Ирина Федотовань важодевксэнзэ марто теевинь содавиксэкс панжадо интернет-источниксэ, ков авась эрьва чи путни эсензэ кедьсэ теевксэнзэ. Эряви меремс, Иринань сынь лия енов а молицят, эдь сон важоди севонь марто. Сынст лангс ванозь, ломанесь чарькоди, кодамо Мордовия Республиканть мазый пертьпельксэзэ ды кодат вадрят эрицянзо.
Ирина Николаевна чачсь Саранскойсэ. Зярдо сон эште вишкинель, семияст ошсто тусь эрямо Ромодановань районов, сынст ундоксост Покш Чуфарова велестэ. Тесэ тетязо уставась важодеме строителекс, авазо жо – стыцякс.
– Вечкан, зярдо кевкстнить, косто эйзэнь саевсь шкинемань сяткинесь. Мельспаросо мерян – ули кинь пельде саевемс, тетям вишка порасто саезь машты чувтосто керсеме, чеканямо, вечки артомо масляной краскасо. Теньс сонзэ кияк эзь тонавто, ерокчинть тензэ максызе Пазось. Ялаксомгак пек вадрясто арты. Екатерина бабам ульнесь вадрясто стыцякс-кодыцякс ды викшницякс, весе важодевксэнзэ кандынь Ромодановань райононь музеев. Вейке валсо – семиянок ашти шкинемав ломаньстэ, – корты Ирина Федотова.
Эйкакшчистэ тейтерькась весе юткошканзо алтась артомантень. Валонзо коряс, артовкстнэнь неиль онстонзо, удомсто стямодо мейле артыль конев лангс. Тейтересь мельспаросо яксиль художественной школав, косо тонавтыцятнень пельде сонензэ ютасть артомань ды декоративно-прикладной творчествань коряс ламо содамочить.
Школанть прядомадо мейле Ирина кочкизе Ицялонь райононь техникумонть, косо тонавтнесь художественно-графической отделениясо. Теде мейле тейтересь тагояк сермадстызе прянзо студенттнэнь юткс. Явсь мель М.Е. Евсевьев лемсэ университетэнтень (сестэ эште институтоль), косо тонавтнесь вишка классонь тонавтыцякс. Тонавтнеманть прядомадо мейле тейтересь велявтсь тиринь районов. Кавто иеть важодсь Пушкина велень школасо ИЗО-нь тонавтыцякс. Теке жо шкастонть роботась библиотекарекс. Мейле зярс-бути важодсь Ромодановань Культурань кудосо, косо важодсь эйкакштнень марто. Ансяк эрямосонть свал эрсить полавтомат, сынь токизь Иринаньгак. Сон семиянзо марто тусь эрямо Московов, косо авась истя жо важодсь тонавтыцякс. Ансяк кода кортави: «Моданть лангсо эрьванть ули эсензэ тарказо…», истямо таркакс Иринанень марявсь Ромодановась, ков зярыя иень ютазь авась сась мекев.
– Кода ломантне иляст корта Московсо вадря эрямодонть, тиринь районсо марян прям сехте уцяскавокс. Эдь тесэ истямо мазый пертьпельксэсь, ломантне чевте седейть, эрьва таркась кепеди ежонть теемс кодамояк вадря тев. А сепан, весе эсь важодевксэнь алтавить тиринь таркатненень, – евтни Ирина.
Истя жо авась евтнесь, зярдо сон эрясь ды важодсь покш ошсо, ламо мезенть чарькодизе эсензэ туртов, васняяк сень, кода ероков ломанентень стака эрямс истямо коткудавонь пизэсэ. Марявсь, Московсо ломантнень а эрси юткошкаст аштемс ве таркасо, весе сынь свал ков-бути капшить, чиить прянь-полдань синдезь, мик стувтсызь эсест лемест ды кить сынь истятнэ. Истямо эрямо лувось эзь тукшно мельс ероков авантень, эдь сонзэ важодемасо седе пек лездыть каштмолемась, мазый пертьпельксэсь ды малавикс ломантне – те весемесь учось эйсэнзэ Мордовиясо.
Тешкстама, Ирина Федотова – ламо эйкакшонь триця ава, сонзэ колмо эйдензэ. Меельцесь чачсь Московсо, ды самай сонзэ вакссо аштемстэ аванть чачсь покш мелезэ велявтомс тиринь енксов ды панжомс кодамояк эсензэ тев. Истя панжовськак Ромодановасо «Ирина и глина» шкинемань мастерскоесь, косо неень шкасто авась важодияк. Сон тунь а эрси чавосто, свал пешксе эйкакшонь вайгельде, эрьва чистэ тей сакшныть вишка инжеть, конатнень ули покш мелест тонавтнемс артомо ды тееме севоньстэ кудопотмонь кодаткак мазылгавтомат.
– Эйкакш марто важодемась канды монь эрямос кеняркс ды мелень кепедема. Чарькодеви, лиясто лиснить стакачить, ансяк важодемань вечкемась лезды сынст изнямс, – корты минек героинясь.
Эсензэ шкинеманзо кастомга Ирина секе-тев тонавтни содавикс артыцятнень, севоньстэ налкшкень ды мазылгавтомапелень теицятнень пельде. Ловны эрявикс литература, Интернет вельде юты курсат ды ванкшны мастер-класст. Авась тешксты, эрьва чистэ эряви кастомс эсь духовной ды профессиональной енкстнэнь. Бути жо ломанесь чинь-чоп ашти диван лангсо, эрямозо юты ваксканзо. Ирина аволь истятнэде. Чинь перть сон важоди шкинемань мастерскойсэ, чокшне ланга жо мезтькак тейни севоньстэ эли жо керамикасто.
Эряви меремс, ероков авась – республикань шкинемань фестивалень, ярмункань ды пелькстамонь свалшкань участник. Сонзэ покш мелезэ – шкинемань нупалезэнзэ савольть седе ламо эйкакшт, од ломанть ды весе сеть, кинь ули мелезэ варчамс эсь прянзо творчествасо. Эдь тонавтнемс одонтень зярдояк а позда.
Алена Артемьева
Фототне саезь
Ирина Федотовань
архивстэ.