Февралень 21-це чистэ модамасторсо тешкставсь Тиринь келень раськеютконь чись. Те кенярксчись од, сон яволявтозель 2000-це иетнестэ. Минек республикась ламо раськень, секскак Тиринь келень чись келейстэ тешкстави эйдень кужотнесэ, школатнесэ, культурань учреждениятнесэ.
Истя, А.С. Пушкин лемсэ Раськень библиотекасо ютась «Мордовия многонациональная: мелодия родного слова» эрьва иень фестивалесь. Сонзэ ютавтыцякс кармась Равчирень финнэнь-угрань раськетнень культурань центрась.
Лембе вал марто пурнавозтненень пшкадсь МР-нь Культурань, национальной политикань ды архивень тевень министерствань раськеютконь кевкстематнень ды аволь коммерческой вейсэндявкстнэнь важодемаст коряс отделэнь прявтось Даниил Стенькин:
– Покштояк покш Россиясо эрить 193 раськеть, конат кортыть 270-де ламо кельсэ. Косояк лия таркасо истямо сюпавчи арась. Ды минек прявт тевенек – ванстомс кельтнень, раськетнень, ойменек. Аволь стяко 2026 иесь яволявтозель Россиянь раськетнень вейсэндявомань иекс. Кельтнень ванстомаст коряс ламо мезе теезь ды важодемась поладови. Истя, мелят эрзянь ды мокшонь кельтне кармасть улеме «Яндекс Переводчиксэ». Ней моли важодема кельтнень совавтомга Гигачатс. Тевс нолдавить келень мобильной приложеният. Тешкстаса, июльстэ республикасонок карми Тиринь келень раськеютконь фестиваль.
Истя жо вал сайнесь Эрзянь ды мокшонь раськень регионъютконь общественной вейсэндявксонь прявтось Юрий Мишанин. Сон пачтясь, мартонь 1-це чистэ эрямос совавтови законось, конань коряс ошонь куринкатнева сермадовкстнэ (лавкань ды эрьва кодамо учреждениянь лемтне) улевельть рузонь кельсэ, аволь омбо масторонь.
– Минек республикань моданть лангсо ламо пингень перть ояксчисэ эрить ламо эрьва кодат раськеть. Умок сась мель панжомс мезеяк истямо, кона бу вейсэндявлинзе раськетнень. Ды вана, февралень 27-це чистэ панжови «Дом народов Республики Мордовия» региононь общественной вейсэндявксось. Арсинек важодемань план. Минек республикасо 40 аволь коммерческой общественной вейсэндявкст. Зярдо од шкастон тонавтнинь Ленинградонь А.А. Жданов лемсэ госуниверситетэнь журфаксо, мартонок тонавтнесть студентт эрьва кодамо масторсто. Минь паро мельсэ кевкстнинек вейкень-вейкень раськень обуцядонть, менталитеттэ. Ютасть ламо иеть, минь жо те шкас кирдтяно сюлмавкст, кортнетяно. Арсян, те опытэсь лезды важодемасон, – кортась Татьяна Ларина.
Седе тов ютавтовсь концертэсь. Кодат ансяк кельть эзть гайге! Эрзякс ды мокшокс морасть Саранск ошонь Культурань кудонь морсицятне Дмитрий Фадейкин, Ирина Новикова; «Юрхтава» фольклорной ансамблясь. Татаронь номерт анокстасть Ляйсан Гусева ды Евгений Гродников («СарГрад» центрань). Армянонь кельсэ морась Л.П. Кирюков лемсэ музыкальной училищань студенткась Наре Мурадян. Лембестэ вастозель Н.П. Огарев лемсэ МГУ-нь Геоинформационной технологиянь ды географиянь институтонь студентэсь Максат Шукуриллаев, сон морызе туркменэнь кельсэ «Лейла» моронть. Амина Гаибова ловнось таджикень кельсэ стих. Истя жо инжетне парсте вастызь Н.П. Огарев лемсэ МГУ-нь «Ладница» ансамблянть.
Татьяна Маторкина