципальной китнень 280 вайгельбетнеде седе ламо, сынст ютксо 8 вайгельбетне – Саранск ошонь агломерациясо. Сыця шкантень эштё вейке прявт ёнксось – Темниковань районсо ды Нижегородской областень Вознесенской районсо «Старый Город – Вещерка» кинь строямось. Минь анокстынек проектэнь-сметань документациянть. Ней Правительствантень эряви топавтомс покш важодема те объектэнь строямонть туртов федеральной бюджетстэ ярмактнень явовтомань коряс».
ЖКХ-сь
Пшти вановт ало кадовить жилищно-коммунальной комплексэнь кевкстематне. «Сы иестэ ушодови Краснослободской, Чаунзань ды Ташто Шайговань районтнэсэ ведень пачтямонь, ванськавтомань сооружениятнень ды канализациянь сеттнень строямось, – мерсь Артём Здунов. – Саранск ошонь ведень пачтямонь системанть ды ошонь ульцятнень валдомтомань систематнень одкстомтомань коряс тевтнень лувсо минь домкасто ваннынек вешематнень ды весе ютавтовкстнэнь. Проекттнэ пек питнейть. Республикасонть газификациянь покш уровенесь. Догазификация топавтозь 4 тёжат кудотнес, косо газоснабжениясь ветязель ансяк эрямонь пункттнэнь видьс. Те невтевксэнть коряс Россиянь регионтнэнь рейтингсэнть минь омбоцеть».
Одкстомтомась-мазылгавтомась
Сы иестэ «Формирование комфортной городской среды» федеральной проектэнть лувсо эряви вадрялгавтомс общественной таркатнень Саранскойсэ, Инсарсо ды Темниковасо.
«Сы иестэ эряви кундамс Саранскойсэ Фонтанонь валгомань, истя жо Тёжа иень площаденть ды фонтанонть витнемань коряс покш проекттнэнь топавтомантень. Проектэнь-сметань документациясь анок, эряви ванномс финансированиянь кевкстематнень Минстроенть ды Сберэнть марто. Чувтонь-куракшонь озавтомань коряс тевтнеде ламо, теке марто республикасонть арасть декоративной ды плодово-ягодной касовкстнэнь озавтомань материалтнэнь производительть. Весе куракштне ды чувтотне усковить республиканть томбальде. Республикань Минлесхозонтень эряви кундамс Мордовиясо озавтомань истямо материалонь кастомань коряс проектэнь топавтомантень».
Мордовия Республикань Прявтонь пресс-службась