Четверг, июня 17, 2021
Важное

Покш Березникень райононь Симкина велень Од ульцясо эсензэ кудосо эри трудонь ветеранось, ламо эйкакшонь триця авась-героинясь Галина Ивановна Новикова (Мамаева). Сонзэ ундоксонзо ды чачома тарказо – Покш Игнатбуень Вармазейка велесь. Тетязо-авазо, Марфа ды Иван Мамаевтне, ульнесть трудонь вечкицят, эрьва тевс чарькодицят. Виде, стакасто эрясть, ламо вачочи цидярдсть, эдь семияст пек покшоль, весе эрясть вейке кудосо.



Кудазорось, Иван Михайлович, ульнесь кедьчелькев ломань, аволь ансяк эсензэ кудосо эрьва мезень тееме маштыль, истя жо лиятнененьгак, эсест велень эрицятненень, кие тензэ пшкадиль, свал лездыль. Ульнесь сонзэ нешкепирезэ, медесь сатныль кода эсензэ семиянтень, истя жо покш раськентеньгак.

Галина Ивановнань эйкакшпингень ледстнематнес те шкас кадовсть истят мельспаронь кенярксчитне, зярдо кудост пешкедиль малавикстнэде, вейсэ ютавтовсть гармония марто свадьбатне. Ине Отечественной войнадо мейлень покш стакачитнень лангс апак вано, сынст велень эрицятне маштсть аволь ансяк валскень зорясто позда чокшнес важодеме, вейсэ паро тевтнес кенярдомо, вейке-вейкенень мелень явомо.

Виде, нужачись эзь казе тензэ уцяскав эйкакшпинге, куш тейтерьканть покш мелезэль тонавтнемс. Сень неезь, кодамо стака малавиксэнзэ туртов, Галина Ивановна сайсь мель туемс Саранскоев, аволь ансяк эсензэ прянть трямс, эштё лездамс тетянзо-аванзо туртов лия эйкакштнень трямс-кастомс, пильге лангс стявтомс.

Ведьгеменце-кодгеменце иетнестэ Саранскоесь теевсь покш стройкакс. Самай сестэ теезельть республикань промышленной ды перерабатывающей предприятиятне. Эрязасто мольсь эрямо кудонь ды эрьва кодамо социальной объекттнэнь стявтомась. Мордовиянтень эрявсть ламо строительной материалт. Эдь сестэ эзть бажа сонзэ ускомс ве ёндо, седе ламонть тейсть теске, эсенек республикасо.
Вана истя Галина Ивановна сась сехте стака роботас, ушодсь важодеме кирьпецень теемань заводсо.

Велень тейтерькась вишка пингстэ тонадсь рана стямо, эрьва тевенть алкукс тееме ды мезе лангскак а пеняцямо. Кие соды, кода бу туевель сонзэ эрямось, бути весть важодема таркасо сонзэ лангс чевтестэ ды вечкезь аволь варшта од цёрась Пётр Новиков. Сон сась кирьпець мельга Покш Березникень Симкина велестэ. Од цёрась эзь карма туеме ве ёнов кувака целковоень вешнеме, сон кадовсь важодеме тиринь районс, роботась эсест ёнкссо стройкасо водителекс. Самай се шкастонть Покш Березникень райононь велетнесэ теевсть школат, клубт, медпунктт, лавкат…
Одтнэ сайсть мель венчамс-урьвакстомс ды эрямо таркакс кочкизь Симкина эрзянь веленть.

Галина Ивановнанень сеске тусть мельс тосонь эрицятне. Васняяк сельмс каявсь, кодат сынь трудонь вечкицят: эрьва семиянть кардазсо ульнесть ламо ракшат. Эрямо кудотне малав весе парт, эрьва кудазорось бажась сонзэ мазылгавтомс кода потсто, истя ушостояк. Те велесэнть ульнесть ламо кедьчелькев ломанть, кить сынсь эстест путсть паро ды мазый кудот.

Сехте пек эрзянь од авиненть кенярдовтсь се, мирдензэ семиясо вастызь кода эсест тейтерест. Атявтозо-ававтозо, Василий Фролович ды Анастасия Петровна, чарькодсть, урьваст Галинань, сындест башка, седе малавикс ломанензэ те велесэнть арасть. Вастызь васня стамбарнэ, вансть-тонавтнесть обуцянзо. Ансяк васень шкасто уш редизь, тейтерь-авась эрьва мезес чарькодиця, кодамояк роботадо а пелиця, обуцязо чевте ды шожда. Сон прок сынст семиясо чачсь-кассь, эрьва тевенть бажась теемс алкукс ды бойкасто.

Зинаида Васильевна парыянзо марто мусть кель-вал. Паряк, вейсэ кувать ояксчисэ эрявольть, ансяк сон теке жо иестэнть лиссь мирденень ды тусь тетянь-авань кудосто.
Васень шкастонть Галина Ивановна ушодсь важодеме Симкинань лесничествасо. Тагояк стака тев эстензэ кочкась. Тосо виресь маласо, сон аволь касовкстнэнь мельга кармась якамо, пилорамщикень а шожда тевс кундась. Юткошкасто кизэнь перть атявтонзо марто тикше анокстась, тельня яксесь пенге мельга вирев. Весе таркатнень бажась седе парсте содамс, косо ягодат ды пангот касыть, штобу мейле тов ськамонзо молемс ды вирьс а кадовомс.

Пилорамасо а кувать важодсь, эдь тосо чинь-чоп улема, секс шкань ютазь сайсь мель молемс роботамо фермав дояркакс.
Симкина велень «Путь к коммунизму» лемсэ колхозось куш ульнесь икеле молицятнень ютксо, ялатеке тундонь-сёксень шкастонть ферматнесэ ламо рудаз савсь ичемс, скалонь одартнэньгак колмоксть-нилексть шлильть ялганзо марто. Эдь шкань ютазь паро китне ацавсть, потявтомань од оборудованиясь ладявсь.

Галина Ивановна ялатеке свал ульнесь икеле молицятнень ютксо, сонзэ невтевкстнэ кенярдовтсть кода эсест велень колхозонь правлениянть, истя райононь прявттнэньгак. Нать, а стяко аволь весть тешкстазель Почетонь грамотасо, шнамонь валсо.

Валдо ледстнемакс тензэ кадовсь кизэнь шкане Сура лей чиресэ важодемась, тов яла панилизь скалтнэнь, потявтыцятнень пачтилизь чизэнзэ кавксть машинасо, таркась аволь маласоль. Юткошкане кенерильть эрьва кодамо ягодань кочкамо, эйкакшост туртов кандыльть кстыйть, пичеумарть, инзейть…

Галина Ивановнань мирдезэ, Пётр Васильевич, истя жо пингень перть важодсь «Путь к коммунизму» колхозсо. Мирдть-нить трясть-кастсть вете эйкакшт, эрьвантень макссть содамочить, стявтызь кеместэ пильге лангс. Тонавтызь сехте эрявикс тевентень – а пелемс стакачиде, эсест трудсо добовазь ярмактнень лангс эрямо, лиятнень эрямозост сельмень а сявадомо. Нать, а стяко сонзэ казизь «Медаль материнства» казнесэ.
Васенце эйкакшост, Александр Новиков, эри Саранскойсэ, кавто эйкакшонзо, сон кавто нуцькань покштя. Нинзэ марто вейсэ весе оймсема шкаст ютавтыть тиринь велесэ. Вельмевтизь покштяст-бабаст юртонть, одкстомтызь кудонть, озавтсть покш садпире, конась кизэнь шкасто кенярдовты икельгаст ютыцятнень мазый цецясо.

Николай (омбоце цёраст) – военной, саизь армияв Чита ошов ды тоско кадовсь служамо. Виде, сон свал бажась, куш кавто иес весть, самс тиринь велев малавиксэнзэ содавтомо. Кода тетясь-авась сыредсть, эрьва иестэ кармась сакшномо, ков виензэ сатотсть, тенст лездамо.
Колмоце эйкакшост, Валентина, эри Саранскойсэ, сон сехте сеедьстэ содавтни аванзо. Се шкастонть саезь, кода тетяст, Пётр Васильевич, кулось, сон весе оймсема читнень ютавтсь аванзо вакссо. Валентина Петровна пингензэ алтызе микшнемань тевентень. Вейсэ мирдензэ Евгений Петрович марто трясть-кастсть кавто эйкакшт, покш кенярксчист – нуцькаст.

Новиковтнень эштё кавто эйкакштне, Елена ды Пётр, эрить Самара ёнксонь Тольятти ошсо. Кавонест трясть-кастсть колмонь-колмонь эйкакшт. Истя жо пек тошнакалить вечкевикс аваст, Симкина тиринь велест кис. Эрьва юткошкане бажить самс Мордовияв, содавтомс малавикс ломанест.

Валентина Юдина

Вечкевикс авай!

Течи минь ёвтатано тонеть поздоровт юбилееть кувалма! Покштояк покш сюкпря эрямонь каземань, трямонь-кастомань, кисэнек седейшкавань мелявтомань, вишкинестэ веньперть а удомань, тантейстэ андомань ды весе вечкемат миненек максомань кисэ.

Вишка пингстэ саезь, минь неинек, кода тонеть стака аволь уле, зярдояк эзить пеняця, киньгак мель эзить кола. Минек каштомосо свал ульнесь пси ям, каванить эйсэнек тантей прякадо ды ламо лия мелень витемапельде. Ды вана нейгак минек вастат эсеть кедьсэ пидезь-панезь ярсамопельсэ, кудот-чить свал кирдят ваньксчисэ, ойметь валдочисэ.

Минь арсетяно теть кеме шумбрачи кувака пингес, уцяска. Кадык свал чамасот карми мизолкс ды мезеяк а коласы ёжомарямот!

Вечкезь, тонь эйкакшот: Александр, Николай, Валентина, Елена, Пётр Новиковтне ды нуцькатне.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».