Эрзянь ды мокшонь раськень киштематне – те алкуксонь искусства. Минек культурасо те ёнксось невтеви пек домкасто ды мазыйстэ. А стяко кельсодыйтне кортыть: «Эрзянь-мокшонь киштематне – те раськень оймеёжо».
Васняяк ловныцятненень ёвтасынек, эрзянь ды мокшонь киштемась – те авань киштема. Кезэрень шкатнестэ цёратне лиснильть киштеме ансяк сестэ, зярдо аватне тердилизь. Нама, неень шкань киштематнень ладост аламодо полавтовсь, кода мерить од ломантне, сон кармась стилизованноекс. Ней киштематнесэ эсь ёрокчист невтить кода аватне, истя цёратнеяк. Те тевесь а берянь. Ансяк Мария Анатольевнань ризнэвти лия тувталось – хореографиясо пек а сатныть цёраломанть. Лиясто аватненень эстест савкшны киштемс цёрань партиятнень.
– Эрзянь, мокшонь, шокшонь киштематне кеместэ сюлмавозь раськень оршамопельтнень марто. Кода чарькодемс тень ловныцятненень? Ёвтнетяно седе тов. Эрзянь аватне киштема шкасто башка мель явить пильгепукшотненень. Те тееви секс, што эрзявась киштемстэ бажи невтемс оршамопеленть сехте мазый пельксэнзэ – пулаензэ. Мокшаватне киштемстэ седе пек лыкавтыть мештесэст – теньсэ невтить мештень мазылгавтоматнень сюпавчинть. Шокшаватне жо седе пек лыкавтыть верев кепедезь кедест, бажить невтемс кедьс тонгозь Теньгушевань мазый варьгатнень. Эряви ёвтамс, раськень киштематне – те аволь ансяк киштема, те цела история, раськень эрямо ды культура, – корты Мария Костерина.
Мария Анатольевнань семиясо киштицят арасельть. Тетязо, Анатолий Иванович, важодсь Саранскоень «Лисма» заводсо электромонтерокс. Теде башка, минек республикасо сон содавикс футболист. Одсто налксесь Мордовиянь сборнойсэ. Ульнесь вадря нападающеекс.
Налксемань историязо сюпав, весемезэ сон налксесь футбольной 120 матчт, конатнесэ чавсь 17 голт. Неень шкане сонензэ алтавить футбольной турнирт. Мария Анатольевнань авазо, Валентина Ивановна, эрямонзо алтызе медицинасо важодемантень. Сон ламо иеть роботась невропатологокс Саранскоень 1 № больницясо. Тетязо-авазо васенце классто саезь вейсэть. Вечкемань толонть ванстыть эрямост перть. Трясть-кастсть кавто тейтерть, конатненень максызь весе седейлембест. Сы иестэ Костеринтнэнь семиясь карми тешкстамо юбилей, мирдть-нить вана уш 55 иеть эрить вейсэ.
Эйкакшпорасто Мария арсесь улемс тонавтыцякс. Ансяк вейксэце классо тонавтнемстэ бажамонзо полавтовсть. Се шкастонть ошсонть мельга-мельцек кармасть панжовомо эйкакшонь шкинемань центрат. Истя Мария ялганзо марто ушодсть якамо киштемань ды гитарасо налксемань секциятнес. Тейтерькантень пек вечкевсь киштемс. Ды школань прядомадо мейле сон кочкизе Н. П. Огарёв лемсэ МГУ-нь Раськень культурань институтонть (се шкане Раськень культурань факультет). Чарькодевсь, тейтерентень савсь пек ламо тонавтнемс художественной хореографиянть. Ламо шка явсь киштемань те эли тона элементэнть тонавтнемантень, сеедьстэ те тевенть топавтсь кудосо ды веть. Лиясь бу, паряк, умок кадовлизе те тевенть, ансяк аволь Мария. Эдь сон чарькодсь, хореографиясо эряви виев обуця ды ёрокчи. Обуцязо ладясь, ёрокчинь таштамодо тейтересь эзь мелявто.
– Раськень киштеманть келензэ чарькодемс вадрясто лездась Александр Гаврилович Бурнаев тонавтыцянок. Сон эрьва ие ардтнесь студенттнэнь марто этноэкспедицияв. Студентэкс монень ламоксть савсь улемс Покш Березникень, Покш Игнатовань, Орданьбуень ды республикань ламо лия районтнэсэ. Истямо ладсо пурнынек ды тонавтнинек фольклоронть. Теде башка, сырькайтне ёвтнесть ды невтнесть тенек кезэрень шкань киштемань ламо элементт ды раськень оршамопельть. Ушодыця хореографонть туртов истят сыре ломантнень превс путоматне кандыть покш лезэ, – тешксты Мария Анатольевна.
Студентэнь иетне ютасть. Мария Костерина кандынзе конёвонзо аспирантурав. Секе жо иестэнть тейтерьавась ушодсь важодеме студентт марто. Седе тов, 2010 иестэ, Мария пурнась «SkyDance» раськень киштемань ансамбля, конань участникекс кармасть Н.П. Огарёв лемсэ МГУ-нь Раськень культурань институтонь выпускниктне ды студенттнэ. Те ансамблясь важоди хореографиянь эрьва кодамо жанрасо. Весе неть иетнень перть репертуарозо сюпалгадсь. Сонзэ юрсо эрзянь-мокшонь ды рузонь киштемат, классической ды неень шкань хореографиянь путовкст (постановкат), истя жо улить вокально-хореографической ламо композицият, конатне теезь вейсэ Саранскоень Культурань кудонь солисттнэнь ды коллективтнень марто. Ансамблясь свалшкань инже республикань кенярксчитнесэ. Теде башка, ансамблясь аволь весть невтнесь эсь ёрокчинзэ лия регионтнэсэяк. Ютазь иетнестэ сынь ульнесть натой Сербиясо.
– Ансамблясь – теке монь эйкакшом. Эйзэнзэ путозь седейлембе ды ламо вийть. Мон неян, кода сонзэ шкинемазо чиде-чис касы. Эйсэнзэ важодить ёроков ды тевде а пелиця од ломанть. Сынст марто роботазь, монськак марян прям од тейтерькакс. Монь койсэ, киштемась аволь ансяк вадрялгавты ёжо, сон кувалгавты эрямо, – мизолдозь корты хореографось.
Од мельть-арсемат Мария Анатольевна пурны лия региононь коллегатнень ды артисттнэнь важодемаст лангс ванозь. Истя, авантень вечкевить Омской народной хоронь, Красноярской академической ансамблянь, Игорь Моисеев лемсэ раськень киштемань ды «Берёзка» ансамблятнень постановкатне. Нама, кой-мезенть саи Интернетстэ. Неезенть а стувтомга музыкальной драматургиянь коряс од мельтнень-арсематнень авась сёрмады конёв лангс, хореографиянь элементтнэнь жо снимси телефонс. Седе тов невтни студенттнэнень.
Важодемадо башка Мария Анатольевнань эрямосо прявт сюпавчизэ ды уцясказо – те малавиксэнзэ. Мирдензэ марто трить-кастыть кавто эйкакшт. Тешкстама, Мариянь мирдезэ истя жо тонавтнесь хореографокс, зярыя иеть важодсь университетсэ. Неень шкане сон важоди лия ёнкссо. Самай те ломанесь васенцекс неи Мариянь од постановканзо ды лезды авантень превс путомасо. Нинтень сон эрси кода ваныцякс, истя критикекс ды вадря тонавтыцякс.
Эряви меремс, Вика тейтересткак уш нейке невтни ёрокчинзэ киштемасо. Сон тонавтни Саранскоень хореографиянь школасо. Кода корты авазо, те тевсэнть Викань улить маштомачинзэ. Арсетяно, сыця шкасто семиясонть карми хореографонь цела династия.
Алена Артемьева