«Шумбрат, Мордовия!» раськень творчествань республикань фестивальсэ эрьва ие важодить декоративно-прикладной творчествань выставкатне. Тесэ кедьчелькев ломантне невтить эсь теевксэст. Кой-кить ансяк юткошкасто явить мель творчествантень, лиятнень жо весе эрямост алтазь тенень. Истят выставкатнесэ мельспаро неемс сетнень, кинь умок содасак. Сынь анокстыть шкадо икеле, ускить мезе-бути од. Седеяк мельспаро теевемс содавиксэкс од автортнэнь марто. Бути ломаньсэнть ули Пазонь сяткине, ули талант, те а кекшеви. Таркасот а аштеват, эряви теемс мазычи, конась дивавты ды кецявты ломантнень.
Вана минек героиняськак – Анна Нестерова – аволь умок кармась невтнеме теевксэнзэ эрьва кодамо фестивальсэ ды пелькстамосо. Тейтерьавась краскасо арты тарелкат ды кузонь шарт, мазылгавты сынст эрзянь ды мокшонь авань образтнэсэ.
Анна чачсь Темников ошсо. Те районось содавикс кружовань кодамонь ды матрёшкань теемань коряс. Тонавтнесь художественной школасо. Тосо тонавтыцякс важодсь патязо, кона кемень иеде седе покш, сон тонавтсь сазорканзояк. Артомантень ёрокчись, паряк, ютась тензэ тетянзо пельде. Сонгак вечксь артомо, тейнесь фотографият, машты чувтова керсеме. Самай сон кирвазтсь кавто тейтерензэ эйс вечкемань сяткине тиринь ёнксонтень, пертьпельксэнтень, калонь кундамонтень, толбандя вакссо аштемантень. Эйкакш пингестэ Аня вечксь артомо, теке марто лиясто бажиль менстямс художественной школасо занятиятнень.
Школань прядомадо мейле Анна кармась тонавтнеме Н.П. Огарёв лемсэ МГУ-нь Раськень культурань институтонь «дизайн среды» отделениясо. Важодемань кизэ ушодовсь «Ростр» организациясо, косо тейнесть ламо эрьва кодат сувенирт. Сыненст пшкалесть покш компаниятне, эрявсть тенст казнекс дипломт, грамотат, паннот ды лия продукция, конась эряви офистнэсэ. Сон жо весе седейсэ бажась теемс мезеяк лия, мезесь кецявты ломантнень.
Шкань ютазь лиссь мирденень ды кармась эрямо Орданьбуе ошсо, республикань лия ёнкссонть.
– Темниковась ды Орданьбуесь мейсэ-бути молить вейкест-вейкест ёнов. Территориянь коряс сынь аволь покшт, вакскаст чуди лей. Нама, васень шкастонть пек тошнакалинь эсень ошонть кисэ. Нейгак бажан седе сеедьстэ тов пачколемс. Тиринь кудосо свал эйсэнь учить. Васня Орданьбуесь марявсь ломань масторокс, ней тонадовсь, теевинь содавиксэкс ламо ломань марто, – ёвтни Анна.
Васенце тейтернензэ чачомадо мейле сон кармась явомо мель творчествантень. Артсь-тейнесь эрьва кодат сувенирт. Неень шкане покш мель яви декоративной тарелкань ды кузонь налкшкень артомантень. Рамси ашо тарелкат ды лангозост мезе ансяк а арты! Неть тарелкатне ансяк мазычинь сувенирт казнекс, ярсамс эйстэст а эряви. Ды превскак а сы истямо лангсто ярсамс. Эрьва тарелканть лангсо артовкстнэ лия ёнов а молицят, кавто вейкеть а лиснить.
Анна Нестерова содасы эрзянь ды мокшонь культуранть, улить мокшонь ундоксонзояк. Секскак тарелкатнес арты эрзявинеть, мокшавинеть, раськень тешкст. Самай сынь пек вечкевить рамицятненень. Озы артомост ды арси: мезе бу од теемс, мезе икеле эзь тейне. Нама, сон невти авань оршамопелень весе элементтнэнь: пангонть, пулаенть, сюлгамонть, мокшонь мазылгавтоматнень. Сёрмали тарелкатнень лангс «Мордовия», «Эрзя», «Мокша» сёрмадовкст.
Кузонь налкшкетне суликань, мартост эряви важодемс састо, иляст колаво.
– Налкшкетнень артомс седе стака. Эряви цидярдома, покш мелень явома, авань вишка фигурканть эряви артомс эрьва ёндо. Тевс нолдан акриловой краскат, сынь парт. Чинест арась, куроксто коськить. Маштовить суликань ды керамикань артомс, – ёвтни Анна.
Тейтерьавась ушоды артомо сеске 5–7 эрзяват-мокшават. Нама, те тевентень туить зярыя чить. Важоди сон вишка мастерскойсэнзэ чокшне ланга ды веть, зярдо семиязо уды. Чить а озат, перьканзо чарыть тейтернензэ. Васенцентень кото иеть, омбоцентень – колмо. Кадат икелест мезеяк, ансяк велявтат – «шедевра» теить. Истя бажить лездамс. Вана касыть ды, паряк, сыньгак кармить тонавтнеме художественной школасо.
Мелят Анна Нестеровань важодеманзо васенцеде невтевсть Темниковань районсо «Аксельский огурец» фестивальсэ, Темников ошонь чинь кенярксчисэ. Тосо редизь сонзэ. Августсто тердизь «Тев» народной художественной промыслань ды ремеслань регионъютконь выставкас. Тей сакшность мастерт кода эсенек республикасто, истя жо лия регионтнэстэ.
Теде башка, декоративной тарелканзо невтевсть Московсо ВДНХ-со выставкасо. Те шкане сонсь тосо арасель. Тарелкатне миевсть. Шкань ютазь якасть мирдензэ марто экспозициятнень ванномо, пек тусь мелезэст.
Тарелкатнеде башка Аннань улить картинанзо. Сынь артозь карандашсо ды лия техникасо. Картинатне истя жо невтевсть «Шумбрат, Мордовия!» фестивальсэ.
Анна эзь арсеяк, эрзянь ды мокшонь артовкс марто сувениртнэ кармить истя вечкевикст ломантненень. Меельце шкасто од ломантнеяк явить мель раськень культурантень. Секскак Анна арси од образт, бажи келейгавтомс налкшкень ассортиментэнть. Мелят комсь тарелкат вешсть кедьстэнзэ Башкортостанонь эрзятне. Истямо казнесэ сынь казизь стихотворениянь пелькстамонь изницятнень. Рамсить теевксэнзэ Россиянь эрьва кодамо ёнкссо.
Те мазый, оймамонь а содыця, эряза тейтерьаванть ули эштё вейке вечкевикс тевезэ – цецянь кастомась. Сон ютась тензэ аванзо пельде. Февральстэ саезь октябряс касты тёжа цецят! Озавты петуният, виолат ды львиный зев. Петуниянь сехте вечкевикс сортозо – Тайдал Вейв Сильвер. Сон касы куракш ладсо, пек мазый. Цецятне мазылгавтыть пирензэ, вальмалксонзо. Бути кинень эряви, сон мии.
– Садпиресь монь туртов теке холст, косо эрьва чи теят мезеяк од, неят а ёвтавикс мазычи! – корты Анна.
Татьяна Маторкина