Понедельник, октября 18, 2021
Важное

Аволь умок Калуга ёнксонь Медынь ошсо ульнесь покш кенярксчи, конась сови аволь ансяк те тарканть, истя жо весе масторонть историяс. Те покш чись алтавсь минек республикань Покш Березникень райононь Симкина велень эрицянть Николай Николаевич Пятайкинэнь «Историческая энциклопедия Медынского района» книганзо лисемантень.
Сонзэ эйсэ невтеви масторонок весе историясь, ансяк сёрмадозь вейке башка таркань саезь.

Тешкстасынек, Н.Н. Пятайкин чачсь-кассь ламо эйкакшонь триця семиясо. Сон вишкинестэ саезь содасы кшисускомонть питнензэ. Эйкакшпорасто саезь тонадсь алкукс важодеме, ушодозь тевенть педе-пев топавтомо. Николай Николаевич тонавтнесь Мордовиянь Н.П. Огарёв лемсэ государственной университетэнь кавто факультеттнэсэ: филологиянь ды велень хозяйствань.

Истя лиссь эрямосонзо, вейсэ семиянзо марто 30 ламо иеде икеле тусь эрямо Калуга ёнксонь Медынской районов, важодсь «Никитский» совхозонь прявтокс, ульнесь предпринимателекс, «Медынь» компаниянь управляющеекс.

Н.Н. Пятайкин обуцянь коряс оймамонь а содыця, ламо тевс бажиця. Косо сон бу аволь уле, свал муи общественной тев. Николай Николаевич – Райононь Собраниянь ды Велень Думань «Село Никитское» велень поселениянь колмо созывень депутат. Ушодксонзо коряс пурназель ды важодсь историко-патриотической «Звезда» поисковой вейсэндявксось, конань прявтсо сон ульнесь малав кемень иеть.
Ине Отечественной войнасо маштовозтнень вешнемстэ, сынст малавиксэст марто вастовомсто-кортамсто те ломанесь таштась пек питней ды сюпав сёрмадовкст, конатнень мейле совавтынзе книгантень.
Течи Николай Николаевич Пятайкин – минек редакциянь инже, сон ёвтни ловныцятненень покштояк покш важодевкстэнзэ, конанень алтась кемень иеть. Те меленть топавтомга аволь ансяк ламо вийть, шка, истя жо ярмакткак ютавтозельть, штобу книгась лисевель документальной, мазый ды паро конёв лангсо.
А ёвтавияк, зяро вайгельбеть ютась Н.Н. Пятайкин Медынской районганть книгантень материалонть пурнамсто. Аволь весть сон ульнесь неень шкасто улиця весе велетнесэ. А конат кадовсть ансяк ломантнень ледстнемас ды картатнес, Николай Николаевич пурнась корязост архивень даннойть. Вейкеяк эрямо тарка мельтеме эзь кадо. Пек ламо шка ютавтсь тёжат фотографиятнестэ эрьва ломаненть содамга.
– Николай Николаевич, книганк лиссь малав тёжа лопасо. Инескеть, пачтядо, косто пурнавсь зняро сёрмадовксось?
– Те книганть питнейчись – документальностесь. Сонзэ сёрмадомсто кевкстема-энялдома марто савсь тень пшкадемс минек ды омбо масторонь сядодо ламо архивс. Тешкстаса, Калуга ёнксонь хранилищатнесэ важодинь-вешнинь 312 чить.
Книганть сёрмадомсто истя жо тевс нолдазельть Российской Государственной архивень кезэрень акттнэ (РГАДА-нь), Кремлянь Архангельской соборонь ды Троице-Сергиева Лаврань, Химки ошонь газетань ды журналонь архивтне. Ламо документт муезельть Медынской архивстэ ды Медынень, Кондровской, Кременской ды Калужской краеведческой музейтнестэ, Медынской райононь организациятнень ды предприятиятнень архивтнестэ.
Покш лезкс тень макссть «Заря» райононь газетань публикациятне, краеведениянь материалось, конань пурнызь Медынской райононь централизованной библиотечной системасо важодицятне.
– Николай Николаевич, инескеть, ёвтадо, минек республикань ломантнеде кияк совась тынк энциклопедиянтень?
– Мон мельспаросо пачтян, седейс токавинь, зярдо карминь содамо: Ине Отечественной войнанть шкасто Медынь ошонть ятонть эйстэ олякстомтомсто алкуксонь героекс маштовсь эрзянь цёрась Павел Петрович Батаев, кона чачсь 1915 иестэ Самарань губерниянь Бугурусланонь райононь Новые Сосны велесэ. 1934 иестэ сон сась эрямо Мордовияв. Войнадо икеле ульнесь Мордовиянь книгань издательствань художественной литературань редакторокс ды «Ленинэнь киява» комсомолонь-од ломанень газетань отделэнь прявтокс.
1941 иестэ саезь Батаев ульнесь фронтсо военной корреспондентэкс. Служась 53-це стрелковой дивизиясо рядовоекс. 1942 иень январьстэ маштовсь ды калмазь Медынь ошсо, косо стявтозь тензэ кеврунго.
– Кодамо стакачи марто вастневиде истямо покш книганть анокстамсто, ламо-аволь ульнесть лездыцянк?
– Алкукскак, важодемась пек покшоль, ансяк монень прась уцяска вастомс истят ломанть, кить седейшкава лездасть. Васенце лездыцякс ульнесть Д.С. Шуклина ды Медынской райононь архивариусось Л.А. Иванова. Чарькодема ды эрьва ёндонь лезкс ульнесь Медынской райононь прявттнэнь ды велень поселениянь администрациянь прявттнэнь ды специалисттнэнь, Анна Петровна ним ды Яна ды Олег эйкакшон ёндо.
Виде, книганть лангсо важодемстэ ульнесть стакачить, конатнень коряс савсь ютавтомс домка ванкшномат. Невтемакс, Горка веленть эйстэ а васоло апак учо лисинь кадозь калмазырьс. Крёсттнэнь лангсо ульнесть ламо сявордозь сыре чувтот ды ламо иень перть пурнавозь лопат. Сынст ютксто сельмезэнь каявсь Россиянь содавикс сёрмадеентень Т.И. Соколованень-Есакованень кеврунгось. Сась тень мель содамс аволь ансяк сонзэ биографиянзо, истя жо ловномс произведениянзо.
Ушодынь Интернетстэ, тосо эйстэдензэ мезеяк эзинь муе. Теде мейле пшкадинь Белинский лемсэ библиотекав, косо электронной картотекань отделстэ тень пачтясть: сонзэ вейке книгатнестэ карточкась ули Московонь государственной библиотекасо. Тов самсто, карточкань муемстэ карминь содамо, сёрмадеенть кавто книганзо ванстовить Санкт-Петербургонь национальной библиотекасо. Шкань апак таргсе сыргинь масторонь мазый ошонтень. Пек кеминь книгастонзо муемс фотографиянзо ды эрямостонзо пачтямот. Тосто, стихотворениядонзо ды поэмадонзо башка, мезеяк эзинь муе. Теде мейле Калугань исторической архивстэ кепединек Кузьмодемьянской церьковань Клировой ведомосттнень, косто карминек содамо эрямо таркадонзо, мирдензэ ды тейтерензэ лемтнень. Вана истя пельксэнь-пелькс пурныя сёрмадеенть биографиянзо ды сонзэ малавикстэнзэ кулятнень.
Омбоце невтевкс. Генералтнэде материалтнэнь пурнамсто карминь содамо, Глухова велесэ чачсь-кассь Павел Денисович Матвеев, кона 1937 иестэ комбригень званиясо маштозель. Эрьва кодамо сёрмадовкссто анокстыя сонзэ биографиянть. Ансяк фотографиянть муемс пек стакаль. Мик 16-ксть пшкалинь эрьва кодамо государственной структурас. Окойники, монь тердимизь, ды мерсть: «Вана, Николай Николаевич, Матвеевень личной тевезэ, тосо фотография арась. Энялдтано Тенк, те кевкстеманть коряс яволявтомат икелепелев илядо кучне».
Аволь кувать арсемадо мейле «Одноклассники» социальной сетьстэ муия Матвеевтнень группанть, ков совасть 400 ломанть. Пшкадинь тенст, ёвтыя энялдомам, ды кавто недлянь ютазь сась фотография Болгариясто. Сонзэ паролгавтомга лезкс мельга пшкадинь художникентень-портретистэнтень Р.Д. Арефьеванень, кие энялдомам кунсоломадо мейле рисовизе Матвеевень портретэнзэ, кона лиссь те книгасонть.
Сехте стака ды кувака тевекс ульнесь фотоматериалтнэнь пурнамось. Медынской райононь весе 130 велетнень савсь содавтомс ниледе а седе аламоксть, штобу муемс ды содамс, кить неть фотографиятнесэ. Невтемакс, А.А. Пучков кандсь 1953 иень фотография, косо невтезельть 58 ломанть. Кавто недлянь перть ардтнинь Романова велев, штобу содамс, кить те фотографиясонть, ансяк вете ломантнень лемест муевсть. Тесэ мон апаркстоминь. Лездась тосонь вейке эриця: «Учодо кизэнть. Сы минек велев А.И. Пучкова ды весень ёвтнесынзе». Истя лисськак. Анастасия Ивановна аволь ансяк весень содынзе, истя жо биографиясткак ёвтнинзе.

А вана Клины велестэ Зоя Павловна Руднева 1948-49 иетнень колмо фотографиятнестэ содась сядо ломанть. Ды истят лездыцятнеде пек ламольть. Сыненст ёвтан покштояк покш сюкпря.
Редакциянть пельде Н.Н. Пятайкиннэнь ёвтатано поздоровт истямо покш важодевксэнзэ тееманть кувалма. Арсетяно кеме шумбрачи ды седе товгак поладомс те ине тевенть.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».