Аволь умок истямо лем ало Саранскоень П.С. Кириллов лемсэ библиотекасонть ютавтовсь кенярксчинь мероприятия, конась алтавсь Тиринь масторонь ванстыцятненень ды од ломантнень патриотизмань лувсо кастомантень.
Те чинтень библиотекань вейке залсонть анокстазель выставка, косо невтевсть мельстуиця книгат, газетат ды журналт. Невтемась евтнесь минек цератнень ине тевдест. Вастовомасонть ульнесть Саранскоень электромеханической колледжень студенттнэ, «Память» поисковой отрядонтень совицятне, ошонь 28 № СОШ-нь тонавтницятне. Сынст марто вастовомо сакшность ветерант, кить ламо содыть икелень ды неень шкань аволь шожда иетнеде.
Васенцекс вал сайсь «Российский Союз ветеранов» Весероссиянь общественной организациянь Мордовиянь региональной отделениянь ветеранонь комитетэнь прявтонь полавтыцясь Михаил Китаев.
Михаил Сергеевич пурнавозтненень пачтясь, кодашка смусть канды Тиринь масторонь ванстыцянь кенярксчись. Сон ледстинзе сеть мероприятиятнень, конат ульнесть ютавтозь минек республикасо 2025 иестэ, зярдо яволявтозель Отечествань ванстыцянь иесь.
Сон евтась покш сюкпря Саранск ошонь округонь Октябрьской райононь Ветеранонь советэнь прявтонтень Наталья Макарованень, кие эсь организациянтень совицятнень марто покш лезкс максы СВО-нь участниктненень.
Седе тов историянь ламо тевтнеде ледстнесть ды эсь эрямодост пачтясть «Трудовая доблесть России» организациянь прявтось, войнань шкань эйкакшось, ветеранось Иван Иванович Дзюбак, МР-ва МВД-нь Ветеранонь советэнь прявтось, отставкасо милициянь полковникесь Валентин Макарович Байгушев, СВО-нь участникесь Валентин Николаевич Адрахманов.
Саранск ошонь округонь Октябрьской райононь Ветеранонь советэнь прявтось Наталья Макарова евтнесь, кода сынст организациянтень совицятне пек ламо теить специальной военной операциянь участниктненень лезксэнь максоманть коряс. Сеть бабинетне, кинень кавксоньгеменде ламо иеть, эсь кудосост стыть оршамопельть минек боецтнэнень. Малав эрьва ковсто сынь лездыть ильтямс гуманитарной лезкс.
Нать, а стяко те вастовомасонть башка мель явовсь Ветеранонь советс совицянтень Василий Федорович Захаркиннэнь. Сон аволь ансяк эсензэ ярмак лангс свал рамси коцт, эште сеедьстэ вастневи микшницятнень марто ды терди эйсэст лездамо специальной военной операциянь участниктненень. Эдь сынст оршамопельтне пек эрявикст кода фронтсо, истя жо госпитальсэ шумбрачинь витицятненень.
Саранск ошонь «Свято-Предтеченское» казаконь обществань представителесь А.П. Батяев явшесь казнеть – «За оказание помощи участникам СВО» медальть – сеть ломантненень, кить минек боецтнэнь ладсо малавгавтыть Изнямонть. Казезтнень ютксо – В.Ф. Захаркин, Н.В. ды А.И. Макароватне, Н.А. Тюлякова.
Те чистэнть музыкальной казне марто библиотекав сакшность 97 № эйдень кужонь эйкакштне. Сынь киштсть-морасть ды евтнесть стихотвореният. Теде мейле весе пурнавозтне вейсэ морызь «Катюша» патриотической моронть.
* * *
Теке жо чистэнть Саранск ошонь Октябрьской райононь Ветеранонь советс совицятне, вейсэ прявтост Наталья Макарова марто, макссть гуманитарной лезкс минек боецтнэнень. Специальной военной операциянь участниктненень рамазельть оршамопельть. Маласо шкасто сынст ильтясызь фронтов.
Валентина Юдина.