Суббота, сентября 18, 2021
Важное

Таштамковонь 23-це чистэ А.С. Пушкин лемсэ Национальной библиотекасо ютавтозель видеоконференция, кона алтазель содавикс литературоведэнть, филологиянь наукань докторонть, профессоронть, МР-нь культурань заслуженной роботникенть В.И. Дёминэнь чачома чистэ 65 иетнень топодемантень.

Ледстнемань чокшнесь анокстазель Н.П. Огарёв лемсэ МГУ-нь филологиянь факультетэнть ды М.Е. Евсевьев лемсэ МГПУ-нть марто вейсэ. Эйсэнзэ видеоформатсо кортасть учёнойть, вузсо тонавтыцят, журналистт, кинь марто В.И. Дёмин важодсь «Эрзянь правдасо», «Сяткосо», оянзо-ялганзо. Васенце валось максозель МР-нь Писателень вейсэндявксонь прявтонтень, МР-нь заслуженной поэтэнтень, «Чилисема» журналонь прявт редакторонтень Н.И. Ишуткиннэнь. Николай Иванович тешкстызе, кодамо путовкс В.И. Дёмин тейсь, кода литературовед ды сёрмадыця.

А.С. Пушкин лемсэ библиотекань национальной ды краеведческой литературань отделсэ пурназь учёноенть научной весе важодевксэнзэ. Неть книгатнеде, монографиятнеде ёвтнесь ды «Зяро кадсь сон апак прядо тевть…» видеопрезентация невтсь отделэнь главной библиотекаресь В.Б. Бояркина.

В.И. Дёминэнь, ловт, пель эрямозо ютась Н.П. Огарёв лемсэ МГУ-нь филологиянь факультетсэ. Ульнесь рузонь ды омбо масторонь литературань кафедрань прявтокс, региональной журналистикань теориянь ды практикань кафедрань профессорокс. Кода ветясь В.И. Дёмин эсь тевензэ вузонь тонавтыцякс улемстэ, ёвтнесь филологиянь наукань докторось, Н.П. Огарёв лемсэ филологиянь факультетэнь профессорось Ю.Г. Антонов.

В.И. Дёмин анокстась наукань сисем кандидатт ды колмо докторт. Вейкесь эйстэст – филологиянь наукань докторось, Удмуртской государственной университетэнь удмуртонь литературань ды Россиянь раськень литературань кафедрань прявтось Т.И. Зайцева. Татьяна Ивановна ёвтась седейстэ молиця лембе валт В.И. Дёминэнь лемс, кинь кедьсэ тонавтнесь ды кинь прявтонзо ало идизе докторонь диссертациянзо. Седейшкавань сюкпря учёноенть туртов ёвтась И.Н. Ульянов лемсэ Чувашской государственной университетэнь чуважонь филологиянь ды культурань кафедрань профессорось А.Ф. Мышкина.

Седе тов кортасть М.Е. Евсевьев лемсэ МГПУ-со тонавтыцятне ды тонавтницятне. Сынст ютксо – филологиянь наукань докторось, те вузонь тиринь келень ды литературань кафедрань прявтось О.И. Налдеева.

Науканть марто сюлмавомадо икеле В.И. Дёмин ламо иеть важодсь «Эрзянь правда» газетасо. Кодамо сон ульнесь кода журналист, ёвтнесть МР-нь культурань заслуженной роботникесь Р.Б. Щанкина, МР-нь заслуженной поэтэсь, «Народное образование» журналонь прявт редакторось Г.С. Гребенцов, «Сятко» журналонь прявт редакторонь полавтыцясь Л.А. Ломшина.

В.И. Дёминэнь валдо лемензэ а стувтнить Покш Березникень эрицятнеяк. Эрзянь велесэ чачозь (те Шугурова велесь), учёноенть туртов «Парынза» ансамблянть вайгельтнесэ гайгиця эрзянь моротне улевельть сехте покш ды питней казнекс.

Видеоконференциянть кунсолость ды вансть библиотекасо важодицятне Мордовиянь буетнесэ ды лия регионтнэсэ.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».